عقول راقية🖤🖇

أتمنى أن تُشرق أعينكم بهجةً وأن تُزهر قلوبكم فرحاً، وأن يُصبح يومكم لطيفاً ورائِعاً ً 🌤💛".

‏" سيفتح الله بابًا كنت تحسبه من شدة اليأس .. لم يُخلق بمفتاح "♥️.

ونسأل الله وُضوح الطريق وإدراك العلامات ،وفَهم الإشارات ♥️.

‏﴿قَد أُوتيِتَ سُؤلكَ يامُوسَى﴾ هكذا مرة واحدة، في كلمة واحدة، فيها إجمال يغني عن التفصيل، وفيها إنجاز لا وعد ولا تأجيل، كل ما سألته أعطيته، أعطيته فعلاً لا تعطاه ولا ستعطاه، وفيها مع الإنجاز عطف وتكريم وإيناس بندائه باسمه سبحان ربنا الكريم اللهم آتنا سُؤلنا إنك على كل شيءٍ قدير

حالات الضيق التي تمُرُّ بهاً، ‏اغمرها بكميات وفيرة من التسبيح والسجود،(وَلَقَد نَعلَمُ أَنَّكَ يَضيقُ صَدرُكَ بِما يَقولونَ فَسَبِّح بِحَمدِ رَبِّكَ وَكُن مِّنَ السَّاجِدِينَ)💜

إذا كانت نيّتك "لا أبرح حتّىٰ أبلغ"، فلابدَّ أن تصبر علىٰ ما لم تحط بهِ خبرا 💚

اللهُم سخِّر لنا من قدرك ما تُسر به أنفسنا🤍✨

15) آخر حاجة وأهم حاجة تذاكر عشانها هي أمتك .. كان في قصة بتروي إن في فترة من الفترات في بني إسرائيل حُرموا المطر .. فسيدنا موسى عليه السلام أخد القوم وطلع يدعو عشان ربنا يرزقهم المطر .. وفي ظل ما هم بيدعوا الله عزوجل أخبره الله إنهم منعوا الرزق دا اللي هو المطر .. بسبب ذنب واحد مقيم عليه أربعين سنة .. فسيدنا موسى لما قال دا .. الرجل صاحب الذنب دا تاب لربنا عز وجل .. فنزل المطر .. الشاهد من القصة .. إن ذنب رجل واحد كان سبب في حرمان الرزق من الأمة كلها .. إنت ليه مش شايف إن تقصيرك في مذاكرتك يكون سبب في إنت مضيع عليك عبادات كتير بسبب إن نفسيتك بايظة .. وليه مش شايف إن تقصيرك في مذاكرتك دا ذنب إنت مقيم عليه والله عز وجل يمنع رزق أمتك بسببك .. لو مش بتذاكر عشان أي حاجة ذاكر عشان الأقصى .. الأقصى محتاج حد يحرره .. مهو مش هيحرره وهو مش مسؤول وميعرفش يكون حازم مع نفسه ويقولها يلا هقوم أذاكر فتقوم تسمع كلامه .. مفيش حد هييجي يقوم في وسط جيش الإسلام قدام أعداء الله عز وجل .. ويجي يمسك السلاح ويقدر إن هو يضربهم .. إلا إذا كان هو عنده ثبات على النفس وثبات علىٰ مبادئه .. ويقدر إن هو من خلالها يحقق أهدافه وإنه يمكث عليها ويطور منها. متستهونش بأي ذنب زي كدا .. إنت ممكن تكون بتعمله عشان ممكن تكون الأمة في الإستضعاف دا كله بسببك إنت .. وبسبب ذنبك إنت فخليك باصص علىٰ نفسك وملكش دعوة بحد .. عشان الأمة تُقام من تاني.

