Bac with Kheireddine 📖

الاول :

فيديو فيه معلومات بزاف سجلوها رح تفيدكم بزااااف، موفقين بإذن الرحمان، متنساوش تدعوا ربي بزااااف في كل صلاة في كل مرة تستريسيو فيها، ومتهملوش صلاة الفجر صلوها في وقتها نوضوا علاجالها وادعوا ربي هاداك الوقت احسن وقت للدعاء، بالنسبة للذراري روحوا صلّوه في الجامع وماذابيكم كل صلواتكم تكون في المسجد، ني فرحانلكم بزاااف والله مبقاش بزاف وتتهناو وترقدو 4 ايام مور بعضاهم 😂، دك شويا نحطّلكم مجموعة من الادعية المليحة متهملوهاش وداوموا عليها

هلوو 🙂، ان شاء الله تكونوا بخير وراكم تحبدوا مليح فهاد السمانة التالية مبقاش وتريحوا بإذن الله، جيت نعطيكم فكرة الادب، كاين سؤالين عادة يطيحوا هوما الاوائل في البناء اللغوي، الاول يقول صنف الكلمات ضمن حقلين، والثاني يقلك بما توحي الالفاظ وبزاف تتخلطلهم بيناتهم ويحسبوهم كيف كيف وهي لالا، الاول كالعادة صنفوا الكلمات لحقلين عادي، والثاني كل كلمة عطاهالك اعطيه المعنى نتاعها وبما توحي : مثلا الاسد يوحي بالشجاعة والقمر يوحي بالجمال….. هاد الرموز اطلعوا لفوق تلقاوهم فملخص الادب لي راني حاطه. وثان بالنسبة للاجتماعيات ان شاء الله تكونوا حفظتوها كامل ولا راكم ناويين تحفظوها بإذن الله، برك كي تعودوا رح تراجعوا خلّو تركيزكم بالنسبة للحرب الباردة على النظام الدولي الجديد وعوامل تفكك الكتلة الشرقية ومعايير تصنيف العالمين والثورة استعادة السيادة الوطنية (العلميين)، والجغرافيا ركزوا على دور العنصر البشري في اقتصاد منطقة شرق وجنوب شرق اسيا واقتصاد الاتحاد الاوربي والمعيقات لي تعترضهم. بالتوفيق للجميع

لي مزال مبداش مصطلحات الثورة ولا تالفتلو، شوف هذا الفيديو لبورنان زوج مرات (فيه 30 دقيقة) ومبروك عليك، بالتوفيق لكم جميعا لم يبقى الكثير، لا تنسونا من صالح دعائكم 🙏🏻 https://youtu.be/c1eHPU58row

كل الشّكر للأستاذ الفاضل، 10 افكار مهمّة خاصة الخامسة كونوا على دراية بهم، وفّقكم الله

هاي الشااابين 🙃 جيت نعطيكم فكرة خفيفة.. في تمرين الاحتمالات دائما فبداية التمرين وقبل ما تحل اي سؤال احسبلو عدد الحالات الممكنة حتى وميطلبهاش منك بسك فباك 2020 مات تكنيك الموضوع 2 مطلبش منه مي حاسبو عليها وحدها كسؤال، ومام نورالدين شفتو في اي تمرين يحله يحسب عدد الحالات الممكنة قبل ما يحله فتجنبوا انه تروحلكم 0.25 ولا 0.5 هكاك برك، ربي يوفقكم وايا رجعوا تقرااووو

موفقين بإذن الرحمان، مبقاش قد لي فات وتتهناو ان شاء الله ❤️

هاي جماعة، هادو افكار تع وحدة المناعة في العلوم لنادية خالم جزاها الله كل خير ملاح اضربوا عليهم طلة وادوا فكرة كيفاه تدونوا افكار التمارين المهمة :

جماعة الخير كاين استاذ اجتماعيات طريقة تعريف المصطلحات لي راهي تدور حاليا، وتان معاها فنفس السلسلة فيديوهات لشرح المصطلحات مع انه الجودة ضعيفة شويا لكن رح تفيدكم وتنقص عليكم بزاف الوقت، حاولوا تفهموا من عنده المصطلحات ماشي تحفظوا بسك بزاف، ومن فهمك تصاغ الاجابة ⬇️

تذكّروا، اذا لم يكن مكتوب لكم المعدّل او التخصّص الذي تبتغونه فإنّ بإمكان الصلاة والدّعاء تغيير ذلك ✨

