គណនេយ្យភាពសង្គម Social Accountability

កិច្ចប្រជុំពិនិត្យឯកសារទស្សនៈទានជំនួយបច្ចេកទេស គាំទ្រកម្មវិធីធ្វើឱ្យប្រសើរឡើងការផ្តល់សេវាសាធារណៈនៅកម្ពុជា ដំណាក់កាលទី២ ----- នៅទីស្តីការក្រសួងមហាផ្ទៃ៖ ថ្ងៃអង្គារ ១១រោច ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៨ ខែកញ្ញា ឆ្នាំ២០២៦ ឯកឧត្តម ឆឹម សំអ៊ែល ប្រធានអង្គភាពត្រួតពិនិត្យ វាយតម្លៃ និងព័ត៌មាននៃលេខាធិការដ្ឋាន គ.ជ.អ.ប. តំណាងដ៏ខ្ពង់ខ្ពស់ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បានដឹកនាំកិច្ចពិភាក្សានេះ ដោយមានការចូលរួមពីតំណាងអង្គភាពទាំងពីរ សរុបចំនួន ១៣រូប ក្នុងនោះមានស្ត្រី ២រូប។   ក្នុងមតិបើក ឯកឧត្តម ឆឹម សំអ៊ែល បានលើកឡើងថា វេទិកានេះជាឱកាសសំខាន់ ដើម្បីត្រួតពិនិត្យលទ្ធផល ដែលសម្រេចបានរួមគ្នា ទទួលស្គាល់ភាពរីកចម្រើននៃគណនេយ្យភាពសង្គម និងពិភាក្សាអំពីការបន្តពង្រឹងកិច្ចសហការនាពេលអនាគត។ លើសពីនេះ ឯកឧត្តមបានបញ្ជាក់ថា ការចូលរួមគាំទ្រពីដៃគូអភិវឌ្ឍន៍ពិតជាចាំបាច់ក្នុងការបំពេញបន្ថែមនូវតំបន់គោលដៅមួយចំនួន ដែលមិនទាន់គ្របដណ្តប់ពេញលេញលើរដ្ឋបាលក្រុង ស្រុក ខណ្ឌ ឃុំ និងសង្កាត់ទូទាំងប្រទេសនៅឡើយ។ ដូច្នេះហើយ គ្រប់ភាគីត្រូវចូលរួមរៀបចំផែនការអនុវត្តរួមគ្នា ដែលរួមបញ្ចូលការកំណត់សកម្មភាព ថវិកា ការពង្រឹងសមត្ថភាព និងយន្តការតាមដាន ដើម្បីលើកស្ទួយប្រសិទ្ធភាពនៃការផ្តល់សេវានៅថ្នាក់មូលដ្ឋាន ប្រកបដោយបរិយាបន្ន ដោយគិតគូរលើការប្រែប្រួលអាកាសធាតុ និងការធ្វើទំនើបកម្មឌីជីថល។   កិច្ចពិភាក្សាបានផ្តោតលើចំណុចចំនួន ៣ រួមមាន៖ ១) តម្លាភាពព័ត៌មានដល់សាធារណជន ២) ការពង្រីកការអនុវត្តគណនេយ្យភាពសង្គមនៅថ្នាក់ក្រុង-ស្រុក និង ៣) ការពង្រឹងប្រព័ន្ធប្រមូលមតិត្រឡប់ពីប្រជាពលរដ្ឋ។     គួរបញ្ជាក់ផងដែរថា កិច្ចសហប្រតិបត្តិការរវាងលេខាធិការដ្ឋាន គ.ជ.អ.ប. និង GIZ គឺជាការផ្សារភ្ជាប់កំណែទម្រង់វិមជ្ឈការ និងវិសហមជ្ឈការជាមួយនឹងការអនុវត្តជាក់ស្តែង ដើម្បីជំរុញឱ្យរដ្ឋបាលថ្នាក់ក្រោមជាតិផ្តល់សេវាប្រកបដោយប្រសិទ្ធភាព តម្លាភាព គណនេយ្យភាព និងបរិយាបន្នសង្គម៕