14) ذاكر عشان المذاكرة مفيدة😁 متقنعنيش إنك مثلا بتقرأ في كتاب دراسي أو بتذاكر ومفيش ولا معلومة وقفت معاك ولا حاجة علقت معاك واستفدت منها .. متقنعنيش إن انت بتقرأ كلام مفيهوش ريحة الإفادة! أكيد لأ .. أكيد أيا كانت كليتك بتصب في الآخر علي نفعك إنت .. فـ إنت تحاول تستغل الأمر دا بردو واستمتع بالمذاكرة أحسن ماتذاكر وإنت قرفان .. النبي صلي الله عليه وسلم كان يحب الشعر وكان يحب الاستماع للشعر .. وكذلك كان عليه الصحابة من بعده سيدنا أبو بكر وعمر .. النبي صلي الله عليه وسلم أمر سيدنا حذيفة بن اليمان رضي الله عنه أن يتعلم اللغة الفارسية علشان يقدر يكلم بيها بلاد فارس .. وكان بيجيب الناس اللى عارفة لغات تانية علشان يقدر يخاطب بيهم الناس اللى مش مسلمة ويدعوهم للإسلام .. إنت ليه متشوفش كليتك ومجالها وتحاول إن إنت من خلالها تنفع بيها الإسلام ؟ هو مش ممكن تكون إنت اصلا في حد ذاتك في حاجة تستفيدها من الكلية .. تعود بالنفع عليك إنت شخصيا قبل ما تعود بالنفع ع الإسلام ؟ يعني لو إنت دكتور العلم اللى عندك إنت .. قادر من خلاله إنك تتعرف علي الله عز وجل عن طريق جسم الإنسان .. تقدر لو إنت مهندس تستفاد من علمك دا جدا ف فقه المواريث .. تقدر إنك تتعرف علي دقة الله عز وجل بفهمك الحسابي. تقدر من خلال الكلية اللى إنت فيها لما تتخرج منها تبقي مدرس يربي جيل صالح ممكن يقام عليه الأمة فيما بعد .. تقدر من خلال مليون حاجة لو إنت ركزت وأصلحت النية إنك تلاقي معلومات كتير تفيدك من مجالك بعيدًا عن السلبية .. أنا شخصيًا ياما عرفت أستفيد كتير جدا بفضل الله من مادة الأحياء في ثانوي والجيولوجيا وغيرهم .. وعرفت أستفيد من علم النفس لما بقرأ في كتب دراسية تخصه في أمور كتير .. ياما عرفت أستفيد من كتب الشعر إني اتعلم ألفاظ معينة تفيدني في القرآن الكريم نفسه .. ياما استفادت من مواد ممكن تبان دنيوية لكن الله عز وجل أبصرني وقدرت أوجهها من خلال الدين وقدر أوجهها في صلاح نفسي .. فـ لو مش هيفيدك في أي حاجة في الحاجات دي كلها .. هتفيدك في إنك لما تيجي في يوم من الأيام وأولادك يحتاجوا حد يساعدهم .. يلاقوا باباهم أو مامتهم يقدروا يساعدوهم في حاجة زي كدا .. ومايحتاجوش إنهم يلجأوا لحد برا .. ومتكونش إنت الحد اللى مش فاهم هما بيتكلموا في إيه عشان كنت طالب فاشل دراسيًا .. لأ تقدر تفيدهم ساعتها وتكون إنت سبب إنك تكون عون لأولادك وتقوم بحق رعيتك اللى هما هيكونوا مسئولين منك وقتها .

13) لما تذاكر هتاخد أجر إغاظة الكفار هتكون متفوق إن شاء الله لأن الله الشكور هياخد منك العمل القليل ويجازيك عليه بالكثير .. ودا حسن ظنك بالله عز وجل .. ووقتها هتكون على رفعة في المجتمع .. ووقتها اللي باين إنت شخص مسلم والله عز وجل فتح عليك ورفع شأنك وسط الناس .. دي حاجة في حد ذاتها تغيظ الكفار قال الله سبحانه وتعالى : « وَلا يَطَئُونَ مَوْطِئًا يَغِيظُ الْكُفَّارَ وَلا يَنَالُونَ مِنْ عَدُوٍّ نَيْلا إِلا كُتِبَ لَهُمْ بِهِ عَمَلٌ صَالِحٌ إِنَّ اللَّهَ لا يُضِيعُ أَجْرَ الْمُحْسِنِينَ » هما مش بيحبوا الخير للمسلمين .. ومش عايزينهم يكونوا أعزة بالدين .. ولا عايزينهم يكونوا أقوياء بأسباب العلم .. فلو ربنا فتح عليك في مجالك .. هتكون سبب رفع شأن الإسلام أمام الكفار والغرب .. وإنك توضح إن المسلمين مش جهلة .. دول أسياد الخلق .. وخصوصًا لو أكرمك الله بإنجاز في مجال دراستك زي براءة اختراع مثلا .. وطبعًا لو مجال نادر فإنت ساعدت في سد حاجة الأمة الإسلامية في مجال دراستك .. وعدم احتياجها للكفار في المجال دا .. أو بنات يساعدو في سد أقسام الطب كلها بحيث المرأة المسلمة ماتضطرش إنها تكشف علي رجل .. فالخلاصة إنك تغيظهم دا في حد ذاته طاعة .. وحاجة هتاخد عليها أجر .. عشان كدا لما بيشوفوا حد تقدم وهيبقى عنده براعة اختراع أو خد جايزة نوبل في حاجة .. وهو مسلم أو عربي دي بتكون سبب إنهم يغتالوه .. أو سبب إنهم يتكاتفوا على قتله .. فـ وإنت بتذاكر حط نية إن إنت تغيظ الكفار .. ودي حاجة ربنا عز وجل بيحبها ويرضى عنك بيها ..

