بالوحي نُرَبِّي - سمر إبراهيم

المقالة رقم 372 #لقطة 48 ((اعلَم أبا مسعود: لَلهُ أقدرُ عليكَ، منكَ عليه..)) .... وتلف في البيت كله تدوّر عليه في كل حتة، ثم تلاقيه أخيرا متكوم في ركن في أوضته دافن وشه بين ركبه، وصوت عياطه مقطوع النَّفَس ومتقطع، سمع صوت رجليها عند الباب، رفع راسه ووَقَّف عِياط وجِري عليها يدفن في حضنها وشه إللي لسة معلّم عليه صوابعها الخمسة بالأحمر... .. وكم قسى قلبُها عليه وأوسَعَهُ طَردًا.. وكم وَسِعَهَا قلبُه رحمةً وعَفوًا وتَعَلُّقًا... ما تعرفش إن ضربة بالقلم على وش العبد تساوي في ديننا 10 جلدات...!؟ وإن كفارتها عتق ذلك العبد...؟! مابالنا بالضنا.. المسلم.. الحر.. البريء.. المرفوع عنه القلم....؟! ومين يعتقهم من إيدينا.....؟ ...ارفعي ((القلم)) عن الوجه الكريم اللي ربنا رفع عنه ((القَلم))... وقد خاب من افترى..... وقد خاب من حمل ظلما.... ((اعلَم أبا مسعود: لَلهُ أقدرُ عليكَ، منكَ عليه..)) *هامش: -الضرب على الوجه = محرم مطلقا.. -الضرب التأديبي المبرح حرام شرحا بردو.. -لكن الضرب التأديبي غير المبرح = مباح شرعًا بس بضوابط وموانع وشروط شرعية، من غيره يبقى لا يجوز شرعًا.. #لقطات_تربوية #أسماءمحمدلبيب #أمةالله-عفا الله عنها

المقالة رقم 371 #لقطة 47 يا ابني يا ضنايا.. أنا ولله الحمد رب العالمين: 1-عمري ما ضربتك على وشك.. 2-عمري ما شتمتك.. 3-عمري ما دعيت عليك.. 4-عمري ما ظلمتك.. 5-عمري ما كذبت عليك.. 6-عمري ما عصيت ربنا عشان أفرحك.. -----في رأيي المتواضع: دي أنضف صحيفة تربوية ممكن تقر عين أي أم في الدنيا عند ابنها، وفي الآخرة عند الملِك الديّان عز وجل.. جهزي الستة دول من دلوقتي بالمجاهدة والمثابرة والصبر والاستعانة بالله، عشان تقدري تقوليهم لابنك بكل اعتزاز وثقة وصدق، لما يكبر.. طب مفرطة فيهم ومش هتقدري للأسف تقولي بعضهم/ أو كلهم، وكان نفسك جدا تقوليهم....؟ = توبي عن الستة فورًا توبة نصُوح، وفهمي ابنك ندمك دة بكل صدق وتجرد، وفهميه إنك كنتي غلط وقررتي تصححي مسارك لله عز وجل، وكل ابن آدم خطاء وخير الخطائين التوابون، وشهديه على نيتك الإقلاع عن كل دة بعون الله، وكفى بالله شهيدا.. --- اعملي دة وانتي إن شاء الله هتعرفي تقوليها له في يوم من الأيام بكل ثقة واعتزاز وصدق: يا ابني يا ضنايا.. أنا ولله الحمد رب العالمين: من ساعة ما تُبت وأنَبت وعرفت الصح من الغلط في تربيتك وديني وإن كلكم راع وكلكم مسؤول عن رعيته: 1-عمري ما ضربتك على وشك.. 2-عمري ما شتمتك.. 3-عمري ما دعيت عليك.. 4-عمري ما ظلمتك.. 5-عمري ما كذبت عليك.. 6-عمري ما عصيت ربنا عشان أفرحك.. {إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ ۗ وَكَانَ اللَّهُ غَفُورًا رَّحِيمًا} {..وَإِنِّي ((لَغَفَّارٌ)) لِّمَن تَابَ وَآمَنَ وَعَمِلَ صَالِحًا ثُمَّ ((اهْتَدَىٰ))..} {..إِلَّا مَن ظَلَمَ ثُمَّ ((بَدَّلَ)) حُسْنًا بَعْدَ سُوءٍ فَإِنِّي غَفُورٌ رَّحِيمٌ..} {وَلَمْ يُصِرُّوا عَلَىٰ مَا فَعَلُوا وَهُمْ يَعْلَمُونَ..أُولَٰئِكَ جَزَاؤُهُم مَّغْفِرَةٌ مِّن رَّبِّهِمْ} == طيب الأم إللي لسة بتجاهد نفسها والأمر صعب عليها لسة وعاوزة حل لده لحد ما تقدر تتوب عنه وتظبط لسانها بحول الله وقوته، تعمل إيه؟ : تقرا المنشور ده: https://www.facebook.com/photo?fbid=2712571865675783&set=a.1839976876268624 #لقطات_تربوية #أسماءمحمدلبيب أمةالله-عفا الله عنها

المقالة رقم 370 #لقطة "46" حبيباتي الأمهات الطيبات🌻🌻 ▪️ما تفضحيش ابنك بشكوتك منه في التعليقات.. = مثلا ما تقوليش: ابني بيكذب/ بيضرب أخته/ بيشتمنا/ بياكل نصيب اخواته/ بيعمل على روحه/ بيحب الأذية/....إلخ، حد يقول لي أتصرف إزاي معاه؟.. 👈 الأيام بتجري والصغير بيكبر وممكن في يوم يشوف كلامك ويحزن إنك ما سترتيهوش.. ▪️ خليها بصيغة حمّالة أَوْجُه.. مثلا قولي: لو واحدة ابنها بيكذب/ بيضرب أخته/ بيشتم أهله/ بياكل نصيب اخواته/ عنده تبول لا إرادي..... تتصرف إزاي معاه؟.. 👈 "ومن ستر مسلما ستره الله يوم القيامة"/البخاري ومسلم... **(إلا طبعا لو شكوى سطحية بسيطة ولا ترقى لوصف "فضيحة" = فلا حرج بإذن الله.. 👍والأولَى = السّتر..) #لقطات_تربوية #أسماءمحمدلبيب أمةالله-عفاالله عنها

🔸 ما تبقيش طول مانتي قاعدة بتشتكي منه..! اذكري محاسنه أكتر.. والشكوى واللوم والتقريع استبدليهم بتوجيهات ونصايح ولفت نظر هادي.. قدر الإمكان. 🔸 اعمليله لقب فخم خاص بيه يحسسه بالرجولة والإكبار -أو بالأهمية عموما سواء بنت أو ولد: صاحبي/دراعي اليمين/نور عيني/ منقذي/البطل/الجدع/ وش الخير...إلخ، وإديله كنية: زي أبو الخير/أبو الطيابة/أم الأبطال/أم أبيها/أم الجمال/ أم الطعامة.. مثلا.. 🎁🎁دي لقطات سريعة من الدعم المعنوي ودعم القوة النفسية والإدراك الواعي للقدرات الذاتية، من خلال تعزيز الثقة بالله عز وجل والاعتصام به وحده بجانب تنمية مهارة الوعي الذاتي بالنفس تقبل الفروق الفردية.. باقي الأمثلة في مقالي الطويييل: العيال والرجولة/الثقة بالنفس/الخشونة، قيد التجميع والنشر بإذن الله.. 🎁🎁مش هتعرفي تعقمي العالم من حوالينا من القاذورات، لكن تعرفي بعون الله تصنعي جهاز مناعي قوي ضدها .. 🎁🎁هتعرفي تزرعي جواه القوة النفسية من خلال الثقة واليقين في الله عز وجل، ثم صدق الإدراك لقدراته، بإذن الله ودعمكم له.. 🎁🎁 وأهم حاجة تزرعي جواه إن اللي بيسخر منه دة هو الظالم، وإن ابنك بياخد من حسناته طول ما هو ظالمه، وإنه أقوى منه بأخلاقه وحلمه وأدبه وإرضاء الله فيه 🎁🎁 وطبعا من وقت للتاني تعلميه مهارات "فن الرد بأدب وقوة" على الساخرين منه، وما يسيبش حد يتمادى في أذاه وظلمه وتطاوله عليه سواء باليد أو باللسان.. #لقطات_تربوية #أسماءمحمدلبيب أمةالله-عفا الله عنها

