سأكون "تحفيز للمذاكره"

أعتقد أحلى دعوة لما تقابل حد جديد في حياتك انك تدعي ربنا يديلك خيره ويبعد عنك شرّه زيه زي العربية كده. حوادث البني آدم اسوأ ١٠٠ مرة من حوادث العربيات #خواطر_قد_تصل

ابني الطالب وابنتي الطالبة اللي عليهم امتحانات قريبة او امتحانات لا تنتهي مش هتاخد الا نصيبك ومش هتحصد الا اللي كتبه ربنا لك. مش دعوة للتراخي لكن دعوة للفهم واليقين. انت مصاب زي كل الناس. تفرح يوم وقد لا تفرح في يوم تاني. لكن الحقيقة ان الله يرى. الحقيقة ان الله يعلم. الحقيقة ان لكل مجتهدٍ نصيب. الحقيقة ان اليأس يقتل الحلم . الحقيقة ان التفاؤل والأمل يدفعك في الطريق الصحيح. الحقيقة انك مش هتخسر الا اللي تنازلت عنه بنفسك لما تخاذلتَ وقلت لنفسك مش هقدر ، مش هقدر. عشان كده من مكاني ومن تجربتي قبلك بسنين طويلة ما تقولش مقدرش ومكانها قل اللهم قدّرني ويسّر طريقي وأسعِد قلبي. #خواطر_قد_تصل

الفكرة اللي لازم تعيش بيها انك هتوصل طول ما انت مستمر. حتى لو وصلت متأخر عن حساباتك اللي هي أصلًا قاصرة. هو انت مين فرض عليك تسابق غيرك اللي مختلف عنك قدرات ووقت ومجهود ويمكن نصيب وحظ ويمكن توفيق. سباقك مع نفسك الأمّارة بالسوء اللي بتضيع وقتك ومجهودك ويقينك ان ربنا هيرزقك في معاد رزقك مش معادك اللي انت حطيته لنفسك. الأجر مضمون لأن ربنا اللي بيدّي الأجر ولو ما أخدتهوش دلوقت ربنا شايف ليك الأحسن بعدين. #خواطر_قد_تصل

رسالة لكل اللي بيذاكروا . ادعوا بهذا الدعاء: اللهم انا استودعناك ما تعلمناه وما درسناه فردّه لنا وقت حاجتنا له. اللهم انا استودعناك وقتنا فبارك لنا فيه وأعطنا منه ما يكفينا فلا يضيع منا. اللهم انا استودعناك غربتنا بين أهلنا وبعيدًا عن أهلنا فلا تضيع أجرنا على غربتنا. اللهم انا استودعناك احساسنا بالفقد والملل والتعب والاجهاد فأبدله احساسًا بالثبات والنشاط والطاقة فلا نيأس أبدًا. اللهم انا استودعناك صحتنا فلا تحرمنا منها ولا تفقدنا اياها. اللهم انا استودعناك أهلنا فاحفظهم لنا واجعلنا سبب فرحتهم وفخرهم. اللهم انا استودعناك زملاءنا ممن يتعبون مثلنا فلا تضيعهم وآتهم مثل ما تؤتينا من خير ولا تحرمهم من نعمك عليهم. اللهم انا استودعناك هذه السنة بكل ما فيها من تعب ومجهود فاجعلها خير سنين عمرنا وأفضلها. اللهم استودعناك وأنت خير من يحفظ الودائع. كل مرٍّ سيمر #خواطر_قد_تصل

نصيحة ١- بلاش تتعشّم. ٢- اعمل اللي عليك ومتستناش حد يسندك. ٣- دوّر على حد ايجابي في حياتك تسمعله. ٤- التوكّل والدعاء بييجوا مع الشغل مش مع النوم. ٥- صحيح لكل مجتهد نصيب بس مش لازم النصيب دا يكون على مزاجه. ٦- السعي يراه الله ويجازي عنه بس مش لازم يكون على كيفك. ٧- التنافس الحقيقي عالجنة ، أيوة والله ودي مش دروشة 😄. ٨- الدايرة اللي حواليك اختارها بعناية عشان هتتعرى اوي لو طلعوا اي كلام. ٩- جملة ربك رب قلوب جملة حق ارادوا بها باطل يعني عايزينك تفهم ان النية تكفي للوصول من غير العمل عشان نيّتك كويسة . دا خداع. ١٠- ربك رب قلوب لازم يسبقها العمل والسعي مش ننوي ونقعد عالكرسي ونستنى الأجر على مفيش. #خواطر_قد_تصل

يجب على الإنسان أن يفخر بنفسه ، بمجهوده، بمعاناته التي لم يشعر بها أحد لكنه عبرها وحده #خواطر_قد_تصل

