🧬Medical Courses-IUA-B26🧬

اضافة بسيطة.. أي منصة سوشيال ميديا م مهمة وبتضيف حاجة حقيقية ليك اتخلص منها.. كمان لو فيها فايدة بس ضررها اكبر برضو اتخلص منها.. انا مثلاً كنت بستخدم واتس وبستفيد منو كتير مع الناس وكده (مرات في وِرش بتتعمل فيهو وخاشي في قروبات مفيدة وقروبات انا الآدمن بتاعها) لكن لقيت نفسي بضيع زمن كتير في الحالات + فيهو محادثات م مفيدة يعني ونسات وضياع زمن في الفاضي.. ف مسحتو قبل كم شهر وبقيت شغال بالتلجرام بصورة أساسية.. صح في حاجات فقدتها بس استفدت اكتر.. كمان ممكن تشوف بدائل للمنصات المفيدة زاتها.. زي كورا بدل الفيس مثلاً (ح اتكلم عنو في بوست تاني ان شاء الله) ٢. دي حلول تانية بتساعد وبتدربك على التركيز: ١. الـ meditation (بالعربي جلسات التأمل ولا حاجة زي كده م متأكد).. المهم دي لاقتني كتيير عن علاج الـ monkey mind ده.. الطريقة بس انك تقعد (ممكن تغمض عيونك عشان م تتشتت بالـ حولك) و م تفكر في أي حاجة، بس تركز مع أنفاسك، نفَس داخل ونَفَس طالع، نفَس داخل ونفَس طالع.. ركز فيها بس، م لاقتني مدة محددة بس أعمل على قدر ما تقدر وحاول خليها كل يوم او بصورة منتظمة يعني.. (المفترض ان الحاجة دي نلقاها في الصلاة لو خشعنا فيها عديل، لمن تخشع فيها عديل بتحس انك في عالم تاني وبتنسى أي حاجة وراك، لكن زي ما قال ربنا "ألهاكم التكاثر" ف بس ربنا يهدينا ويردنا إليه رداً جميلاً) ٢. لمن تكون بتقرا بتجيك افكار عظيمة (وإن كان بعضها فارغ) 😂 لكن يعني حاجات بتجذبك شدييد انك تفكر فيها أو تعملها فاااا خلي جمبك ورقة وقلم تسجل فيها الأفكار الـ بتجيك أثناء القراية دي، أو ممكن في النوت بتاعة الفون او اي حاجة، بحيث لمن تنتهي من القراية ترجع ليها و م تنشغل بيها أثناء القراية ٣. الـ minimalism او التقليل بالعربي.. لمن تكون قاعد في حتة وحولك أشياء كتيرة وخصوصاً لو كانت جايطة بتتشتت بيها حتى لو م قاصد (لا إرادياً).. ف حاول قلل الحاجات المحيطة بيك قدر الإمكان (أي حاجة م ضرورية اتخلص منها أو وديها محل تاني) يلا الأشياء دي ممكن تشوف انها م بتعمل حاجة لكن لمن تتخلص منها بتعرف انها كانت عاملة حاجات.. أقل حاجة بتكون مرتاح نفسياً لمن تكون قاعد في حتة م مزدحمة ومردومة وواسعة ٤. استخدم نظام الجلسات sessions أو تقنية البومودورو Pomodoro technique.. وهي يعني انك تقرا مثلاً لمدة ٢٥ دقيقة وتاخد ٥ دقائق بريك (راحة /فاصل).. تكررها ٤ مرات وتاني تاخد ٢٠ دقيقة بريك.. لو بتقدر تقرا اكتر من كده ممكن تقرا ٤٥ دقيقة مثلاً وتاخد ١٥ دقيقة بريك.. ولو م بتقدر ممكن تقرا ١٠ دقائق وتاخد ٥ دقائق بريك.. يلا في تطبيقات بتساعدك على الحكاية دي، بعد ٢٥ دقيقة بتنبهك للبريك وبعد ينتهي بتنبهك برضو.. الفكرة هنا إنك بتحدد زمن معين بتكون مُلزم بيهو ف م بتشتت (تنبيه: الحاجة دي بتنفع مع الناس الـ بتشتتوا أو م بيقدروا يركزوا لفترة طويلة وأنا زاتي بشتغل بيها، لكن لو انت بتقدر تقرا لفترة طويلة مثلاً ساعة او ساعتين او اكتر بدون ما تقطعها ف أفضل ليك م تستخدم الطريقة دي.. لأن لمن تقرا بصورة متواصلة كده ح تخش في حالة الـ flow ولمن تاخد بريك ح تطلع منها وتاني صعب ترجع ليها.. ح اتكلم عنها في بوست تاني ان شاء الله.. لكن الأغلبية م بيقدروا يعملوا كده وانا منهم ف تقنية البومودورو افضل) ٥. أو ممكن تقسم المادة الـ بتقراها دي لأجزاء صغيرة بحيث تشوفها ساهلة وكل مرة تقرا جزء بس وتقيف لحدي تتعود إنك تقرا بصورة متواصلة (الدرس الواحد زاتو ممكن تقسمو) ٦. خصص وقت من يومك للتفكير.. كتير مننا عندو مشاغل كتيرة وحاجات وراهو محتاج يفكر فيها لكن م بندي زمن للتفكير.. ف بتلقى نفسك لمن تقرا شغال تفكر فيها، لمن تصلي بتفكر فيها، وكده كل مرة بتشتتك فاا خصص زمن من يومك بس تفكر فيهو في أمورك دي وترتبها بحيث م تشغلك أثناء القراية (عارف انو الأفكار والهموم م بتنتهي لكن على الأقل تقللها بس).. أول ما تجيك في أثناء القراية مثلاً اكتبها وأرجع ليها بعدين في الزمن المخصص ليها ده عشان م تشغلك ٧. ممكن تعمل تمارين بسيطة تدربك على التركيز.. زي إنك تراقب ظل البيت وهو بيتحرك.. أو تشوف عقرب الدقائق في ساعة وهو بيتحرك.. أو ممكن تعمل أكتر من كده وتشوف عقرب الساعة وهو بيتحرك🤣 (في ساعات عقارب في الفونات).. الخ الخ المهم حاجة تخليك تركز فيها لفترة طويلة ⭕ #تنبيه.. م تتوقع ان الحلول والتمارين دي لو عملتها في يوم واحد ح تعالج ليك مشكلة التشتت دي نهاي.. لأن زي ما قلت لو بتخش فيس مثلاً ساعتين في اليوم ف إنت كل يوم بتدرب عقلك لمدة ساعتين على التشتت وعدم التركيز لفترة طويلة.. ف م تتوقع تحلها في يوم واحد خصوصاً لو كنت بتعمل كده من فترة طويلة او لو انت مدمن مواقع تواصل اجتماعي.. ممكن تشوف فرق في البداية لكن الموضوع محتاج شغل متواصل حتى ينتهي نهائياً

