Crack GPSC Channel

તીરંદાજ શીતલ દેવીએ રચ્યા બે નવા રેકોર્ડ વર્લ્ડ આર્ચરી દ્વારા વર્ષ 2025ની ‘પેરા આર્ચર ઓફ ધ યર’ જાહેર કરાયેલ ભારતીય તીરંદાજ શીતલ દેવીએ અમદાવાદમાં આયોજિત હ્યુન્ડાઈ વર્લ્ડ આર્ચરી પેરા સીરીઝ-2026માં શાનદાર પ્રદર્શન કર્યું. તેમણે કમ્પાઉન્ડ વિમેન્સ ક્વોલિફિકેશનમાં ટોચનું સ્થાન મેળવી પોતાનો એશિયન રેકોર્ડ એક પોઈન્ટથી સુધાર્યો. ઉપરાંત, શીતલ અને રાકેશ કુમારે કમ્પાઉન્ડ મિક્સ્ડ ટિમ ક્વોલિફિકેશનમાં 1400 પોઈન્ટ સાથે નવો વિશ્વ રેકોર્ડ બનાવ્યો, જે પેરિસ 2024ના તેમના અગાઉના રેકોર્ડથી એક પોઈન્ટ વધુ છે. શીતલે પાયલ નાગ સાથે કમ્પાઉન્ડ વિમેન્સ ડબલ્સમાં પણ ટોચનું સીડિંગ પ્રાપ્ત કર્યું. Crack GPSC

ભારત AFC U-20 એશિયન કપ માટે ક્વોલિફાય ભારતીય અંડર-20 પુરુષ ફૂટબોલ ટીમે 2006 બાદ પ્રથમ વખત AFC U-20 એશિયન કપ માટે ક્વોલિફાય કરીને ઐતિહાસિક સિદ્ધિ મેળવી. તાશ્કંદમાં યોજાયેલા ક્વોલિફાયરમાં ભારતે ગ્રૂપ-Bની અંતિમ મેચમાં બાંગ્લાદેશને હરાવ્યું હતું. ભારતે અગાઉ સીરિયાને પરાજય આપ્યો હતો, જ્યારે ઉઝબેકિસ્તાન સામે હાર્યું હતું. છ પોઇન્ટ સાથે ગ્રૂપમાં બીજા ક્રમે રહેલ ભારતે આઠ ગ્રુપમાંથી સાત શ્રેષ્ઠ રનર્સ-અપ ટીમોમાં સ્થાન મેળવી મુખ્ય ટુર્નામેન્ટમાં પ્રવેશ કર્યો. AFC U-20 એશિયન કપ 2027નું આયોજન ચીનમાં થશે અને તેમાં યજમાન સહિત 16 ટીમો ભાગ લેશે. આ સ્પર્ધાની 43મી આવૃત્તિ હશે. Crack GPSC

સાત્વિક-ચિરાગે જીત્યું ચાઇના માસ્ટર્સ ટાઇટલ ભારતની સ્ટાર બેડમિન્ટન જોડી સાત્વિક સાઈરાજ રંકીરેડ્ડી અને ચિરાગ શેટ્ટીએ શેનઝેનમાં યોજાયેલી 2026 BWF ચાઇના માસ્ટર્સ સુપર 750 ટૂર્નામેન્ટમાં પુરુષ ડબલ્સનું ઐતિહાસિક ટાઇટલ જીત્યું છે. ભારતીય જોડીએ ફાઇનલમાં ચીનના હે જિ ટિંગ અને રેન શિયાંગ યુને 11-21, 21-13, 21-17થી પરાજય આપ્યો હતો. પ્રથમ ગેમ હાર્યા બાદ સાત્વિક-ચિરાગે શાનદાર વાપસી કરી હતી. આ તેમનું પ્રથમ ચાઇના માસ્ટર્સ અને કારકિર્દીનું 10મું BWF વર્લ્ડ ટૂર ટાઇટલ છે. અગાઉ તેઓ 2023 અને 2025માં આ સ્પર્ધાના ઉપવિજેતા રહ્યા હતા. આ જીત સાથે તેઓ ચાઇના માસ્ટર્સનું પુરુષ ડબલ્સ ટાઇટલ જીતનાર પ્રથમ ભારતીય જોડી બન્યા છે. Crack GPSC

