MEDICAL BLOG

إلى ملائكة الطهر الذين نسجوا روح الحياه بإذن الله ... إلى صانعي الابتسامة وقبلة الحياة على جبين المرضى، إلى أولئك الذين يزرعون عمرا جديدا مستمدين قواهم من الله تعالى، وهم الذين يهندسون الجرعة الدوائية..،لتكون بشكلها الجميل ومفعولها الطويل وتأثيرها الفعال 💜 إلى أولئك الصيادلة 💜 الذي يعملون بكل صيدلية .. ويوزعون بكل شركة .. ويصنعون بكل مصنع .. ويستخرجون العلاج من كل عقار.. ويحللون كل سميه .. ويعملون مع كل منظمه إنسانية خاليه من الشوائب المشبوهة، إلى من تأثيرهم علی الحياه كتأثير الترامادول مع الآلام، والجلوس معهم، كمتعاطي مرورفين كل حين، وإزالتهم لكل مكروة.، كريم الورد وتاثيرة علی البشرة.. وانتقائهم من بين غيرهم..، كإنتقاء محفزات B2 لأمراض الأزمة وكغالقات ألفا1 لأمراض الضغط . وأهمية وجودهم في الحياة..، كأهمية وجود نتروجلسيرين لأمراض الذبحة . وهم خط الدفاع الأول لكل خطر كمثل ألفا مثايل دوبا الخط الأول لضغط الحامل . ومواجهتهم لصعوبة الحياة..، كمواجهه ميترنتازول للديدان .. كل عام و كل الصيادلة بخير.. انتم يا أقراص المحبة وكبسولات الأخلاق وبلسم السعاد.. 💜✨ World_Pharmacist_Day💊 اليوم_العالمي_للصيدلي⭐

🔥🔥

الطَّبِيبَةُ إِسْرَاء 🥼🌸 https://t.me/Esriwaa

بتمنى تنضمو فيها .. ✨ بنشر فيها كتابات تحفيزية و منشورات دينية مفيدة 💛

قناة تحفيزية دينية رائعة 💛 https://t.me/Aisha_stimulate

السلام عليكم ،أكثر مايقتل شغفنا هو الروتين ،واللامبالاة ،الشحن بالطاقة السلبية أولا يجب ان يدرك الفرد تغيره للموضع من مسؤول عليه إلى مسؤول ليستطيع تقبل مهامه وتحمل واجباته ثانيا أن يربط أهدافه باليوم الاخر ان يتعلم ذكر الله في كل خطوة تخطوه وان العمر يتفنى ،وعمر الشباب يسال عنه ثالثا وضع خطط وأهداف سنوية شهرية يومية حتى لايقع في فخ الفراغ ،ودوامة التفكير اللامتناهية رابعا تعلم الرضى والقناعة ان يفرح بكل انجازاته يحمد الله على نعمه ،لايستمع للسلبيين والنظرة السوداوية للحياة ،يتفاء ل لاينسى ان كل شيء هو من هدر الله ،المحافظة على الصلوات ،تجديد العهد مع الله في كل صلاة ومناسبة دينية أيضاً الابنتعاد عن السوشل ميديا وماتخلفه من اكتئاب وحزن ،وحسد ،وشعور بالعجز والمقارنة... العظيم فقط من يهتم بالامور العطيمة وعلى قدر العزم تأتي العزائم كل ماكانت الاهداف كبيرة كل ماكانت الهمة أكبر نسال الله الثبات والتوفيق

