Dreamers 🩷🦋. "

اسبوع شوامل ولا أروع، فمفيش تاسك الأسبوع ده ممكن تعملوا حاجه من التاسكات اللي فاتت مكنش فيه وقت تعملوها وعندكم وقت دلوقت، او أجازة ومتعملوش حاجه 😂🩷. متنسوش تخططوا للاسبوع الجديد و تختاروا وقت لنفسكم 🥰🩷.

التاسك الاسبوع الجديد : _ الجزء الديني: اختار سُنَّـة مكنتش بتعملها والتزم بيها. _ اشتري حاجه جديدة لنفسك كَـ مُكافئة " خصوصًا ثانوية المساكين زي حالاتي ". _ قيِّم الأسبوع اللي فات من 1 لـ 10 واكتب أهم أحداثه. _ تابع ناس جديدة بمحتوى مفيـد وألغي متابعـة الناس اللي محتواها غير مفيد وبيضيع وقتك. ♡

🤍.

بعد شهـر ونص تقريبا من ثانوية عامة فيه شويه ملحوظات كان لازم أقولهم وأذكر نفسي بيهم: _ الـ To do list تتحط على حسب أولوية الدروس مش المتاح بس. _ درجات الشوامل مش كل حاجه، ممكن تكون ذاكرت كويس وحليت كتير بس فقدت تركيزك في الامتحان ومحليتش كويس، ده من عند ربنا،بس المهم متعديش الامتحان ده غير لما تكون استفدت منه، أولا: استفدت نفسيًا و اتعودت إنك متهتمش بالدرجات _ مش بقولك ان الدرجات مش مهمـة _ بس اللي اقصده ان الدرجات دي ملهاش تأثير على امتحان الثانوية العامـة، ثانيًا: الاستفادة الدراسيـة، انك هتلاقي نقاط ضعفك اللي مخدتش بالك منها وانتَ بتذاكر او بتراجع، ولو فيه معلومـة بين السطور هتتعلم إنك تركز في كل حرف، الامتحانات بتدينا على دماغنا آه، بس افتكر ان الواحد مش بيتعلم ببلاش، كل فكرة مكنتش تعرفها وأخطأت فيها فأنتَ استفادت مرتين، مرة علشان هتكون عرفت فكره جديدة ممكن تكون فكرة امتحان، ومرة علشان أخطأت والانسان مبينساش الحاجات اللي أخطأ فيها أبدًا، وإلا مكنش فيه متعلمين ناجحين، لو سألت أي حد ناجح هيقولك إنه أخطأ كذا مرة واتعلم من خطأه. _ مذاكـرة الصبح أفضل مليون مرة من مذاكرة بالليل: فيه ناس بتكون منتجـة أكتر باليل وأنا كنت منهم، بس في المقابل، كان تعب جسدي لا يّطاق بالنهار و تعب نفسي لإني قالبة يومي ومش عارفه هو المفروض أنام بالليل ولا بالنهار، لازم تجربوا تذاكروا الصبح بدري، وتخلصوا أكبر قدر ممكن حتى لو عندكم حصـة. _ امسح أي تطبيق بيشغلك حتى لو كان مهم بالنسبة لك، مستقبلك أهم يا عزيزي. _ لو بتاخد حصص اونلاين حاول تلاقي بديل عن الموبايل للحصص دي وإلا مش هتعرف تسمع الحصـة من التشتيت. _ البريك الاسبوعي مهم ومش تضييع وقت، البريك الاسبوعي مهم ومش تضييع وقت وإلا هتزصل لمرحلة الـ burn out . _ مهم إنك تعمل رياضـة، بيزود التركيز وبيساعـد الجسم بالذات لو بتقعد فترة طويلة في حصة او بتذاكـر. _ اشرب ميه كتير علشان كليتك المسكينـة وعلشان تزود من تركيزك لأنه بيوصل الاكسجين للمخ وبالتالي بيزود التركيـز. _ مهم جدًا تهتم بالبيئة اللي حواليك، لو المكان مش مرتب لازم ترتبه قبل ما تبدأ وتحط جنبك الحاجات االلي بتحتاجها و تبعد عن التليفون وأي شاشـة عموما غير اللي بتذاكـر عليها. _ كافئ نفسك بعد كل يوم بحاجـة بتحبها حتى لو مصاصـة بتحبها. _ لازم تعمل كراسة " متغلطهاش تاني " في كل مادة _ لو حد بياخد مع مستر محمد صلاح هيعرف قصدي _ كراسـة تكتب فيها كل الأسئلة اللي أخطأت فيها علشان لما تيجي تراجع أو تختبر نفسك متنساش أخطائك. _ مش لازم تلخص كل الدروس ورا المستر طالما معاك الكتاب: هتاخد وقت كبير جدًا في محاولة تلخيص اللي هو متلخص أصلا، طب وليه، انت اسمع المحاضرة وفي ايدك الكتاب واكتب الحاجات اللي مش موجودة، او تركات الحل أو معلومة قديمـة بتفكرك بجزئية معينـة، صدقني هتختصر وقت كبير جدًا والمحاضرة اللي كنت بتخلصها في 5 ساعات سماع وتلخيص ومذاكرة هتخلصها في 3 ساعات ونص بالكتير، مذاكرة وسماع و مراجعـة والساعة ونص اللي اتوفروا هتكون خاصت فيها حل. _ عادي تشعر إنك لوحدك في المرحلـة دي، بس شيل نفسك يعزيزي محدش هيشيلك. _ متهملش صحتك وتقلل نومك و أكلك في الاخر ده كله هيأثر على انتاجيتك. _ فكر في الأخطاء إنها هدايا،اه هتزعل شويه على الدرجات لو مش كويسة بس فكر من ناحية تانيه، انت حليت كمية كويسة من الاسئلة وأخطأت شويه هتتعلم منهم ومش هتغلط في فكرتهم تاني . بس كدَه ده كل اللي فكرت فيه وده يعتبر ملخص الشهر ونص اللي. فاتوا بالنسبا ليا ولناس كتير، حبيت زي ما قولت أفكر نفسي اولا بيهم وأفكركم . _ ندى مدحت .