બાળલગ્ન નાબૂદીના UN ઠરાવને ભારતનું સમર્થન સંયુક્ત રાષ્ટ્ર મહાસભાએ 27 નવેમ્બરને ‘બાળ, વહેલા અને બળજબરીના લગ્ન નાબૂદી માટેના આંતરરાષ્ટ્રીય દિવસ’ તરીકે ઉજવવાનો ઠરાવ સર્વસંમતિથી સ્વીકાર્યો છે. સિયેરા લિયોને રજૂ કરેલા ઠરાવને આશરે 70 દેશોએ સહ-પ્રાયોજક તરીકે સમર્થન આપ્યું હતું. આ દિવસનો હેતુ બાળલગ્ન નાબૂદ કરવા માટે વૈશ્વિક જાગૃતિ, શિક્ષણ અને અસરકારક નીતિઓને પ્રોત્સાહન આપવાનો છે. ભારત માટે 27 નવેમ્બરનું વિશેષ મહત્ત્વ છે, કારણ કે આ જ દિવસે વર્ષ 2024માં ‘બાલ વિવાહ મુક્ત ભારત’ અભિયાન શરૂ કરાયું હતું. આ પહેલ લિંગ સમાનતા સંબંધિત SDG-5ના લક્ષ્ય 5.3ને વર્ષ 2030 સુધી પ્રાપ્ત કરવાના વૈશ્વિક પ્રયાસોને મજબૂત બનાવશે. Crack GPSC

આદિમ જનજાતિઓના વિકાસ માટે વહીવટી સુધારો ગુજરાત સરકારે ‘મુખ્યમંત્રી આદિમજૂથ સર્વાંગી ઉત્કર્ષ યોજના’ હેઠળ આદિમ જનજાતિઓના વિકાસને વેગ આપવા મહત્ત્વપૂર્ણ વહીવટી સુધારો કર્યો છે. અમદાવાદ, સુરેન્દ્રનગર, ગીર સોમનાથ અને જૂનાગઢ જિલ્લામાં જનજાતિ વિકાસ વિભાગના વર્ગ-1 અધિકારીઓને જિલ્લા કક્ષાની સમિતિના સભ્ય સચિવ બનાવાયા છે. આ વ્યવસ્થાથી પઢાર અને સીદી સમુદાય માટે શિક્ષણ, આરોગ્ય, આવાસ, રોજગાર અને આર્થિક સશક્તીકરણની યોજનાઓનું આયોજન, મંજૂરી, દેખરેખ અને અમલીકરણ ઝડપી બનશે. સ્થાનિક વર્ગ-2 કચેરીઓ ટેકનિકલ મંજૂરી, સ્થળ તપાસ અને પ્રમાણપત્રોની કામગીરી સંભાળશે. Crack GPSC

વિશ્વ નકશા ઠરાવ અંગે ભારતનું સ્પષ્ટ વલણ ભારતે સંયુક્ત રાષ્ટ્ર મહાસભાના સમાન ક્ષેત્રફળ આધારિત વિશ્વ નકશાને પ્રોત્સાહન આપતા ઠરાવને સમર્થન આપ્યું છે. આ ઠરાવના સમર્થનમાં 164 દેશોએ મત આપ્યો હતો. વિદેશ મંત્રાલયે સ્પષ્ટ કર્યું કે ઠરાવ કોઈ ચોક્કસ વિશ્વ નકશા, પ્રોજેક્શન, આંતરરાષ્ટ્રીય સરહદ કે વિવાદિત પ્રદેશના ચિત્રણને માન્યતા આપતો નથી તેમજ જમ્મુ-કાશ્મીર અને લદ્દાખ સહિત તેનો સમગ્ર સાર્વભૌમ પ્રદેશ ભારતના સત્તાવાર નકશા પ્રમાણે જ દર્શાવવો જોઈએ, કોઈપણ ખોટું અથવા ગેરમાર્ગે દોરતું ચિત્રણ અસ્વીકાર્ય છે. આ અબાધ્ય ઠરાવનો ઉદ્દેશ મર્કેટર પ્રોજેક્શનથી થતા કદના વિકૃતીકરણને ઘટાડીને ખાસ કરીને આફ્રિકાનું વાસ્તવિક ક્ષેત્રફળ દર્શાવવાનો છે. Crack GPSC

