تلاوات ✨

نصر الهيازم 95 ... تسليم واستلام وبداية مشوار العطاء للسودان أنهى طلاب المستوى السادس كلية الطب جامعة الخرطوم آخر امتحان ليهم في المستوى السادس والأخير🎓 . مشوار طويل و معقد ، كان مليان بالتعطيلات و العوائق - كورونا - الثورة - الحرب . الدفعة 95 هيازم مش بس صبروا وجاهدوا وثابروا ووصلوا لخط النهاية لأ. بل مشوا أبعد من كده بإنهم ختّوا لمسة وأثر عطائي في كل سنة من السنين الستة بي قنواتهم المرتبة والمنظمة من أولى لي سادسة 🤍. مشاعر ملخبطة "حزن على وداعهم - و فرح ببداية مشوارهم المهني" ، ما حنقول وداعاً للهيازم لأنوا متأكدين 100% إنو التخرج بالنسبة ليهم ما وداع للكلية وإنما فتح جبهة عطاء خارجية للمجتمع السوداني ومواصلة في عطاءهم للمجمع بالتوجيه و الإرشاد✨ . عقبال النتائج الحلوة والسمحة زيكم يا هيازم 🩷. فليُبشِر المجتمع السوداني بشلال العطاء هيازمي الذي سيضرب كل مؤسسات الدولة الصحية🌺 . #دفعة_العطاء 👨‍🎓 #موسم_الامتحانات

زلزلة الخرطوم من جديد هل ستعود بابنوسة وما علاقة طلاب جامعة الخرطوم كلية طب بذلك ؟🤔 اليوم أكمل طلاب الدفعة ٩٨ المجموعة الثانية امتحان المايكرو والتحموا مع زملائهم ليعود نسيج الدفعة كتلةً واحدة 🥳. على صعيد آخر يتقدم أفراد الدفعة ٩٦ و ٩٧ غداً وبعد غد للقيام بالهجوم والسيطرة على معاقل الإمتحانات في كلية التربية جامعة الخرطوم وعطبرة والخارج☄️ . نسأل الله اكتمال التحام قوات جنوب كردفان و شمال كردفان و الانفتاح على بابنوسة و عودة كل ما تبقى من البقاع إلى حضن الوطن 🤍. أشملوا كل المرابطين في كافة المحاور العلمية و الحربية في دعواتكم #موسم_الامتحانات🧑‍🎓

ورق سادسة في قبضة الهيازم ... الزحف نحو ال OSCE بسطت سريّة الدفعة هيازم السيطرة على كامل إقليم ال Papers و تستعد للزحف نحو إقليم الإمتحانات السريرية في قلعة ال OSCE. يجري تجهيز العتاد من بِدَل و لابكوتات و سماعات و البعض حشد المصّاصات و البلالين " بيدياترك وكده".😆 تمرْكزت مركبات الهيازم القتالية مطوقةً الخناق على قلعة ال OSCE آخر معاقل التمرد الإمتحاني 🥷 . دعواتكم بالشّفع الهادين و المرضى المتجاوبين و التوفيق و السداد لدفعة العطاء ❤️ . #معركة_دفعة_العطاء #موسم_الامتحانات

نهاية مأساوية لطالبة في طب الخرطوم وكيف تحطمت آمال أسرتها اليوم بدأت امتحانات المستوى السادس في كلية الطب جامعة الخرطوم وتفاجأ الطلاب بحرمان زميلتهم من الجلوس للامتحانات بسبب خطأ إداري يحدث عادة لكن ما لا يحدث في العادة عدم المعالجة . حيث لم يتم احتساب الحضور والغياب للدكتورة وسقط اسمها سهواً من أوراق الإدارة وتم إدراجها ضمن المحرومين . نناشد كل أطياف المجتمع للصدح بصوت عالٍ لتفادي هذا الضرر الجسيم والمتمثل في إنهيار الطالبة وضياع سنين ومجهود ذويها . وكما كرر طبيبنا الشهيد بشرى ابن عوف كثيراً و ذكّر بمقولة سيدنا عمر بن الخطاب : "والرجوع إلى الحق خير من التمادي في الباطل رحمه الله وأعلى قدره" . ننشد في إدارة الجامعة والكلية وأساتذتنا الكرام الاتزان والحكمة كما عهدناهم ومراجعة القرار الصادر مشكورين . #أنقذوا_دفعة_العطاء 💔