سلسلة القراية في فتيل #3_التشتت_وعدم_القدرة_على_التركيز #Monkey_mind لو م بتقدر تقرا البوست ده لأنو طويل فأنا ح اتكلم عن المشكلة دي زاتها، ف بس معليش حاول اقراهو بأي طريقة🤣 #سبب_المشكلة منصات التواصل الاجتماعي ويوتيوب وغيرهم، كلهم بقدموا خدماتهم دي مجان مقابل عرض الإعلانات (الاعلانات ممنوعة مننا هنا في السودان عشان كده م بتظهر ليك، بس لو خشيت بـVPN ح تجيك) فبالتالي عشان يربحوا اكتر لازم يخلوك قاعد معاهم اطول فترة ممكنة عشان تشوف فيها اكبر قدر من الاعلانات ويربحوا هم من وراها، الحاجة دي اسمها "اقتصاد جذب الانتباه" بحاولوا يعرضوا ليك اكبر قدر من المحتوى في زمن قليل جداً عشان تشوف اعلانات كتيرة، في الفيس مثلاً في خلال ثواني بتكون اتنقّلت بين عدة منشورات، منشور بتكلم عن القراية لي منشور ديني وواحد ثقافي وواحد ساخر وواحد سياسي واقتصادي وترفيهي و... الخ الخ وده كلو بيحصل في ثواني بس، نفس الشي بيحصل في حالات الواتس وباقي منصات السوشيال ميديا، في اليوتيوب بعرض ليك فيديوهات محتواها مختلف كلياً وكل واحد في مجال براهو، ولمن تفتح واحد بيعرض ليك تحتو مجموعة فيديوهات تجذبك تشاهدها، وفي آخر الفيديو ممكن تجيك اقتراحات لفيديوهات تانية، في الأفلام مافي مشهد واحد بطوّل كده ولا الفلم ح يكون ممل، المشاهد بتتغير بالثواني أو الدقائق، مرة يجيب ليك البطل مع ناسو بعد شوية يجيب ليك العدو تاني يجيب ليك الكديسة الـ ماشة على الجسر فوق النهر والكلام الفارغ داك، حتى لو المشهد طول وأخد كم دقيقة م بكون من زاوية واحدة، بجيبوهو ليك من كم زاوية ولا ح تمل و م تكمل (ده تحليل بس م يعني اني بقول انها حلال) .. يلا الحاجات دي كلها درّبتنا حرفياً على التشتت وعدم التركيز في حاجة واحدة ثابتة لمدة طويلة، وظهر مصطلح جديد اسمو Monkey Mind أو عقل القرد، يعني العقل بقى ينطط زي القرد و م بيثبت في حتة واحدة، اسي في الدين بعد ٥ ثواني في الرياضة وبعد ٧ ثواني في السياسة و... هلم جراً.. حتى مشاعرنا زاتها بقت تتقلّب بسرعة، تشوف منشور يذكرك بالآخرة ويلين قلبك، بعد شوية تشوف واحد ساخر او هزلي تضحك وتنسى الآخرة، تشوف منشور فيهو معاناة ناس تتأثر ليهم، بعد شوية تلقى قصة قتل ولا جريمة شنيعة تخليك تكره مجرة درب التبانة وما فيها و.. الخ الخ.. المهم يعني بقينا حرفياً بنتدرب على التشتت والتنطيط السريع بين مختلف المواضيع والمجالات كل يوم بل كل دقيقة، ف طبيعي تاني م تقدر تركز في حاجة واحدة لفترة طويلة او تقرا منشور طويل او تقرا قرايتك او او او... يلا #الحل ١. أفضل حل إنك تحارب مصدر المشكلة من الأساس، منصات السوشيال ميديا دي افضل انك تطلع منها نهاي (انت عارف انو كتير من الناجحين م بستخدموا سوشيال ميديا؟ بل فيهم جزء م بيستخدم هواتف ذكية أساساً.. يااخ مارك زوكربيرغ الـ عمل الفيس ده زاتو م بيستخدمو!! لأنو عارف وراهو شنو 😆) ، لو م بتقدر تمنع نفسك منها نهاي على الأقل حدد ليها زمن معين بس في اليوم تخش فيهو وخلي باقي اليوم للقراية (وخليك عارف انك لمن تخش بتدرب عقلك على التشتت وعدم التركيز، لو بتقضي فيها ساعتين من يومك ف إنت كل يوم بتتدرب على التشتت والـ monkey mind ده لمدة ساعتين.. وزي ما قلت في البوست الفات، ساعتين في اليوم بتساوي شهر في السنة!!) عشان م تخش في غير الزمن الـ حددتو ده ممكن تعمل واحد من الحلول دي.. 1. لو م بتقرا بالفون خليهو بعيد منك 2. لو بتقرا بيهو او عندك حاجة فيهو ف لو م عندك حاجة بالنت افضل م تفتحو نهاي 3. لو بتشتغل بالنت امنع اشعارات تطبيقات السوشيال ميديا دي بحيث لمن تكون فاتح النت م تجيك منها اشعارات 4. أو ممكن تنزل تطبيقات تحجب ليك النت منها لمدة معينة بتحددها انت.. زي تطبيق appBlock (بتقدر تمنع بيهو النت من ٥ تطبيقات مجان لزمن معين وتخليها تستخدمو في زمن معين في اليوم.. لو داير اكتر من ٥ تطبيقات الا تشتري الـ pro version).. أو تطبيق netGuard او internet guard ودي بتقدر تقفل بيها النت من تطبيقات غير محدودة لكن م بتقدر تحدد زمن تفتح فيهو ف إلا تفتحها براك.. 5. خلي تطبيقات السوشيال ميديا بعيدة منك، يعني م تختها في الشاشة الرئيسية، خليها تكون بعيدة شوية بحيث م تلقاها بالساهل، (أنا مثلاً خاتيها في الشاشة الرابعة وخاتيها في مجلد كاتب عليهو ضياع زمن بحيث يذكرني كلما أكون داير افتحها).. او ممكن تمسحها وتخش ليها بالمتصفح، كده بكون في جهد إضافي إنك تخش المتصفح وتكتب اسم الموقع و.. (لأن من اكبر الاسباب الـ بتخلينا نخش فيها اننا بنلقاها قدامنا طوالي وبس لو ختيت اصبعك فيها ح تفتح ف الحاجة دي بقت زي العادة كده ف لمن تخليها بعيدة منك تاني الا تكون ماشي ليها براك قاصد) ونفس الشي مع اليوتيوب (مع انو أقل قدراً في التشتت لكن برضو عندو دور)