نمسكه بالعكس لحدي م نصل لي حته الشغف دي طيب اول حاجه حته تكون زول مبدع كان في الجامعه او في الشغل او في اي حته .. بتكون معتمده علي البيئه اولا وبعدين منو القاعدين في البيئه البساعدوك في الإبداع طيب قصه الضغوطات انا ك طالب نزلت في حته كان عن رغبه ولا خضوع لرأي اهل م إلزامي علي اتحمل مشاكل حلها بكون يا اما في يد إداره فاشله او في جهه منسقه او غيرو .. فالبحصل انو انحنا بنتحمل مشاكل وبنحاول نفتش الحل وبننسي  الهدف الجينا ليو .. فأكيد كدا الابداع حيكون علي الهامش ، وحتته يصل بيك الامر انو يكون الابداع علي الهامش في الوقت المفروض انت بتبدع فيو دي بتعمل ليك Overthinking ودي اغلب النهايات ليها مشاكل نفسيه النقطه الاخيره طيب انا ك طالب خاشي  جامعه اول مراحل النجاح بالنسه لي لانو إعتمادي علي الشهاده البتحصل عليها .. ومع تقدم الزمن واكتشف انو انا البعمل فيو اقلبو ضايع في حل مشاكل انا م من م واجباتي في الفتره الحاليه ، وفي نفس الزمن بحاول ابدع مع كل البحصل معاي ومافي بيئه مساعده ،هنا اكيد بختفي الشغفل ،  وتمشي عشان تنجح وترضي الحاجه بالشهاده نورين

الحاجة الحقيقي مرعبة انه العينة دي من المجتمع كل يوم ماشين يكبروا بس من غير اهداف واضحة وعايشين في فراغ ووهم كبير ..لا قادرين يمشو قدام ولا يرجعو لي ورا ، كل البعملوهو انه يراقبو الحياة من ورا الشاشات مستنين مرور الايام .. الحاجة البتخلي الايام تمر بسهولة وبتخليك منتظر ومتشوق لي تحقيق هدفك باعتبارها المحرك الاساسي بتاعك هي الشغف وانعدام الشغف بعني فقدان الهيكلة والتخطيط لي كل أحلامك وطموحاتك وح ينهار فوق راسك 🙂💔 الشغف حاجة داخلية بتجي وبتبدا منك .. انت عايز شنو ؟ بتستمع وانت بتعمل شنو مفيد ليك ولي غيرك ؟ ممكن نبدأ الحاجة دي بي الاهتمام بالمواهب وتنميتها  ممكن تكون نقطة البداية وبداية شغفك  لكن م ممكن انا اقعد اتمحن واستنى لي مدرب تحفيزي ي نفع يا ملاني عبارات يوتوبية م بتمت للواقع ب اي صلة .. وزي م قلت الشغف ببدا منك  واحنا اتعودنا نرمي اي حاجة في (حال البلد والوضع الاقتصادي) ده ابدا م سبب يخليك م عندك شغف لو بالجد عندك  م ح تمنعك حاجة .. دي كلها اعذار واهية بتبرر بيها للناس ليه حياتك واقفة ومافي تقدم حاصل لكن انت كده بتبرر لي نفسك او بالاحرى بتكسر في مجاديفك براك .. Essra yousif