🚀::::ثانيا: من خلال القدرات::::🚀 🔸 ركزي أكتر على حقن ابنك بالقوة النفسية بشكل رئيسي من خلال (القدرات) والتفوق فيها، مش الأمور الذاتية الخَلقية.. 🔸 يعني زي ما قلنا في لقطة "ابنك والتفوق" = علميه خير الناس أنفعهم للناس/ خيركم من تعلم القرآن وعلمه/خيركم خيركم لأهله....إلخ، يعني خليه يبحث عن ((التميز الديني والأخلاقي)) بالتنافس عموما على أبواب الخير والبر والصلاح إللي فيها التفاضل بين الناس عند الله... ➖مثال منهم: علميه التفوق والتميز في حفظ القرآن وتعلم العلم الشرعي، من وهو عنده 3 سنين أو أقل كمان لو يقدر، ويسمّع قدام الأهل والأصحاب وتشجعوه بفخر.. ⬅️ مع الوقت بيحس فعلا إنه مختلف، ذو مكانة مختلفة بين أقرانه والمجتمع عموما بحمله لكتاب الله علما وعملا، فثقته بنفسه بتبقى مش غرور ع الفاضي أد ما إنها بتكون اعتزازًا بالله وبحسن الصلة به عز وجل، مع تعليمه الإخلاص طبعا حسب استيعابه حبة حبة.. ((واقري الباقي من لقطة "52": "ابنك والتفوق")).. 🔸 علميه التفوق والتميز في رياضة أو مهارة بيحبها ومافيهاش حاجة حرام أو منكرات أو تعجيز له.. 🔸 علميه التفوق والتميز في ((التقوى)) -{إِنَّ ((أَكْرَمَكُمْ)) عِندَ اللَّهِ ((أَتْقَاكُمْ))..}، التقوى بالذات لإن دي إللي هتخلي ثقته في نفسه في السما بإذن الله وبما يرضي الله عز وجل.. ➖تنافسه على التفوق في التقوى = هيخليه متميز عند ربه عز وجل بإذن الله = ودة التميز إللي هيديله أعلى درجات الثقة بالنفس والطمأنينة وعدم خشية الناس، لإنه هيكون تقي في السر والعلن = وبالتالي هيكون صادق وصالح ومستقيم = وبالتالي لا يخشى أحدا إلا الله ولا يخاف من أي مواجهة طالما هو على الحق، إن شاء الله.. 🌿.....أيُّ ثقة بالنفس بعد ذلك تهتز بعد إذابة خوفنا من الناس....؟🌿 🔸 اديله مصروف وعلميه يحوّش وإزاي يهتم بنعمة المال ويصونها، ويجيب إللي عاوزه ويجيب هدايا للناس ويتصدق.. حسسيه إنه ((مسؤول)) عن حاجات عظيمة عند ربنا وعند الناس.. 🔸 لو هما صبيان، حببيهم في المصارعة الودية، إللي الغرض منها التقوّي والتدريب على التنافس في القوة والإعداد البدني الرجولي وتمرين العضلات والمهارات القتالية.. عوّديهم على دة بس يكون تحت رقابتك ويكون في جو مافيهوش غل ونفسنة، لأ، تنافس ودّي على الخير.. 🔸 صحيه للفجر.. ولو ولد = عوّديه على عدم تفويت صلاة الفجر في المسجد.. ربي رجولة ولادك بالفجر.. (اقري لقطة "التربية بالفجر").. 🔸 لما يقطّع السلطة مثلا -أو العيش- ضمن مهام المعاونة مع أسرته في البيت، وإيده تتجرح = ظبطيله الجرح وحطيله الملصق الطبي وطبطبي عليه وكل حاجة مفيش مشكلة، لكن خليه يرجع يكمّل تقطيع تاني عادي جدا، وساعديه في التقطيع فقط لو احتاج.. #المهم: يكمّل، وهو إللي هيكمل مش حد غيره.. ده إللي عملته بالظبط مع ابني سلمان وهو صغير خالص حوالي 5 أو 6 سنين. لازم يعرف إن جرحه البسيط مش معناه إن الدنيا تقف. هي دي الرجولة.. واحكيله إن #أم_عمارة عملت ده مع ابنها لما اتجرح في المعركة، قامت وعالجت جرحه وربطته كويس ثم قالت له: "انهض بُنَيَّ فضارِبِ القومَ..".. (ضارِب أي: قاتِ.ل) 🔸 ما تكتريش من قعداته وسط البنات، وما تعوديهوش يبقى ملتصق بيكي وبعالم صاحباتك، وحاوطيه أكتر بالصبيان ومجالس الرجال.. الموضوع مش بسيط ولا اختياري ولا هو دين فقط، الموضوع فعلا عواقبه النفسية والاجتماعية خطيرة لو ما انتبهتيش له بدري، فيه مراكز علاج نفسي سجّلت حالات من الشذوذ الجنسي كانت بداياتها إهمال الحرص في الأمور دي.. 🔸علميه فن التجاهل والإعراض عن الجاهلين.. ده بينمي عنده الصبر والتغافل والسمو النفسي والانشغال بالمفيد وعدم الإغراق في أكفار التألم من أذى المؤذيين وكلامهم الجارح.. ومع الوقت يوصل لمرحلة إنه لا يلتفت أصلا للكلام سبحان الله، وكل ده بيزود حقيقي مؤشر القوة النفسية بحول الله وقوته: {وَأَعْرِضْ عَن الجَاهِلِين}/ {وَإِذا سَمِعُوا اللَّغوَ أَعرَضوا عَنهُ وَقالوا لَنا أَعمالُنا وَلَكُم أَعمالُكُم سَلامٌ عَلَيكُم لا نَبتَغِي الجاهِلينَ} #منتهى_الثبات_الانفعالي_والقوة_ألنفسية.. #الشرح: وإذا سمعوا الباطل من القول لم يُصْغوا إليه، وقالوا: لنا أعمالنا لا نحيد عنها، ولكم أعمالكم ووزرها عليكم، فنحن لا نَشْغَل أنفسنا بالرد عليكم، ولا تسمعون منَّا إلا الخير، ولا نخاطبكم بمقتضى جهلكم؛ لأننا لا نريد طريق الجاهلين ولا نحبها. وهذا من خير ما يقوله الدعاة إلى الله. || التفسير الميسر.. (والباطل هو كل ما يخالف الحق الذي يرضي الله عز وجل..) 🚀::::ثالثا: من خلال الدعم المعنوي وبث الروح الإيجابية::::🚀 🔸 غضي الطرف أحيانا كتير عن أخطاؤه إللي بيكررها رغم كثرة تنبيهك، كإنك مش شايفاها ساعات، من باب التغافل وعدم تعريضه للضغط النفسي بسبب الرقابة الخارجية، وإللي بيهز ثقته في نفسه..

🔸 حديث5: "رَأَى سَعْدٌ رَضِيَ اللَّهُ عنْه، أنَّ له فَضْلًا علَى مَن دُونَهُ -لقوته القتالية وضعفهم عن ذلك- فَقالَ النبيُّ ﷺ: ((هلْ تُنْصَرُونَ وتُرْزَقُونَ إلَّا بضُعَفَائِكُمْ))؟! #والشرح: لا يكون نصر ورزق الله الطيب فقط بسبب قوة القوي في أخذه بأسباب ذلك، وإنما من #أقوى_أسباب النصر والتوفيق والرزق الطيب عموما: دعوات الضعفاء منكم الراضين بقضائه والخاضعين له، يعني الكل في الثمرة مشارك بما أعطاه الله من فضل إن أخلص النية، والفضل كله من عند الله، محدش له فضل على نفسه بغير الله..(صحيح البخاري، أول تعليق) --- وده يعمله ويغرس جواه التعايش مع الضعف أو النقص ده بتوازن نفسي ورضا إيماني، محتسبًا أجر الله ومعيته فيه، ويعتبره تميُّز ونعمة وفضل وشرف من الله عز وجل مش نقمة ولا إهانة بالعكس.. ➖➖ ونعلمه يرد على إللي بيسخروا منه بكلام يوجعهم ويؤدبهم {وقل لهم في أنفسهم قولًا بليغا}.. ➖➖ يعني حفظيه مثلا نصوص زي {فيسخرون منهم سَخِر الله منهم}/ {لا يسخر قوم من قوم عسى أن يكونوا خيرا منهم}/ {إن الله يدافع عن الذين آمنوا إن الله لا يحب كل خوان أثيم}/ {والذين يؤذون المؤمنين والمؤمنات بغير ما اكتسبوا فقد احتملوا بهتانا وإثما مبينا}/ "لا تُظهِر الشماتَ بأخيك فيعافيه اللهُ ويبتليك"(والحديث حول صحته خلاف لكن ابن باز قال رجاله ثقات وهو صحيح المعنى)*أول تعليق.. / أو أنا أقدر آخد حقي منكم لكن هأجله ليوم القيامة، {فليضحكوا قليلا وليبكوا كثيرا جزاءً بما كانوا يكسبون}.. إلخ ➖➖ ولو مثلا التريقة عليه كانت بسبب تأخره في البلوغ عنهم ((يا عيل يا نونا إمشي العب مع الصغيرين..إلخ)) --- نعلمه يرد بالمثل: ده أنا فرحان إني لسة مرفوع عني القلم، إنما إنتم لو حد فيكم مات دلوقتي هيلاقي صحيفة سيئات إن لم يعف الله عنه ويرحمه، يبقى مين فينا إللي مفروض يزعل دلوقتي؟.. = وحسب كل موقف فيه سخرية منه أو غيره، بنعلمه الرد المناسب للشخص المناسب، فيه شخص بيوجعه التذكير بالله فقط وبيرتدع، وفيه شخص يوجعه مقابلة السخرية بالتجاهُل، وفيه شخص بيوجعه مقابلة السخرية بإهانة لفظية له مُقابِلة تُعبر عن التجاوز الأخلاقي إللي الطرف المتجاوز ده عمله، وتبين إن الطرف المستضعَف مش بيسكت، فيعمل المتجاوِز حساب لده بعد كده لو مش حابب يتهان بالمثل.. فلو يقدر على ردود الفعل المناسبة حسب كل موقف وكل شخص فياريت لإن ده هيعزز قوته النفسية أكتر ده غير إن ده حقه شرعا فما تمنعيهوش منه {وإن عاقبتم فعاقبوا بمثل ما عوقبتم به}/ {ولمن انتصر بعد ظُلمِه فأولئك ما عليهم من سبيل}.. لكن الأفضل نربيه على الإعراض عن الجاهلين وتفويض الله بالدفاع عنا والعفو عند المقدرة {ولئن صبرتم لهو خير للصابرين.. واصبر وما صبرك إلا بالله.. ولا تحزن عليهم ولا تك في ضيق مما يمكرون.. إن الله مع الذين اتقوا والذين هم محسنون}.. 3️⃣-- وعن طريق تعليمه النظر لمن هم أدنى منه: = الحديث: "إذا نَظَرَ أحَدُكُمْ إلى مَن فُضِّلَ عليه في المالِ #والْخَلْقِ، فَلْيَنْظُرْ إلى مَن هو أسْفَلَ منه مِمَّنْ #فُضِّلَ_عليه." = الحديث: " انظروا إلى من هو أسفلَ منكم ولا تنظروا إلى من هو فوقَكم ، فإنه أجدَرُ أن لا #تزدَروا نعمةَ اللهِ #عليكم" (الحديثين صحيحين، أول تعليق)