12) كونك بتذاكر دي حاجة تدل على استقامتك وصلاحك .. فـ بالتالي « المرء على دين خليله » .. فـ لما ربنا - عز وجل - يرزقك بصحبة هتكون شبهك أكيد. وهتلاقيهم برضو كويسين وبتهتمو وواخدين بالهم من كل حاجة دينية ودنيوية .. وقد المسؤلية .. لكن كل ما هتكون في انحدار وفي ضياع كل ما هيكون صحبتك شبهك .. فـ لو أنت عايز فعلا يكون ليك صحبة صالحة دينيًا ودنيويًا .. فـ لازم إنك تصلح من ذاتك. نفس الكلام لما ولادك في يوم من الأيام ييجو محتاجين قدوة .. أو يبصوا على حد أنه بالنسبة ليهم المثل الأعلى هتكون أنت أول حد بيفكر فيه .. مش الهزار بتاع كل أهالينا الكرام إنه كلهم كانو أوائل وشطار .. لأ إنت هتكون قدوة لولادك بجد وكنت مجتهد بجد. ليا صديقة كانت طالعة من الأوائل على الدفعة كانت ديما تقولي « في أي وقت بضعف بقول لنفسي أنا مش هسمح لولادي إنهم يبصوا لحد على أنه قدوة غيري .. مش هسمحلهم إنهم يدوروا على مثل أعلى برا بيتنا .. ويتشكلوا بمبادئ وقيم غلط لمجرد إن الشخص دا متفوق دراسيا وممكن يضيعلهم دينهم .. أنا هكون قدوة ومثل أعلى ليهم على قد ما أقدر »

11) ذاكر عشان تبقي عنصر فعال في الدعوة إلي الله. لو إنت مثلًا في ثانوي وحد اتخرج بقا دكتور أو مهندس .. و حد كان محاسب فـ الدكتور والمحاسب جم واتكلموا في الدعوة إلى الله عز وجل .. أو نصحوا حد بشيء معين .. أو أمر بالمعروف ونهي عن المنكر .. هيكون الدكتور دا أكيد كلمته مسموعة أكثر من الشخص اللي أقل منه تعليميًا. فهنا في الوقت دا الدراسة كانت سبب إن الإنسان دا يُنصت إليه وإن يؤخذ بكلامه أكيد .. مش بهمش موضوع الصدق في الدعوة .. وإن أكيد مش شرط إن الداعية يكون حد دراسيًا وتعليميًا عالي .. بس بقول إن دي نقطة من النقاط اللي غصب عنك المجتمع بيميل ليها .. لما يشوف إنه ناجح دينيًا ودنيويًا .. بيكون جاذب أكتر وعندهم رغبة وشغف يعرفوا عنه أكتر من الشخص اللي مش ناجح في الدنيا بتاعته .. ودا برضوا على مستوى الكلية لو إنت حد جايب امتياز أو جيد جدًا .. أو طالع من الأوائل هيكون فيه شغف يسمعوا منك نصائح أكتر من شخص جايب جيد أو مقبول .. فا في الحالة دي إنت مذاكرتك فرقت معاك في الدعوة إلى الله عز وجل .

