📚 ကဗျာ​လေဟာနယ်နှင့် ကလောင်ပျို ကဗျာများ💕✍

`ငရဲခန်းက ပျို့ကဗျာ´ တိမ်တွေကလဲ ဝါရီဝေ လိမ်ညှာလှည့်ဖျား ကြောက်မက်ဖွယ် အသွားအောက် ပြားပြားမှောက်ခဲ့ရတဲ့ ငါတို့အနာဂတ်တွေ မီးညွန့်မီးစတို့ကို နမ်းရှိုက်ခဲ့ရ။ တရားသော စစ်သည်လည်းကောင်း မတရားသော စစ်သည်လည်းကောင်း ငါတို့ကို အလောင်းများစွာ ထပ်စေခဲ့၏ ထို့ကြောင့် ငါတို့သည် စစ်ကိုမုန်းခဲ့ကြ။ အမှန်စင်စစ် ငါတို့သည် စိမ်းစိုသော တောများပမာ ရှင်သန်ချင်ကြသည် သို့သော် အာဏာရူးရဲ့အိမ်မက်များ၌ ငါတို့အနာဂတ် ရင့်ရော်စွာကြွေခဲ့ရပြီ။ ကမ္ဘာမြေ သာယာပါစေကွယ်..... ကမ္ဘာမြေ သာယာပါစေတော့.....။ -မုဒြာ

ရင့်ကျက်သင့်ပါပြီ ---------//------- ဆရာကြီးအောင်သင်းရဲ့ စကားလေး လူတစ်ယောက် ရင့်ကျက်တယ် မရင့်ကျက်ဘူးဆိုတာ အသက်နဲ့လည်း မဆိုင်ဘူး။ ပျော်ပျော်နေတတ်တာ ခပ်တည်တည်နေတတ်တာနဲ့လည်း မဆိုင်သလို ဘွဲ့ဘယ်နှခုရထားတယ် ဆိုတာနဲ့လည်း မပတ်သက်ဘူး။ တကယ်တော့ ရင့်ကျက်မှုဆိုတာ အတွေ့အကြုံကနေ ဖြစ်လာတဲ့ ခံယူချက်တစ်ခုပဲ။ ကျမအကြိုက်ဆုံးကတော့ ဆရာလင်္ကာရည်ကျော် ပြောဖူးတဲ့စကားလေး။ "ရင့်ကျက်တယ်ဆိုတာ တခြားလူဘက်က တွေးပေးတတ်တာကို ခေါ်တာ"တဲ့ ဆရာပြောမှ ရှင်းသွားတယ် ရည်းစားထားစဆို တစ်ယောက်နဲ့ တစ်ယောက် သဝန်တိုကြတယ် ဟိုဟာမဝတ်နဲ့ ဒီလိုမဝတ်နဲ့ ချုပ်ချယ်ကြတယ်။ ကြီးလာတော့ သူ့ရဲ့ လွတ်လပ်ခွင့်ဆိုတာကို နားလည်ပေးနိုင်လာကြတယ်။ ငယ်ငယ်က ကိုယ်ဖြစ်ချင်တာ ကိုယ်လိုချင်တာပဲ သိတယ် မိဘကိုပူဆာတယ် မိဘနဲ့ ပြသနာတွေ ဖြစ်တယ်။ ကြီးလာတော့ ဒါတွေ နည်းသွားတယ် ဘာလို့ဆိုတော့ မိဘရဲ့ နေရာကို ဝင်ကြည့်တတ်လာလို့ပဲ။ ငယ်ငယ်တုန်း  ကတော့ ကြိုးစားရင် ဘာမဆို  ဖြစ်နိုင်တယ်လို့ ယုံကြည် ခဲ့ ဖူးပါတယ် လက်တွေ့ ဘဝ မှာတော့  ဘာတွေကို ကြိုးစား ရမယ်၊ ဘာတွေကို  လျစ်လျူရှု  တတ်ရမယ်  ဆိုတာ သဘောပေါက် သွားခဲ့ပြီ ဒါဆို သင် ရင့်ကျက်လာပြီ။ အရှုံးဆိုတာ နာကျင်စရာ မဟုတ်သလို၊ အဆုံးသတ်လည်း  မဟုတ်ဘူးဆိုတာ  သိသွားပြီ အရှုံးတွေနဲ့  မကြာခဏ ဆိုသလို ရင်းနှီး  လာရပေမယ့် အရှုံးသမားဆိုတဲ့ တံဆိပ်ကပ်  မခံရအောင် သင်ခန်းစာတွေ ယူတတ်လာခဲ့ပြီ  ဒါဆို သင် ရင့်ကျက်လာပါပြီ။ ၀မ်းနည်း  နေပေမယ့် ပြုံးနေမိတယ် ရင်ထဲ ဝမ်းသာပေမယ့် တည်ငြိမ်အောင် နေနေပါတယ် ဒါဆို သင် ရင့်ကျက်လာပြီ။ လူဆိုတာ အကောင်းနဲ့အဆိုး ရောနေတဲ့ သူတွေမှန်း သိလာရတယ် ဒါပေမယ့် ကောင်းတဲ့အချက်တွေကိုပဲ မြင်အောင်ကြည့်ပြီး ဆိုးတာတွေကို လျစ်လျူ ရှု  တတ်လာ ပါမယ် ဒါဆို သင် ရင့်ကျက်လာပြီ။ အစပိုင်းမှာ လူတွေ သတ်မှတ်ထားတဲ့  အောင်မြင်မှုကိုရှာတယ် နောက်ပိုင်းမှာတော့ ကိုယ့်ရင်ထဲက ယုံကြည်နေတဲ့ အောင်မြင်မှုကိုပဲ ရှာတော့တယ် ဒါဆို ရင့်ကျက်လာပြီ။ ဘယ်အချိန်မှာ ပြောရမယ်၊ ဘယ်အချိန်မှာ နှုတ်ဆိတ်နေရမယ်၊ သင်ကောင်းကောင်း သိလာပြီ ဒါဆို သင် ရင့်ကျက်လာပြီ။ လူတွေရဲ့ စကားကို ဂရု မစိုက်တတ်ဘူး ဒါပေမယ့်ကိုယ့်ရဲ့ သိက္ခာတရားကိုတော့ ဂရုစိုက် တတ်လာပြီ ဒါဆို ရင့်ကျက်လာပြီ။ အဆိုးတွေ  နဲ့ ကြုံရတိုင်း ဝမ်းမနည်း တတ်တော့ဘူး ဒါတွေဟာ အခိုက်အတန့်ပဲဆိုတာ သိသွားပြီ ဒါဆို သင် ရင့်ကျက်လာပြီ။ #crd -မုဒြာ