المقالة رقم 369 لقطة "45" #لتحصين_ابنك_ضد_السخرية_والإيذاء ("#التنمر" بلغة العصر) #فن_صناعة_القوة_النفسية_رغم_الضعف_والنقص #من_القرآن_والسنة 🎯 الثقة/ الخشونة/ تحمل المسؤولية/الرجولة..... كلها مترادفات مترابطة جدا.. إزاي أزرعها في ابني/بنتي ويساهموا في تحصينهم ضد السخرية وغيرها؟.. أيوة بنتي كمان = لإن الرجولة غير الذكورة..! ....الرجولة = مواقف.... 🐥 الثقة والقوة النفسية بعد توفيق الله- بتيجي من 3 أبواب: ✔️ أولا:: الذات---الشكل والصفات الخَلقية.. ✔️ ثانيا:: القدرات---مهارات/أخلاق/إنتاج/إنجاز.. ✔️ ثالثا:: الدعم المعنوي---التشجيع والكلام الطيب وبث الروح الإيجابية.. 🚀::::أولا: من خلال الذات::::🚀 🔸 نمي اعتزاز واطمئنان ابنك في (الأمور الذاتية) براحتك ماشي: إنتَ قمر/إنت دمك خفيف/إيه الذكاء دة اللهم بارك....إلخ.. لكن #ما_تعتمديش في تنمية قوته النفسية على الأمور دي بشكل #رئيسي، لأ خلي ده بشكل فرعي هامشي.. 🔸 يعني ما تعظميش في قناعاته أوي إن الشكل مرتبط بقوته النفسية.. 🔸 بالذات لو عنده سبب في ذاته أو شكله أو خِلقته يخلي ثقته بإمكانياته ضعيفة، زي إن شكله مش حلو/ قصير/ ضعيف/ لون بشرته ملفت/ بيتأتأ/ بطيء/قليل الذكاء....إلخ، لإن مهما أقنعتيه بعكسها عشان تطيّبي خاطره وتقوّي ثقته بنفسه من خلالها = هيقابل ناس في الحياة تصدمه بالحقيقة بشكل قاسي بقصد أو بدون قصد.. 🔸 فساعتها: لو هو مقتنع إن الشكل والصورة مهمين = هيتأثر بكلامهم بعمق/ ولو مقتنع إن الجوهر والعمل هما الأهم = تأثره هيبقى أبسط بإذن الله.. 🔸 واقنعيه بده بطريقتين: 1️⃣-- عن طريق ضرب الأمثلة: ➖مثلا سيدنا بلال الحبشي شكله في الزمن إللي هو فيه كان من الأمور "المحرجة"، كان بيُطلَق عليه "عبد إسود"، ورغم ذلك بلغ بالإسلام مكانة لم يبلغها غيره لا قبل ولابعد، بقى مؤذن الرسول صلى الله عليه وسلم.. ➖و مثال: الرجل الصالح زاهر إللي كان شكله "دميم"، الرسول ﷺ كان بيحبه. في مرة النبي ﷺ كان بيهزر معاه وبيقول عنه: من يشتري هذا العبد؟ -كإنه قبض عليه وهيبيعه في السوق يعني- فقام زاهر رد عليه وقال بحزن ما معناه: لو عرضتني للبيع في السوق يا رسول الله هتلاقيني كاسد والناس هتزهد في أمثالي لإني مش حاجة غالية.. فقال له ﷺ: ((لكنك عند الله غالٍ..))☝️.. ➖ومثله: سيدنا جُليبيب، كان في وشه دمامة، والنبي عرض عليه يجوزه واحدة، فرد وقال: إذن تجدني كاسداً يا رسول الله، فقال ﷺ: غير أنك عند الله لست بكاسد.. ➖ومثاال: سيدنا عطاء بن أبي رباح، كان أسود أفطس أشل أعرج -صفات دمامة في الخلقة- وكمان بقى أعمى بعد كدة، ورغم كل قواصم الثقة في النفس دي وكل المحبطات الخِلقية الذاتية دي == كان عالم فقيه من الثقات العدول كثيري الحديث، لدرجة إن أيام مِنى -في الحج- كان بينادي مُنادي بين الناس: "لا يُفتِي الناسَ في الحج إلا عطاء بن أبي رباح".. ! 2️⃣-- وعن طريق #التلقين_النظري_المباشر بنصوص الشرع إللي تثبت له إن ميزان ربنا غير ميزان الناس فيخلي عنده تعايش وتقبُّل ووعي راشد بجوانب النقص إللي عنده ومسبباله حرج// وبنصوص الشرع إللي بتثبت معية الله للمستضعفين وأصحاب تواضع الحال في الدنيا بشكل أو بآخر، فده يخليه يعتبرها النقص أو المشكلة إللي عنده ((نعمة من الله)) عز وجل: 🔸 حديث1: "إِنَّ الله لا يَنْظُرُ إِلى أَجْسامِكْم، وَلا إِلى صُوَرِكُمْ، وَلَكِنْ يَنْظُرُ إِلَى قُلُوبِكُمْ"... 🔸 حديث2: "رُبَّ أشْعَثَ، مَدْفُوعٍ بالأبْوابِ لو أقْسَمَ علَى اللهِ لأَبَرَّهُ." #شرحه: مدفوع بالأبواب، أي يلفُظُه الناس ويمنعونه عن مجالسهم باللسان أو اليد ولا يرحبُ به أحدًا في بيته لو افترضنا أنه واقف على باب بيتهم، من شدة حقارته في أعين الناس، بينما هو عند الله ممن يبر قَسَمَهم لو أقسموا عليه بشيء عز وجل..! 🔸 حديث3: "مَرَّ رَجُلٌ علَى رَسولِ اللَّهِ ﷺ، فَقالَ: ما تَقُولونَ في هذا؟ قالوا: حَرِيٌّ إنْ خَطَبَ أنْ يُنْكَحَ، وإنْ شَفَعَ أنْ يُشَفَّعَ، وإنْ قالَ أنْ يُسْتَمع.. ثُمَّ سَكَتَ ﷺ.. فَمَرَّ رَجُلٌ مِن فُقَرَاءِ المُسْلِمِينَ، فَقالَ ﷺ: ما تَقُولونَ في هذا؟ قالوا: حَرِيٌّ إنْ خَطَبَ أنْ لا يُنْكَحَ، وإنْ شَفَعَ أنْ لا يُشَفَّعَ، وإنْ قالَ أنْ لا يُسْتَمع، فَقالَ رَسولُ اللَّهِ ﷺ: ((هذا خَيْرٌ مِن مِلْءِ الأرْضِ مِثْلَ هذا))"*(صحيح البخاري، أول تعليق).. --- وده يعلمه إن ميزان الله غير، وإن العبرة عنده عز وجل بالعمل والسعي والنية والسرائر، مش بالصور والمظاهر.. فيقل في نفسه حدة أثر نظر الناس له وتعقليقاتهم عليه.. 🔸 حديث4: "ألا أخبركم بأهل الجنة؟ قالوا: بلى.. قال: "كل ضعيف متضعف لو أقسم على الله لأبرَّه" --- #الشرح: ضعيف مُتَضَعَّف (بفتح العين) : مغلوب/ محتقر/ مستضعَف/ لا يؤبه له ويستضعفه الناس ويحتقرونه، ويتجبرون عليه لضعف حاله في الدنيا وتواضعه أو ما شابه ذلك... *(فتح الباري شرح صحيح البخاري، وشرح النووي.، أول تعليق)

