بوح.. ومشاعر٠بدوي٠

‏المعلّم يحتقر عقله مناهل علمه ‏لالقى اللي عنده دروسٍ مهيب دروسه ‏صاحبك ماهوب محتاجك تحقّق حلمه ‏بس في حاجة من يصحّيه من كابوسه ‏يحزنك شوف السيوف القاطعه منثلمه ‏ويوجعك بالذات شوف الرايه المنكوسه ‏يسكت الوجه الكريه ولا يورّد علمه ‏الكلام المتّزن ماهوب في قاموسه ‏يُتقى شرّ الحليم ايلين يفقد حلمه ‏وان فقد حلمه تضيع جهوده الملموسه ‏الكلام يهون كله ،، والبلا ؟ من كلمه ‏تطلع من الغيض مطلاع السهم من قوسه.

‏لاتامن الدنيا ترا مافوقها مبنى شموخ ‏إن لوحت بيدينها وإن أشرت بحجاجها ‏مغير تلعب بك على الحبلين لين أنك تدوخ ‏وترميك في وسط البحور اللي تعوم أمواجها.

‏النشاما عن مقاصد بعضهم يعرفون ‏والردي لو صبوا العلم فـ اذنه ماعرف.

‏والله اني قمت اصد من العرب جبريه ‏خايف من عثرة اخطاها وسوم اخطاها ‏كل ما واجهتها قلت السلام تحيه ‏وادعيت الله لا يبلاني بما يبلاها ‏الوجيه اللي عطتنا البغض تاخذ زيه ‏والوجيه اللي تقدرنا نحب لحاها.

‏لا تشوف الناس ضعفك وانكسارك ‏لو عظامك تنكسر ما جبروها ‏انتصب كنك طلعت من المعارك ‏ماخذٍ ثار القبيله كلبوها .

‏من لاتركد بالهدف قبل مرماه ‏ترميه نـاسٍ رمـيها بالركادي.

‏ما فينا غرور بس نعرف قيمة نفوسنا ‏صدقني نعجبك ولكن صعب تعجبنا.

‏من لا يصلي ، خاطره دايماً عمس ‏ولا خير في عبداً لهى عن صلاته ‏مسكين ياغافل عن فروضه الخمس ‏خسران حي وخاسرٍ في مماته .

‏الوجيه اثنين متبسم وعابس ‏لا حداك الوقت لارقام الشريحه ‏فيه رقمٍ لا قبس للنار قابس ‏وفيه رقمٍ للسواليف المليحه ‏الدليل تشوف معلاق الملابس ‏مايقوم بدور معلاق الذبيحه .

‏من عادة الدنيا تخون المواثيق ‏تدور مكرتها سواة المحاله ‏ولولا اللوازم ما عرفنا المخاليق ‏مانعرف الرجال لين انعناله ‏الكفو تظهر فزعته حزة الضيق ‏يبان بالشده بعين العداله ‏نسل الرجال متعبين الملاحيق ‏متوسطٍ ما بين عمه وخاله ‏واللي يطيق وليا بغى قال ماطيق ‏تحرم عليه المرجله والشكاله.