10) تذاكر علشان تبقي راضي عن نفسك .. كان ليا صديقة تقولي « أفضل يوم أصلي فيه قيام بقلب حاضر .. وأصلي فيه الفرائض بخشوع .. هو اليوم عملت فيه كل المهام اللي عليا في المذاكرة » .. شعور إن إنت تبقي راضي عن نفسك وخلصت مهامك .. دا لوحده كفيل أنه يفتح عليك في الطاعة عشان نفسيتك مرتاحة .. والله زي ما قلت رزق الخشوع والفتح في الطاعة وإن قلبك يبقي حاضر .. ممكن يكون مسلوب منك بسبب تقصيرك في المذاكرة .. وبسبب إن نفسيتك بايظة بسبب تقصيرك في الأمر دا .. فـ إن إنت تظبط مذاكرتك دا هيساعدك تظبط باقي الجوانب بتاعتك في العبادة .. هيساعدك في إنك تظبط نفسك في كلامك مع أهلك .. مش عشان إنت مضغوط دراسيا .. فـ يبقي ليك الحق انك تزعق مع والدك أو والدتك أو تتعامل بعصبية جامدة مع إخواتك .. غير إن إنت تظبط نفسك دا كفاية وكفيل .. إن يبقي عندك سعة صدر واستيعاب لـ صحابك .. عن طريق إنك تخيلهم يعرفوا يتكلموا معاك .. وتقدر تقوم بحق الأخوة صح .. عشان إنت نفسيتك بقت سليمة .. وبتؤدي واجبك كويس .. فلما تبقي راضي عن نفسك دا هيفتح عليك في حاجة تانية كمان .. إنك في يوم من الأيام لما النتيجة تظهر ولو لا قدر الله مجبتش النتيجة اللى إنت عايزها متحسش بالندم .. شعور الندم وحش ومؤذي .. ليا صديقة متخرجة من كلية هندسة وترتيبها الرابع علي الدفعة .. بتقولي « أنا طالعة الرابعة على الدفعة أهو .. ومع ذلك أنا ندمانة أشدّ الندم علي أي لحظة كانت ممكن تساعدني إني لو اجتهدت أكتر وذاكرت فيها كنت أخدت مركز أول » .. فماتديش لنفسك فرصة إن لما نتيجتك تظهر تندم علي حاجة .. أو لما تظهر نتيجتك وربنا عز وجل لم يرد إنك تجيب التقدير اللى كنت عايزه متندمش .. بس خليك فاكر إنت عليك السعي والله عز وجل عليه النتيجة فـ اجتهد واتعب علشان متديش لنفسك فرصة تندم .

9) من الحاجات بردو اللي ناخد بالنا منها .. إن كلنا عايزين نعرف عن الدين وعايزين نقرأ كتب .. ونسمع دروس وكذا وكذا. بنيجي نعمل دا بعيدًا عن الهوى وبعيدًا عن الشيطان .. معندناش المهارات الكافية لدا طب نكتسبها إزاي لو مضغطش نفسك في دراسة وفي مذاكرة! يعني مثلًا .. شوف أي حد معاك ف أكاديمية شرعية أو معهد شرعي عمومًا وقارن بين اتنين .. حد بيتعلم وحد لأ .. أكيد اللي بيتعلم هتلاقي عنده نظام في الكتابة أحسن .. بيعرف يذاكر بطريقة أفضل .. فاهم يعني إيه يلخص .. بيعرف يسمع المحاضرات الطويلة عشان هو متعود علي المحاضرات الطويلة في الكلية .. بيقدر يفهم إيه مواضع الأسئلة عشان هو متعود على نظام الأسئلة في امتحانات المدرسة مثلا .. المهارات بتاعة العلم الشرعي نفسها أو طلب العلم في الدين في الأصل هي مرتكزة علىٰ مهاراتك اللي اكتسبتها من الدراسة الدنيوية .. دا لو ينفع نقول عليها دا أصلا .. لأن إحنا اتفقنا إنها عبادة. فمن النوايا اللي إنت ممكن تحطها إنك تتعلم يكون عندك صبر .. إنك تقعد علي المكتب وتجيب ورقة وقلم وتكتب وتذاكر وتراجع وتلخص .. عشان لما الله عز وجل يفتح عليك في وقت تاني ويكون وقت طلب العلم الشرعي يكون عندك المهارات الكافية والصبر والحزم مع نفسك إن إنت تعمل دا.