المقالة رقم 368 لقطة "44" أمهات عظيمة بتقول لابنها: ((هتاكل دة يعني هتاكله 😡.. الراجل بياكل كل الأكلات 😑)) ➖ حبيبتي.. الكلام دة مش دقيق شرعًا.. خدي بالك.. يعني عادي جدا ولا ينافي الرجولة لو ابنك رافض أكلة معينة بشكل ثابت، فما تعتبريش دة مياصة.. ➖ النبي صلى الله عليه وسلم -أشرف وأصلح الناس وأوفرهم مروءة ورجولة- كان فيه أنواع معينة من الطعام ما بياكلهاش، حتى لو قدام منه ضيوف بياكلوا منها عنده وفي بيته: 📌 ((عن خالد بن الوليد أنه دخل مع رسول الله صلى الله عليه وسلم بيت ميمونة -أم المؤمنين- فأُتِيَ بضَبٍّ مجنوذ -لحم ضب مشوي- فأهوى إليه رسول الله صلى الله عليه وسلم بيده، فقال بعض النسوة أخبروا رسول الله صلى الله عليه وسلم بما يريد أن يأكل! -يعني قولوله الأول إللي ناوي ياكله دة إيه لإنه لو عرف مش هياكله- فقالوا: هو ضَبّ يا رسول الله.. فرفع يده.. فقلتُ: أحرام هو يا رسول الله؟ -يعني سيدنا خالد إللي بيسأل- فقال: لا، ولكن لم يكن بأرض قومي -يعني مش موجود في مكة ومش متعود على أكله- فأجدني أعافُه -يعني مش بتقبّل طعمه أو أكله- قال خالد: فاجتررتُه فأكلته ورسول الله صلى الله عليه وسلم ينظر../*البخاري 🐥🐧 طب ولو بيتمايص وبيرفض الأكل عشوائي بدون قواعد؟ 🍉 اتفقوا على أصناف الأكل المقبولة والمحبوبة وهتتاكل بكل درجات قبولها عندهم 🍉 واتفقوا على الأصناف غير المقبولة ومش هتتاكل بالغَصب.. 🍉 وإللي يخلف اتفاق الأكل المقبول = هياكل إللي موجود في التلاجة حتى لو جبنة أو عيش حاف، ومش هنعمل له أكل مخصوص.. ▪️ يبقى لو ابنك مش ميال لأكل معين. سيبيه براحته.. ▪️ لكن في نفس الوقت علميه إن من الخشونة إنه يهيأ نفسه أحيانا لأكل ما لا يستساغ، بنية الاستعداد للجهاد وما فيه من مشاق وانتفاء رفاهية الاختيار ساعتها ما بين أصناف الطعام.. ...باقي "آداب الطعام والنصائح"، في مقالي الطويل "العيال والأكل"، قريبا بإذن الله على صفحتي أو تليجرام... #سؤال: بس في زماننا دة العيال بطرانين أصلا على كل الأكل بسبب الجري ورا الأكل برة والاندومي والسوسيس وغيره، نعمل إيه؟ كمان اأنا شايفة إن الحديث بتاع نفور النبي من طعام "الضب" وعزوفه عن إنه ياكله = معناه إن النفور من الأكل جائز لو كان فقط بسبب إنه أكل مش واخدين عليه في العادة، أكل غريب عنا يعني فمش متقبلين ناكله.. لكن مش كل أكل العيال ينفروا منه العيال نسيبه!، يعني إيه العيل ما ياكلش البتنجان والقلقاس والسبانخ والقرنبيط والسمك لو مش حابين ياكلوهم.. طب والنمو والغذاء المهم لجسمهم؟؟ .......الإجابة في أول تعليقات.. #لقطات_تربوية #أسماءمحمدلبيب أمةالله-عفا الله عنها

المقالة رقم 367 #لقطة "43" #بعد_الشر_عني_أنا_يا_حبيبي = لما ابنك يقولك "أنا لو مُت يا ماما" - ما تقوليلوش "بعد الشر عنك يا حبيبي".. - قوليله بدالها: "بعد الشر عني أنا يا حبيبي" أو الأفضل قولي بدالها: "هتوحشني أوي لو دا حصل وهحزن عليك طبعا يا حبيبي".. حاجة زي كدة.. 🔴 ما تزرعيش جواه إن الموت شر له.. = إحنا كمسلمين، المفروض إننا بننشأ ولادنا على ((يرجون لقاء الله)).. = وإن الموت بأجل الله هو إللي حاجزهم عن اللقاء العظيم الغالي دة.. = يبقى الموت شر ليهم إزاي {وَلَئِن مُّتُّمْ أَوْ قُتِلْتُمْ لَإِلَى اللَّهِ تُحْشَرُونَ}..؟ = ثم إحنا المفروض بنربي ولادنا على حب الموت في سبيل الله، وعلى الحرص عليه حرص الكافر على الحياة.. = فمنين كدة ومنين أقوله لما يجيب سيرة موته "بعد الشر عنك"..؟ 🔴 على الناحية التانية بالنسبة للأم: = الموت طبيعي إنه يكون مصيبة وحزن وبالتالي قد يحصل فيه سخط ويبقى شر على الحيّ إللي هو أهل الميت، لإن الحزن بشكل عام هو مما تعوذ منه النبي ﷺ.. = فممكن هنا إننا نعتبره شر لينا إحنا الأحياء على اعتبار إنه مصيبة وسبب للحزن-- {فأصابتْكُم مصيبةُ الموت}.. { ولنبلونكم بشيء من الخوف والجوع ونقصٍ من الأموال و((الأنفس)) والثمرات..} = وعلى اعتبار إن "الشر" نسبي، يعني شر في ناحية لكن خير في ناحية تانية، لإن ربنا ما خلقش شر محض في الدنيا.. = دة بالنسبة للأم إللي هتعيش حزينة على موت ابنها.. = لكن الابن نفسه : فالظن في موته إنه مش شر نسبي له، بل خير محض ومطلق، لِما للمؤمن إللي يموت على الإيمان من خيرات تنتظره بعد الموت بإذن الله.. المهم ما تقوليش: بعد الشر عنك ساعتها.. #لقطات_تربوية #أسماءمحمدلبيب أمة الله-عفا الله عنها

🔹🔹 الخلاصة: 🍃 علمي ولادك ينكروا الموسيقى في كل وقت ومكان بس بالحكمة والموعظة الحسنة والكلمة الطيبة.. 🍃 علميهم إن طوبى للغرباء دي منهج حياة، ما يعتبروهاش تهمة لما الناس تقول عليهم بكلامهم أو نظراتهم "إنسان غريب!"، بالعكس يطمن إنه على الطريق.. طالما متبع للنبي ﷺ ومخلص لله في اتباعه.. 🍃 علميهم الجُرأة والشجاعة في إظهار "إنكار المنكر" بدون حرج أو غضاضة أو تحسس، زي ما هنتكلم عن دة بالتفصيل في لقطة "ابنك والشجاعة في نصرة الحق".. 🍃 علميهم الاتباع للنبي ﷺ شبرا بشبر وذراعا بذراع، زي ما هنتكلم عن دة في لقطة "رأيناك خلعتَ فخلَعنا"، بإذن الله.. 🍃واصبري على الثمرة.. واحتسبي أجر الجهد في التربية.. وأولا وأخيرا إن عليك إلا البلاغ.. ربنا يقر عينك بالثمرة.. **تنويه: حكم الموسيقى على المذاهب الأربعة: في أول تعليق👇👇.. #لقطات_تربوية #أسماءمحمدلبيب أمةالله-عفا الله عنها