انا كنته قبل شهور بس طالبة ،ومريت بنفس الظروف الانت بتتكلم عنها دي ،مشكلتنا نحن مع الجامعة م نفسية ،ولا زهج ،ولا ملل ،ولا كرها للدراسة ،مشكلتنا مشكلة جامعة ابتداءا من مدير الجامعة لي غفيرها ،ديل البشكلو الهيكل الجامعي عندنا ،العميد بكون عبارة عن عميد في مكتبه بدي الاوامر للاساتذة والمسجلين والعاملين دون مراعاة لقدرة الطالب الذهنية والفكرية ،م براعو لي وقت الطالب ،ولا مواعيد المحاضرات ،ولا الكمية العلمية المحددة المفروض تدخل ذهن الطالب ،الجامعة عندنا في السودان عبارة عن بداية السمستر ،(الدكتور م جا،الدكتور حصل ليهو ظرف)،نص السمستر يجو داخلين عليك بنظام الدراسة المغلق ،يتبعو عملي ،يتبعو سمنار ،يتبعو امتحان نصف فصلي ،يتبعو امتحان نهائي ،دا البخلي الطالب مضغوط ذهنيا وفكريا ،م عارف يعمل شنو ،والحاجة الانا  بستغربها يجيك واحد يقول ليك انت اول السنة بتعمل في شنو .حتى انا اذا اتجاوزتة اكادميات الجامعة ،نجي نشوف الجامعة زاتة ،،،،عبارة اما عن اماكن الطالب زاتو يغلبوا يقعد وين ،وسائل الراحة مافيها للاسف ،الماء والخضرة ،واذا كانو فيها ،الوجة الحسن يكون ماف وهنا بقصد ( التعامل الزفت ،العداوة ،عدم المؤخاة ،عدم وجود صاحب جيد الاخلاق ) ،دا كلو سبب انها تكون مرحلة من مراحل غير معدودة في حياة الانسان ،( الدكتور البدرس المادة شحص صارم ،لايقف مع الطالب حين يحتاجة ،لا يوفر للطالب الكم المعرفي الهو محتاج ليهو بالضبط والكمية المحددة في القاعة ،يخرج خارج النص،دي كلها من الاسباب  ). واهم م يجب في الدكتور ان يكون قوي الشخصية ،حازم في وقت الجد ،فانا م ممكن اكون قاطعة بحور عشان اجي ادرس وانت محاضرتك عبارة عن زريبة بقر وغنم ،فانا اذا كانت عندك محاضرة الاسبوع الجاي ح اكون موجودة بالخلف واركب السماعة وكلو انت السبب فيهو ،الغلط م غلط طالب ،الغلط غلط جامعي .انت عارف انو الطالب خلاص لو كان جااااي الجامعة اداء واجب بس لقى الاستاذ القدامو او الدكتور القدامو انسان قائد بمعنى الكلمة ومكافح وشخص قوي يتحدى المصائب ،ذو شحصية ،وقامة ،ومحترم ،وذو اخلاق ،نظرتو ممكن تتغير ،( نحن كان بقولو لينا زمان وزارة التربية والتعليم في الاساس فقط  ،بس انا بقول ليهم انتو غلطانين وزارة التربية والتعليم في زمة اي استاذ اساس او ثانوي او جامعي ) .الطالب بجي من بيئة مختلفة ،وذو فكر ونهج مختلف ،بتعود على البيئة الجديدة تدريجيا ،بالمعاملة الحسنة والطيبة ، بصبر على مشقة التعليم ،بخلي عائلتو في البيت عشان يتغرب ويدرس ويساعد اهلو ،لكن ضغوطات الجامعة الما عندها اي مبرر وضح ،بتخليهو يكره نفسو ،ويكره مجالو ،ويكره الحياة ،لذلك حاولو خففو علي الطالب بالوقت ثم الوقت ،اذا الدراسة مشت بالوقت الصحيح والنهج الصحيح والراحة التامة ماف طالب بحس انو مجبر على دراستو .نجي طيب نشوف الامكانيات في الجامعات السودانية والتطبيق للعملي البكون اصلا عبارة عن دكتور واقف يشرح لي في النظري دون تطبيق(ي دكتور لو سمحتة دا تطبيق عملي او نظري ) الدكتور يجاوب دا عملي لكن م عندنا مواد (طيب م عندك مواد بتشرح لي في الفات لي شنو وانا طالع هسي من امتحان وتعبان وامس نوم م نائم يعني عايزني اموت ي دكتور ولا شنو ) ،والدكتور يرد ليك ،اطلع من اللاب (والبسمع لاب يحلف يقول في اكسفورد وهو عباره عن غرفة فيها طربيزة معقولة لكن ). #مشاركة

ديل من اجمل الإجابات في الموضوع دا 👌❤️ ما زلت انتظر المزيد 👀✨

اولا السلام عليكم ورحمه الله وبركاته حياكم الله وبارك فيكم وبشكركم كتتتتير على هذه القناه الجميله والرائعة دائما بنحس بحماس في البداية يعني الاسبوع الاول الزول بيكون متحمس شديد وبيجتهد وبذاكر بكل اجتهاد وهمة ولمن تكتر عليهو المواد ويحس انو م مستوعب بشكل كبير هنا في الفترة الحماس بنتهى عديل والانسان بحس انو نفسو ضائع ومحتاج يحضر فديوهات عن المواد دي ويذاكر ويجتهد بس م عندو نفس لانو م عارف يبدا من وين فيقول لنفسو بكر نبدا وياجل كدا لمن تتراكم زيادة ولو جات اجازة احتمال كبير يلحق نفسو ويشاهد فديوهات ويذاكر ويرجع الحماس وبيكون هدفو القمة وما يرضى بدون علشان الحماس يرجع لاي زول مفترض بعد اي ضغطة كبيرة يكون في اجازة م علشان يرتاح وينوم فيها علشان يزبط الشي الي اخدو وبي كدا كلنا باذن الله حنكون متحمسين والانسان عليهو فقط يسعى وربنا م بضيع زول اجتهد معليش على المعط ريان امين

