🧬Medical Courses-IUA-B26🧬

ريكوردات د. السنوسي له الرحمة والمغفرة 👆

اللي لونهم برتقالي ما تفتحوهن. ممكن تفتحوهم لزيادة معلوماتكم لكن ما بجوا في الامتحان

فالطرق السليمة للدراسة هي .. اولاً : self explanation بتعتمد على انك تشرح الكلام لنفسك ..بعد تقرى الدرس كله و تقفله .. تقوم تشرحه لنفسك بانك تسأل نفسك و تجاوب فهي طريقة استرجاع active .. ما passive زي طريقة re-reading ح تحتاج تعمل شنو بالتحديد ؟ 1. تشرح بصوت مرتفع 2. تشرحها بعبارات كاملة 3. تشرح من غير ما تستعين بأي بمصدر . مثلا انت قريت .. myocardial evacuation.. الذبحة الصدرية و داير تشرح لنفسك .. معروف ان الزول العنده ذبحة في الجزء التحت من القلب بتجي بأعراض جهاز هضمي و طمام و الم حرقان .. فلو جاك زول كبير في العمر و عنده مشاكل قلب قبل كدا و جاك بالاعراض حقت الحرقان .. انت ما تفكر في انها مشكلة جهاز هضمي بس دي مشكلة ممكن يكون عندها علاقة بالذبحة .. و دائما بيجوا بليل بعد وجبة دسمة .. فاغلب دكاترة الطوارئ بليل بقول ليه دا حرقان فبديه دواء الحرقان وبمشي فبجي الصباح ميت لان دي اعراض ذبحة و هو ما عارف ان في تشابه في اعرضهم الاتنين فانت بتجي تسأل نفسك لو جاك زول في الطوارئ بالاعراض دي ح اعمل ليه تخطيط للقلب .. لي ؟ ودي اصلا ما اعراض حقت قلب بل اعراض حقت جهاز هضمي .. طوالي بجاوب لانه اعراض الجهاز الهضمي هي ممكن تكون نفس اعراض الذبحة التحت القلب .. تقول انا قاعد في الطوارئ بليل جاني عمك كبير عمره ستين سنة .. عنده حرقان و طُمام .. وقال انه اكل ليه وجبة دسمة قبل كم ساعة .. وهو عنده مشكلة بتاعة arti .. فانا ح اقول اعمل فحص لمخطط القلب ECG ليه لانها ممكن تكون ذبحة و لو ما عملته و اجاهلته الزول دا ح يموت .. فكدا بتكون قريت الدرس كله و تشرحه لنفسك في طريقة أسألة بتسأل نفسك و تجاوب براك .. أنت لما تشرح مفهوم معين مع إدراك سبب الانتقال من خطوة لخطوة ، بيدل على إنك فهمت وتذكرت ، لان المعلومات بتكون مبعثرة ومشوشة في ذهنك فانت كدا بتجمع كل ما قرأته وإخراجه في سياق واضح ومفهوم ومرتب ، بدون الاستعانة بأي مصدر خارجي ثانياً : النيمونكس mnemonics ﻭﻫﻲ ﺍﻧﻚ ﺗﺮﺑﻂ ﻣﻌﻠﻮﻣﺔ ﺻﻌﺒﺔ ﻋﺎﻳﺰ ﺗﺤﻔﻈﻬﺎ ﺑﺤﺎﺟﺔ ﺳﻬﻞ ﺍﻧﻚ ﺗﻔﺘﻜﺮﻫﺎ ﺍﻭ ﺍﺳﻢ ﻣﺸﻬﻮﺭ.. فهي بتعملها لنفسك عشان تقدر تحفظ .. الحاجة دي موجودة في التجويد و الرياضيات.. وفي الطب برضه فيه .. بتكون حاجات ما بفهمها زول غيرك .. لكن بتكون مفيدة لك .. مثلا لو عندك سبع فوائد حقت حاجة و داير تذكرهم فبتاخد من كل جملة حرف و تختهم في كلمة واحدة تحفظ بها فكل حرف في بداية الكلمة تذكرة بالمعلومة زي (كل جميلة ظريفة جاتها هدية) في اشارات ± للنسب المثلثية، في ناس بيقولها بطريقة تانيه برضه، ( كل جبار ظالم جاته داهية ) او إنك بتختار من كل فكرة عايز تحفظها كلمة بارزة ( الكلمات الأساسية ) و تجمعها مع بعض في جملة ليها معنى لكن انت عشان تقرى بالطريقة دي لازم تكون زول بتعرف تستخدمها .. لأنك لو عملت نيمونكس صعب ح تنساه و تنسى المعلومة الداير تحفظها .. ففي نيمونكس بتكون جاهزة في المراجع ( غالبا) زي first aid .. وممكن تعود نفسك لحد ما تقدر تعملها براك ثالثاً : الخرائط الذهنية .. في مرجع كامل ( ما مذكر اسمه ) بس عبارة عن خرائط ذهنية لكل حاجات الطب .. وهي انك تعمل الدرس اختصار على شكل نقاط بيناتهم أسهم.. و الطريقة دي كويسة شدييد لكن ما تم إثبات انها فعالة لاي درجة لكن الدليل على انها كويسة ان في مراجع كبير زي Oxford حق الباطنية فيه خرائط ذهنية .. فهو بجيب لك زول بأعراض معينة ويقول لك تعمل له حاجات معينة لو حصل تحسن بوجه سهم للخطوة التانية ولو ما حصل تحسن بوجه لك سهم بجه اخرى للخطوة التالية آخر حاجة نتكلم عنها و هي فعالة جدا لتسهيل الحفظ .. ترك الذنوب .. العلم دا رزقك فاكيد الرزق دا بزيد بطاعة الرازق و بختفي او بنقص بمعصية الرازق .. كلنا سمعنا الأبيات شكوت الى وكيع سوء حفظي فارشدني الى ترك المعاصي .. الأبيات دي للشافعي كان شكى لشيخه سوء حفظه و بعد ارشده و عمل بالوصية دي بقى بحفظ الصفحة من النظرة بس المفروض تخفف من ذنوبك ما للقراية بس .. لانه ما معروف متين تموت #منهجية_دراسة_الطب 🩺