المقالة رقم 366 لقطة "42" 📸 ابنك والموسيقى وقصة مزمار الراعي 📸 📸 مشهد1: بلال ابني -كان 5سنين- في مرة كان في زيارة مع اخواته، بدوني أنا ووالده.. في الزيارة دي كان فيه سيدة من كبار السن، ندهِت على بلال وشغّلِت له أغنية لأم كلثوم بموسيقى على الموبايل وقالت له ارقص يا بيبو.. فبلال سد ودانه وقال لها: لأ ما ينفعش أرقص، الرقص دة بتاع البنات🙄، أنا ولد مش بنت😌.. قالت له طب اسمع بس و مش لازم ترقص؟.. قال لها: لأ ما ينفعش لإن الموسيقى حرام، وصوت ربنا مش بيحبه.. قالت له: دي جميلة تعالى اسمع🤗.. قال لها لأ هسمعها في الجنة إن شاء الله😌.. فقامت قفلت الأغنية وشغلِت له قل هو الله أحد🙃.. فقام شال صباعه وراح كمل لعب بعدها عادي... 📸 مشهد2: بلال لما راح الحضانة -الإسلامية المفروض- المعلمة حكت لي إنهم لما شغلوا الموسيقى سد ودانه و رفض يسمع أو يرقص وساب الأوضة وراح أوضة اللعب لحد ما خلصوا.. وكذلك اخواته وهما صغيرين في المدرسة نفس رد الفعل.. 📸 مشهد3: أنا وولادي الكبار -ابتدائية وإعدادية- كنا في عيادة.. وكل شوية موبايل السكرتير يرن بنغمة عالية وصاخبة وراقصة وماجنة جدا بشكل مستفز فعلا وممتد كإننا في حلبة رقص! وهو سايبه يرن ومش بيرد ولا بيقفل الصوت، يعني مش رنة عابرة حتى! فبقيت كل ما يرن أسِد وداني بإيدي، والولاد كمان بيسدوا ودانهم، لحد ما الصوت يخلص، نقوم ننزل إيدينا كلنا.. 🍄🍄 إزاي الثمرة دي تتحقق بفضل الله وعونه؟ 🍄🍄 بالقدوة +التربية الإيمانية + العلاقة الطيبة + النص الشرعي 🟣 لما تعَدِّي إنتي وولادك من جنب مكان فيه موسيقى بتوصل لودانكم غصب عنكم: ➖ سدي ودانك بإيديكي.. ➖ واعملي تعبير بملامحك إنك متضايقة .. ➖ وحاولي تاخدوا جنب شوية وإنتوا ماشيين في طريقكم لحد ما تحسي إنكم بقيتوا أبعَد نوعًا ما عن صوتها، ثم كمّلي ساعتها طريقك عادي. ...ابنك هيستغرب طبعا وهيسأل . 🌻🌻فهميه إن النبي -حبيبه وقدوته ﷺ- عمل كدة بالظبط لما سمع صوت معازف من بعيد، وإحنا مش أقل إسلاماً من الصحابة عشان ما نقلدش النبي ﷺ في كل حاجة عملها.. 🌻🌻 وفهميه إن ربنا بيغضب على من لا يتمعّر وجهه - لايظهر عليه أثر غضب- لحرمات الله وهي تنتهك.. 🌻🌻 واحكيله قصة المزمار: = سمع ابنُ عمر صوتَ زمّارةِ راعٍ، فوضعَ إِصبَعيه في أذنيه، وعدَّل راحلتَه عن الطريق وهو يقول: "يا نافعُ أتسمعُ؟".. فأقول: "نعم"... فيمضي -يعني يكمل ابتعاد قليلا عن الطريق لحد ما يوصل لنقطة الصوت فيها مش واصل لودانه- حتى قلتُ: "لا" -يعني خلاص الصوت هنا مابقاش واصل- فوضع يديه -يعني نزلها من على ودانه- وأعاد الراحلةَ إلى الطريق، وقال: ((رأيتُ رسولَ الله ﷺ سمعَ صوتَ زمارة راعٍ فصنعَ مثل هذا..))*صححه الألباني.. ✔️ هتلاقي ابنك بيقلدك و بيعمل كدة في المدرسة والحضانة والعيادة وأي حتة وعند أي حد وبكل بساطة وتلقائية بدون أي تحسس بإذن الله.. ✔️ وهتلاقيه أول حد بيقول لو فيه الموسيقى: "سدوا ودانكم يا جماعة".. أو "اقفلوا الصوووت🔇" .. أو "الموسيقى حرام🚫".. أو "مزامير الشيطان في بيتنا والا إيه؟!"...الخ، من وهو عنده 5 سنين وأقل كمان..! ✔️ دة غير انك بتعلمي ابنك يكون مرتبط بنبيه ﷺ كقدوة في القول والعمل وإن قلبه ينزعج عند المنكرات فيبان أثر دة عليه... 🌿.... نضَّفي ودانهم من و هُمّا في اللفة....🌿 🦋... وابنك على ما تربيه، وقلبه النضيف على ما تعوديه...🦋 وخدوا بالكم: ▪️ مشهد1 كان وسط حوالي 8 أشخاص كبار بالغين و5 أطفال دون الحُلُم، وإللي حكالي الموقف نفسه كان ولادي الكبار، وأحد أقارب الولاد كلّموا والدهم وحكوله الموقف و هما فرحانين بإللي عمله... / ومشهد2 كان بيبقى وسط أطفال كتير بيتنططوا ويرقصوا ويغنوا بشكل مغري بالمشاركة لأي طفل / ومشهد3 كان وسط ناس كتير قاعدة في العيادة وكانوا بيبصوا علينا باستغراب يحرج أي حد ويخليه يتردد --- لكن لإن الولاد متعودين على دة من وهما صغيرين وعارفين نصوص المسألة وحكمها شرعا = فبقى رد الفعل تلقائي وثابت بفضل الله.. ▪️ وطبعا كل مرة بندعمهم وبنشجعهم جدا على موقفهم وبنثبتهم أكتر وبنحكيلهم قصة نافع مولى عمر وحفّظناهم شعار: ..🌱فطوبى للغرباء🌱.. ▪️ وطبعا مش محتاجة كلام: أي فيديوهات أو ألعاب أو برامج أو كرتونات فيها موسيقى بنقفل فيها الصوت.. ▪️ وطبعا بحكيلكم دايما مواقف واقعية عشان أقنعكم إن الكلام النظري قابل للتطبيق بعون الله، وماهواش كلام خيالي..

المقالة رقم 365 لقطة "41" 📸 ....العهد... 📸 💡كنت دايما بسأل نفسي: إيه الحكمة من قصة العهد إللي ربنا قصَّها علينا في القرآن؟ العهد إللي ربنا أخده علينا وإحنا لسة في عالَم الذَّر، وقال لنا فيه هناك في العالم الآخر: ألستُ بربكم؟ فقلنا: بلى..! شَهِدْنا.. فقال لنا الله: أن تقولوا يوم القيامة إنا كنا عن هذا غافلين☝️.. 🤔 طب ما إحنا فعلا مش فاكرين دة دلوقتي، طب إيه الحكمة..؟ 👈👈 استشعرت حكمة معينة من دة كالتالي: لو إنت مسلم = فإنت بتشهد بإن { وَمَنْ أَصْدَقُ مِنَ اللهِ قِيلًا.. }، وإنه مُنَزَّه -سبحانه- عن الكذب = وباتالي فإنت مصدقه -عز وجل- في كل شيء بما في ذلك إن الموقف دة بالفعل حصل، وإن كنت إنت نفسك مش فاكره.. لإن بالنسبالك -كمؤمن- أي خبر ربنا قاله = بتتعامل معاه تعاملك مع ((الخبر الصادق)) .. وبالتالي -لو إنت قلبك سليم لا شك فيه في الله عز وجل- بتتحرج وتخجل من نفسك لما بتقع في معصية تتنافى مع كمال عبوديتك لله، لإنك بتفتكر العهد إللي هو أخده عليك دة، وبتحاول دايما تكون أد كلمتك وعهدك إن العبودية الحق = طاعة واستسلام وتمام انقياد وإخلاص... 💡 ...ومن هنا...💡 قررت أطبق التجربة مع ولادي.. جبتهم في يوم، وحكيت لهم قصة العهد الأول بيننا وبين ربنا عز وجل، وطلبت منهم نجدد عهد العبودية الحق لله سوا، وسجلت لكل واحد فيهم تسجيل بصوته على الموبايل فيه تجديد للعهد دة، مع إضافات مهمة لكمال العبودية... 👈👈 العهد كان كالتالي: ((عهد عليا هعبد ربنا وحده لا شريك له في قلبي وأفعالي وأقوالي، ومش هتعمد ارتكاب المعاصي إللي بتغضبه ولا أتعدَّى -عَمدا- حدوده إللي أمرني ما اتعدَّاهاش، ولو حصل في يوم من الأيام وزليت في عهدي دة، أتعهد إني أسارع بالتوبة وعدم الإصرار.. )) -- طبعا لله المثل الأعلى: العهد دة عهد غير العهد إللي ربنا أخده علينا في عالم الذر، وعهدي مع ولادي مُستَأنِس بيه فقط كوسيلة تربوية قرآنية مثمرة بالفعل.. ومُستأنِس كذلك بقوله عز وجل: {ألم أعهد إليكم يا بني آدم ألا تعبدوا الشيطان}.. 💡...ومرت الأيام... 💡 وواحد منهم غلط عمدا في لحظة غفلة = غلطة من الكبائر.. قلت له: إنت نسيت العهد....؟ قال: آني عهد!؟🙄🤐.. وما كانش فاكر أوي إيه دة بالظبط.... طلّعت له التسجيل إللي بصوته وسمعتهوله... افتكره واتأثر جدااااا... 🌿 وبقيت كل ما أحس إن الشيطان داخل عليه أهو أو هيوقعه وقعة مش هيّنة = أقوله: العهد يا فلان.. العهد..! وعمرها ما خيبت معايا بفضل الله.. وطبيعي الإنسان بينسى ويفتن ويحتاج تذكير تاني وتنويع في الوسائل.. 🍂....علموها لولادكم....🍂 🍂.....وانتوا كمان ما تنسوش العهد....🍂 {..وَإِذْ أَخَذَ رَبُّكَ مِن بَنِي آدَمَ مِن ظُهُورِهِمْ ذُرِّيَّتَهُمْ وَأَشْهَدَهُمْ عَلَىٰ أَنفُسِهِمْ أَلَسْتُ بِرَبِّكُمْ ۖ قَالُوا بَلَىٰ ۛ شَهِدْنَا ۛ أَن تَقُولُوا يَوْمَ الْقِيَامَةِ إِنَّا كُنَّا عَنْ هَٰذَا غَافِلِينَ...} #لقطات_تربوية #أسماءمحمدلبيب أمةالله-عفا الله عنها