ادعوا الله دائماً، فإن الدّعاء لبّ العبادة، اكثروا وألحّوا منه فإنّه يغيّر الاقدار ✨

لم يتبق سِوى القليل، القليل فقط و ستتخلص من هذا الحِمل ❤️ ماذا يمنعك من بذل أقصى جهدك !✨ "إن الخيل إذا شارفت نهاية المضمار بذلت قصار جهدها لتفوز بالسباق" ذلك سباقك فسارِع لتظفِر في النهاية❤️ وفقكم الله وسدد خطاكم

السلام عليكم، بالنسبة لي راهم يقراو بملخصاتي كيما الاجتماعيات، جماعة حاولوا قبل ما تحفظوا قارنوا بينهم وبين كتاب بورنان ولا كراس القسم اي عناصر تلقاوها ناقصة زيدوها باه متكونوش منقصين على رواحكم، وتاني كيما التواريخ ممكن تكون كاينة اخطاء في الارقام فتأكدوا قبل كل شئ ممبعد احفظوا تحسباً لكلش، هكا تكونوا مضمونين ومنكونش دخلتكم فحيط مع انه هاد الملاحظات كنت نقولهم قبل ما نحط اي ملخص فاي مادة مكاش لي معصوم من الخطأ، ربي يوفقكم ❤️

صحة فطوركم، جيت نحكيلكم على ظاهرة رح تصرا هاد الايامات ولا بالاحرى راهي صارية، فئة كبيرة من الاساتذة واشباه الاساتذة لي رح يخرجوا ويبداو يشهروا بدوراتهم وانا بدورتي بعدها روح وجيب 20 ومعلاباليش واش وخاصة هاداك جوفر لي شهر وهو يضبح دورة عالمية ومنا وممبعد علابالك وش رح تلقاو ؟ فيديو يشرح فيه بورقة وستيلو و لا تنظيم لا شكوبي تحسب يقري باطل، ولي سجلوا فدورة العام لي فات نتاع المراجعة الشاملة راهم يعرفوا علاواش راني نحكي، مستوى يتكركر في الارض، وبلا ما نحكو على المهابل لي يقراو ميدسين ولاعبينها يقرو كيما وحدة جايبة 20 فالباك في العربية ايا دارت دورة والله تحير اسك نتي قارية عربية في الجامعة ؟ كارثة عظمى ولي يدوخوك اكثر لي يسجلوا عندها بسك جابت 20 حبيت نسقسيكم برك تخلوا اساتذة قاريين المادة نتاعهم شحال من عام و عندهم خبرة بوحدة جابت 20 وممكن زهر قاع، المهم خلاصة القول نتوما صحاب الباك هاد الوقت رح تكونوا ضعاف ولي جا يديكم بسك خوف الباك مسيطر عليكم، ويحشوهالكم بزوج كلمات وتروحوا تسجلوا، وانا هدفي من هاد الهدرة كامل انه نوصللكم بلي ماشي الريح لي جا يديكم بسك راهم يستغلوا فيكم من لخر، مش نقلكم متسجلوش لا ! مي متخليش واحد جاب الباك ثلاث خطرات ولا واحد جاب العلامة الكاملة فمادة يحشيهالك، كاين بزاف اساتذة ما شاء الله منهم زدون، حيقون، عبد الباسط، بورنان، خيرة فليتي، كتفي، طلحي،….. عندهم كفاءة وتقدر تتكل عليهم، ان شاء الله توصلكم الرسالة ومتطيحوش ضحية الخرطي نتاعهم، واي واحد من لي راني نمعني عليهم لفوق معجبوش الحال اخبط راسك على حيوط لالجيري قاع، ومام لي راهم يروجولهم على اساس انهم صحابهم نتوما وياهم كيف كيف، ربي يوفقكم ويسدد خطاكم 🤍

من الاساتذة الاكّفاء ما شاء الله استاذ احمد ترير في الفيزياء والرياضيات، لي مزالو حاصل في الفيزياء فكاش وحدة والله ترير طريقة ايصاله للمعلومة و طريقة تنظيمه للدروس على شكل عناوين تخليك تفهم كلش، ما تراطوش ادخلو لقناته فاليوتيوب (احمد ترير) وادخلوا لقوائم التشغيل تلقاو الوحدات مرتبين، وفّقكم الله