حسب تجربتي مع إني ما فقدت الشغف كليآ لكن شتان ما بين زمان ونحنا أطفال مقبلين ع الحياة بكل النشاط والحماس والتفاؤل الفي الدنيا... وأسي ..ولا زلنا ف الحياة الجامعية ولم نبدأ مشوار الحياة العملية بعد ...السبب نفسي بالتأكيد ..وبالذات الظروف العامة البتمر بيها البلد واللي هي م بتخفى ع اي زول ...حتى أبناء الطبقة البرجوازية  بقوا معانا ف الهوا سوا ...لأنو حتى لو معاك مليارات ...م اي شي بالقروش ...مثلا سرير عناية ف لحظة ضيق كان معاك كنوز الارض ممكن م يتلقي ...زايد انو العملية التعليمية زاتها بقت مجهجهة ومنفرة زاتها ...شهادة الاساس والثانوي اللي مفترض يحددوا مسار مستقبلك ...كلها تسريب وغش وحتى نتيجتك البتظهر تكون شاكي فيها ...الزول يقول الحمد لله طلع من المراحل الأساسية بأساس متين قبل م تجوط....وأما المرحلة الجامعية وما بعدها حدث ولا حرج ..أحكي مثال بسيط بس اختى بتحضر دبلوم عالي HR ف جامعة الخرطوم والنتيجة طلعت ناجحين ٢٠ من ٥٤ والحمد لله نجحت نجاح مشرف💙 لمن واحدة من مفوضيات العون الانساني دايرة توقع عقود تدريب مع الناجحين لقوا ناس الجامعة سحبوا النتيجة ورفضوا يدوهم تفاصيلهم ..ودا كلو عشان معاهم بنات شخصيات معروفة راسبين كم مادة ..لمن تتعدل النتيجة طبعا بما يرضي أبناء السادات..لا مراعاة لي تعبهم وهلاكهم وجريهم ف المواصلات ومكافحتهم  ولا غير ..حريقة فيهم ...طبعا نحنا كشباب وناس ف بداية طريقنا النصيحة دا كلو م سبب يخلينا نيأس ونوقف لكن اي زول عندو مقدرات محدودة وصبر محدد تاني الحاجة لو جات قدامك م بتعاين ليها ...وبعدا لسا بنحاول ومواصلين وبنصحا كل يوم بأمل جديد لكن للأسف مسافة تحصل محل دراستك ولا شغلك تكون انطفيت وبطنك طمت قبل تبدا يومك...والحمد لله على كل حال♡ Zubaida ismal

الموضوع دا بسيط والله.. انت بيدك اي شي.. بيدك تنكد ع روحك وتبقى كئيب وتقلب على نفسك المواجع، وانك تعيش على اوهام وتخش في نفسيات ما ليها اول ولا اخر.. وكمان ممكن تعيش مبسوط وتفتش للحاجات البتسعدك وتعملا .. ❤️ ببساطة كل الموضوع في اختيار قراراتك ..👌عيش اليوم بي يومو وما تملاهو بالخوف من بكرا وبقولو..(الفي يدو قلم ما بكتب على نفسو شقي) 💜✨ Mazen alwagea

صراحه والله بالجد مشكله  والأسباب والعوامل كثيره منها 1/المجتمع في حد زاتو هو عامل كبير في الحته ده يعني انا خشيت الجامعه رغبه وكنت متحمسة بس بمصدر بالنتيجة وفي اختيارك الجامعه زاتو المجتمع بيقارنك بي غيرك انت اخترت الجامعه ده ليه ما شفتا ولد فلان او بنت فلان خشا ياتو جامعه وكده نلقي ده اول تحطيم من المجتمع 2/ والعامل التاني ناس البيت بيقارنوك بي نتيجتك وانت فاشل  لي زميلتك تجيب كده وانت كده 3/العامل الثالث ود الحطم أمال الناس وطموحاته هو تقفيل الجامعه الكتير قال من رغبة الكثيرين في المواصلة يعني طول الفتره مفروض تكون خريج تلقي نفسك يا داب في السمستر الثالث لذلك الناس نفسياته زهجنا وقفلت من القرايه 4/البيئه نجد الظروف البيئه لها دور في ذلك ربما تكون غير ملاءمة لي انا كطالب جامعي نجدها غير صحيه 5/الأوضاع والأزمات التي تعاني منها البلاد ده تأثيره سلبي يعني الواحد بقا يعاين لي وضع ناس البيت أكتر ويفكر انو يخليها لانو ما مستفيد شي من ال بينما في هو ده وانتو ناس البيت تحتاجين ليهو......والعوامل والأسباب كثيره لا تنتهي وفي الأخير ربنا يصلح الحال ويهدينا وبصفي قلوبنا من ال هي فيهو