🎀🎀🎀 يغدو قبل الفجر طفلًا غير مؤدب، ويعود بعد الفجر طفلاً صالحًا ورجلًا قد زاد رزق الإيمان والصلاح في قلبه.. 🎀🎀🎀 يغدو للفجر "بردان" = ويعود منه "دفيان".. دافيء القلب والبدن معا.. 🌿...الفجر تربية....🌿 **المحاضرة الرائعة "كيف تحافظ على صلاة الفجر" للدكتور راغب السرجاني، ممكن تساعدك جدا في تطبيق دة مع نفسك وولادك وأهل بيتك.. #أسماءمحمدلبيب أمةالله-عفا الله عنها #بَشِّرِ_المشائين_في_الظُلَم_إلى_المساجد #بالنور_التام_يوم_القيامة☝️ #لأتوها_ولو_حبوًا☝️ #لقطات_تربوية #أسماءمحمدلبيب أمةالله-عفا الله عنها

المقالة رقم 364 لقطة "40" 📸 ..التربية بالفَجْر.. 📸 🕌 علمي ابنك إن الفجر حياة أو موت.. 🕌 وإنه ممكن ما يروحش المدرسة، بس مش ممكن ما يصليش الفجر = مش العكس☝️.. 🕌 علميه إن مستقبله الدائم = أهم من مستقبله الزائل... وإن مجرد ركعتين النافلة فقط بتوع الفجر خير من الدنيا وما فيها☝️.. 🕌 علميه إن أول حاجة يحطها في خطة "عمل اليوم" وييسر لها أسباب النجاح بإيديه وسنانه = "صلاة الفجر"☝️.. 🕌 علميه إن صلاة الفجر مش أيام الدراسة بس عشان بنصحى كدة كدة بدري "نلحق أتوبيس المدرسة"🚌🏃‍♂️، ولا وقت الامتحانات بس عشان ربنا يوفقنا ويعديها على خير.. ولا وقت رمضان بس عشان بنسهر كدة كدة خوفا على فوات السحور🥗🍕 وما أدراك ما فوات السحور .. 🕌 لأ 🤚.. علميه إن صلاة الفجر هدف ثابت و "تارجت" واضح🎯، في الدراسة والأجازة والامتحانات والصحة والمرض والراحة والتعب ورمضان وكل الشهور... {إِنَّ قُرْآنَ الفَجْرِ كاَنَ مَشْهُودًا} 🕌 علميه إنه يصلي الفجر حتى لو عيان أو بردان أو تعبان.. مانتي بتوديه المدرسة لو عيان أو بردان أو تعبان بالذات لو فيه امتحان.. طب وامتحان الفجر...؟ عادي يسقط فيه كل يوم كدة....؟ عادي يتعود إنه يبدأ يومه بمعصية كدة ؟ 🕌 علميه إنه لو في صلاة الفجر هيلاقي ألف جنيه أو لعبة غالية هدية = هيقوم مهما كان هلكان من التعب، حتى لو هيزحف على بطنه مش هيفوتها .. {...بَلْ ((تُؤْثِرُونَ)) الْحَيَاةَ الدُّنْيَا.. وَالْآخِرَةُ ((خَيْرٌ)) وَ((أَبْقَىٰ))...}.... 🕌 علميه إن ((كنوز الفجر)) أولَى بالتضحية والزحف وتذليل الصعاب وبذل كل غالي.. 🤚ربنا -عز وجل- إللي قال كدة على لسان نبيه ﷺ، إن الإنسان لو يعرف حجم الخيرات إللي في صلاة الفجر = لقام إليها ولو زحفًا: "لو يعلمون ما في العتمة -العشاء- والصبح = لأتوهما ولو حَبوًا".. 🕌 علميه {...وَالصُّبْحِ إِذَا تَنَفَّس...}.. قوليله يقوم يجيب قلبه يتنفس بالسجود، ويجرجر روحه تاخد لها نَفَس مع أول أنفاس للطبيعة المسلمة كل يوم، لعل وعسى النفس تطهر من قسوتها وتفيق من غفلتها وتنتعش حُجرات القلب بالنقاء والطهر والإيمان.. 🕌 وانتي بتقوّميه للفجر = فكريه بالكلام دة.. 🕌 وقوليله: دة هي دقايق وهترجع تاني للسرير قرير القلب والعين والصحيفة.. 🕌 وقوليله السرير موجود مش هيطير، لكن الفجر هيطير، ولو فجر طار = عمرك ما هتعرف ترجعه تاني ليوم القيامة.. 🕌 وعلميه ينام بدري -صيف شتا- عشان يعرف يقوم للفجر.. وفهميه إنه لو ما صحيش معاكي للفجر هتخليه تاني يوم ينام بدري أكتر لإن دة معناه إنه ما كانش نايم كفاية.. هتلاقيه بيصحى معاكي بسهولة إن شاء الله.. ولو عصلج = فكريه بكدة هيفوق ما تقلقيش.. وفهميه إن النوم بدري دة هو السنة النبوية أصلا والأمر مالوش علاقة بإن الأطفال بتنام بدري، لأ النبي نفسه ﷺ كان بينام بدري.. وطبعا مواعيد الصيف بتفرق عن الشتا، بنتكلم عن قاعدة عامة: "النوم بدري عشان الفجر ما يفوتناش" 🕌 ومن سن سبع سنين علميه يصلي الفجر في المسجد مع باباه كل ما ينفع.. ولما يبلغ ١٠ سنين خليه ما يفوتش نزول الفجر في المسجد.. |🕌 ولو دة مش متاح لأي سبب = اتفقي مع أي جار صالح عندكم في العمارة يكون أهل ثقة وإيمان ومن معارفكم وبيصلي في المسجد بانتظام = اطلبي من زوجته تخليه يعدي ياخد ابنك يصلي معاه الفجر ويرجعه.. على إيه دة كله يا أسماء!!؟؟ 👈 أفكرك: "لو علموا ما فيها من خير لأتوها ولو حبوًا".. 🕌 ولو مفيش حد غيرك يوديه وتقدري على دة = انزلي وديه الفجر بنفسك واحتسبي أجر تربية الرجال.. زي ما والدة الإمام أحمد وهو صغير ويتيم الأب كانت بتاخده الفجر يصلي في المسجد من وهو عنده ١٠ سنين.. 🚫 طبعا دة لو عناصر الأمان متوفرة عندك في مجتمعك وتأمني على نفسك في النزول في الوقت دة والمسجد جنب بيتكم.. والدة الإمام أحمد كانت في مجتمع بيعرف حدود الله و بيصون النساء وبيحترم المنتقبات و بيعمر المساجد.. ☝️المهم شوفي تقدري على إيه = واعمليه = واحتسبي الجهد والحرص.. 👈ووازني الأمر بميزان الشرع والممكن والواقع والتكليف حسب المرحلة العمرية.. ⭐️"بَشِّرِ المشائين في الظُلَم إلى المساجد = بالنور التام يوم القيامة".. 🕌 ولما تلاقي نفسِك مكسلة تقوِّميه = قولي لنفسك: {...وَأْمُرْ أَهْلَكَ بِالصَّلَاةِ وَ((اصْطَبِرْ)) عَلَيْهَا ...}.. 🕌 ولما تلاقي نفسك قلقانة عليهم من البرد أو صعوبة الرجوع في النوم = قولي لنفسك {... لَا نَسْأَلُكَ رِزْقًا.. ((نَّحْنُ نَرْزُقُكَ)).. وَالْعَاقِبَةُ لِلتَّقْوَى... } 👈👈 النوم رزق، والدفء رزق، والرجولة رزق، والعيال الصالحة رزق.. 👈👈 و ربك قال ما نقلقش على الرزق... دة بيرزق الكافر إللي بيجحد نعمته كلها وبيجحده هو ذاته عز وجل..! ما بالك برزق المؤمن؟ ☝️بشرط: نكون متوكلين على الرزاق مُتعبدين له بإخلاص في القَصد ويقين في الرزق، كتوكل الطير: تغدو خِماصا وتروحُ بِطانا..