8) ذاكر عشان فقه الأولويات. فقه الأولويات هي نوع من أنواع العلم اللي الشيطان بردو بيدخلنا منه بما إننا بنتكلم علىٰ الشيطان. الشيطان بيجي في وقت وإنت مركز كدا .. مش هيقدر يقولك فيه قوم اعمل ذنب ولا هيقدر يقولك متعملش الطاعة .. بيدخلك مدخل تاني خالص .. وهو إنه يلغبطلك الأولويات بتاعتك .. يجيلك في وقت إنت صابح عندك امتحان .. يفتح نفسك أوي علىٰ القيام .. يجيلك في وقت زي رمضان وبدل ما يفتح نفسك على القيام .. يفتح نفسك على المذاكرة .. يجيلك في وقت تالت .. إنت عندك مثلًا دروس ومذاكرة .. يفتح نفسك جدًا للعلم الشرعي. يجيلك في وقت إنت بتدرس علم شرعي أو عندك امتحانات في المعهد أو الأكاديمية اللي إنت فيها .. ويقولك يلا ندعو إلىٰ الله عزوجل. هو الشيطان كدا اوقات ممكن بيجيلك بجلابية وطاقية بيضة. بس الفكرة إنك تكون أنصح منه .. يعني تقدر تحدد الأولويات بتاعتك قبل ما يوسوسلك .. يعني مش يكون عندك ضغط وامتحانات .. وتروح تشد شوية في القرآن أو العلم الشرعي ولا إنك تدوس في الدعوة .. لأ تذاكر. ولو إنت لغبطت أولوياتك فدا بردوه اتباع للشيطان. ودا هيرجعنا لنفس النقطة بتاعة : " أَفَتَتَّخِذُونَهُ وَذُرِّيَّتَهُ أَوْلِيَاءَ مِن دُونِي وَهُمْ لَكُمْ عَدُوٌّ ۚ بِئْسَ لِلظَّالِمِينَ بَدَلًا" النقطة دي نتعلم منها .. إنك تعرف تقول لنفسك لأ .. تعرف لما نفسك تلاقيها فتحت علي حاجة دا مش وقتها تقولها لأ مش هعملها. دا هيعلمك إنك تمشي نفسك مش هي اللي تمشيك .. إنك تكون حازم مع نفسك. فلو أنت ربيت نفسك على المعنى دا في المذاكرة .. هتقدر إن أنت تعمله في الطاعة هتقدر إنك تعمله في كورس الإنجلش اللي عايز تاخده .. هتقدر تعمله في أي حاجة إنت متأخر عنها بسبب إنك بتتبع هواك .. فـ خلي عندك أولويات وذاكر دلوقتي عشان دا وقت المذاكرة.

7) المذاكرة هتعلمك معنى السعي. الله عز وجل لما ذكر قصة سيدنا موسى ذكر فيها .. « وَأَوْحَيْنَا إِلَى مُوسَى إِذِ اسْتَسْقَاهُ قَوْمُهُ أَنِ اضْرِب بِّعَصَاكَ الْحَجَرَ فَانبَجَسَتْ مِنْهُ اثْنَتَا عَشْرَةَ عَيْناً » الله عز وجل قدير علىٰ إنه يخلي الحجر ينفجر بدون مايقول لسيدنا موسى إنه يضرب بعصاه الحجر .. طب ليه ربنا سبحانه وتعالى عمل دا .. عشان يعلمنا السعي .. عشان يعلمك إن أنت يبقى عندك توكل مش تواكل. إنك تعتمد على الله عزوجل بس بعد ما تكون أخذت بالأسباب .. وتدعوه وإنت مضطر بعد ما تكون اجتهدت وتعبت .. نفس الأمر مع السيدة مريم « وهُزي إليكِ بجزعِ النخلة ..» .. واحدة في آلام المخاض ومش قادرة وتعبانة .. ومع ذلك كان الله عز وجل يقدر إنه يسقط الرطب لكن هو جل في علاه أمرها إنها تهز جذع النخلة .. كأنه سبحانه وتعالي يريد أن يقولها لازم تتعبي .. لازم تعملي حاجة وبعد كدا تدعي .. أنت عايزة تنجحي .. عايزة تعملي كذا .. اتعبي وبعد كدا ادعي .. إنما إن أنت تدعي بس .. دا غلط. فـ دي نقطة من النقاط اللي هتعلمنا السعي جدًا .. وهتعلمك إن أنت يكون عندك يقين بالله عز وجل « إن يارب انا عايزة انجح بس مش مجهودي اللي هينجحني .. إنما يارب عشان أنت أردت لي أن أنا أنجح » ودا يتمثل في قول الله عزوجل : « وما رميتَ إذ رميتَ ولكنَّ اللّٰـه رمىٰ » فـ الحاجة اللي هتوصلها لو الله عز وجل فتح عليك فيها .. منحة من الله عز وجل .. مش بشطارتك إنت .. فـ دي حاجة مش هتتعلمها إلاّ لو ذاكرت.