الميدسن خش الضل 🩺💊 تقدُّم سريّة الدفعة 95 هيازم و بسط السيطرة على ال Medicine Paper بالقوة العسكرية ، في معركة شهدت تكتيكات فنية عالية من الهيازم 🥷🔥 تتوجه السريّة صوب ال Obs and Gyne Paper فأعينوهم بدعائكم 🌺 #موسم_الامتحانات #معركة_دفعة_العطاء🤍

نهاية مرثون البحوث🏁 الشوارما بوكيه ورد🤩 و نفير المجمع 🎊 اليوم آخر يوم لتسليم بحوث تخرج طلاب المستوى الخامس | 96 صوارم . كتير من الناس مفتقدين مناقشة البحث الحضورية و البرنامج البيحصل ، الأهل الكان البجو ، البوكيهات الببتطاقش ، اليوم التاني ألفي حياتك البتلبس فيهو بدلة 😎 "بعد يوم امتحان سادسة". 💚 رغم البُعد و التفرق دايما في نص الضلام نور الشمعة بولّع : 🔁١🍃 حصل استبسال حقيقي من كل الدفع في المجمع ، أي ملي الاستبيانات حاجة معروفة و عادية لكن الدفعة 96 حصل فيها ظرف و مشوار البحوث وصل في لحظة إنو يبقى بعد إعلان الإمتحانات! و بعد دا كلو الطلاب جوة فترة الإمتحانات كانو بملو لي صوارم ❤️. 🔁٢🍃 عدد كبير من الطلاب أشادوا بي دور المشرفين من الناحية المعنوية ! ، كيف يعني معنوية : "بداية البحث ما كنت متحفز شديد لكن والله صراحة كلام السوبرفايسر حفزني أجتهد أكتر" ودي حاجة زيادة على دور الإشراف من السوبرفايسر و دكاترة القسم ربنا يجزيهم كلهم واحد واحد . 🔁٣🍃الأمانة الأكاديمية اللي أبدعت في تحفيز الناس و تفنّنت في أنواع التوجيه و الإرشاد على طول مراحل البحث "سباق الريسيرش - Tips and tricks - لجنة البحوث". يُسدل الستار على مسرحية البحوث لطلاب الدفعة 96 و نَعِد و نُشوّق الدفع الجاية باقتراب حصاد الصوارم اللي حينفعكم ويجنبكم كتير من الصعوبات اللي واجهت صوارم في مشوارهم بإذن الله ❤️. ما حنقول للبقية الدفع شكراً اللي هي زي معليش اللي ما بتأكل عيش😄. حنقول ليكم انتظروا شكرنا العملي "حصاد الصوارم" اللي بيأكل شاورما 😎. #بحوث_التخرج📝🎓 #واطة #مفاهيم⚫

