سأكون "تحفيز للمذاكره"

خليك كتوم ✳️ عشان تعيش مركّز على هدفك ✳️ عشان محدش يؤثر عليك سلبًا برأيه ✳️ عشان العين ✳️ عشان بتحس بالراحة الكذابة لمّا بتتكلم عن هدفك ومع الوقت بتكسّل ✳️ عشان ما تتصدمش من نظرة الناس لما ما تنجحش في الوصول ✳️ عشان احلى حاجة تعملها انك تعمل حفلة بعد النجاح احسن ما يتعمل عليك حفلة من نظرات الناس وكلامهم. خليك متّزن وواثق في نفسك واسكت #خواطر_قد_تصل

انت لازم تكون فخور بكل خطوة خطيتها لوحدك. محدش عاش التجربة بتاعتك غيرك. الكل بينصح من ورا الباب او السوشيال زي حالاتي كده لكن في النهاية انت اللي بتقفل بابك عليك وتكمل معركتك مع كتبك او رزقك او شغلك. مديونين للي بيحسّ بينا ويشجعنا بس مديونين اكتر لنفسنا ولتعبنا وسهرنا ومجهودنا. مقطعناش المسافة دي كلها بسهولة. خليك فخور بنفسك مهما حصل 💪 #خواطر_قد_تصل

Don’t take anyone for granted وشكرًا

ما تضيعش عمرك تحاول تثبت نفسك لحد. اشتغل على نفسك عشان نفسك ودا أكبر انتصار

مهما كانت النتيجة لمجهودك وعملك اِرضى طالما عملت اللي عليك اِرضى طالما عذرت نفسك قدّام ربنا اِرضى حكمته ورحمته هم اللي بيحددوا طريقك

تم تحديث البوت للرد على الرسائل @Bot34423bot

هتكتر حواليك المغريات والحرام هيختلط بالحلال وهتحسّ نفسك تايه بس لو سيبت الحرام عشان ربنا، ربنا هيعوّضك بأكتر من اللي تتمنّاه دايما قول اللهم أغننا بحلالك عن حرامك ؤاغننا بفضلك عمن سواك 💚💚💚

اجتهد لحد ما تثبت لنفسك قبل أي حد تاني انك تستاهل كل حاجة حلوة في حياتك. انت أولى الناس بنفسك د حازم محمد عبدالتواب

وإنت بتدوّر على حلم بكرة وفرحة النهارده متنساش نعمة امبارح الشكر يزيد النعمة الحمد لله دائما وأبدا

الطبطبة النفسية على طلاب ثانوية عامة مش كفاية بالعكس انا بعتبرها خداع. مش كل سنة نفس الطريقة ونقيس بألفين تلاتة جايبين ١٠٠٪؜ ونفتكرهم القاعدة. مش كل سنة هتبقى نواح وبكاء ونفسيات متدمرة وناس كان حلمها في السما مش عارفين نعالجهم لحد الوقت. يا ابني ويا بنتي ربنا شايف تعبكم وحسبكم الله وكفى.

طبعًا مع كل امتحان فيه أسئلة عليها اتفاق بالصعوبة او الغرابة ومع كل حالة غِش بتحصل في اي امتحان الواحد بيبقى حزين على الورود دي.. مطلوب مجاميع عالية يدخلوا بيها كليات ترضيهم وترضي أهلهم وتفرحهم ومش عارفين يعملوا كده عشان ظروف الامتحان أو الغش اللي بيدّي الحق لغير صاحبه. لكل واحد بيحط امتحان : انت مسؤول أمام الله عن اي ظلم بتتعمد تعمله بأسئلة ما يعرفوهاش. لكل واحد بيراقب لجنة ويسيب الغش فيها بأي دعوى بالذات انك بتساعدهم فأنت مسؤول أمام الله عن الغش دا. لكل طالب حاسس انه اتظلم وراح أمله وحلمه: لعله خير يا ابني لعله خير وحقك عند ربنا موجود ولو اجتمعوا كلهم ضدك لن يضروك الا بما شاء الله. رفعت الأقلام وجفّت الصحف

هلا هلا بالشباب 🤝👋 كفاره للناس اللى خلصت امتحانات 🥳🥳 وعقبال اللى لسه مخلصش وربنا يوفقه . المهم هتعملو إيه فى الإجازه ؟ شاركو على البوت 👇 @Bot34423bot أبهرونى 😁

ربنا أعطاك سبب وطريق تتعب فيه عشان توصل للآخرة عبادة وعمل. وفي نفس الوقت تقدر تعيش وتستمتع بالدنيا دون غفلة. ويا سلام لو طريقك وعملك كان خير لأن ربنا أعطاك كل مقومات الخير وانت بس اللي مش واخد بالك. انت على ثغر : إيّاك تفرّط فيه

عدم التوفيق في الامتحان مش معناها غضب ربنا عليك. ربنا ممكن ما ييسرش ليك التوفيق في الامتحان دا وتضيع منك كام درجة لأن الخير بتاعك في مكان تاني ربنا بيوفقك ليه بعدم التوفيق هنا. اللي فات مات ، ركِّز عالجاي #خواطر_قد_تصل د حازم محمد عبدالتواب