ભારતીય રિઝર્વ બેંકે LICને ICICI બેંકની ચૂકવાયેલ શેરમૂડી અથવા મતાધિકારમાં કુલ હિસ્સેદારી 9.99% સુધી વધારવાની મંજૂરી આપી છે. જૂન 2026ના અંતે LIC પાસે ICICI બેંકમાં 4.35% હિસ્સો હતો. LICએ એક વર્ષની અંદર હિસ્સેદારી વધારવાની રહેશે નહિતો મંજૂરી રદ ગણાશે. આ મંજૂરી કાયદાકીય અને નિયમનકારી શરતોના પાલનને આધીન છે. જોકે મંજૂરી મળવાનો અર્થ LIC તરત જ સંપૂર્ણ 9.99 ટકા હિસ્સો ખરીદશે તેવો નથી. બેંકમાં પાંચ ટકા કે તેથી વધુ હિસ્સેદારી મેળવવા RBIની પૂર્વમંજૂરી જરૂરી છે. LICની સ્થાપના ઇ.સ. 1956માં થઇ હતી.

ઇન્ડોનેશિયામાં અનાક ક્રાકાટાઉ જ્વાળામુખી ફાટ્યો ઇન્ડોનેશિયાના અનાક ક્રાકાટાઉ જ્વાળામુખીમાં પ્રચંડ વિસ્ફોટ થયો અને તેની રાખનો ધુમાડો લગભગ 50,000 ફૂટ સુધી પહોંચ્યો. તેની અસર હવાઈ મુસાફરી અને શૈક્ષણિક પ્રવૃત્તિઓ પર પડી. અસરગ્રસ્ત વિસ્તારોમાં કેટલીક શાળાઓએ ઓનલાઇન શિક્ષણ શરૂ કર્યું. અનાક ક્રાકાટાઉ એટલે ‘Child of Krakatau’. સુન્ડા જલસંધિમાં જાવા અને સુમાત્રા વચ્ચે આવેલો અનાક ક્રાકાટાઉની રચના 1883ના વિનાશક ક્રાકાટાઉ વિસ્ફોટ બાદ થઇ હતી. 2018માં અનાક ક્રાકાટાઉના વિસ્ફોટને કારણે વિનાશક સુનામી આવી હતી. ઇન્ડોનેશિયા પ્રશાંત મહાસાગરના ‘રિંગ ઑફ ફાયર’ વિસ્તારમાં આવેલું છે. Crack GPSC

IIT દિલ્હીના ડિવાઈસથી ડીઝલ વાહનોનું પ્રદૂષણ ઘટશે કેન્દ્ર સરકાર જૂની ડીઝલ બસો અને ટ્રકોમાં રેટ્રોફિટ એમિશન કંટ્રોલ ડિવાઇસ (RECD) લગાવવાની મંજૂરી આપશે. IIT દિલ્હી દ્વારા વિકસાવાયેલું આ ઉપકરણ BS-III, BS-IV અને અન્ય જૂનાં ડીઝલ વાહનોમાં લગાવી શકાય છે. કેન્દ્રીય માર્ગ પરિવહન મંત્રી નીતિન ગડકરીના જણાવ્યા મુજબ, આ ઉપકરણથી પાર્ટિક્યુલેટ મેટરનું ઉત્સર્જન 90% સુધી અને નાઇટ્રોજન ઑક્સાઇડનું ઉત્સર્જન લગભગ 60% સુધી ઘટાડી શકાય છે. પરીક્ષણમાં સફળ રહેલું આ ઉપકરણ જૂનાં વાહનોના ઉત્સર્જનને BS-VI સ્તરની નજીક લાવવામાં મદદરૂપ બનશે. તેના અમલીકરણ માટે માર્ગ પરિવહન મંત્રાલય AIS-228 ધોરણ જાહેર કરવાની તૈયારી કરી રહ્યું છે. Crack GPSC