سلسلة القراية في فتيل #2_اكتئاب_الدراسة لو نفسك بتقفل وانت بتقرا وبجيك اكتئاب وبتحس الدنيا ضيقة وزهجان فاااا تعال اوريك الحلول وقصصي معاها.. #سبب المشكلة: هي عوامل كتيرة زي الضغوطات النفسية والرتابة (الروتين الثابت وعدم التغيير).. كلها بتخليك مكتئب أثناء القراية وبتقفل معاك #الحلول الحل باختصار "غير" أحفظوها كده.. قفلت معاك؟ غير ١. غير المكان لمن كنت في تالتة وكان بكرة امتحان الفيزياء بتاع الشهادة.. كنت بقرا لحدي جات الساعة ١٠ م تقريباً تاني خلاص حسيت مخي قفل عديل.. بقيت م قادر افهم أي حاجة.. بالضبط كأنك بتقرا في لغة عارف حروفها بس وطريقة القراية لكن م عارف عنها أي حاجة تاني ولا معنى كلمة واحدة.. بقيت بقرا الكلمات مجردة كده بس م بقدر افهمها وقفلت معاي شديد.. وقفت القراية ونمت.. اليوم التاني مشيت الامتحان وانا خايف ومتوتر شدييد من الحاجة الـ حصلت لي امبارح دي و م عارف السبب شنو.. خشيت الامتحان وكنت م قادر استخدم نقطة قوتي وهي التحليل والفهم بسبب الخوف (م بركز على الحفظ بقدر الفهم، أو بعبارة تانية بحفظ بالفهم).. المهم يلا جيت البيت وكان الامتحان الـ بعدو كيمياء تقريباً.. كنت خايف شديد من الحاجة الـ حصلت معاي في الفيزياء وخفت تتكرر معاي في الكيمياء و م أقدر اقرا تاني لأني م عارف سببها شنو أساساً عشان أمنعو.. عندي صاحبي ساكن جمبنا براهو في البيت، مرات لمن يطلع بديني مفتاح البيت أحرسو ليهو.. يلا اليوم داك كان مافي ف قلت أمشي بيتو وأحاول اقرا هناك (بيتو واسع، فيهو غرفة واحدة وفي قش وزراعة في الحوش) يلا مشيت وكان الوقت العصر قريب المغرب كده.. مجرد ما قعدت (برة في الحوش) وبديت اقرا اتفاجأت بإنو الخوف والتوتر داك كلو راح ونفسيتي اتصلحت وقدرت اقرا بمزاج الحمد لله.. اتذكرت مقولة سمعتها قبل فترة، وهي لمن تمل من القراية غير مكان قرايتك، وعرفت انو من أسباب الحالة الـ حصلت معاي دي انو بجانب ضغوط الامتحانات النفسية وكده كنت دايماً بقرا في حتة واحدة.. في غرفتي، كنت بقرا فيها زمن طويل.. فلمن غيرتها لمكان مفتوح فيهو زراعة كده حالة الاكتئاب دي راحت ف قدرت اقرا وبالتالي الخوف وتوابعو راحوا والحمد لله كملت باقي الامتحانات عادي ٢. غير الزمن مرات بس بتقفل معاك في القراية لأنك ببساطة م بتقرا في الزمن المناسب.. أفضل أوقات القراية حسب ساعتك البيولوجية هي الصباح الباكر (بعد تصحى من النوم) والعصر.. في الوقتين ديل بكون دماغك في أعلى حالات نشاطو.. بعد الصباح بيبدا النشاط يقل لحدي الظهر كده بكون في أقل معدل ليهو.. تاني بعد الظهر بيزيد لحدي العصر قريب المغرب كده بكون في أعلى معدلاتو تاني.. لمن يجي المغرب بيبدا يقل تاني.. ف لو قفلت معاك اقرا في أوقات النشاط العالي دي (ده لو ساعتك البيولوجية مضبوطة صح، لكن لو خربتها ده موضوع تاني😆.. حاول رجعها لأن الموضوع ده عندو أضرار كتيرة م ح أقدر اذكرها هنا) ٣. غير المادة لو عندك كم مادة لكن بقيت تقرا مادة واحدة طوالي باستمرار ف ممكن نفسك تقفل منها و م تقدر تكمل.. الأيام الفاتت دي مثلاً كنت مركز على حاجة واحدة بقرا وبطبق فيها اليوم كلو.. قفلت معاي شديد وكرهت أي حاجة لكن كنت عارف انها السبب🤣.. لو شغالين بالكورسات وعندك مادة واحدة ف شوف الحل الجاي ٤. غير الدرس أو الموضوع لو بتقرا في مادة واحدة أو مجال معين ف ممكن تجرب انك تغير الدرس أو الموضوع لو قفلت معاك ٥. الضغوطات النفسية.. حاول أعرف سببها وحلها.. مثلاً ضغوطات وخوف زنقة الامتحان دي ممكن تحلها بإنك تقرا من بدري😆.. الحلول الأربعة الفاتت دي بتخفف الضغوطات النفسية #تنبيه عشان مافي زول يفهم غلط.. الحلول الـ ذكرتها دي بتطبقها في حال قفلت معاك وجاك اكتئاب وانت بتقرا.. يعني ممكن تقرا في مكان واحد بس (كمان في فوائد من انك تحدد مكان خاص للقراية).. وممكن تقرا في أي وقت في اليوم عادي.. وأفضل انك تقرا مواضيع المادة بالتوالي خصوصاً لو كانت معتمدة على بعضها.. لكن "لو" قفلت معاك تاني ممكن تغير المكان او الزمن او المادة.. الخ #تنبيه تاني.. #الملل ده موضوع براهو ح اتكلم عنو في بوست تاني ان شاء الله #الخلاصة قفلت معاك؟ غير " الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ ۗ أَلَا بِذِكْرِ اللَّهِ تَطْمَئِنُّ الْقُلُوبُ " ❤️ #القراية_في_فتيل #AN