6) ذاكر عشان تتعرف على الله عزوجل .. أكتر فترة الإنسان بيقدر من خلالها يتعلم معنى الإفتقار إلى الله عزوجل .. أو يتعلم معنى اليقين .. أو يتعلم معنى الثقة في الله عز وجل .. هي أكتر فترة بيكون فيها بيذاكر وعنده ضغط دراسة وحاسس إنه مافيش في إيده حاجة .. فلما توصل للمعنى دا هيكون عن طريق إيه؟ « أنا يارب تعبت في المذاكرة .. يارب وفقني .. يارب أنا عندي امتحان بكرا في كذا وكذا وملحقتش أخلص بس إنت شايف إني عملت كل اللي أقدر عليه .. يارب إن شاء الله الإمتحان ييجي من الحتة اللي أنا ذاكرتها .. يارب أنا كذا وكذا وكذا وتشكيله بافتقار كدا » كلها حاجات تعلمك إنك ليك رب قادر .. الرب دا جل في علاه مطلع على قلبك .. وقريب منك وأقرب إليك من حبل الوريد .. ويعلم ما في صدرك ويعلم السر وأخفى. كل دي معاني ربانية جميلة جداً مش هتعرف توصلها غير لما تتحط تحت ضغط .. والضغط دا مش هتعرف تتحط تحته غير لما تحس بقيمة إن أنت المفروض تذاكر وتحس بالمسؤلية .. فبالتالي تبدأ تحس إنه « أنا يارب تعبت في كذا فيارب وفقني وخليه يحصل عشان ماليش غيرك » فهيكون من أعظم الحاجات اللي هتساعد علىٰ المذاكرة إنك تتعلم الدعاء .. يعني تتعلم الدعاء بجد اللي هو بافتقار وتذلل كدا عن طريق النقطة دا. وممكن الشيطان يدخلك من حتة .. « إنت مابتدعيش ربنا طول السنة وجاي تدعيه دلوقتي لما احتجتله! .. ساعتها خليك عارف إن الله عز وجل بيستجيب دعاء المضطر حتى لو مشرك وحتى لو كافر .. وإنت دلوقتي في حالة المضطر اللي تعتبر أرجي حالة لاستجابة الدعاء حسب ما هو سبحانه وتعالي اللي عرفنا .. يعني بص كدا علي آيات سورة يونس كانت بتقول: « وَجَآءَهُمُ ٱلْمَوْجُ مِن كُلِّ مَكَانٍۢ وَظَنُّوٓاْ أَنَّهُمْ أُحِيطَ بِهِمْ ۙ دَعَوُاْ ٱللَّهَ مُخْلِصِينَ لَهُ ٱلدِّينَ لَئِنْ أَنجَيْتَنَا مِنْ هَٰذِهِۦ لَنَكُونَنَّ مِنَ ٱلشَّٰكِرِينَ » .. هم مش مسلمين أصلا بس كانو بيدعو دعاء المضطر اللي مالوش غير ربنا .. بعدها الكريم سبحانه قال .. « فَلما أنجاهم » .. استجابلهم بس هم بعدها اللي خالفو وعدهم لربنا .. خليك راجل المرة دي والجأله وماتسبش الطريق بعد ما اللي محتاجه يعدي .. الله عز وجل استجاب دعاء المضطر للكافر والمشرك .. مش هيستجيب دعاء المضطر وهو مسلم وموحد وعارف ربنا! فـ دي نقطة قلبية عظيمة مش هتتعلمها غير لما تتحط تحت ضغط زي المذاكرة.