عموماً الاسباب كثيرة شديد سواء كانت بيئية زي مثلا تكون الجامعة في مكان معزول او مقطوع من كل الخدمات ف الطالب حيلاقي صعوبات كتيرة ح تأثر عليه او الوسائل التعليمية في الجامعة م مناسبة او القاعات الدراسية م مهيأة للتعليم او المعدات الطبية مفقودة يعني يمكن في اشياء كتيرة مفقودة في الجامعة من طاقم تدريس ل رفاهيات ل وسائل عرض و غيرها . ثانيا أعتقد انو مرحلة العشرين هي أصعب مرحلة لأنو فيها وعي كبير لا هي مراهقة ولا وعي مطلق ف غالبا الناس بتكون عندها ثقة بالنفس زائدة و في المرحلة دي بتحبط ف بنلقى انو الحياة م زي ما احنا كنا مفتكرين ومصدومين من كمية المعاناة في أبسط شي وكل شي محتاج صبر ف الشغف و الهدف بيتحول لضباب تدريجياً كذلك المجتمع محبط و ظروف البلد سيئة فالناس بتطمح لقدام بس لمن تعرف المستقبل المجهول بعيون المجتمع تلقائيا ح تحبط .كذلك بالنسبة لطلبة المجالات الطبية بشكل خاص بكونوا متحمسين شديد في البداية بس لمن يعدوا كذا سنة بكتشفوا انو العلوم الصحية و بالأخص الطب أسلوب حياة صعب جدا م كل الناس تقدر تتأقلم معاه وتتنازل عن اهم الحاجات في سبيله ف بيكون عندهم ضائقة لحظية و صراعات نفسية ..وكذلك المشاكل العائلية بتأثر واهم شي الأصحاب بيأثروا علينا بصورة كبيرة ف اذا كانوا ناس طموحين ح نتبعهم واذا لا برضو ح نتبعهم كتير مننا اتعرف على ناس وطلعوا مناسبين معانا في البداية ومع مرور الزمن حسينا انهم م بشبهونا ولا بتواكبوا مع احلامنا و طموحاتنا فكتير مننا بخاف يتخلى عن أصحابه بسبب الحاجة دي لكن انا بقول م تتخلى عنهم لكن كلما تلقى فرصة تعرف على ناس طموحة او في حلقة علم انضم ليهم العلاقات الاجتماعية مهمة في الجامعة لكن في حدود والحدود أهم شي . فقدان الشغف والملل حاجة من طبيعة الإنسان ولا بد انو في لحظة ما يمل بس م كل الناس بتقدر تعزز ثقتها بنفسها و ترجع الشغف أنا من الناس الطموحة شديد شديد و الحمدلله دائما بجدد شغفي بتجيني أوقات و بفقده بس براجع نفسي و برجعه تاني، ف شايفة انو الناس محتاجة تقعد مع نفسها اولاً تشوف أهدافها و طموحاتها واهم شي كلنا عندنا هدف مثلا أنا كطالبة طب بطمح اني أكون جراحة في بريطانيا دخلت عن رغبة بس دخلت جامعة م هي رغبتي م بسبب النسبة إطلاقا بل بسبب خاص شوية لكن ابدا م فقدت رغبتي و هدفي لكن الهدف دا عندو تسلسل ف يمكن كتير مننا بفقد الشغف لانه بعاين للهدف البعيد بدون مراعاة للقريب مثلا كأني أنجح و أتفوق وأجيب معدل عالي و أعمل ابحاث و شهادات تطوعية و غيرها ف تلقائيا مع صعوبة البدايات الناس بتستصعب النهاية . واهم شي الوقت حرفيا أكبر عقبة عند الطلبة عدم إدارة الوقت ماف خطة واضحة او روتين ثابت او التزام بشي معين تقريبا أغلب الناس عشوائيين بتنوم و تصحى الصباح تمشي الجامعة تقضي يومها عادي وترجع بس بشوف لمن نخطط حتى لابسط الأشياء بنلقى الشغف رجع تدريجيا عموما رجوع الشغف والطموح بختلف من طبيعة إنسان لأخر في ناس لمن تتخيل أحلامها إتحققت برجع ليها الشغف وناس لمن تشوف غيرها ناجح وناس بطرق مختلفة يمكن نسيت أهم نقطة الجامعة محتاجة توازن لا هي قراية مطلقة ولا اجتماعية مطلقة هي وسط ف الناس تعدل في حياتها بوصي كل الشباب إنها تحذر من شغف البدايات و اللهفة و الإندفاع ،لازم تحدي النفس و أطموحوا بالنجوم لتنالوا القمر وبالنسبة للناس البتدخل مجال بدون رغبة دا محتاج كلام كتير ف كلنا عارفين انو ربنا كاتب كل شي لخير يمكن المجال دا لخير يعلمه الله ف بقول ليكم أسعوا و حاولوا ألقوا إيجابيات فيه عشان تحبوه وبالنسبة للدكاترة و المحاضرين م تسمعوا كلامهم ولا تتأثروا بيهم خلوا هدفكم هو الوصول لهدفكم م الإمتحان بس وأستشيروا غيركم بس أعملوا الفي نفسكم خليكم على طبيعتكم وأبداً م تخافوا من المستقبل او التجارب استفيدوا من تجارب غيركم بس عيشوا تجاربكم الخاصة .وأحب أقول ليكم الفرق بين الإنسان الناجح والفاشل م هو العقل إطلاقا هو الصبر هو التحمل هو التحدي هو التعب كتير مننا بتجنب التعب عشان الحاجات الساهلة و القليلة بقول ليكم م ترضوا بالبسيط ولا تستعظموا أنفسكم و لا تستهينوا بيها خليكم وسط ودائما أدعموا نفسكم ،استشيروا غيركم ، اتعبوا عشان ضميركم يرتاح م عشان جسدكم ، خلوا عندكم عزيمة ، م عيب تنفسنوا شوية تفقدوا الشغف بس م تخلوه يستمر لفترة طويلة حاولوا فضفضوا شوية واهم شي يا شباب أقضوا حوائجكم بالكتمان قولوا افكاركم للناس البتستاهل والناس البتدعم اي زول بديكم طاقة سلبية ابعدوا منه إلا اذا كانت نصايح وقربوا من الايحابيات الحياة صعبة شوية بس محتاجة مننا تعب و صبر و يقين وأهم شي إتفائلوا والله ح تنالوا و الله ح تنالوا بإذن الله ربنا يوفقنا جميعا ويجعلنا من خيرة الشباب والأطباء.والسلام عليكم ..❤️ Arafa Adam