المقالة رقم 363 #لقطة "39" 📸 مَهري ((القرآن)).. وشفيعي ((القرآن)) 📸 🌿... ماما أنا خلصت ربعين من القرآن، مسامحاني خلاص؟...🌿 ....دي جملة معروفة في بيتنا بفضل الله.. بسمعها من ولادي لما بيكون حد فيهم بيصالحني من موقف كان فيه زعل "مش بسيط" ما بيننا.. ولله الحمد رب العالمين... = وطبعا ماهواش مولود بيها أكيد. = وطبعا أخدت وقت وجهد على ما عوّدتهم عليها بحول الله وقوته.. 🔘🔘علمي ابنك لما يزعّلك أوي أوي، وتقفلي منه جامد = يجري يفتح مصحفه ويقرا قرآن.. على غرار ((مهري القرآن)) كدة... 🔘🔘 وعلميه إن القرآن إللي هيقراه هيشفع له عندك في الدنيا... على غرار ((شفيعًا لأصحابه)) كدة.. ربنا عز وجل هيجعل القرآن يشفع له عنده في الآخرة: "اقرأوا القرآن فإنه يأتي يوم القيامة شفيعًا لأصحابه"*رواه مسلم.. 🔷 بفضل الله وحده، ربنا ألهمني بالحل دة لما كانت بتحصل قفلة شديدة بيني وبين أحد أبنائي في مرحلة طفولته المبكرة والمتأخرة -إللي كانت صعبة جدا الحقيقة وفيها عِند وتمرد وإسراف في الخطأ والاستهتار بالعواقب... 🔷 كنت ببقى عاوزاه يختفي من قدامي شوية ألتقط فيها أنفاسي وأفكر نفسي بالتقوى والصبر والاحتساب والهدوء عشان أحفظ لساني عن السوء وما أظلمهوش بانفعالي.. 🔷 وفي نفس الوقت ما أسيبوش فترة طويلة لشيطانه وما أسيبش الشيطان بيننا كمان فترة طويلة.. 🔷 وفي نفس الوقت أعلمه طريقة اعتذار يصالحني بيها تشفع له عندي ويكون بيبعمل فيها مجهود وبَذل أكتر = عشان ما يستسهلش تكرار الخطأ والاستهتار، ويعمل حساب للعاقبة.. 🔷 وفي نفس الوقت تكون طريقة فيها تهدئة ربانية لقلبه وتربية لنفسه على البذل والتزكية لتصحيح خطؤه ويطلع منها بأكبر قدر من الخير لقلبه وصحيفته وعلاقته بإللي بيحبهم.. 🌿.....ولم أجد لكل ذلك خيرا من القرآن....🌿 🔘🔘 فالحمد لله... عوّدته لما يبقى فيه زعل كبير بيننا، إنه يصالحني بالقرآن.. شفيعك.. 🔘🔘 وكنت بقوله كمان إن دة كلام ربنا، وربنا هو إللي يملك قلوب حبايبك، وهو إللي هيجيبهملك لو انت استعنت بيه ولجأت له.. 🔘🔘 وبفضل الله بعد صعوبات في التعويد على دة وممانعة أحيانا كتير ونسيان منه أحيانا وتذكير مني له أحيانا وثبات معاه على ذلك طمعًا في الثمرة = بقيت بفضل الله أخيرا بتفاجيء بيه بعد طول اختفاء وصمت في أحد غرف البيت، جاي يصالحني ويقول لي أنا قريت 3 أرباع من القرآن، أو أنا قريت سورة كذا وهي ربعين يا ماما، أو أنا قريت كذا صالحيني بقى.... وأخوه كمان بقى بيقلده بفضل الله.. 🔘🔘 وكنت بصالح فورا طبعا وباخده في حضني، رغم إن بيبقى في نفسي منه لسة أشياء غير مرممة وانفعالات متأججة.. 🌿 لكن ببقى عارفة ومتأكدة إن الحضن والقبول له دة دلوقتي بعد كل دة = هيرمم كل شيء جواه وجوايا، لدينه ودنيته، واستشعار ثمرة دة في قلبه واحتساب أجر غرس محبة القرآن في قلبه = بيطفي ناري بالفعل.. 🌿 وبالفعل.. إلى الآن بلمس بركة العادة دي والحمد لله رب العالمين.. 🔘🔘 وكِبِر وعَدَّى مرحلة الطفولة المبكرة، والزعل الشديد بيننا بقى نادر بفضل الله ثم بفضل نضج انفعالاته المرحلية نوعا ما بردو أكيد طبعا.. 🔘🔘 ولما بقى يحصل بيننا زعل كبير لا سمح الله = بقى تلقائيا يجري على القرآن -شفيعه الوفيّ 　 - أو الأذكار أو الدعاء أو الصلاة والاتصال بربنا عموما... ✔️ منها يبدل السيئة بحسنة، وكل الحسنات دي في ميزانه بنص الأحاديث النبوية لمن هم دون الحُلُم.. ✔️ ومنها يحرق شيطانه و يرغمه ويتعلم يهزمه ويملك نفسه.. ✔️ ومنها يزكّي قلبه بذكر الله ويغسل روحه ويطفي غضبه.. ✔️ ومنها ((يستهدَى)) بالله الهادي وبكلامه عند الغضب.. ✔️ ومنها يتعلق بمعنى "اللهم شفِّع فينا القرآن".. 🌿 وطبعا كل دة يستلزم أصلا إن علاقتكم ببعض تكون قوية وزعلك منه يكون نقطة ضعفه، زي ما قلنا في "التربية بالحب".. 🌿 ويستلزم إن علاقته بالقرآن كمان تكون قوية، زي ما كتبنا خطوات دة في سلسلة "العيال والقرآن".. 🌿...علمي ابنك يتصالح معاكي ومع نفسه = بالقرآن... 🌿...علمي ابنك إن شفيعه عندك القرآن... .🌿...واصبري على الثمرة... **تنويه: ربعين أو أقل أو أكثر.. الكمية مش بتبقى ثابتة.. كانت بتتراوح من صفحتين أقل شيء سامحة بيه عشان يعدي وقت وجهد كافي- لحد حزب أو أكتر حسب اجتهاد كل واحد ساعتها.. = منشور آخر لتطبيق هذه الأداة: https://www.facebook.com/permalink.php?story_fbid=pfbid0vWTZYWvRTpZZcqjyBm933hWSGXP6d8Wxc6bPf95Mc9HiLZiN5gHuPCsSzWa4koqUl&id=100007689874839 #لقطات_تربوية #أسماءمحمدلبيب أمةالله-عفا الله عنها

المقالة رقم 362 #لقطة 38 📸 ضربة بالقلم على وش ابنك تساوي عشر جَلدَات! 📸 ☝️ ما تضربيش ابنك على وشه.. ☝️ ولا تلعني وتشتمي وشه.. 🚫 لإن ربنا خلق وجه الإنسان على صورته عز وجل -ولله المثل الأعلى.. 🚫 لإن في شرعنا، ضربة واحدة بالقلم على وشه كإنك بالظبط جلدتيه بالكرباج على جسمه أكتر من 10 جلدات!! 🚫ولإن ده كان "عبد" عندك كان هيبقى مطلوب منك ساعتها شرعا كفارة عن لطم وجهه: إنك تعتقيه وتطلقي سراحه...! قال النبي ﷺ: ➖ ((لا تضرب الوجه فإن الله قد خلقه على صورته))/*مسلم ➖ ((ذَا ضَرَبَ أَحَدُكُمْ فَلْيَجْتَنِبِ الْوَجْهَ، وَلَا يَقُلْ: قَبَّحَ اللهُ وَجْهَكَ وَوَجْهَ مَنْ أَشْبَهَ وَجْهَكَ، فَإِنَّ اللهَ تَعَالَى خَلَقَ آدَمَ عَلَى صُورَتِهِ))/*السلسلة الصحيحة للألباني ➖ ((لا تُقَبِّحُوا الْوَجْهَ فَإِنَّ اللَّهَ خَلَقَ آدَمَ عَلَى صُورَةِ الرَّحْمَنِ))/*مختلف في صحته لكن ممن صححه: الإمامين أحمد وإسحاق بن راهويه. ➖ ((.....والمعروف أن اللطمة لطمة واحدة، وتكون على صفحة الوجه أو ما غطى من الوجه، فانظر إلى هذا الفقه العجيب، فإن ضربَهُ فوقَ العشرةِ أسواط، أو لطمَهُ على وجهه لطمةً واحدةً، ففي الحالتين: الكفارةُ إعتاق هذا العبد؛ لأن الوجه له حرمةٌ تختلف عن حرمة بقية البدن....))/*1شرح صحيح مسلم 🌱ما تهينيش الوجه الكريم إللي ربنا كرمه.. 🍂 ما تهينيش الراس إللي هترفع راسك يوم التناد.. 💔ما تهينيش الوجه إللي هيبيض وجهك يوم الحساب.. ☝️ما تهينيهوش لا باللفظ ولا بالإيد.. 🚫🚫 هامش مهم فيه شرح للأحاديث على منهج أهل السنة والجماعة : في أول تعليق 👇🏻👇🏻 #لقطات_تربوية #أسماءمحمدلبيب أمةالله-عفا الله عنها