صح في بداية اليوم ح تشوف الموضوع صعب شديد واليوم طويل وعندك رغبة كبيرة تفتح الفون لكن جاهد نفسك.. كلو يوم واحد بس.. ممكن كمان تحس بي دافع كبير ورغبة في القراية لكن ماف😆 يلا لمن تعمل الحاجات دي الدماغ م ح يلقى كمية الدوبامين الكبيرة الـ اتعود عليها ديك فاا ح يتواضع شوية ويفتح المستقبلات الـ كان قفلها ديك فااا تاني كمية قليلة من الدوبامين بتكفي لي انك تشعر بالحافز والدافع (يعني تاني بتتحفز للقراية وإنجاز حاجاتك المهمة بإذن الله) طيب بعد اليوم ده تعمل شنو؟ بعد اليوم ده حاول م ترجع للملهيات ديك كتير لأنها بترجعك من البداية تاني، قلل منها على قدر ما تقدر، أفضل تحدد ليها زمن معين بس في اليوم وتخلي باقي اليوم للقراية وإنجازاتك (لو بتقضي ساعتين بس من يومك في منصات السوشيال ميديا بتكون قضيت شهر كامل فيها في السنة!! شهر صافي ليل ونهار فيها.. كيف لو كنت بتقضي فيها ٤ او ٦ ساعات في اليوم؟! ألحق نفسك) أحكي ليكم #تجربتي مع صوم الدوبامين: كنت مضغوط شديد في الجامعة بالقراية الكتيرة (بقرا طب) و م لاقي طريقة لحاجة تانية غير القراية، يلا لمن الجامعة قفلت بسبب كورونا يادوب لقيت نفَس كده وقلت ارتاح شوية كم يوم بعد داك ارجع للقراية واشتغل على أهدافي الـ كانت الجامعة حارماني منها.. وفعلاً عديت الأيام الأولى نوم ويوتيوب اظن وتاني نزلت الفيس والانستا ونزلت لعبة كمان وأدمنتها🤣.. المهم طولت كده وبقيت م قادر أنجز حاجة من أهدافي وكل مرة اقول بكرة ابدا بداية جادة، لمن تجي بكرة اول حاجة بلقى نفسي فتحت اللعبة وتاني باقي اليوم بضيع بحاجات تافهة وكل يوم كده تقريباً (كنت بعمل حاجات مهمة لكن م كتير كده).. لحدي يوم قررت أصوم عن الدوبامين وأأدب عقلي قليل الأدب المدلع ده😆.. اليوم الـ قبلو نمت بدري عشان أصحى الصبح نشيط، بعد الصبح قريت شوية قرآن وعملت رياضة شوية كده عشان اكون نشيط وعقلي يكون متفتح كده (الرياضة ٨ دقائق بس بتطبيق لكن كافية جداً).. شغلت وضع الطيران في الفون من الصباح عشان م اقدر افتح النت ولا اخلي فرصة يجيني اتصال او رسالة، قعدت في غرفتي في الكرسي وبس بقيت افكر وأخطط وبس، في البداية شفت الموضوع صعب واليوم ح يكون طويل، جاتني رغبة افتح اللعبة ديك لكن ماف😆.. بعد شوية جاتني رغبة قوية شديد اني اقرا وأنجز لكن وييين ياا🤣.. قعدت أحلل بس في أيامي الفاتت، أستفيد من أخطائي ومن الأيام الـ كنت منجز كويس فيها، أخطط للأيام الجاية ولأهدافي وكيف أصل ليها، عديت اليوم كلو كده تقريباً.. في النهاية طلعت بالفوائد دي: • حددت زمن معين للسوشيال ميديا وأي حاجة تانية (فترة بين الظهر والعصر) باقي اليوم مفترض أقرا واشتغل على اهدافي • قدرت اتحكم في اللعبة وبعد كم يوم مسحتها نهاي الحمد لله • بقت عندي خطة كاملة وظابطة لتحقيق أهدافي م أظن اني كنت ح اقدر أعمل رُبعها بس لو استمريت بنفس الأسلوب داك والحمد لله بعدو خشيت في كم كورس أونلاين وخلصتهم وأخدت شهادات، طورت مهاراتي، قريت دروس كتيرة واستفدت كتير والحمد لله (برغم اني م التزمت بشكل كامل) لكن التحفيز والرغبة رجعوا لي تاني الحمد لله🌸. في النقطة السادسة ان شاء الله ح اتكلم عن حاجة ح تكون إضافة جميلة للموضوع ده.. حاجة محفزة كتيير وبتخلي ليك القراية أو أي حاجة تانية ممتعة شديد ومسلية كأنها لعبة.. بإذن الله🌸 حاولت بقدر الإمكان أشرح بلغة بسيطة وساهلة و م استخدمت مصطلحات.. لو في حاجة م واضحة أو عندك سؤال اكتب لي في التعليقات وبرد عليه ان شاء الله جربوا صوم الدوبامين وأكتبوا لينا في التعليقات عن تجربتكم وخلونا نستفيد من بعض✨ "احرص على ما ينفعك، واستعن بالله ولا تعجز" أو كما قال ﷺ #القراية_في_فتيل #AN #تعديل يا جماعة الهدف من صيام الدوبامين م انك تعمل جدول وتخطط وكده.. دي بس حاجة ممكن تعملها في اليوم داك.. لكن الهدف انك ترجع تتحفز تاني للقراية والحاجات المهمة لو بقيت م بتتحفز ليها بسبب الملهيات الكتيرة

