غرايّب :)

‏مارحت ادور وجودي لان عندي يقين ‏حتى في لعب الورق ماحب اكمل عدد ‏لو اتضايق واشوف الوضع ماهو بزين ‏مانيب ادور سوى من الله عتاد ومدد ‏اثر الشغف ينفقد مع مرور السنين ‏انا فقدته واحسب انها مشاكل غدد ‏الظاهر اني بحاجة واحد من الثنين ‏اما اصحابٍ جدد ولا اعداءٍ جدد :)

‏لا تنتظر رد الجمايل .. والارباح ‏ولا تلتفت في طيبك اللي صنعته ‏الطيب بوجيه الكريمين ماراح ‏ولا الردي ما ينفعك لو نفعته .

‏من أجتهد في رضا الأوادم تنقّد ‏إذا رضيت بما تسويه كافي ‏اللي يشوفك معقّد ؟ معقّد ‏واللي يشوفك سنافي ؟ سنافي

‏"يا ما أعذبك وأنت تهبّ حتى مع الأنسام ‏ويا ما أقساك وأنت تغرّب الشخص ببلاده" ‏- بندر الدويش

‏« احنك وانا مابيني وبّين ربعك عرق ‏انا واحدٍ قالو له — اختار واختارك »

‏« لك علي أني ما أحطك على لسان الشموت ‏ولي عليك إن كان صدرك تضايق مرّني ‏مستعّد أموت لأجلك / ولكن قبل أموت ‏كان عندك شيء يثبت غلاتي ورّني ! »

‏"قالت أنت تموت فيني وقلبك ما يخون ‏والتفتّ إلها من أعماقي وصارحتها قلت أنا ميت وميت وميت ومغبون ‏يعني فوق الأرض أحبَّك، وأحبَّك تحتها"

على كثر ما شريط الذاكرة يطوي ‏مافيه وجهٍ ثبت فالذاكرة .. كثرك .

‏فيه ديون تبقى معلقه برقبة أصحَابها ‏ مثل دين شخصٍ طفى عمر شخصٍ ثاني .

نداري تقلاب الزمن والزمن ؟ دوار يغير مضامين النفوس ومشاعرها صبرنا عليها والصبر للحليم إشعار تجينا الامور الكايدة وإنتصاغرها .

معاد عندي مكان للعتب والملام الناس ميزت مدخلها ومخراجها يعالج الصمت شي ماصنعه الكلام ويعالج البعد أمورٍ يصعب علاجها .

الإنسان لا صار ذو مبدأ وعنده ضمير طبيعي يعيش في حيره وشك وارق ما الله خلق لي جناح اليا تضايقت اطير واجوب كل الشوارع مفترق مفترق لكن عطاني من الإلهام شي كثير ما يجعل الحبر يرفع من مقام الورق " غرقت مره ومن فضل العلي القدير نجيت وانا اكثر ابن آدم يخاف الغرق ".

‏عسى فالغياب علاج خاطر وطب جروح ‏عن اللي دروبه ماتماشى مع دروبي ‏على الرغم من كبر الملامه وضيق البوح ‏انا واثق إن الطيب ماهوب عذروبي ‏لـ هالحين والروح النقيّه بذات الروح ‏تهبّ الهبوب .. وتطرق أنسامها ثوبي " ياكثر الوجيه اللي فـ بالي تجي وتروح ‏ولا عاد تلحقها المشاريه من صوبي ".

‏هجعة العربان تكشف ملف الذكريات ‏ساعةٍ دايم تعزم الشقا عند الشقي ‏حزة المسرا ليا راحت الجمعا شتات ‏والقمر نصٍ مبين ونصٍ متّقي ‏كل ما طال السهر قلت يالله الثبات ‏استقري يا هبايب ويا شمس اشرقي .