اللي ربنا يسخّره عشان خدمة عباده يحمد ربنا اوي على الاصطفاء دا #خواطر_قد_تصل

ليالي وأيام الامتحان ثقيلة فاستعن فيها بما يلي ممكن يفيدك: التزام الصلاة فالقريب من الله قلبه مرتاح. التزام الدعاء فما من أحدٍ يطلب من الله برضا الا اعطاه الله بكرم. التزام بر الأبوين فرضاهما رضا الله ودعاؤهما مستجاب. قسط من الراحة ففي راحة الجسم وراحة العقل طاقة رهيبة لبداية جديدة قوية. اعمل واجتهد وأنت موقن ان الله يراك. اعمل واجتهد وانت مؤمن ان الله لن يضيع أجرك. اعمل واجتهد وانت تعلم في داخلك ان الله سيعطيك ويعطيك حتى ترضى. ما عند الله مرتبط برحمة الله وليس بعملك لكن الله يحب أن يرى عباده على ما طلبهم من خير وعبادة وعمل. الله كريم والكريم لا يخشى منعه ولكن يُرْجَى عطاؤه #خواطر_قد_تصل

ما تستهونش بساعة تعب واجتهاد ما تستهونش بساعة ندم وعودة بعد تقصير ما تستهونش بساعة سهر في سبيل علم او عمل ما تستهونش بيها لأنها مكتوبة وباقية في ميزانك ومستنيّاك يوم ما تحتاج ليها دنيا وآخرة ومش هتندم انك بذلتها من قلبك ومن ضميرك #خواطر_قد_تصل

حاسس بيك.. وعارف انك تعبان ، وانك مش قادر ، وعارف انه نفسيتك تعبت ، وحاسس ب ارهاق بدنك ، وتعب عقلك وروحك ، وكمان عارف بإنك بتحاول التوازن على أيامٍ تترنّح وكم هي ثِقالً عليك جداً … بس أحب أقولك انه حضرتك/تِك ابطال وأقوياء ، برغم من كل الي بنمرّ بيه ، أبداً ما استسلمت ، ولا درت ظهرك . عادي لو حسيت نفسك اهملت القليل ، بس مش عادي انك تجي علي مشارف الانتهاء وتقف . كللل الي انت حاسس بيه ده أجره وثوابه عند ربنا كبيير وعظيم✨ ما سعى للهِ ساعٍ إلّا بلغ ..

حياتنا درجات درجات في المذاكرة ودرجات في المناصب ودرجات في الشغل ودرجات في الرزق. مش معنى اني اخدت درجات احسن منك في حاجة انك وحش ومش معنى انك احسن مني في حاجة اني وحش. الدنيا صعبة. وصعوبتها هي المنافسة المستمرة على كلام فارغ لكن لازم نؤمن ان كل شئٍ يدور هنا مقدر من الله ومعلوم. ولازم نفهم ان لو كان في حاجة نفسنا فيها فلازم نحارب عشانها ونستمر في السعي والطلب. وفي الآخر نرضى برزق الله وما كتبه لنا. ما تحت سماء الله يجري بقدر الله #خواطر_قد_تصل

اكتر حد بحب أتصالح معاه هو نفسي: مكنتش تقدر تعمل احسن من كده خلاص ما تزعلش عملت اللي عليك انت حاولت بس دا مش نصيبك انت تعبت فعلًا بس ربنا مش عايز دا ليك انت لازم ترضى بقدر ربنا #خواطر_قد_تصل

فيها ايه لو سمينا الحاجات باسمائها يعني مش اتيكيت احترام الخصوصيه اسمها (ولا تجسسوا) ومسمهاش مش اتيكيت نتكلم على حد في غيابه اسمها (ولا يغتب بعضكم بعضًا) ومسمهاش مش اتيكيت اسميك اسم مش بتحبه اسمها (ولا تنابزوا بالألقاب) شيء حلو يبقى عندنا أخلاق شيء وحش اوي لو خلطنا الورق وسمّيناه اتيكيت وهو أصلًا اسمه دين #خواطر_قد_تصل