♡♡♡♡♡.

فيديو أصنع وقتًا أكثر من المتاح من تلخيصات قناة أخضـر: لو بصينا حوالينا هنلاقي إننا مشغولين، مشغولين، مشغولين في وضع خطط وليست طويلة بكل الحاجات اللي عايزين نعملها وده في الغالب بيشكل ضغط عليك. •«ظاهرة الإلهاء المستمر»: وهي عبارة عن كل المششتات اللي حوالينا وآخر الأخبار اللي بتكون على مواقع التواصل الإجتماعي وكلهم في الحقيقـة بيتنافسوا على وقتك وإزاي تعتبرهم مكافئة تُستحق بعد تعب_ زي مثلا تفتح إنستجرام ساعـة على سبيل الراحة بعد مذاكرة نص ساعـة _. وبكِده تكون التطبيقات دي حققت هدفها وإنها تخليك دايما مشغول ومتراكم عليك حاجات ومتشتت وتنتقل من تطبيق لتطبيق . تخيل إنك تقدر تلغي كل الحاجات اللي مش مهمـة وتخلي بس الحاجات المهمـة وتنظم وقتك وتخصص وقت كمان لعقلك وتنميته أو تتعلم مهارة أو هوايـة جديدة، أو تخلص الكورسات اللي عاملها save بقالها سنين. هنغيـر الإعدادات الإفتراضيـة الخاصة بينا من موضـة الإنشغال والالهاء بين المشتتات لـ « اصنع الوقت ». الكاتبيـن اللي كتبوا الكتاب ده توّصلوا لأربع خطوات ممكن تساعدنا وده بناءًا على تجاربهم وقراءاتهم. 1_ الخطوة الأولى؛ تحديد الأهداف: حدد هدف أساسي لليوم وده هيكون الهدف اللي هتركز عليه كل طاقتك في اليوم. ممكن تلاقي صعوبـة علشان تحدد أهم هدف في اليوم وده هيتحل عن طريق 3 طرق. ١•أهداف مُلحـة وعاجلة. زي deadline لتاسك في شغلك أو دراستك. ٢•أهداف تشعرك بالرضا. ومش لازم تكون حاجه بخصوص شغلك أو دراستك ممكن تبدأ أول خطوة في تعلم البرمجـة مثلا. ٣• شيء ممتع. مثلا تقرأ كتاب، تخرج مع صحابك. ممكن تشعر أن كدَه بتضيع وقتك ولكن يا عزيزي تضييع الوقت الحقيقي لما يكون الوقت بلا هدف. •نصايح تساعدك على تحقيق الهدف اليومي. ١• حدد الهدف إنه يستغرق من 60: 90 دقيقـة، لو أقل من 60 د مش هتكون إندمجت في المهمـة، ولو أكتر من 90 د هتكون تعبت، فممكن تاخد بريك بعدها. •٢ قسِّم هدفك في اليوم لكذا جزء ولو كبير جدًا ممكن تقسمه لكذا يوم. ٣•خلي أهدافك مكتوبة سواء في نوت أو ورقـة وحدد وقت لكل مهمـة أو هدف. ٤• رتِّب أولوياتك. ولكن متكتبهاش بطريقـة الـ To-Do List علشان مش بتفرق بين المهام الصعبـة والمهام البسيطـة، والمهام الطويلة والصغيرة وممكن الأهداف المهمـة متبانش فيها وعلشان كدَه فيه 3 طرق علشان تعالج المشكلة دي: ١• تعمل قايمـة مهام مُحتملـة وبعد كدَه تحولها لأهداف وتحطها في قايمـة الأهداف. ٢•تقسم القايمـة لـ 4 أجزاء. 'الجزء الأول: تحط فيه الهدف الأساسي اللي شغال عليه 'الجزء التاني: تحط تاني أهم الأهداف . 'الجزء التالت: تحط المهام اللي عايز تعملها بعدين. 'الجزء الرابع: خليه فاضي لأي أفكار جديدة. ٣_ الطريقـة التالته هي إنك تقسم الورقـة لـ 3 أعمدة رأسيـة كالتالي: • العمود الأول: تحط الوقت المخصص للمهمـة. •العمود التاني: الواقع اللي حصل فعلا. •العمود التالت: أي تعديل هيطرأ. 2 _الخطوة التانيه علشان تصنع الوقت: هي إنك تركز تركيز تام. وعلشان التكنولوجيا هي السبب الرئيسي اللي بيفقدنا التركيز هنعيد طريقـة استهلاكنا التكنولوجيا. •اول حاجه قبل ما تفتح أي تطبيق اسأل نفسك 3 أسئلة. •أنا ليه محتاج أفتح التطبيق ده؟ • كم المدة للي هستخدمه فيها؟ • امتى هستخدمه؟ لو الـ 3 أسئلة دول مقدموش إجابات مفيدة متستخدمش التطبيق. • متستخدمش الموبايل أو ما تصحى من النوم لأن ده كفيل أنه يغير مودك للأسوء. •الغي الإشعارات. 3_ الخطوة التالتـه: جدد طاقتك. بسبب موضة الانشغال إحنا بقينا قليل جدا لما بنهتم بصحتنا وممكن ننساها أساسا، ولو اهتمينا بصحتنا إحنا في الحقيقة بننقذ الوقت اللي ممكن نضيعـه واحنا مجهدين وفي الحالة دي بنلجأ لمواقع التواصل الاجتماعي علشان نضيع الوقت وعلشان مش بتحتاج مجهود فـ: • تحرَّك •تناول أكل صحي. • حدد استهلالك للكافيين. مثلا صحيت الساعـة 7 اشرب القهوة بعد ساعتين ونص او 3 ساعات والقهوة اللي بعدها بعد 3 ساعات وهكذا بس بلاش أكتر من مرتين لأن ده هيأثر على نظام نومنا. • ابعد عن الضوء قبل ما تنام. • خد يوم اجازة بعيدا عن كل حاجه حتى الموبايل. • قضي وقت مع اهلك وصحابك. 4_ الخطوة الرابعـة: هي التفكُّر في نهايـة كل يوم فكر مع نفسك انت استفادت من وقتك النهارده ولا لأ،وايه الحاجات اللي استفادتها. وفي النهاية متحاولش تركز على المثاليـة. ووفر وقتك اللي بيضيع وركز على أهدافك المهمـة فعلا. وبس كدَ يعزيزي كدَه خلص التلخيص. _ندى مدحت.