سلسة القراية في فتيل #1 #فقدان_الحافز_والشعور_بالمتعة #صوم_الدوبامين كتير مننا كان زمان بيقرا او بيعمل الحاجات المهمة عادي جدا وبكون متحفز داخلياً كده وأسي فقد الحافز والمتعة وبقى يشوفها مملة شديد و م بيقدر يعملها الا بي صعوبة او يكون مجبور شديد عليها عشان الامتحان قرب او الـdeadline قرب او whatever وبعملها ونفسو مقفولة.. الكلام ده حصل لأن دماغك اتدلّع😂 تعال اوريك اتدلع كيف #تمهيد الدوبامين ده هرمون بيُفرزو دماغك عشان يحفزك ويدفعك لي إنك تعمل حاجة متوقع منها مكافأة أو متعة.. زي انك تخش اليوتيوب او منصات السوشيال ميديا او تلعب او تاكل حلاوة او تنجز الـ وراك زي انك تقرا مثلا.. كل حاجة بتكون متوقع منها متعة او مكافأة بتخلي دماغك يفرز الهرمون ده ف بحفزك تعملها.. وكميتو بتعتمد على كمية ودرجة المتعة الناتجة من الفعل الـ ح تعملو ده.. يعني كلما كان الفعل الـ بتعملو بيديك متعة اكتر، كلما الدماغ بيفرز دوبامين اكتر عشان يحفزك تعملو والعكس صحيح.. مثلاً كمية الدوبامين الـ بتُفرز عشان تحفزك انك تشرب موية لمن تكون عطشان أقل من الكمية الـ بتُفرز لمن تكون داير تاكل حلاوة مثلاً.. الدماغ فيهو خاصية انو يحافظ على الوضع الطبيعي (يعني م يخلي حاجة تكون زايدة او حاجة ناقصة من القيمة الطبيعية الـ بتكون محددة مسبقاً، مرات بيغير القيمة الطبيعية دي زاتها ويعتبر القيمة الجديدة هي الوضع الطبيعي) يلا لمن تتعود على انك تعمل حاجات ممتعة كتير و بتخلي الدماغ يُفرز دوبامين كتير باستمرار زي انك تخش فيس طوالي مثلاً وتقعد فيهو كتير (الفيس فيهو قدر كبير جداً من المحفزات) يلا دماغك ح يتعود على كمية الدوبامين الكبيرة دي وتبقى هي الطبيعية (بيقفل جزء من مستقبلات الدوبامين فاا كمية الدوبامين الكبيرة دي بتبقى هي الطبيعية لأنها م بتخش كلها في المستقبلات) عشان كده تاني لمن تعمل حاجة تحفيزها قليل زي القراية او انجاز الحاجات المهمة م بتحفزك لأن الدوبامين الـ بتُفرزو بقى أقل من الطبيعي (دلّعت دماغك بالدوبامين الكتير ف رفع قزاز على دوبامين القراية والانجازات وقلّ أدبو😂).. أديكم مثال، الزول الـ بيتعاطى مخدرات (او خلينا نقول صعود مثلاً) في البداية بكون مستمتع شديد (صح الشعور بالسعادة زاتها مرتبط بهرمونات تانية زي السيروتونين لكن الدوبامين برضو داخل في القصة لأنو بحفز للفعل أصلاً) بعد فترة بيتعود عليهو وتاني بيبقى م بحس بالمتعة الأولى ديك لأن الدماغ بكون قفل جزء من المستقبلات وخلى الوضع ده هو الطبيعي، تاني عشان يحس بنفس السعادة ديك إلا يزيد كمية الصعود.. ممكن متعاطي المخدرات في مراحل متأخرة من الإدمان المبالغ فيهو يبقى م بيهتم بأيي حاجة غير المخدرات بس لأن كل حاجة تانية بشوفها مملة وم محفزة لأن دماغو اتعود على كمية كبيرة جداً من هرمون الدوبامين واللي م بيلقاها إلا في المخدرات.. نفس الشي لمن تتعود على الملهيات (سوشيال ميديا، ألعاب، أفلام، مسلسلات(بغض النظر عن حرمتها)، أي نوع إدمان.. الخ) بتشوف القراية مملة شدييد وصعبة ولو عملتها بتكون نفسك قافلة منها وعايز تعمل الحاجات الممتعة ديك لأنها بتديك الدوبامين الطبيعي للشعور بالحافز (هو م طبيعي لكن لأنك اتعودت عليهو بقى كده) يلا عرفنا المشكلة نشوف #الحل كيف تأدّب دماغك المدلّع قليل الأدب ده وتخليهو يحفزك للقراية؟😂 الحل انك تمنع منو الدوبامين نهاي عشان يتأدب ويفتح المستقبلات الـ قفلها زمان ديك😂.. عن طريق صيام الدوبامين✨ يلا هو ح يكون يوم واحد بس م تخاف، بعدو ان شاء الله أمورك بتظبط لو التزمت عديل.. اليوم ده تمنع فيهو نفسك من أي حاجة فيها متعة او مكافأة ولو قدر قليل جداً.. تقفل النت ومنصات السوشيال ميديا، م تخش فيس ولا يوتيوب ولا تشاهد تلفزيون ولا تلعب فيديو قيمز، شغّل وضع طيران او م تخلي الفون جمبك لو م بتقدر تمنع نفسك منو، م تاكل او تشرب حاجة فيها سكر او حاجة لذيذة عموماً، لو بتقدر م تاكل زاتو اليوم داك بس تشرب موية يكون أفضل، م تمشي زيارات.. حتى م تقرا زاتو.. أيوه م تقرا ولا تعمل الحاجات الـ وراك.. في ناس بقولوا بس تعمل الحاجات المهمة لكن الأفضل انك م تعمل حاجة لأن "الحاجات المهمة" دي ممكن تبداها بعد شوية تلقى نفسك بتقرا في منشورات الفيس🤣.. غير كده هي بتديك دوبامين ونحن م عايزين دوبامين نهاي.. طيب تعمل شنو؟ تقعد في غرفة او مكان براك و م يكون معاك زول، وتفكر بس.. تفكر في أيامك الفاتت قضيتها كيف؟ استفدت شنو وأنجزت فيها شنو؟ كنت بتعمل شنو بدل القراية؟ تفكر في مستقبلك (في الدنيا لو كان فيها حياة وفي الآخرة)، تأثير القراية على مستقبلك وعلاقاتك.. أهدافك.. بالطريقة دي المفترض انك تعرف تقصيرك وين وأخطاءك في الأيام الفاتت وتحاول م تخليها تتكرر في الأيام الجاية لو كان فيها حياة..تخطط لي مستقبلك والأيام الجاية.. تضع خطة للقراية محددة بزمن وخطة لإنجار أهدافك ومشاريعك..