قواعد التدريس الأربعون، هبقى مبسوط لو قريتوهم للآخر: ١- مادة علمية مبسّطة. ٢- طريقة شرح. ٣- حب طلابك. ٤- حب طلابك. ٥- حب طلابك. ٦- شارك طلابك مناسباتهم. ٧- ونتا بتشرح بص في عينيهم. ٨- متنساش القصص. ٩- متنساش تقربهم من ربنا. ١٠- متنساش تقوي ثقتهم في نفسهم. ١١- متنساش تحببهم في بعض. ١٢- لازم راحة كل شوية لو المحاضرة طويله. ١٣- اوعي الراحة تبقي حل أسئلة،، ممكن هزار في حدود المعقول. ١٤- اسالهم عن أفكارهم. ١٥- احترم عقلياتهم. ١٦- ما تستهيفش مشاعرهم. ١٧- اوعي تبقي Mask face. ١٨- اوعي تسألهم بره المنهج. ١٩- لو هتسألهم بره المنهج قولهم علي المصدر اللي هيذاكروا منه. ٢٠-ماتجيبش امتحانات من الواق الواق. ٢١- مش معني كده انك تجيب امتحانات سهلة اوي لأن لازم تعرف كل طالب مجهوده ازاي. ٢٢- اعملّهم وقت دعم بره وقت الدراسة. ٢٣- ما تفضلش مجموعه علي التانية. ٢٤- ما تشرحش في الضلمة. ٢٥- ما تشرحش في مكان مقفول. ٢٦- كلمهم ونتا بتشرح. ٢٧- اللي نايم يسيبه يريح خمسه هيصحي لوحده علي فكرة ويكمل معاك. ٢٨- انتا اخوهم الكبير او ابوهم اللي خايف عليهم. ٢٩- شاركهم طموحاتهم. ٣٠- كلمهم عن فشلك قبل نجاحك عشان مايخافوش من الفشل. ٣١- اوعي صوتك يعلي عليهم. ٣٢- اوعي تستخدم الفاظ قبيحة في الهزار حتي قبل الجد. ٣٣- احترم معني بنت ومعني ولد. ٣٤- ماتنشفش علي الولد عشان ميرفضش نصيحتك. ٣٥- البنات اخواتك الصغيرين وبناتك اوعي تعاملهم غير كده. ٣٦- علمهم معني ضمير. ٣٧- علمهم معني نية طيبة. ٣٨- علمهم هما مين وهيبقوا ايه وهيأثروا ازاي بعدين في الناس. ٣٩- كبرهم في عينين الناس يكبروك طول عمرهم. ٤٠- انظر الي الله فيهم لا ينساك الله ابدا ولا ينسوك هم ابدا. يا رب يفيدوا حد #خواطر_قد_تصل

لا أفهم كيف ينجّيني الله كل مرّة لكن لعلّها دعوة أبٍ صالح أو جبر خاطرٍ وقبلهما رحمة رب العباد

في حياتي مبدأ عايش بيه ومتطمّن الحمد لله، وشفته اكتر من مرة وربّنا خلاني اقتنع بيه من غير شك (وَيَمْكُرُونَ وَيَمْكُرُ اللَّهُ ۖ وَاللَّهُ خَيْرُ الْمَاكِرِينَ)

مش لازم كل الناس تشوفك كويس ولا يجب ابدًا انتظار رأي الناس. أما بشوف في ارض الواقع ناس بتعاملني بطريقة مش مريحة او غرض او مصلحة أجري علطول أراجع رسايل ناس ما شفتهمش قبل كده وما شافونيش وهم بيقولولي اني غيّرت تفكيرهم او طريقهم او حولت يأسهم أمل. أما بشوف حد بينشر عني كذب وبهتان أجري اشوف واحد بيقولي بحبك في الله لانك عملت كذا وكذا. مش لازم كل الناس تشكر فيك لأن دا أصلًا شيء غريب لكن يبقى الأثر. #خواطر_قد_تصل

بمناسبة الإمتحانات...♥️ • ‏اللي ذاكر يراجع كويس، واللي مذاكرش ميقعدش يصيح ويتقي اللّٰه في نفسه ويجمع النقاط الرئيسية ويذاكر اللي يقدر عليه، ذاكر وادخل بنص المادة أحسن ما تدخل وأنت مش عارف عنها كلمة نص العمى ولا العمى كله! - اللي مذاكرش هيقدر يجمع حاجة؟ = أيوا هيقدر بأمر اللّٰـه، المسلم في أي وقت إذا استدرك فإنه يستدرك عند كريم بس يستغل الوقت الباقي ويبطل تلكيع! • ابعد عن السوشيال ميديا الدنيا مش هتطير واركن الأمور اللي مش مهمة أوي دلوقتي أنت حاليًّا مطالب بعبادة الوقت وهي المذاكرة • ‏ركز على النقاط المهمة، زي التعريفات أو الكام سؤال اللي الدكتور ركز عليهم. • نام كويس قبل الامتحان (4 ساعات على الأقل) ومتعملش فيها الرجل الأخضر وتطبق علشان هيطلع عينك في اللجنة! • متطلعش من البيت إلا وأنت مصلي الفجر وقولت الأذكار، وأكلت ساندوتش علشان تكون في معية اللّٰـه وحفظه، ومتهبطش. • صلِّ ركعتين بنية التيسير وتسهيل الإجابة، ولو قدرت تاخد ورد صلاة على النبي ﷺ يبقى فل، وخد بالأسباب المعينة على سلامتك بأمر اللّٰـه. • ‏اقرأ دعاء دخول الإمتحان وقول لا حول ولا قوة إلا باللّٰـه عند تعسر الإجابة. • وسمِّ اللّٰـه وابدأ، ومتزعلش أيًا كانت النتيجة علشان دا أكيد الخير ليك. الله يبارك في الوقت والجهد.🪴 لقائله