شايفة انه الأسباب كتيرة شديد للأسف ومتداخلة وبيختلف أثرها من زول للتاني بس في النهاية المحصلة واحدة: شباب كتير منه بعزائم ضعيفة وقوى خائرة 💔 ضغوطات الحياة الكترت وكملت باقي الحيل البعافروا بيه، الملهيات الإنتشرت شديد وموتت قلوب الشباب وخلت عقولهم خاملة وأبدانهم ضعيفة، التسويغ المبالغ لفكرة قولبة النجاح أو المفاهيم عموماً وحصرها في نقاط معينة قد تكون مامنطقية أو صعبة المنال وجداً واللي خلت الناس تسعى عشان تحققها ولإستحالتها مثلاً أو لعدم مناسبتها ليهم" دي فيها كلام كتير" مااتحقت فقنعوا مثلاً أو حسوا بالفشل للدرجة الخلتهم يوقفوا،رفع سقف التوقعات وخيبة الأمل الكبيرة بعده ونتايجها، يمكن حتى عدم معرفة بعض الشباب لقيمة الحياة ككل بل وقيمة العمر دا بالتحديد رغم انه دي قيمة محورية شديد وبتنبني عليها أي حاجة حرفياً. الذنوب والمعاصي، البعد من ربنا وعدم استذكار المعاني الإيمانية البتحيي القوة في النفوس حاجات كتيرة لدرجة انه حتى لفظ مراهق البتقال للشاب قبل يصل فترة العشرين وماقبله تخفيفاً عليهم ربما واللي بعده بيلقى نفسه فجأة بقى في نظر نفسه والناس في عمر كبير والمفروض يبقى مسؤول وهو ناقصاه الخبرة أو المعرفة لانه مثلاً بيأجل أي حاجة بحجة انه لسة بدري. كلام كتير لكن ماعندى حيل أكتبه😞💔 ضحي عابدين