🎧تلاوة هادئة من سورة البقرة 🔖البراء أبو بكر 98 . #البراء #تلاوة 🎙

أحبك أنتيبايوتك🫶💊 الكلمات المهترشة ... فاصل كوميدي 😗 #شوية_كوميديا🎭

مدافع البَنْبر في صبات عبور مصفوفة ديسمبر 🚀😼 1. استثمر طاقتك ضد الشيتات 📖 من أكبر مهدرات و مضيعات الوقت و الطاقة >>> مصارعة الرغبة في التصفح🛑📱 الحل ؟! لو بتقرأ من اللابتوب أو التاب أمسح الوسائط منهم و أقفل التلفون و ختو بعيد⛔️ ، لا داعي لخلق صراع كل مرة ضد السوشيال و الرغبة في التصفح . نوفرها لمعارك الشيتات و الحلحلة و المراجع ⬅🤩. كونو ساهل و قريب بيخلي فتحتو قريبة فبزيد الصراع الماشي في محاربة الرغبة في مسكتو. لكن لمن يكون مقفول و مجدوع في الدولاب لأ اييييك نمشي و نفتحو ، نفسك بتقول آه أقعد أقرأ أحسن . 2. البركة أهم من الوقت 🕦 أذكار الصباح عامل فيصل في ضربة بداية اليوم ، ياها زاتا ال 24 ساعة لكن في وجود البركة بتنجز في ال 24 دي أكتر و البتنجزو دا زاتو بيكون فيهو توفيق 🎯. المواد دي كتيرة ، التوفيق في القراية و إنو تركيزنا يكون ماشي في الشي المهم حاجة كلنا عايزنها . و مورد البركة الأعظم برضو >>> ورد القرآن 📖 3. الصلاة على النبي 🤍ترياق هم الإمتحانات مهو أنت في فترة الإمتحانات معناها قد تكون متنشن 1 + ما قاري 2 ⬇ "يُكفى همّك و يُغفر ذنبك" الكفاية للمشكلة و غفران للذنب عشان التنشنة تروح 🤍 ففي جُمُعتنا دي اغتنم الموضوع دا 4. لا للتخاذل في الدعاء🤲 يا رب أنجح ... ليه ؟! "إذا سألتم الله، فاسألوه الفردوس⭐، فإنها أعلى الجنة" النبي صلى الله عليه وسلم بيعلمنا كيف ندعو أسال ربنا الديستينقشن عديل و خليك بتعاين على قدرة ربنا سبحانه وتعالى مش على وضعك الأكاديمي ، توفيق ربنا دا ما عندو حدود و بعداك أنت أبذل الأسباب. 5. نجاة الجماعة عرس👥 خت ليك دعوة عامة في نهاية دعائك لكل الممتحنين و خص الهيازم بي دعوة كده براها وفاءً ليهم و وقفة معاهم في معركتهم المحتدمة النهائية. مع الدعوات الجماعية العبور بإذن الله بكون جماعي 🛣📍 #واطة #مفاهيم⚫

الإمتحانات ... عسر واحد قصاد يُسرين من ربنا سبحانه وتعالى ❤️ | مجتبى كمال | الدفعة 96 صوارم . #مجتبى #تلاوة ✨

يا طالع الشجرة🌴 ... فاصل كوميدي 😁 #شوية_كوميديا🎭

مشروع يرفع البحث العلمي في كلية الطب جامعة الخرطوم ! خطوة جديدة كلياً ✨ ♡ رد جميل للدفع اللي ملت استبيانات 96 !💌. ♡ و عشان لمن 97 98 99 100 يجيو يعملوا بحث التخرج حقهم يعرفوا يسوّوا شنو و يستفيدوا من تجربة 96 📩 ♡ المشروع دا لينا و ليكم زي ما تعبتوا معانا في الملي حنديكم النتائج و نتعب عشانكم في العرض و التقديم 🫶. ♡ شكراً لكل زول ملأ أي استبيان من استبيانات 96 ، و شكرنا حيكون عملي في المشروع بإذن الله 🤎. ♡ رابط قناة عمارة #مشاريع_عمارة 🌟 #مشروع_حصاد_الصوارم ⚡️