જાપાન: પુરુષ-માત્ર શાહી ઉત્તરાધિકાર નિયમ યથાવત જાપાનના 20 વર્ષીય પ્રિન્સ હિસાહિતો સમ્રાટ નારુહિતોના ભત્રીજા અને ક્રાઉન પ્રિન્સ અકિશિનોના એકમાત્ર પુત્ર છે તથા ક્રાઇસન્થેમમ સિંહાસનના ઉત્તરાધિકાર ક્રમમાં બીજા સ્થાને છે. જાપાનની સંસદે ઇમ્પિરિયલ હાઉસ કાયદામાં સુધારો કર્યો હોવા છતાં રાજસિંહાસન માટે માત્ર પુરુષ ઉત્તરાધિકારીની જોગવાઈ યથાવત્ રાખી છે. જોકે રાજપરિવારની મહિલાઓ સામાન્ય નાગરિક સાથે લગ્ન કર્યા બાદ પણ શાહી દરજ્જો જાળવી શકશે. રાજાની પુત્રી પ્રિન્સેસ આઇકોને મહિલા હોવાને કારણે ઉત્તરાધિકારનો અધિકાર નથી. પ્રિન્સ હિસાહિતો હાલમાં ત્સુકુબા યુનિવર્સિટીમાં જીવવિજ્ઞાનનો અભ્યાસ કરી રહ્યા છે અને શાહી જવાબદારીઓ પણ નિભાવી રહ્યા છે. Crack GPSC

રશિયા: વોસ્ટોક પાઇપલાઇનમાં પ્રથમ તેલપ્રવાહ રશિયાએ મહત્ત્વાકાંક્ષી વોસ્ટોક ઓઇલ પ્રોજેક્ટની મુખ્ય પાઇપલાઇન દ્વારા પ્રથમ વખત તેલનું પરિવહન શરૂ કર્યું છે. રશિયાની સરકારી નિયંત્રણવાળી ઊર્જા કંપની રોસનેફ્ટ આ આર્કટિક પ્રોજેક્ટનું સંચાલન કરે છે. પાઇપલાઇન વેન્કોર ક્લસ્ટર અને પાયાખા ક્ષેત્રોને ક્રાસ્નોયાર્સ્ક ક્રાઇમાં આવેલા સેવર બે નિકાસ ટર્મિનલ સાથે જોડે છે. અહીંથી હાઈ આઇસ-ક્લાસ ટેન્કરો દ્વારા ઉત્તર સમુદ્રી માર્ગે તેલ મોકલાશે. પ્રોજેક્ટમાં આશરે સાત અબજ ટન પ્રવાહી હાઇડ્રોકાર્બન સંસાધનો હોવાનો અંદાજ છે. આ પ્રોજેક્ટ એશિયન બજારો સાથે રશિયાના ઊર્જા વેપારને મજબૂત કરવા અને આર્કટિકના ઉત્તર સમુદ્રી માર્ગનો ઉપયોગ વધારવા વ્યૂહાત્મક રીતે મહત્ત્વપૂર્ણ છે. Crack GPSC