" إن الإخفاق وارتكاب الأخطاء هما الطريقـة الوحيدة لإحراز تقدم حقيقي وملموس في شيء ما جديد، فلقد قيل قديمًا أن الطريقـة الوحيدة لأن تحقق نجاحًا باهرًا هي أن تضاعف معدل إخفاقك، وهذا القول ليس حقًا بالسخافـة التي يبدو بها للوهلة الاولى، فإذا لم ترتكب أخطاء، فأنت لا تقوم بدفع نفسك بجدية تجاه عوالم جديدة من الإنجازات ممكنـة التحقيق، فحدوث الفشل والإخفاق شيء طبيعي مع بدايـة كل شيء جديد أو غير مألوف، كما أن الإخفاق سرعان ما يتبدد مع بَذلِك للمجهود، ولا تتوقف عن بذل هذا الجهد حتى يفوق عدد نجاحاته عدد اخطائك. " _ من كتاب " ادرس بذكاء وليس بِجد. "

https://play.google.com/store/apps/details?id=english.test.reading.comprehension السلام عليكم ورحمة الله وبركاته. الأبليكيشن للـ Passages لو حـد يقّوي نفسه في الحل، فيه تدرُّج في مستوى الصعوبـة من الأقل إلى الأعلى. كل ما عليك فقط إنك تدخل تحل كل يوم Passage، وده اللي المفروض نعمـله خاصةً اللي في ثانوي _ أولى وتانيه وتالته _ كلنا عارفين طبعًا هي عليها درجات قد إيه. الـ Passage في ثانوية عامـة عبارة عن 4% من درجات الإمتحان، متخيلين!! ياريت لانستهين بيها ونقول هبقى أحل كام سؤال قبل الإمتحان وخلاص. ♡