《 النقطة الثالثة : طرق الحفظ 》 الطريقة المنتشرة بين الطلاب هي Re-reading الطريقة دي قديمة جدا .. وأغلب طلاب الطب بستخدموا الطريقة دي و هي انك تقرا الدرس الليلة مطالعة و تعيد في المعلومات عشان تحفظها و تاني بكرة تجي تقراه بنفس الطريقة .. فالطريقة دي ما فعالة شديييد و مضيعة للزمن لانك بتقرى الكلام تاني و ثالث وبعد تقرأها أكثر من مرة عقلك بيتعود على المعلومات ، ولما يشوفها تاني بيعرف إنها عدت عليه قبل كدة ، فأنت طبعا تتغش بده وتفكر نفسك خلاص بقيت تمام في المادة . لكن الدور اللي بيقوم بيه عقلك هنا دور سلبي جدا هو فقط عرف المعلومات لما شافها لكن لسى هي مشتتة في عقلك و محتاجة منك تربطها ببعضها .. فالطلاب البقروا بالطريقة دي بعد سنة بنسوا ٣٠% من المعلومات و بعد سنتين بنسوا ٥٠% .. و بكون في ثالث و نسى نص المعلومات القراها في أولى و هي طبعا الاساس وغالبا اي زول بقرا كدا بستخدم ال Highlighters و هي برضو طريقة سيئة .. مشكلتها انك بتحدد المعلومات كلها او حتى لو حددت معلومات معينة لما تجي تقرأ الدرس تاني ح تحتاج تقرا الصفحة كلها لان المعلومة الحددتها دي ممكن ما تفهمها الا ترجع للشرح القبلها .. و كدا انت ما عملت حاجة غير انك لونت الصفحة بس .. و أغلب الطلبة البستخدموا ال Highlighters عندهم وهم بأنو أي شئ عليه تلوين هو متمكن منه ودا بخليك لما تجي تراجع مثلاً للإمتحان بتراجع بصورة دماغك بحسسك فيها إنو أي شئ ملون Done بالنسبة ليو فالمراجعه بتبقي Passive وماف أي Neural Connections جديدة ممكن تتكون أو قديمة تبقى أقوى وقد نكون مبرمجين على حكاية الثانوي و الاساس وهو اني افتح الكتاب و اقراها من البداية.. لازم اقرا كل سطر و لازم احفظ كل معلومة .. المشكلة انه لما تقرى الدرس في معلومات بتكون اساسية ومضمونه بتجيك في الامتحان .. او الدكتور زاته بقول لك انا ح اجيب لكم الحاجة دي .. فانت لازم تعطيها الاولوية .. لكن الحاجة دي مسيطرة عليك فانت عشان تتحنبها خلي الحاجات الما مهمة للنهاية و قول لنفسك انك ح ترجع لها .. فالقرية الاولى خليها للحاجات المهمة.. #منهجية_دراسة_الطب 🩺