ظروف البلد ما مساعدة باختصار واحوال الجامعات السودانيه ما كفاءة كدي التقفيل الكتير بخليك تمل واي خبر تسمعه مابهز فيك شئ بالعكس تتوقع السئ وانت في محلك ولا تعمل رد فعل يعني انا واحدة من الناس كنت نازلة دراسة من بداية السمستر اشتغلو خم مواد فينا كرااش كورس في مادتين فسيو وبايو باعتباره مواد جديده علينا من من نزلنا اسبوعين خلصنا فسيو وجزء من البايو لمي دخلنا انتومي ابرليم الدكتورة درست البون بسبب مشاكل كدي وانها بتستحقرنا درسنا الابر لوحدنا وهي جاتنا يوم الامتحان تضحك اها شوفته كلامي كيف🤧😐💔 دخلنا فترة اجازة شهر بسبب كورونا وتاني نزل وتاني اخد شهر ؤمضان وقفلنا وتاني قفلنا بسبب فترة 25يوم مابتعمل للطلبه شى وينزلو بعد العيد وتاني جاءنا جدول امتحانات وتنتهي في اسبوعين💔 باختصار كدي انا شايفة شغف القرااية هو التاخير ودخول المخ في مرحلة الجمود من الامبالاة والتفكير الهايف ممكن بعض من ناس تستغل الاجازات في اشياء مفيدة والاغلبيه في لاشئ نسبه25 الي75باعتبارة كل مابقيت فترة طويلة من غير انجاز ونشاطات كل بتعجبك المستلزات الاخري وتصبح رغبتك في اشياء بسيطة تنقذك من فراغك دا وينتهي امل الدراسة والشغف وجهة نظر لاغير😐 ✨~Lolaaa abdo 💜

من الرائع جدا مناقشة أمر كهذا حتى لا يطول الصراع على الشباب أكثر ..برأيي إثارة نقاشات كهذه هي اول خطوة في التغيير فالأغلب قد يكون غرق في الاهمال وضاعت نفسه منه وفقد الشغف بالمعنى الحرفي وحتى تعود على ذلك كما تفضلتم ولكن حين تثار قضايا كهذه قد يستيقظ البعض ويرى أن هذا ليس بشيء يُعايش ولابد من تغيير لأن الحياة دون شغف بما نفعله ليس لها أي طعم ومن منا لايريدالاستمتاع بحياته وخصوصا فترة شبابه ويغتنمها حق الاغتنام.. الأسباب قد ذكرت بمقالات قبلي لذا سأقدم بعض الحلول علها تنفع احدا بما فيهم نفسي قبل الكل. محاسبة النفس بضمير واعي اعتقد ان هذا اول مؤشرات التغيير فحين تحاسب نفسك بكل شفافية في كل جوانب حياتك تجد ثغرات كثيرة تحتاج إلى سد وتوضح لك اشياء لم تكن تخطر على بالك دون جلسة مع نفسك تقاضيها بكل شيء بكل عهد عاهدتها به ثم نقضته بكل قرار تاكدت من صحته ولكنك لم تتخذه بكل تقصير في حق الله ...وكل شخص يعرف جيدا نفسه وكل منا مطالب ان يرتقي بها لا ان يهملها وتسمح لها في النهاية أن تنهض بك إلى مكان أفضل ففي اخر المطاف كلنا مطالبون ان نوصل انفسنا الى قمة الصفاء الذهني والروحي وان نحقق ما نريد بالاستعانة بالله .. لنكون شبابا أقوى نتحمل المسؤلية المنوطة بنا ولا نتهرب علينا ان ندرك اننا شباب وبنا الطاقة الكافية لانجاز كل شيء موكل لنا ليس فقط كوننا شباب ولكن لان الله قال في محكم تنزيله(لا يكلف الله نفسا الا وسعها) أن ندرك اننا قادرون وأن الله لا يكلفنا بشيء لااستطاعة لنا فيه كافيا لأن ننفض غبار الكسل عنا ونشمر عن ساعد الجد ونحارب الحياة بقلب شغوف مبتسم Rawia saeed