مسافة أقرأ درس جديد بلقى قراية أمس كلها اتبخرّت 😣 هل هناك زهايمر شباب "على وزن حب الشباب"؟! 🤔 #️⃣من أكتر الحاجات رعباً لمن تحصل النص كده في اللكاشر و تكون بتحل أسئلة يلاقيك سؤال في الشيت الأول و تكون ناسهيو كلو كلو ، ما متذكر ولا طشاش 😐. ⬅️ هي الزول يعني يتقطع 😭؟! يقرأ الجديد و يتم ولا يراجع القديم ولا شنو ولا شنو 🖱 ناخد 3⃣2⃣1⃣ 1️⃣. الإنسان بطبعه بعاين للحاجة الما عندو طوالي ؛ عشان كده بصورة لا إرادية تركيزه و اجتهاده كله على الإضافة و الدروس الجديدة أكتر من المراجعة. من القواعد العامة في كم علم : - التأمين أولاً قبل التوسّع. - و الاحتفاظ بالعملاء القدامى أولى من جلب عملاء جدد. - تثبيت المعلومة القديمة يكون قبل إضافة المعلومة الجديدة. - الانتشار لا يعني السيطرة "لم المنهج كلو لا يعني التمكن 🙂" ■ فكرة القاعدة منطقية ، فيزياء فيزياء كده الطاقة المطلوبة للاحتفاظ بي عربية إنها تظل متحركة أقل من طاقة إنك تلز عربية من الزيرو💤 . - الزمن و الطاقة المطلوبة للتثبيت أصلاً ما كتيرة لأنها "ترجيع الشي الإتنسى + تثبيت الموجود". 2⃣. الخلل وين🤔؟! الحاجة الما محسوبة دائما ساهل تتجغمس ◇ يعني مسألة المراجعة لازم يكون في ليها تخطيط و نسبة محددة من الوقت🗓 ، نعم دي حتة فيها اختلاف شاسع "في زول ما بنسى سريع و في زول حفظه تقيل فيياخد وقت في القراية ...الخ". ◇ لكن بعض الأبحاث ¹ بتدي "مقترحات" إنو النسبة تكون 60% قراية / 40% مراجعة . ◇ فالفكرة برضو في التركيز ✍️،زي ما أسلوب و طريقة و مصدر القراية نحن مفصلين فيهو برضو طريقة ووقت و زمن و أسلوب المراجعة برضو ياخد تركيز كويس. 3️⃣. ليه يعني أنت دايرني أقعد اراجع وأخش نص المنهج ما هبشتو ؟! 🤯 ● الكلام دا معناهو تخت بالك في المراجعة عشان ما تقع في فخ النسيان بالجملة مش إنو ما تعمل حسابك إنو تحاول تمر على معظم المقرر 😡. ● المراجعة أصلاً دافع لتكميل المقرر ! : - التقدم بثبات "كونك لو لاقاك سؤال في حاجة ورا على الأقل بتذكر جزء كبير منو دا لو ما كان كله" بتديك دافع و ثقة تكمل برتم تصاعدي لحدي النهاية ، "أنا ماشي صح و بفهم إذا أنا حستمر" Positive Feedback Mechanism. - المواد في كتير من الأحيان بتتبني على بعض فالتقدم برقم أقل سرعة لكن بثبات أكتر قد يخليك بتبني كويس في البداية فتمشي بسرعة في النهايات📈 البتكون معتمدة على الأساس ألفي البداية. - المخ عندو limit لكمية المعلومات الجديدة البقدر يدخلها في اليوم + عندو منحنى نسيان تلقائي🐻 بيحصل أتومتك وما بيوقفه سوى المراجعة ، عشان كده من الذكاء إنك تحافظ على معدل إدخال معلومات منطقي و مواكب لي سِعة مخك بصورة يومية و باقي الوقت نمسك الشي ال already عندنا من إنو يضيع و يتبخر و يروح. مهو بالعقل بقى 👈🧠 -كمان لو أنت بادي بالدروس المهمة أول و المراجعة كل مرة بتبدا بيهم و بتكررهم يا سلام💫. - في النهاية هي استراتيجية مقترحة و كل زول يشوف البيتناسب معاه 💬. - لمزيد من التفاصيل يُنظر في كتيب حفرة ²🕳. - 📇شاركونا في التعليقات طريقة مراجعة نجحت معاكم 📈. ____ 📍 مراجع : ١ = بحث Karpicke & Roediger, 2008 ٢ = كتيب حفرة | صفحة 53 #واطة #مفاهيم⚫

🔗الفاشر ستعود بإذن الله ➿فَلا تَحسَبَنَّ اللَّهَ مُخلِفَ وَعدِهِ رُسُلَهُ إِنَّ اللَّهَ عَزيزٌ ذُو انتِقامٍ➿ و قد وعد ربنا سبحانه وتعالى : ➿وَلَقَد سَبَقَت كَلِمَتُنا لِعِبادِنَا المُرسَلينَ۝إِنَّهُم لَهُمُ المَنصورونَ۝وَإِنَّ جُندَنا لَهُمُ الغالِبونَ۝➿ #ضياء_الدين 🎥 #تلاوة 🎧

الدفعة 5️⃣9️⃣ مفترض كل المجمع يدعي ليهم بكمية التنظيم و الترتيب و كمية الماتريال اللي نظموها في قنواتهم في كل المراحل و المستويات 🥹 لو حنختصر هيازم في كلمة ... فهي دفعة العطاء 🤍 ربنا يهون وييسر الفترة دي على كل الهيازم و يفرحنا كلنا بعبورهم الكامل إلى قنطرة التخرج 🎓 #موسم_الامتحانات #شوية_كوميديا🎭