《 النقطة الثانية : تحديد الهدف 》 عشان ما تكون مشتت في قرايتك وتحفظ بتركيز شديد .. حدد المادة الداير تبدا بيها و عدد الصفحات الداير تقراها يعني من الصفحة ( س ) الى الصفحة ( ص ) و الوقت الداير تقراها فيه .. عشان تحس انه لو الزمن حقها دا ضاع منك ح تضطر تضغط نفسك في حاجة تانية فيديك دافع انك لازم تنتهي منه .. فحدد انك من الساعة كدا للساعة كدا دايرة تنتهي من الصفحات دي وكون واقعي يعني ما ممكن تحدد ٥٠ صفحة في ساعة في اليوم .. لازم تكون حاجة حقيقة و منطقية ويفضل تستخدم طريقة بومودورو لانها بتساعدك في التركيز .. لما تقعد تقرا لفترات طويلة بتوصل لمرحلة تقرى فيها الجملة اكثر من مرة عشان تفهمها .. فطريقة بومودورو بتقسم لك جلسة القراية دي لجلسات صغيرة .. مثلا لو داير تقرأ لمدة ساعتين بتقسمها لك اربع جلسات .. الجلسة بتستمر ٢٥ دقيقة و بعدها استراحة ل٥ دقائق .. بعد تكمل ساعة ( جلستين ) بتاخد استراحة لمدة ١٠ دقائق .. ما الا ٢٥ دقيقة ممكن ٣٠ او ٤٠ بس المهم انك تعمل فواصل في جلسة المذاكرة .. اما ال ٥ دقائق لازم تكون في حاجة بسيطة عشان ما تسرق زمنك و تلقى نفسك ضعت و ما قريت الا ٢٥ دقيقة ديك .. وانصح انك تشرب فيها ماء و تاخد سكينة من التفكير عشان عقلك يرتاح و إياك تمسك التلفون لان كدا عقلك ما ح يرتاح وغير انه ح يجرك على حاجات تانية بعدها قسم الصفحات الى مجموعات كل مجموعة تقراه في جلسة ... في ناس ما بحبوا يقطعوا قرايتهم و عادي بقروا ثلاث ساعات متواصل لكن برضو بنصحهم يجربوا الطريقة دي .. ممكن تجرب اول مرة و ما تنجح فيها و تعيد و تكرر ودا طبيعي عشان تعود نفسك .. لكن مع الزمن ح تتعودوا .. #منهجية_دراسة_الطب 🩺