દિનેશ શર્મા: આંદામાન-નિકોબારના ઉપરાજ્યપાલ રાષ્ટ્રપતિ દ્રૌપદી મુર્મુએ ડૉ. દિનેશ શર્માની આંદામાન અને નિકોબાર ટાપુઓના ઉપરાજ્યપાલ (લેફ્ટનન્ટ ગવર્નર) તરીકે નિમણૂક કરી છે. દિનેશ શર્મા ભારતીય જનતા પાર્ટીના રાજ્યસભાના સાંસદ છે અને અગાઉ ઉત્તર પ્રદેશના નાયબ મુખ્યમંત્રી રહી ચૂક્યા છે. તેમણે લખનૌના મેયર તરીકે પણ સેવા આપી હતી. તેઓ નિવર્તમાન ઉપરાજ્યપાલ એડમિરલ ડી. કે. જોશીનું સ્થાન લેશે. કેન્દ્રશાસિત પ્રદેશમાં ઉપરાજ્યપાલની નિમણૂક ભારતના રાષ્ટ્રપતિ દ્વારા કરવામાં આવે છે. બંગાળની ખાડીમાં આવેલા આંદામાન અને નિકોબાર ટાપુઓ ભારત માટે સામુદ્રિક સુરક્ષા, વ્યૂહાત્મક સ્થિતિ, પ્રવાસન અને જૈવવિવિધતાની દૃષ્ટિએ અત્યંત મહત્ત્વપૂર્ણ છે. Crack GPSC

મિસ વર્લ્ડ 2026: જોહેરી મોલા ડોમિંગ્વેઝે ડોમિનિકન રિપબ્લિકની 24 વર્ષીય જોહેરી મોલા ડોમિંગ્વેઝે મિસ વર્લ્ડ 2026નો ખિતાબ જીત્યો છે. વિયેતનામના ન્હા ટ્રાંગ ખાતે યોજાયેલી 73મી મિસ વર્લ્ડ સ્પર્ધામાં 111 દેશોની પ્રતિનિધિઓએ ભાગ લીધો હતો. જોહેરી શિક્ષિકા, પત્રકાર, મોડેલ અને સામાજિક કાર્યકર છે. તેમનો ‘Voices of Tomorrow’ પ્રોજેક્ટ વંચિત બાળકોને અંગ્રેજી શિક્ષણ આપીને તેમના માટે નવી તકો ઊભી કરવા પર કેન્દ્રિત છે. સ્પેનની એલિઝાબેથ રેનેસ પ્રથમ અને મલેશિયાની તાનુસિયા ચેટ્ટી દ્વિતીય રનર-અપ રહી હતી. ડોમિનિકન રિપબ્લિકે 1982 બાદ બીજી વખત આ ખિતાબ જીત્યો છે. થાઇલેન્ડની ઓપલ સુચાતા ચુઆંગશ્રીએ જોહેરીને તાજ પહેરાવ્યો હતો. Crack GPSC

સ્મૃતિ મંધાના: 18 સદી સાથે વિશ્વમાં ટોચે ભારતીય મહિલા ક્રિકેટ ટીમની સ્ટાર બેટર સ્મૃતિ મંધાના મહિલા આંતરરાષ્ટ્રીય ક્રિકેટમાં સૌથી વધુ સદી ફટકારનાર ખેલાડી બની છે. હોંગકોંગ સામે મહિલા એશિયા કપ 2026માં તેણે 64 બોલમાં 124 રન ફટકારી પોતાની 18મી આંતરરાષ્ટ્રીય સદી નોંધાવી. આ સાથે તેણે મેગ લેનિંગ અને લૌરા વોલ્વાર્ટની 17 સદીનો રેકોર્ડ પાછળ છોડ્યો. મંધાનાએ 10,880 આંતરરાષ્ટ્રીય રન સાથે મિતાલી રાજના 10,868 રનનો રેકોર્ડ પણ તોડ્યો. તેની 18 સદીમાં 14 ODI, 2 ટેસ્ટ અને 2 T20I સદી સામેલ છે. મંધાના હવે મહિલા આંતરરાષ્ટ્રીય ક્રિકેટમાં સૌથી વધુ રન અને સૌથી વધુ સદી એમ બંને રેકોર્ડ ધરાવે છે. સ્મૃતિ ડાબા હાથની ઓપનિંગ બેટર છે. Crack GPSC