محدش كان سوبر اول ما دخل الكلية واكاد اجزم ان الكل بيبقى خايف اول شهر عالاقل خوف غير طبيعي والبعض بيمتد الخوف والقلق عندهم سنة واتنين كمان. النقلة الرهيبة بين حياة الثانوي وحياة الكلية هيا السبب. طبيعي جدًا تكون مصدوم ومش مصدق نفسك وطبيعي كمان انك تتعثر لو مالحقتش نفسك بسرعة. اللي يلاقي نفسه مش قادر يواصل لازم يتكلم ويفضفض مع حد اكبر منه في الكلية ، حد مُخلص نصيحته تحترم وكلامه طيب ولازم يكون مستمع جيد. طبيعي على فكرة ثقتك في نفسك تتهز بالذات قعدة المدرج الاولى اللي بتخليك حاسس انك مش انتا ودا مش مكانك لكن ما تسيبش نفسك في دوامة مش عارف تخرج منها. حكيت قبل كده ان اول سيمستر عندي ومن اول محاضرة كان اشبه ما يكون بالخيال والكابوس لدرجة اني كنت بروّح إما ابكي مش مصدق ان انا نفس الشخص المتفوق في الثانوي اللي بيعمل ملخصات او اني اروّح أنام واهرب من المذاكرة والاحباط. كمان زمان بتاعي كان مختلف عنكم شويتين الموبايلات كانت في البداية ومفيش انترنت بالشكل الواسع دا دلوقت سنة ١٩٩٥. واتكلمت مع حد توسمت فيه الخير في سنة ساتة البكالوريوس وقاللي كلمتين شيلتهم امانة ليكم : اشتغل وبس ، اقع وبعدين اقف لكن تقعد تعيط كل يوم يبقى هتفضل مكانك او تنسحب. قاللي كلنا كنا كده وبعدين مننا اللي انسحب وندم ومننا اللي كمّل ووصل ومننا اللي غيّر المسار تمامًا. قاللي ارجع لنفسك وشوف مكانك ولو لقيت نفسك في نفس المكان اللي اتمنيته امبارح يبقى عيب انك تسيبه بسهولة من غير ما تحارب. ونا بقولكم يا ولاد احنا اجيال ورا أجيال بنستلم ونسلّم يا ولاد الدنيا حرب كبيرة جواها معارك صغيرة وإيه يعني لو خسرت معركة اتنين تلاتة واتعورت وبعدين قمت كملت وانتصرت. ما لا يدرك جلّه لا يترك كلّه. ما تحت سماء الله يجري بقدر الله. حياتنا خطواتٌ لا قفزات. من داوم طرق الباب فُتِحَ له الباب بلا شك. #خواطر_قد_تصل د حازم محمد عبد التواب

على فكرة مش عيب تبكي ولا تحس بالضعف لأن دي طبيعتنا. العيب ان الناس يشوفوا ضعفك لأن محدش بيرحم

سنين عمرك اللي بتروح منك في التعليم مش ضايعة. سنين تعبك والضغط النفسي اللي عشتها وبتعيشها مش خسارة. كل ليالي سهرك وايام تقوقعك في البيت على كتاب مش عارف تخلصه مش هدر. كل لحظاتك بعيد عن اهلك وكل غربتك حتى وسط اهلك مش هباء. كل اللي فات ولسه جاي من عمرك في طلب العلم ثواب وأجر وبركة في عمرك واعرف ان كل لحظة مرّت من عمرك هتفيد عيالك بعدين واعرف ان كل لحظة تعب وارهاق قصدت بيها تتعلم وتكسب حاجة جديدة في حياتك هتتردلك ثواب كبير وخير في حياتك بس لو احسنت النية. كام نظري وكام شفوي وكام عملي، كام سؤال وكام اختيار من متعدد وكام صح وغلط ، كام واسطة وكام تهكم وكام تصقيف وكام شكر في تعبك . كل ده لله وكل ده راجع راجع بفايدة ليك لو محستهاش في الدنيا هتلقى ثوابها عند ربنا . بلاش تضغط على اعصابك وبلاش تنهار وبلاش تكون الدراسة سبب في تكسير نفسيتك وبلاش تكبر ونتا مهزوم لأن كل ما تحت سماء الله يجري بقدر الله وكل ما هو رزقك سيأتيك رغمًا عن كل عباد الله ولو اراد الله لسخّر عدوّك لك دون ان يدري عدوك انك تستفيد وتربح من وراء عداوته.. هو الله حين يعطي وهو الله حين يمنع وما بين المنح والمنع شكر وصبر فكن مؤدبًا مع الله وكن حافظًا لنفسك وجسمك ولا تقنط من رحمة الله ابدا. #خواطر_قد_تصل أ د حازم محمد عبد التواب استاذ جراحة الانف والاذن والحنجرة بقصر العيني جامعة القاهرة

اللي مش بيصلّي ناقص في حياته حاجات كتير أوي. ناقص الهدوء وناقص البركة وناقص راحة البال. ناقص انك تبقى عملت الواجب اللي عليك قدّام ربنا وأهم سؤال هتُسأل عنه. صلّي حتى لو مش عارف تخشع..صلّي حتى لو بتتأخر غصب عنك عن الصلاة. لكن اوعاك تضيّع فرض واوعاك تهمل فرض واوعاك تنسى انه فرض.

تاني وتالت وعاشر👇 ١- سعيك للمذاكرة ثواب. ٢- خوفك على وقتك ثواب. ٣- ترتيبك لعملك ثواب. ٤- إحساسك بالقلق من الامتحان ثواب. ٥- سعيك تفرّح أهلك ثواب. ٦- محاولة تعويض وقتك الضايع ثواب. ٧- الكلمة اللي بتحبطك وتستحملها وتكمل ثواب. ٨- السؤال اللي راح منك رغم تعبك ثواب. ٩- مجرد سعيك على العلم ثواب. ١٠- فكرة إنك تدوّر وتحفر في الصخر عشان مستقبلك ثواب. ✅ كل عملك في طريق العلم خير يثيبك عليه الله فسلِّم أمرك لله. #خواطر_قد_تصل د حازم محمد عبد التواب