《 النقطة الاولى: الحفظ في الذاكرة قصيرة المدى 》 انت لمن تبدا تحفظ في بلايين الروابط العصبية ح تتكون في عقلك .. الحيحفظ المعلومات في المرحلة الاولى - مرحلة الحفظ _ في الذاكرة القصيرة المدى لانه بتعامل مع المعلومات البتدخل له بانها جديدة مؤقتة .. و الذاكرة دي بتخزن معلومات بسيطة لصغر مساحتها فعشان كدا بتمسح بشكل دوري يعني كل ما تحفظ كمية من المعلومات ح تمسح الحفظ القديم فانت عشان تثبت حفظك و تضمن انك م ح تنساه لازم تقوي الرابطة العصبية اللي كونتها اول مرة .. و تنقل الحفظ من الذاكرة قصيرة المدى للذاكرة طويلة المدى .. واتاكد انك م ممكن تنقل المعلومات في الذاكرة طويلة المدى بالقوة لازم تتبع مرحلة مرحلة في المرحلة الاولى .. المعلومة لمن تدخل ذهنك لاول مرة لازم تذاكرها خلال اربعة وعشرين ساعة ما تخليها تتم خمسة وعشرين ساعة .. لازم تكون مريت عليها .. ما شرط يكون مرور بشكل عميق شديد ولو كان حاجة بسيطة خلال اربعة وعشرين ساعة لازم تمر عليها. فمثلا ح تكرر المعلومات في اليوم على اربعة مرات ■ اول تكرار بعد المذاكرة او تلخيص .. ■ تاني تكرار بعد ساعة من المرة الاولى ■ تالت تكرار بعد 6 او 8 ساعات من المرة الاولى ■ التكرار الأخير بعد 24 ساعه من المرة الأولى في مرحلة الحفظ انت كدا يداب بتكون بتثبت المعلومات في الذاكرة قصيرة المدى ( ممكن تنساها ان وقفت على كدا ).. اما انك تنقلها للذاكرة طويلة المدى دا في مرحلة المراجعة وبإذن الله نتكلم عنه #منهجية_دراسة_الطب 🩺

《 المرحلة الثانية : مرحلة الحفظ 》 بعد خلاص فهمت الدرس ١٠٠% و قدرت تعمل ملخص ليه .. بتبدا مرحلة الحفظ .. وانك كيف تحفظ المعلومات دي و تثبتها .. وما تنساها ابدا .. وعشان كدا خليك حريص على انك تفهم الدرس تماما .. و إياك تحفظ من دون فهم .. لانك بعد ما المادة تكبر و تعمق ح تلقى نفسك مسحت المعلومات الحفظتها بدون تفهمها .. و ح تحتاج وقت اضافي و جهد كبير عشان تراجع القديم و تقرا الجديد .. صاح الفهم مهم بس الحفظ تكملة لفهمك.. ماف مذاكرة من دون حفظ .. فانك برضو تعتمد على فهمك من دون الحفظ بضرك .. المواد الطبية بتشمل الفهم و الحفظ .. بكون فيها معلومات كثيرة جديدة عليك بعد تفهمها و تستوعبها بتحتاج انك تحفظها عشان ح ينبني عليها معلومات تانية فالفهم براه من غير حفظ بخليك فيلسوف يدو قصيره و الحفظ براه بخليك مثل الحمار يحمل أسفارا .. مافي غنى لواحد عن التاني .. فأحسن من البداية نقرأ بإخلاص و نبقى قدر المسؤولية ‏ #منهجية_دراسة_الطب 🩺

  《 النقطة الثالثة : طريقة التلخيص الصحيح 》 يلا التلخيص فيه الكويس البيوفر زمنك، وفيه النوع اللي يضيع زمنك بتلقى زول لما يلخص بنسخ معظم المعلومات سواء كاتبها من (الشيت + المرجع + المحاضرة) ويكتبها في دفتره، يلا ده التلخيص البيضيع الزمن صاح هو الكتابة بتساعد في الحفظ، لكن برضو انت خسرت زمن. عشان تعمل ملخص بطريقة صاح حاول لما تلخص ما تكتب الكلام في شكل انشائي ..  استعمل اختصارات معينة .. استخدم مفاتيح عشان ما تكتب كل حاجة ..   المعلومات اللي اتكررت حاول ما تكررها تاني كتير اثناء الملخص يعني المعلومة دي بتكون تلقائي اتحفظت  ركز لمن تلخص حاول دايما تركز على التعاريف اعمل لها سحاب اعمل لها لون .. المعلومات المهمة اكتبها في نقاط واعمل نجمات  .. و المعلومات المتشابهة في شكل جداول،  أو ترسم المعلومات رسم، التعاريف اعمل لها سحاب و جمع فيها الـ Mnemonics (الاختصارات). أو تلخص الأمراض الصعبة في شكل case. # في حاجات قد تكون اساسية في مادة معينة وما اساسية في مادة تانيه ! # المادة البسيطة التلخيص فيها يضر .. والمادة الكثيرة التلخيص فيها مفيد جداً # الملخص ربط بين المعلومات الاساسية و التفاصيل المهمة ! مااااااا كل الاشياء اساسية ... وما كل التفاااصيل مهمة ! = طيب الان انا عندي الاصل المعتمد جاهز ولخصته طيب وبعده ؟ -   اول حاجة ملخصك اللي انت عملته ده .. عندك معاه تلاتة محطات .. الحفظ والمذاكرة والسؤال .. خليك عارف اي واحد .. يعني من التلات حاجات دي .. #منهجية_دراسة_الطب 🩺