અમદાવાદ: ભારતની પ્રથમ આંતરરાષ્ટ્રીય પેરા આર્ચરી ભારત પ્રથમ વખત આંતરરાષ્ટ્રીય પેરા આર્ચરી સ્પર્ધાનું આયોજન કરી રહ્યું છે. Hyundai વર્લ્ડ આર્ચરી પેરા સિરિઝ 2026નો ત્રીજો તબક્કો અમદાવાદના સાબરમતી રિવરફ્રન્ટ ખાતે યોજાનાર છે. જેમાં લગભગ 19 દેશોના 100થી વધુ પેરા-આર્ચર્સ એકઠા થશે. ઇવેન્ટ્સમાં રિકર્વ ઓપન, કમ્પાઉન્ડ ઓપન, W1 અને દૃષ્ટિહીન શ્રેણીઓનો સમાવેશ થાય છે. આગામી Aichi-Nagoya 2026 Asian Para Games પહેલાં આ સ્પર્ધા મહત્ત્વપૂર્ણ માનવામાં આવે છે. અગ્રણી ભારતીય સ્પર્ધકોમાં હરવિંદર સિંહ, શીતલ દેવી અને રાકેશ કુમારનો સમાવેશ થાય છે. પેરા તીરંદાજીનું સંચાલન આંતરરાષ્ટ્રીય સ્તરે વર્લ્ડ આર્ચરી દ્વારા કરવામાં આવે છે. Crack GPSC

ડ્રગ ડિમાન્ડ ઘટાડવાના પ્રયાસોમાં મિઝોરમ પ્રથમ કેન્દ્ર સરકારના National Action Plan for Drug Demand Reduction (NAPDDR) હેઠળ ડ્રગ્સના દુરુપયોગને રોકવાના પ્રયાસોમાં મિઝોરમ રાજ્યને દેશમાં પ્રથમ સ્થાન મળ્યું. NAPDDRનો હેતુ ડ્રગ્સનો દુરુપયોગ અટકાવવો, વ્યસનીઓની સારવાર અને પુનર્વસન, સેવાઓને મજબૂત બનાવવી તથા બાળકો-યુવાનોમાં જાગૃતિ ફેલાવવાનો છે. મિઝોરમમાં નશા મુક્ત ભારત અભિયાન (NMBA) પણ તમામ જિલ્લાઓમાં અમલમાં છે. રાજ્યના સારા પ્રદર્શન માટે સરકાર, જિલ્લા વહીવટ, ચર્ચ અને સ્વૈચ્છિક સંસ્થાઓ વચ્ચેના સંકલનને મહત્ત્વપૂર્ણ માનવામાં આવ્યું છે. Crack GPSC

ન્યાય સેવા માટે મોબાઇલ eSewa વાન શરૂ સુપ્રીમ કોર્ટની eCommittee, NALSA અને કેન્દ્રના ન્યાય વિભાગે ‘Mobile eSewa Vans’ પહેલ શરૂ કરી. ભારતના મુખ્ય ન્યાયાધીશ જસ્ટિસ સૂર્યકાંતે 26 વાનને લીલી ઝંડી આપી, જે કુલ 73 વાનના કાફલાનો પ્રથમ તબક્કો છે. આ વાન દ્વારા દૂરના અને વંચિત વિસ્તારોમાં eCourts સેવાઓ, કાનૂની સહાય, મોબાઇલ લોક અદાલત, e-Filing, e-Payment અને કાનૂની જાગૃતિ ઉપલબ્ધ કરાશે. તેમાં 4G/5G કનેક્ટિવિટી અને વીડિયો કોન્ફરન્સિંગની સુવિધા હોવાથી રિમોટ કોર્ટ હિયરિંગ અને સાક્ષીઓની જુબાની પણ શક્ય બનશે. આ પહેલ eCourts Projectનો ભાગ છે. કલમ 39A સમાન ન્યાય અને મફત કાનૂની સહાયને પ્રોત્સાહન આપે છે. Crack GPSC