السلام عليكم ورحمة الله وبركاته 🤍 «طُوال مسيرتي في كلية الطب ، لم أعلم شيئا كان يُسعدني ويدخل السرور علي قلبي أجمل من مساعدة زميل في فهم جزئيةٍ في المنهج قد استشكلت عليه ، أو دلالته علي تلخيص معيّن موجَز يختصر عليه شرحا مُطوّلا أو إعطائه تسجيلا لمحاضرة فاتته ، أو إعارته بعض التلخيصات ليصوّرها ويستفيد بها ، أو تنبيهه لبعض التوصيات المهمة التي ذكرها الدكتور في محاضرته وقد غاب هو فيها وأخبر أنها قد تأتي في الامتحان ، ذَهبَت السنون وانقضت الأيام وافترقنا جميعا ولم يبقَ في ذكرانا إلا الوُدّ والحب وهذا الخير الذي كنا نفعله مع بعضنا ابتغاء مرضاة الله وتطبيقا لحديث رسوله صلي الله عليه وسلم الذي قال فيه : « من استطاع أن ينفع أخاه فليفعل» ناهيك أن شرحك لزميلك يُثبّت المعلومة ويقوّي محفوظك وهذه طريقة متبعةٌ ونافعةٌ في التعلّم ؛ فطوبَي لمن ترَك أثرًا وزرعَ خيرا ». أحمد عبد الغني