《 النقطة الثانية : التسرع قبل الفهم  》 من الأخطاء البيقع فيها الطالب المجتهد في اثناء مذاكرته هو التسرع في تلخيص المعلومات من المصادر الأساسية قبل ما يعطي نفسه الوقت الكافي لأنه يفهم و يحلل الدرس و يفهم المكتوب تماماً و يتأكد من استيعابه التام للدرس ..  فيعمل مخططات أو يكتب أسئلة أو خريطة ذهنية او يبحث في قوقل او يلخص المادة في كراسة خارجية و غيرها من الإضافات فكدا ببساطة بكون شتت نفسه اكثر  .. وبقى بعيد تماماً عن المقصد الأساسي واللي هو تثبيت المعلومة في ذهنك .. ففي القفزة دي من المرجع أو الشيت او الداتا لدماغك "دون استيعاب كافي" ثم لورقه تانيه ثم لدماغك مرة تانيه .. الواحد يهدر مجهود جبار في التخطيط و التلوين و الرسم التوضيحي لمعلومات دماغو لسة ما عمل ليها processing بالصورة الكافية و ده المطلوب فعلاً و قد يكون في معلومات ما محتاجه اصلا و الحاجة الصاح انك تعتبر نفسك في معركة مع المصدر  القدامك و في الجزئية محدده دون إتخاذ اي وسيلة تانيه غير التركيز الذهني و النظر (+ ممكن highlighter) وال highlighter ما لي كل الناس لأنه في ناس بيعمل ليها وهم والشئ دا مثبت بأبحاث علمية بعنوان Illusions of competence in learning [ ببساطة كدا لقوا أغلب الطلبة البستخدموا ال Highlighters عندهم وهم بأنو أي شئ عليو تلوين هو متمكن منه ودا بخليك لما تجي تراجع مثلاً للإمتحان بتراجع بصورة دماغك بحسسك فيها إنو أي شئ ملون Done بالنسبة ليو فالمراجعه بتبقي Passive وماف أي Neural Connections جديدة ممكن تتكون أو قديمة تبقى أقوى ] ثم تاخد وقتك الكافي مع المادة نفسها ما مع الطريقه البتنقلا بيها لدماغك .. لأنو الطريقه الفعليه هي التحليل الذهني و التخزين البعملو دماغك من خلال النظر و التفكير والتحليل قبل أي طريقه تانية ممكن تساعدك محتاج ترجع مرة تانية للمصدر أو مرتين  في بعض الأحيان عشان في كلو مره حيثبت فهمك و يترسخ أكتر ^^ اخد الوقت الاكبر في إتاحة الفرصة لدماغك بالتحليل و عيونك بالنظر و ليس في تحويل محتوى المرجع او الشيت لصورة تانيه ترجع ليها الادوات القلناها فوق معينات و مفيده بس الخطأ في " التعجل " ليها قبل تسمح لدماغك بالإستيعاب و التحليل. و يمكن ما تحتاج ليها او ما تحتاج للوقت الكتير معاها لابأس بالملخصات والمخططات إذا كانت من ذهنك للورقة مباشرة بعد تتأكد تماماً إنك أستوعبت المصدر الأساسي    #منهجية_دراسة_الطب 🩺