5) ذاكر عشان تفرح ربنا بانتصارك علي الشيطان .. لأن إنت باتباعك للشيطان وتطنيشك للمذاكرة تستحق عتاب ربنا سبحانه وتعالي لما قال « أَفَتَتَّخِذُونَهُ وَذُرِّيَّتَهُ أَوْلِيَاءَ مِن دُونِي وَهُمْ لَكُمْ عَدُوٌّ » .. أولياء يعني مشيته ورا كلامه .. إحنا اتفقنا إن المذاكرة عبادة وطالما عبادة يبقي أكيد الشيطان هيبوظهالك .. كنت سمعت في تانى حلقة من سلسلة خطوات وفرجات للشيخ محمد الغليظ .. هى أصلاً سلسلة عن الشيطان بس .. كان بيقول إن من أكبر مداخل الشيطان إنه يوهم ألإنسان إنه مش موجود وإنه كـ شيطان مالوش سيطرة عليه ولا علي تصرفاته .. لأن ربنا سبحانه وتعالى قال « إن كيد الشيطان كان ضعيفا » .. ضحكنى جدا وقتها لما قال .. طب ما إنتَ حضرتك بردو اتقال عليك « وخلق الإنسان ضعيفا » .. وضعيف مع ضعيف يبقي حرب وممكن إنت كـ إنسان تتهزم .. طب لو عايز أفوز عليه بقا .. أعمل إيه وأنا ضعيف؟ .. عدوك بنفسه قالك على العلاج .. وقال لرب العزة « قال فـبعزتك لأغوينهم أجمعين .. إلا عبادك منهم المخلصين » .. عبادك .. يعنى اللى توليت أمرهم يارب .. يعنى اللى هيستعين بالقوى سبحانه وتعالى هو بس اللى كيد الشيطان ضعيف معاه .. ومش هيقدر يأثر عليه ..

4) اتفقنا خلاص إن المذاكرة عبادة .. طب أنا مابحبش المذاكرة وثقيلة جدًا عليا .. وبزهق منها بسرعة وكذا وكذا .. أيوة ماهي عشان عبادة فالطبيعي تكون ثقيلة علي النفس .. إحنا أصلاً في الدنيا جايين دار اختبار لنفسنا .. فلما تجاهد نفسك وتعمل حاجة نفسك بتكرهها تاخد عليها أجر .. وكل ما تكون أصعب كل ما الأجر يزيد .. عشان الرسول صلى الله عليه وسلم قال « حفت الجنة بالمكاره » .. يعنى طول ما بتجاهد نفسك وتعمل الحاجة اللى تقيلة عليها وكارهاها .. كل ما تقرب أكتر من الجنة .. غير إن أصلًا سبحان الله العظيم زهقك وتعبك كله بيكفر ذنوبك .. ودا بشهادة النبي صلى الله عليه لما قال : « ما يُصِيبُ المُسْلِمَ .. مِن نَصَبٍ ولَا وصَبٍ .. ولَا هَمٍّ ولَا حُزْنٍ ولَا أذًى ولَا غَمٍّ .. حتَّى الشَّوْكَةِ يُشَاكُهَا .. إلَّا كَفَّرَ اللَّهُ بهَا مِن خَطَايَاهُ » ..

3) هتذاكر عشان دي عبادة لله عز وجل .. وإحنا موجودين علي الأرض عشان نعبده .. « وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ » .. والعبادة معناها واسع جدًا زي ما قال ابن تيمية رحمه الله « اسم جامع لكل ما يحبه الله ويرضاه من الأقوال والأعمال الظاهرة والباطنة » .. دي قاعدة بقا تحطها قدامك قبل أي حاجة هتعملها .. اسأل نفسك مثلًا دلوقتي المذاكرة دي حاجة يحبها الله ولا يبغضها؟ .. أكيد هي حاجة كويسة يبقي بردو أكيد يحبها الله ويرضاها .. تبقي كدا عبادة زيها زي الصلاة والصوم والذكر وتاخد أجر طول مانت بتعملها .. بس لما تظبط نيتك بس أهم حاجة وتخليها خالصة لله عز وجل ..