Onlíner па-беларуску

Плёнкі з кадрамі Мінска праляжалі забытымі больш за 30 гадоў. Чытач знайшоў іх і аблічбаваў кадры. Сваім архівам плёнак з Onlíner падзяліўся Аляксей Васюхноў. З самага дзяцінства мужчына шмат здымаў, але не друкаваў фатаграфіі: гэта было дарагое задавальненне. Усе плёнкі праяўляліся і адпраўляліся на захоўванне ў спецыяльныя файлы і папкі. — Здымкі зробленыя годзе ў 1988—1989, — мяркуе Аляксей. — Я якраз вярнуўся з войска. Вялікай колькасці сяброў у мяне яшчэ не было, таму я хадзіў па горадзе і здымаў вуліцы. Уласныя здымкі мінчанін не бачыў аж да вясны гэтага года. Рукі дайшлі да архіва толькі тады, калі ў Аляксея з'явіўся добры сканер, які дазваляе аблічбаваць зробленыя больш за 30 гадоў таму здымкі.

Беларуска стварае цацкі паводле дзіцячых малюнкаў. Дзяўчына пад нікам drym_mi увасабляе ў жыццё фантазіі маленькіх замоўцаў. Тут і зялёныя зайцы, і вожыкі з блакітнымі насамі, і мяккія домікі для ўсіх бяздомных жывёл. Аўтарам малюнкаў ад 5 да 11 гадоў. Камусьці цацка дапамагае засынаць, камусьці — пераадолець страхі, а камусьці — не сумаваць, калі мамы няма побач.

Хочаце паўдзельнічаць у сапраўдных археалагічных раскопках? Веткаўскі музей шукае валанцёраў. «Ужо не адзін год у вёсцы Гарошкаў (Рэчыцкі раён) Веткаўскі музей сумесна з археолагамі Эрмітажа капае бескурганны могільнік зарубінецкай культуры. Усе знаходкі перадаюцца нашаму музею», — піша музей у сваім Instagram. Пражыванне і харчаванне для валанцёраў бясплатнае. Каб даведацца падрабязнасці, прапаноўваюць тэлефанаваць ці пісаць Ларысе Варацінскай, кіраўніцы археалагічнай экспедыцыі: +7921 568-66-89 (ёсць Telegram, Viber). З пачатку ліпеня можна звязацца па нумары +375 29 270-89-96. Раскопкі праводзяць з пачатку ліпеня да канца жніўня.

У «Зялёнай гавані» адчыняць гатэль для... насякомых! Хто ў ім будзе жыць? Багоўкі, зялёныя залатавочкі або восы-наезнікі, якія, дарэчы, знішчаюць тлю і іншых шкоднікаў. Домікі будуць выкарыстоўвацца як гнёзды і месцы зімоўкі. Пры гэтым абяцаюць, што суседства не стане праблемай для людзей: «гатэлі» размесцяць на бяспечнай адлегласці ад жылых дамоў.

Прараб з Гомеля выйграў чэмпіянат Японіі па каратэ. 44-гадовы гамяльчанін Аляксандр выйграў адкрыты чэмпіянат Японіі па каратэ, які праходзіў у горадзе Тода, паведамляе «Белка». У спаборніцтве прымалі ўдзел спартсмены з 19 краін. Падчас паядынкаў беларусу ўдалося пакласці на татамі майстроў з Амерыкі і Японіі. Аляксандр працуе на Гомельскім домабудаўнічым камбінаце. Аднак пасля змены тройчы на тыдзень мужчына выпраўляецца ў залу на двухгадзінную трэніроўку па каратэ кіякушынкай, якім займаецца ўжо больш за 32 гады.

«Ноч музеяў — 2024»: пакутнае сярэднявечча, тэорыя кахання і аўтастоп па мемах. У гэтую ноч музеі Беларусі будуць працаваць нашмат даўжэй, чым звычайна. Прычына — у Міжнародным дні музеяў, які штогод адзначаюць менавіта 18 мая. Тэма мерапрыемстваў гэтага года гучыць так: «Музеі: адукацыя і даследаванні», а вось варыянты, куды можна схадзіць. Больш музеяў – тут.