Anora Abirkulova

Maqsadli auditoriya haqida ko‘p o‘ylaysizmi? Ko‘pincha biznesda «auditoriya» deganda qandaydir manekenni ta’riflagandek bo‘lib qolamiz. Lekin aslida unday emas. Maqsadli auditoriya — bu haqiqiy insonlar. Bu nuqul eskirib qolgan Matiz’ini titkilab turadigan Anvar aka, kun bo‘yi dugonalari bilan telefonda gaplashib charchamaydigan Durdona, koptok tepib darslarga kech qolib yuradigan Sardor, bir o‘zi butun boshli oilani ro‘zg‘orini tebratib yurgan Nasiba opa, yiliga 4 marta Rossiyaga ishlagani ketadigan mehnatkash Kamol aka. Siz shu insonlar uchun ishlaysiz, ularning ko‘ngli, qalbi sizga yaqin bo‘lishi shart. Har bir yozgan matningiz qaysidir mavhum auditoriya uchun emas, tirik insonlar uchun yozilayotganini unutmang. Ishingiz birovni og‘irini yengil qilsin, jilmayish uchun sabab bo‘lsin, o‘ylantirsin. «Maqsadli auditoriyam kim?» degan savolni o‘rniga «Men bu ishim bilan qanday odamlarga yordam bera olaman?» degan savolni ishlating. Kim nima desa desin, lekin kopiraytingda odamiylik quruq biznes ko‘rsatkichlaridan muhimroq.