حاجة واحدة كسبتها خلال مرحلتي السابقة في كلية طب.. (الثبات) أيّ طالب طب مهما قرأ وأنجز من بداية السمستر لابد من (تكتم فيهو) لما تقرّب الإمتحانات، على قدر إنو ماف حاجة حاتنفعك في الفترة دي غير تكثيف قرايتك علي قدر لو ما عندك صفة الثبات ما حاتقدر تجازفها مهما أكلت في المراجع أكل ااي فكرة الخوف من الإمتحان فطرة لابد منها، بس في فرق بين الخوف الـ بصب في مصلحتي كدافع يخليني اقرأ وبين الخوف الـ بزيد التوتر وحتى اللي كان في رأسي يطير الحاجه دي صعب إكتسابها، وكتير فاشلين في الحاجة دي، من نوع اللي بتلقاهم في البورد مأخدين درجات أقل من الإنت شايفهم بستحقوها، وإنتو حاتكونوا ملاحظين الحاجة دي، عادي في طالب مشهور بإنو حفّار وما بسيب المرجع من يدو من بداية السمستر وتجي تلقى تحصيلو عادي جدًّا أو أقل من العادي، في حين في واحد تاني مستوى قرايتو بسيط بس تحصيلو بكون علي ذات المستوى والفهم هنا ما مرتكز علي نسبة الذكاء والإستيعاب بس، كتير بكون السبب إنو في طالب متعلم يثبت فترة قرب الإمتحانات وطالب بجزع والورقة قدامو لدرجة المعلومات بحسها كلها جايطة إتعلم تكتسب صفة الصبر والثبات زي ما بتتعلم تقرأ من بداية أو نص أو أخر السمستر، كيف؟ بإنو وأول خطوة ما تنسى تدعي كل يوم في سجودك إنو ربنا يوفقك، ثانيًا مما بديت تحس تتوتر أمشي مكان تفضي فيهو شحناتك السالبة أو أفتح أيّ فيديو تحفيزي، أقعد مع نفسك وأجلدها ذاتيًا وأقنعها إنو خلاص الوضع أنذر ولازم نقوى ونبدأ نجازفها، خلي جمبك أيّ حاجة بتذكر بأهلك، صورة، كباية، أعملهم خلفية لتلفونك، أو مكالمة، المهم يكونوا قدامك وعشان ما نكون مضيقين الحيز، غير أهلك ممكن تكون حاجة تانية من الدوافع اللي خلتك تدخل كلية طبية أو إنت لسه مكمل عشانها عادي ممكن تشوفوا كلامي دا عبط أو عادي أو ما حايكون عندو فائدة بس أنا دايمًا في may be help بكتب ليكم بقلم تجربة، وحاجة أنا دربت نفسي عليها حدي ما أثبتت نجاحها وصحت فرضيتها إتعلموا تثبتوا، ما مهم تبدأ قراية من بداية السمستر أو نهايتو، المهم إنك تكون واثق من درجة إستيعابك وفاهم مدى قدراتك و واقع ليك إنت بتعمل في شنو وممشي حياتك كيف، بس قبل دا إتاكد إنك ممتلك لصفة الثبات وإنك تجمد علي قدر مجازفتك من النقطة الإنت حاتبدأ منها، ربنا يوفقكم وإن شاء الله الأقيكم قريب💛🌻 رؤى_صلاح