ભારતનો પ્રથમ જિયો-ઇમેજિંગ ઉપગ્રહ લોન્ચ ISROએ શ્રીહરિકોટાના સતીશ ધવન સ્પેસ સેન્ટરથી GSLV-F17 દ્વારા EOS-05નું સફળ પ્રક્ષેપણ કર્યું. EOS-05 એ જિયોસિંક્રોનસ ભ્રમણકક્ષામાં કાર્ય કરનાર ભારતનો પ્રથમ સમર્પિત ઇમેજિંગ ઉપગ્રહ છે. 2,367 કિગ્રા વજન ધરાવતો EOS-05 અત્યાર સુધી GSLV દ્વારા પ્રક્ષેપિત સૌથી ભારે ઉપગ્રહ છે. તે લગભગ 36,000 કિમી ઊંચાઈએ કાર્ય કરીને એક જ વિસ્તારનું વારંવાર અવલોકન કરી શકશે. તેની મિશન લાઇફ 10 વર્ષની છે. ઉપગ્રહ કૃષિ, વનસંપદા, કુદરતી આપત્તિની દેખરેખ તથા વ્યૂહાત્મક જરૂરિયાતો માટે મહત્ત્વપૂર્ણ માહિતી પૂરી પાડશે. જિયોસિંક્રોનસ ઉપગ્રહનો ભ્રમણકક્ષાનો સમયગાળો પૃથ્વીના પરિભ્રમણ સમયગાળા જેટલો હોય છે. Crack GPSC

NHAI ગ્રીન હાઇવેઝ એક્સેલન્સ એવોર્ડ્સ 2026 નેશનલ હાઇવેઝ ઓથોરિટી ઓફ ઇન્ડિયા (NHAI)એ રાષ્ટ્રીય ધોરીમાર્ગો પર હરિયાળી અને ટકાઉ વૃક્ષારોપણને પ્રોત્સાહન આપવા ‘ગ્રીન હાઇવેઝ એક્સેલન્સ એવોર્ડ્સ 2026’ના વિજેતાઓ જાહેર કર્યા. આ એવોર્ડ એવન્યુ પ્લાન્ટેશન, મીડિયન પ્લાન્ટેશન અને લેન્ડ પાર્સલ પ્લાન્ટેશન એમ ત્રણ શ્રેણીમાં આપવામાં આવ્યા. એવન્યુ પ્લાન્ટેશનમાં આંધ્રપ્રદેશના NH-16 ચિલકલુરીપેટ બાયપાસને પ્રથમ સ્થાન મળ્યું. મીડિયન પ્લાન્ટેશનમાં ગુજરાતના વડોદરા-કિમ એક્સપ્રેસવેના સાનપા-પાદરા સેક્શનને બીજું સ્થાન મળ્યું. લેન્ડ પાર્સલ પ્લાન્ટેશનમાં નાગપુરના NH-44 પરના જામથા ક્લોવર લીફ–ઓક્સિજન બર્ડ પાર્કને પ્રથમ સ્થાન મળ્યું. Crack GPSC

OpenAIએ શક્તિશાળી GPT-6 Astra લોન્ચ કર્યું OpenAIએ GPT-6 Astra લોન્ચ કર્યું, જેને કંપનીએ AGI (Artificial General Intelligence) યુગ તરફની મહત્ત્વપૂર્ણ છલાંગ ગણાવી છે. OpenAIએ તેને અત્યાર સુધીનું પોતાનું સૌથી સક્ષમ અને બુદ્ધિશાળી મોડેલ ગણાવ્યું, જે કોડિંગ, સાયબર સિક્યુરિટી, સોફ્ટવેર એન્જિનિયરિંગ અને જટિલ મલ્ટી-સ્ટેપ ટાસ્કમાં સુધારેલી ક્ષમતા ધરાવે છે. તે બ્રાઉઝર, સ્પ્રેડશીટ અને અન્ય કમ્પ્યુટર એપ્લિકેશન્સમાં માનવીની જેમ કામ કરીને ઓટોનોમસ કમ્પ્યુટર યુઝ કરી શકે છે. આ મોડેલ OpenAIના અત્યાર સુધીના સૌથી મોટા ટ્રેનિંગ રનમાં 1 લાખથી વધુ GPUsના ઉપયોગથી વિકસાવવામાં આવ્યું હોવાનું અહેવાલોમાં જણાવાયું છે. Crack GPSC