رَحمَّه

عارف إيه مشكلة جماعة المولد؟ إنهم عايزين يعظموا الله ورسوله ﷺ بالعافية حتى لو على حساب مخالفة النصوص الصريحة، وكل ده تحت مسمى المحبة والتعظيم بص يا حبيبي ومعلش تعالى على نفسك وادي عقلك فرصة يسمع الكلمتين دول من غير مكابرة .. أنا مش بكرهك ولا عمري هكره حبك لحبيبي ﷺ، بس التعظيم الحقيقي إنك تعظّم كلام اللي إنت بتعظمه وتقف عند أمره وهديه وسنته وبس، مش تخالفه بحجة إنك بتحبه لأن لو المحبة هتخليك تخالف اللي بتحبه وتعمل حاجات هو ما شرعهاش في إظهار محبته وتعظيمه تبقى دي مش محبة أصلًا، دي استدراك عليه، يعني كأن النبي ﷺ - وحاشاه - ساب حاجة ناقصة في الدين وإنت بتحاول تكملها من عندك! وهنا لازم تسأل نفسك سؤال: مين اللي بيّن لنا إزاي تكون محبته وطاعته؟ مش هو النبي نفسه؟ طيب لما النبي ﷺ يبيّن لنا هديه في محبته وطاعته، يبقى إنت لما تألف طرق لتعظيمه من عندك وتقول "أصل أنا بعمل كده تعظيمًا له"، فإنت كده بتعظّمه ولا بتستدرك عليه؟ اللي أوهمك إنك كده بتحبه، فصلك بين الشرع ومشاعرك. فلما حصل تعارض بين النص وبين اللي إنت شايفه تعظيم وقتها قدمت مشاعرك وتصوراتك لأ وكمان اتهمت اللي متمسك بالنص إنه ما بيحبش النبي ﷺ مع إن ربنا جعل علامة المحبة واضحة جدًا: ﴿قُل إن كُنتُم تُحِبّونَ اللَّهَ فاتَّبِعوني يُحْبِبْكُمُ اللَّهُ﴾ فالمحبة مش إنك تعمل اللي يعجبك وتسميه تعظيم، المحبة إنك تعرف إيه اللي ربنا ورسوله أمروك بيه فتعمله وإيه اللي نهوك عنه فتسيبه لأن ببساطة لو كل واحد حدد من نفسه إيه اللي يعتبره تعظيم ومحبة، وعمله وخالف الكتاب والسنة، يبقى مابقاش في حدود وأحكام أصلًا