المقالة رقم 361 #لقطة "37" ...ابنك وإجابة الدعاء.. و"اللهُ أكثَر"!   ما تعلميش ابنك إنه يدعي ربنا يديه بونبوني، يقوم يصحى يلاقي بونبوني تحت المخدة، تكوني إنتي طبعا إللي حطاهوله وهو ما يعرفش. بكرة يدعي ربنا إنه يديله بونبوني تاني وما يلاقيش البونبوني فيتصدم..  وبكرة يكبر و يعرف إنك كنتي بتضحكي عليه... ...كدة بنخلخل عقيدتهم ببساطة وبنهز يقينهم...  علميه أمور الدين صافية نقية صادقة بسيطة، بكل أمانة علمية.. بدون زيادة ولا نقصان.. وبالتالي: * علميه إن إجابة الدعاء بتكون بإحدى ثلاث طرق، مش بطريقة واحدة فقط محصورة في تحقق الدعوة بعينها.. لأ.. تلاتة : -  تتحقق الدعوة نفسها بالظبط.. -  أو يُصرَفُ عنه من السوء مثلها.. -  أو بتتحوش له للآخرة، ودة أكتر موضع هيفرح فيه بتأجيل دعواته بلا شك... * وعلميه إن فيه فرق بين تحقق الدعاء، وإجابة الدعاء.. -  إجابة الدعاء = تلقي نداءك بالقبول وعدم انغلاق أبواب السماء دونك بسبب غضب الله عليك لمعاصي أو أمراض قلب أو وجود أي مانع من موانع إجابة نداءك.. -  تحقق الدعاء = تنفيذ الدعوة بحذافيرها بالظبط.. * وعلميه يتحرى أوقات ومواضع وأسباب الإجابة وآداب الدعاء، ويتجنب موانع الإجابة، ويعمل إللي عليه فيهم عشان يبقى مستجاب الدعاء، ثم يكون بعدها عنده يقين في إن الله عز وجل قريب مجيب لدعائه.. * وعلميه ما يستعجلش الإجابة وإنه ما يزعلش بعدها من عدم تحقق الدعاء بالظبط، لإنه: -  أولا: ممكن يبقى مصمم على دعوة معينة هي شر له مش خير (( وَيَدْعُ الْإِنسَانُ بِالشَّرِّ دُعَاءَهُ بِالْخَيْرِ ... وَكَانَ الْإِنسَانُ عَجُولًا)).. -  ثانيا: لإنه عنده ثقة ويقين وتفويض تام لله عز وجل في علم مواطن الخير والمصلحة وتحقيقه أينما كان بكن فيكون.. * وعلميه يكتر من الدعاء عشان: 1-أولا وأخيرا من باب تحقيق العبودية لرب العالمين عز وجل، 2-ولإن كل ما كَتَّر فهو المستفيد: قالﷺ: {...ما من مسلم يدعو بدعوة ليس فيها إثم ولا قطيعة رحم، إلاأعطاه الله بها إحدى ثلاث: إما أن تعجل له دعوته، وإما أن يدخرها له في اللآخرة، وإما أن يَصرف عنه من السوء مثلها... قالوا: إذًا نُكَثِّرُ؟ = قالﷺ: الله أكثر...} #الله_أكثر #لقطات_تربوية #أسماءمحمدلبيب أمةالله-عفا الله عنها

المقالة رقم 360 #لقطة "36" ..تعارض توجيهاتك لابنك مع توجيهات مامتك له..  لما تكوني بتوجهي ابنك قدام مامتك، في موقف عام مالوش علاقة بالعقيدة والدين يعني: مثال = الدنيا برد مثلا وهي من النوع اللي بيصمم ان الولاد لازم يلبسوا بنطلون داخلي و كوفية ع المناخير وطاقية عالراس، لكن انتي بتسيبي ولادك هما يقرروا بنفسهم الأمور دي حسب إحساسهم هما بالبرد و درجته عشان بتحبي تعلميهم تحمل المسؤولية وتقدير عواقب الأمور بنفسهم.. المهم انه موقف تربوي دنيوي عام، مش موقف شرعي ولا هي حاجة غلط بشكل محسوم..  وفجأة لاقيتيها عارضت كلامك قدامه..  أو بالفعل بدأت هي بتوجيه ابنك توجيه ضد كلامك له..  فقمتي إنتي حاولتي تتحايلي على التوجيه دة بتوجيه آخر مقابل له..  قامت هي صمّمت -قدام ابنك- إن كلامك غلط..  اسمعي كلامها و ما تعارضيهاش قدام ابنك، واخفضي جناح الذل من الرحمة بشكل عملي و ريحي قلبها.. وما تخافيش إن ابنك كدة تربيته هيبقى فيها خلل.. بالعكس: ابنك كدة ((اتربَّى)) بشكل عملي..... ....إزاي....؟ ابنك كدة اتعلم عمليًا معنى البِرّ بالآباء واحترامهم، إللي بتحاولي تلقنيهوله ليل نهار تجاهك إنتي وباباه، و شافك وإنتي مُتَّسِقة مع ذاتك وقِيَمك وتعاليم دينك، ومع توجيهاتك له في دة، بشكل عملي تطبيقي واضح.. ...باختصار: شافك قدوة في تعليمك له بر الوالدين... فاحتسبي الأجر من ربنا على دة ساعتها، واطمني: ...البِرُّ لا يَبْلى... ولما تروحوا بيتكم = ابقي اتفاهمي مع ابنك حولين الموقف دة بكل احترام و رُقِيّ وبر وإحسان لسيرة أمك بالغيب.. وفهميه وناقشيه بالدليل الشرعي أو العلمي، التصرف الصح إيه والتصرف الغلط إيه.. وإنّ "ما عليكِ إلا البلاغ" مع الناس عموما وهو عليه إنه يختار الصح إللي ثبتت صحته بالدليل، ويترك الخطأ إللي ثبت خطؤه بالدليل، وعلميه إن {...كلُّ امرِءٍ بِمَا كَسَبَ ((رَهيِنٌ)).. }، وحفزيه لاتباع الحكمة أينما وجدها، بالآية: {...الَّذينَ يَستَمِعونَ القَولَ فَيَتَّبِعونَ ((أَحسَنَهُ))...}  👈🏻 {أُولئِكَ الَّذينَ هَداهُمُ اللَّهُ وَأُولئِكَ هُم ((أُولُو الأَلبابِ))... }  ولو الموقف دة كان فيه محرمات واضحة وأمور عقدية لا يجوز السكوت عنها، لعل والدتك ما تعرفش حرمته:  فوضحيلها بكل احترام و بر، سواء في ساعتها أو بعدين..  ولو ابنك هو إللي يوضح لها دة وهيبقى دة أقرب لقلبها = يبقى أحسن وأحسن..  وبعدها مالكيش سلطان عليها ولا على غيرها، وَما أَنتَ عَلَيهِمْ بِوَكَيل... أهم حاجة البر والإحسان والاحترام والمصاحبة بالمعروف.. وتقدير المكانة والسن والعلم والحكمة الأعلى للكبار وإعطاءهم اعتبار علنًا قدام ابنك.. وتجاهل الإساءة والصبر على ذلك على كل حال، إيمانًا واحتسابًا.. ثم نترك المحرم إللي قد يؤمرونا بيه، ونتبع سبيل الطائعين ولو لم يكونوا معنا فيه: {... وَإِن جَاهَدَاكَ عَلَىٰ أَن تُشْرِكَ بِي مَا لَيْسَ لَكَ بِهِ عِلْمٌ ((فَلَا تُطِعْهُمَا))... وَصَاحِبْهُمَا فِي الدُّنْيَا ((مَعْرُوفًا))... وَاتَّبِعْ سَبِيلَ مَنْ (( أَنَابَ إِلَيَّ ))...}..... #لقطات_تربوية #أسماءمحمدلبيب أمةالله-عفا الله عنها

المقالة رقم 359 #لقطة "35" ... شاب نشأ في عبادة الله.. 1-ربي ابنك/بنتك على حمل هم الدين والدعوة.. 2-ربي ابنك/بنتك على نَقْع قلبه في القرآن حفظًا ومنهجًا.. 3-ربي ابنك/بنتك على التخفف من الدنيا وعلى الخشونة وعدم المياعة.. 4-ربي ابنك/بنتك على معالي الأمور والأهداف والغايات.. 5-ربي ابنك/بنتك على التخطيط الشامل لحياته حولين محور ((رضا الله))... 6-ربي ابنك/بنتك على إن الإنجاز الحقيقي والفوز الساحق والميدالية الذهبية بجد هما في رضا الله مش رضا الناس، وذلك هو ((الفوز العظيم))... 7-واعملوا دة وإنتوا بتحبوهم وبتحنّوا عليهم وبتصاحبوهم وبتشاركوهم وبتشجعوهم وبتصبروا عليهم... 8-واعملوا دة إنتوا الأول عشان تبقوا قدوة ليهم في "فن ملء الصحيفة" إنتوا كمان..  إعملوا التمانية دول = وإنتو مش هتحتاجوا الغرب يعلموكم تربوا ولادكم إزاي......... ....دي مقومات صناعة ((الطفل القائد))....  التربية = علم وعمل وقدوة..  والثمرة = شاب نشأ في طاعة الله..  التربية صعبة = والثمرة تستحق... ❓ سؤال مهم من التعليقات: طب إزاي أطبق وأنفذ دة بشكل عملي؟ = الجواب: كل اللي بنقوله في التربية على مدى سنوات.. ▪️▪️بالتالي باختصار قدر الإمكان: * النقطة الأولى—- فأبسط وأقرب إجابة: بتربيته فيما يخص موضوع المذاكرة مثلا على القواعد اللي ذكرناها في ملف المذاكرة. * النقطة الثانية—- فبردو أبسط وأقرب إجابة: بتطبيق كلامنا في ملف العيال والقرآن مثلا. * من النقطة الثالثة للثامنة—-فقصص كتير من حكاياتي مع مشاريع حياتي ولقطات تربوية —بتركز على ده وصعب نحصرها هنا بالتالي،،، اللقطة دي والإجابة عليها مش كلام جديد، اللقطة دي ما هي إلا تجميع لأهدافنا من كل ما سبق من ملفات على مدار سنوات، ويتلخص في كلمتين: ربيهم بالقرآن والسنة وعلى القرآن والسنة. #شاب_نشأ_في_عبادة_الله #مقومات_صناعة_الطفل_االقائد_والطفل_القدوة #لقطات_تربوية #أسماءمحمدلبيب أمةالله-عفا الله عنها