أعاني من فقدان تام للشغف في الدراسة الآن، يجب عليّ الدراسة وأنا أعي بذلك وامتحاناتي قريبة ومصيرية، ما الحل؟ ج / آسف على صراحتي ولكن الجواب هو إدرس أو ارسب،، الأمر بيديك وأنت صاحب الخيار ،،، تخيل ورقة الامتحان أمامك وأنت تنتقل بين الأسئلة دون معرفة أي جواب لأي منها فتضطر لاختراع أجوبة مهبودة لم نسمع بها في كتاب لتحاول ملئ فراغ الأجوبة وزملاءك من حولك يرصّون الإجابات الصحيحة رصّا ،، هل بدأت تتخيل الآن؟؟ لحظة،، ماذا عن لحظة استلام نتائج الامتحانات،، هل ترى أصدقائك يشعرون بمتعة الإنجاز وأنت تشعر أنك شخص فاشل لا فائدة منه وينظر إليك باحتقار وشفقه ،،، الأمر بدأ يزداد صعوبة حسنا،، ما رأيك أن جميع أصدقائك ينجحون بحياتهم ويجدون وظائف وأماكن مناسبة للعمل بسهولة وأنت لا،، ببساطة لأنه في كل مقابلة يتم سؤالك عن علاماتك وتخبرهم بنتائج متدنية فيختارون بالتأكيد من نتائجهم أفضل،،، حتي عندنا في الطب اختيارك لكثير من التخصصات يعتمد علي درجاتك التراكمية بعد التخرج وحتي العمل في كثير من المستشفيات الخاصة يعتمد علي تقديرك العام ، الأمر خطير ويحتاج منك لإعادة نظر وإصلاح للخلل ،،، هيا فلتقم وتدرس فالوقت يتداركك،،، عزيزي الشغف كلمة غير مناسبة ولا أصل ولا صحة لها فإن وجد فأهلا به وإلا فلابد من أداء العمل بأكمل وجه وبقدر المستطاع ،،، الحياة ليست قائمة على ما تحب وعلى الشغف و على هذه العناوين البراقة،،، كثير من الأحيان الإنسان يقوم بأشياء لا يحبها ببساطة لأنه ينبغي عليه ذلك لكن النتائج المترتبة على عدم القيام بالعمل تجبره على ذلك وتذكر دائما حديث النبي صلي الله عليه وسلم والقاعدة التي وضعها:"حُفّت الجنة بالمكاره، وحفت النار بالشهوات" فاصبر علي المكاره وقاوم الشهوات تفلح ،، أتمنى لك النجاح بأعلى العلامات ومتأكدة أنك تستطيع ذلك إن شاء الله إذا أخذت بوصية النبي صلي الله عليه وسلم: " احرص على ما ينفعك واستعن بالله ولا تعجز وإن أصابك شيء فلا تقل: لو أني فعلت كان كذا وكذا، ولكن قل: قدر الله وما شاء فعل، فإن لو تفتح عمل الشيطان" أ.م #الطب_سؤال_وجواب

How To Make a Simple Frequency Table

Statistic vs Parameter & Population vs Sample

Mean, Median, Mode, and Range - How To Find It!

Continuous_vs_Discrete_Data_cz4nPSA9rlc_160.mp4

Vaccines #Osmosis

#SensitivityAndSpecificity

#Correlations