‏رغم حرصي وكثر أنتباهي يزّل الشوف ‏أنا إنسان وأخطي لو ما أنوي إلا خير ‏تجملت في ناسٍ ما تستاهل المعروف ‏وقصرت في ناسٍ ما تستاهل التقصير ‏وعلى صعيدٍ مماثل : ‏إلى مِن خذله الظن مدري خذله الشوف ‏لو إنك تعيش العمر كله تسوي خير ‏تبي تطيب في ناسٍ ما تستاهل المعروف ‏وتبي تقصر بناسٍ ما تستاهل التقصير

‏لو ذقت مر الحياة و شفت ضيق الدروب ‏لي قلب ما يجزع و راسٍ ما عمره طمن ‏عن ضيقة الوقت ما ادوّر وسيلة هروب ‏اعيشها لو تروح احلى سنيني ثمن ‏ما احب احابي زمانٍ ما يعرف الوجوب ‏الحظ قاسي و مدات الليالي تِمن ‏علقت الامال بيد اللي يجري الهبوب ‏الناس ما تنضمن و الوقت ما ينضمن ‏تجارب العمر تكفيرة كبار الذنوب ‏ارفعلها البيض و انثر فوق يدها سمن ‏خلتني اميّز ابن السلم و ابن الحروب ‏اعرف هذا ابن من و اعرف هذا ابن من ‏ و دريت بأنه الحياه تزين من كل صوب ‏ان فرعت لك و قالت لك تعد و تمن ‏الحب وجهه حلو و الكره وجهه شحوب ‏و اللي ما يؤمن بمعنى الحب ما يؤتمن ‏من لذة الغيّ عييت اتناسى و اتوب ‏قد شفت فيه الحياه و شفت فيه الامن ‏" لو تفتش القلب تلقى فيه جرة قلوب ‏احدٍ خذاه الزعل و احدٍ خذاه الزمن ".

نسايم الليل للعشاق ساعي بريد ‏معها من احبابهم حبة خشم واعتذار ‏ياليت ذيك الصروح اللي غلاها تليد ‏يصنع لها شي يحميها من الانهيار ‏اول دروب الغلا ترحيب ومصافح ايد ‏واخر دروب الغلا دمعة رجل وانكسار ‏والعشرة اللي يكون الحب فيها زهيد ‏اخِير منها الفراق بـ عزّ نفس ووقار ‏يا ملهمتني وانا ما اخترت اقول القصيد ‏الفوضوي في حياته يكره الاختيار ‏انفاسك تمرني مع كل صبحٍ جديد ‏ريحة خزامى منابتها بطون الزبار ‏انا شقي قبل اعرفك وامنياتي جليد ‏اصفّها فالظلام وتنصهر فالنهار ‏طفولتي شي قاسي آه ما ابغى استعيد ‏شريط ذكرى احلبْ الناقة وردّ الحوار ‏كانو يقولون لي كابر وخلك شديد ‏وصدّقتهم لين عاش احساسي مستعار ‏مستقبلي ضاع ما عينت شورٍ سديد ‏محتاج لي شخص ينظر لي بعين اعتبار ‏لين انكف الليل واقبلت عليّ من بعيد ‏يا طلّتك حسستني قيمة الانتظار ‏جردت نفسي من الماضي وجيتك وحيد ‏اوجزت فيك الوفاء والصدق والانتصار ‏قلت احضنيني بموت بنظرتينك شهيد ‏قلت لي الموت بسهوم العيون انتحار ‏لقيت فيك القساوة من قصايد لبيد ‏ولقيت فيك العذوبه من قصايد نزار ‏عشت اجمل سنين عمري في رحابك سعيد ‏واثنينا مخلصين ولا نعرف البوار ‏كنت اتمنى يكون الحب عمره مديد ‏مع إنّي انسان ما اداني طوال العمار ‏الى هنا وانتهينا ، ليش ارددّ واعيد ‏العمر محدود وسنين السعادة أقصار ‏انتي عنيدة وطحتي في غرام العنيد ‏اللي ليا من بغاله طرقةٍ ما استشار ‏جيتي مثل ضحكة الاطفال في يوم عيد ‏ورحتي مثل دمعة الفرقا بصالة مطار .

‏صباح الخير ، أما بعد : ‏كل ما ارتخت عزومك يا إنسان تذكر : ‏« لو ما أنت بكفو ما جتك الكلايف ‏القوي دايم —— صواديفه قويه » ‏ ‏- جرعة معنوية صباحية .

‏لا تنبش الذكريات وتبحث الخافي ‏مقابر الذاكره .. "و العمر مليانه" ‏ ‏أنا رحلت .. و تركت الماضي خْلافي ‏وإن جيت أعوّد وش أعوّد على شانه ؟.