《 اخيراً : التلخيص 》 آخر مرحلة من مراحل الفهم هو عمل مرجعك الخاص و لازم يكون شامل للمعلومات المهمة اهم معلومات المادة دي ..و بتكتبها بالطريقة البتناسبك انت .. بالمختصر هو حافظ لمعلوماتك و جهدك .. لأنك بكون عليك مادة كبيرة وبتقراها من مرجع و شيت كبير و الداتا .. فاكيد ح تحتاج يكون عندك ملخص ترجع ليه بعد فترة من قرايتك الاولى يوفر لك الزمن لما تكوت داير تقرى الدرس مرة تانية و ح بتحتاج له أكثر شي ايام الامتحانات 《 النقطة الاولى: فوائده 》 اولاً : توفير الوقت والجهد : بتساعدك بتلقى المعلومات المهمة بسرعة و سهولة متى تحتاج لها ..بدل تكون مشتت بين كل المصادر و تقراها من البداية في كل مرة تكوت داير تتراجع فيها الدرس ثانياً : التركيز على النقاط الرئيسية بركز لك على المعلومات المهمة و المفاهيم الأساسية.. لأنك بتستخرجها كخلاصة للكلام الكثير في المصادر ثالثاً : الاستيعاب السريع و تبسيط المعلومات لأنك بعد تفهم المعلومة و تتمكن منها بتلخصها بطريقة مبسطة و أكثر وضوحًا تسهل لك فهمها و استيعابها بسرعة متى رجعت ليها تاني رابعاً : الحفاظ على الذاكرة لان بكون عندك مصدر واحد فيه كل المعلومات المهمة و بطريقة مناسبة لك .. فكل ما تقراه بترسخ لك اكثر #منهجية_دراسة_الطب 🩺

《 النقطة الثالثة: الطريقة الصحيحة للقراية من الTextbooks 》 كطالب لسى في بداية الطريق لازم تعرف انك م ح تفتحه كدا طوالي و تبدا تقرا .. لازم يكون عندك معلومات عن الدرس اولا .. اي تقرى شيت الدكتور عشان تعرف المعلومات الاساسية و المطلوب منك تعرفها و تحضر الدرس من الداتا عشان يثبت لك الفهم .. تفهم الاتنين ديل فهم كامل .. و تطلع منهم النقاط الأساسية و العنواين الكبيرة و تظبطهم ١٠٠% بعدها قول بسم الله و افتح الTextbooks .. اقرا اول صفحات اسمهم How to use this book..ح يشرح ليك الكتاب مقسم كيف و إذا فيه امثلة او تمارين و حلول ليها... اطلع على طريقة كتابته و طريقة وضعه للعناوين الرئيسية و الفرعية .. و بتلقى في بداية الكتاب او نهايته موضح لك معنى الرموز الموجودة فيه و الكلمات المختصرة و والحروف الكبيرة او المصطلحات اللاتينيه او الحروف المايله كل كتاب طريقته بتختلف عن التاني وبعد تعرف دا كلو تاني بتقدر تقراه زي اي كتاب بعد تبدا تقرا الدرس من ال الكتاب بتلاحظ انه معمول بشكل فقرات بتشرح لك المعلومة .. بس موضوع الفقرة ده بكون صعب لأننا متعودين علي النقاط المرتبة فطريقة مذاكرتك من الكتاب ح تكون انك تمسك فقرة و تقراها و يكون المترجم حقك فاتح اي حاجة م عرفتها تترجمها وتعرف معناها وانت بتقرا يكون عندك قلم تحديد تحدد المعلومات المهمة.. بعد تصل لنهاية الفقرة ترجع للمعلومات الحددتها " تعريف .. اسباب .. تعليل .. وهكذا " .. وتستخرج منه المعلومات في شكل نقاط في ورق خارجي بعدها تمشي للفقرة التانية .. لما تنتهي ح تلقى انك لخصت الدرس كله .. و أهم شي المصطلحات الطبية البتلاقيك لازم تكون ضمن الملخص لو في حاجات ما فهمتها أعمل عليها علامة، واسأل منها سنايرك أو الدكتور ..و ما تحفظ حاجة ما فاهمها (إلا للضرورة القصوى) .. .. بعد تقرأ منه لازم تخلي وقت أكتر من كافي للشيتات، ولحل الـ cases والـ MCQs اخيرا.. قراية الTextbooks حلوة، بس محتاجة صبر و لمن تبدأ ما ح تقيف.. ما تقلق لو حسيت نفسك ماشي بطيء في البداية واصل، وشويه شويه ح تتعود وسرعتك تزيد صح .. صعب انك تخت اول خطوة بس لو عملتها، بعد شوية بتلقى نفسك بتجري جري.. #منهجية_دراسة_الطب 🩺