بقترح انو اذا كان المجال من غير رغبة دا شي طبيعي يحصل مع الزول ..اما لو كان برغبة من الزول ف بكون في مؤثرات خارجية على الشخص بتتراكم على الزول مع مرور الوقت بتخلي الانسان يفقد الشغف في اي شي ما الدراسة بس ،وحتى لو الزول ساعد نفسو واجتهد بلقى تقصير من جهات تانية يعني..واكثرها تاثيرا الاسرة والمجتمع عاوزة زول قوي وواثق من نفسو وصوب هدفو فقط ..بس البشر بطبيعتهم بختلفو وقدرة التحمل كذلك والشباب مرحلة ما بتتعوض هي البكون فيها more creative وحماس لمن يلقى ماف شي مساعد عشان الفي بالو بتحقق ف طبيعي يحبط ويفقد الشغف. وشكرا لحسن الاستماع😊🙏🏻 Rwah al_fadel

وجهة نظري انو من الاسباب دي اول حاجه انو انت في الجامعة معظم نظرت الدكاتره بتكون خاطئه في أنو بدرسوك الماده عشان تنجح فيها مثلا " في نص الشرح بدل م يقول ده عشان لما تتخرج وتتوظف أو في مشروعك الخاص ح تستفيد منو بقول ليك ده ح يجي في الامتحان.. " في اللحظه دي الطالب بخاف واحتمال باقي المحاضره م يركز فيها بس على النقطه دي ويطلع م فاهم المحاضره ومن كده بيبدأ موضوع الماده دي صعبه ووالمجال ده صعب وم مفهوم وانا م بفهم من الدكاتره وكده.. السبب انك انت في المحاضره سرحت بعيد م انتبهت والسبب على الدكتور اداك طاقه سلبيه في ذكر الامتحان في نص الشرح الحاجه التانيه الصحبه الغلط يعني تختار أصحاب بحطموك من القرايه؛ من الجامعه وحتى بتصل لي درجه انو يقولوا ليك"نتفق بكره م نجي الجامعه" طيب والمحاضرات؟! فيعني اغلب الشباب بقعوا في المشكلة دي وفي نهايه العام مع الامتحانات بيحصل تحطم وزهج وانا م فاهم وم حاضر المحاضرات و... طيب المانعك شنو انك م تجي الجامعه في الاول؟!! برضوا في الحساد من الأقارب والاغارب مثلا بعد تظهر نتيجه تقديم الجامعه يقولوا ليك ده شنو ده الح تدخلوا التخصص ده م كويس ماديا؛ م كويس كشغل؛ فيه اهانه ليك و...!!! التخصص ده انا قدمته ليه عن رغبه طيب انتو دخلكم شنو ولي التحطيم ده!!! يلا في بعض الناس بتأثروا بالكلام ده وبفقدوا الرغبه في المواصله... من الأسباب برضوا المشاكل الاسريه يعني يحصل ليك مشاكل في الاسره ونقاشات وتصل مراحل متتطوره .. دي بتخلي الإنسان يكره انو يعيش ويتمنى الموت م بس بتقيف على ده.. بتخلي كتير من الشباب ينحرفوا ويتابعوا المخدرات وغيرها .. بس التصرف ده غلط كبير لازم الإنسان يكون طموحوا اكبر من اي أسباب خارجية لانو في النهايه دي حياتك انت وده مستقبلك انت يعني لو نجحته مافي زول ح يفرح اكتر منك ولو فشلته مافي زول ح يزعل اكتر منك ... وفي الاول والاخير خلي ايمانك بالله كبير "وم بعد الضيق الا الفرج" Abeer Alebaed