27 يوم على الإمتحانات ... الحقونا نعمل شنو ؟!😱 1. نعم للخوف ولا للهلع - أنت حتكون في وضعية الاستنفار بسبب الخوف ، و دي حاجة كويسة لأنو حتزيد القراية "أو حتبدأ تقرأ لبعض الناس 💻". - الفكرة تبقى في إدارة الدافع اللي نطى دا على أساس نوجّهو كويس يعبر بينا لي بر الأمان ، خلاص كنا ما قادرين نقرأ الآن يا تقرأ يا تسقط فحتمشي تقرأ ، لننظر إلى النصف الممتلئ من الجك مشكلة عدم القراية اتحلت 👀. - الخوف يُدار بحكمة عشان تستفيد منو يدفعك تقرأ لكن ما يصل درجة الهلع فتبقى مشلول ما قادر تتحرك أو حاسي بي "حا أنجح كيف؟" "ما بقدر" "السقوط جاي" ...الخ . ❤️ تذكر معيّة رب العالمين ليك زمان "وقد أحسن بي إذ أخرجني من السجن" ، ما أول مرة ربنا يسهل ليك الإمتحانات و ما آخر مرة بإذن الله . ▫️ زي ما سيدنا موسى عليه السلام قال "كلا إن معي ربي سيهدين" ، تسهيل الإمتحانات و توفيقك في القراية في ال 27 يوم دي صعب على ربنا سبحانه وتعالى ؟! ▫️ "هو الذي أنزل السكينة في قلوب المؤمنين" الآية دي بتحكي عن نزول السكينة بعد صلح الحديبية موقف كان عصيب شديد ، فاللجوء لي ربنا خاصة في فترات الضيق دا هو البخليك تستكين و تهدأ حرفياً. ▫️الرجعة و اللجوء لربنا ما ضروري يكون حاجة كتيرة ، دعوات و ركعات و تسبيحات بين أوقات القراية و ربنا بيجزي بالنوايا أضعاف العمل و كونو في لحظة الشدة دي نرجع لي ربنا سبحانه وتعالى و نحسن الظن فيهو فقطعاً لن يضيعنا وهو وليّنا و مولانا . 2. لا مانع من شوية جرسة من باب التفريغ😭 ▫️ خاصة لو كنت زول جِرسة ما تبقى براك ، الشيطان زاتو حيلقاها فيك فرقة ، "تنجح مايكرو كيف بس أقنعني ؟!" ، خلي عندك رفيق للتطمين و الفضفضة على الأقل لو ما كان رفيق قراية عديل . 3. تعامل بواقعية مع الوضع💡 شوف الخطر وين ، ياتو مادة ، نحن وضعنا فيها شنو ؟!🤔 طيب جوة المادة دي أهم دروس شنو ، طيب الوقت المتاح كم ؟ شاور و أسأل الأقران و السناير . 🎯 الهدف يكون بناء على الوضع الحالي كده كده و تبدأ تسعى على ضوءه و تسأل ربنا التوفيق. ▫️ على أساس لمن تخت تصور واقعي قابل للتنفيذ بتقدر تمشي عليهو و لمن تجيب ولو 70% منو بتجيك ثقة تلقائية و الهلع بتاع "واي أنا ما قريت" بروح بإذن الله. يسر الله على كل الممتحنين و هون عليهم و أنزل عليهم سكنيته و توفيقه و رحمته ❤️. موفقين جميعاً ، ربنا في ما بتجيكم عوجة ❤️ #واطة #مفاهيم⚫

الفاشر ... انصرهم بي قرايتك قال صلى الله عليه وسلم: "مثلُ المؤمنين في تَوادِّهم ، وتَرَاحُمِهِم ، وتعاطُفِهِمْ . مثلُ الجسَدِ إذا اشتكَى منْهُ عضوٌ تدَاعَى لَهُ سائِرُ الجسَدِ بالسَّهَرِ والْحُمَّى" 《صحيح البخاري》 فكرة الحمى من وجهة نظر طبية عملية تضافر مجهودات ، الشرايين رغم إنها بعيدة من موقع العمليات إلا إنها وقت المعركة بتتوسع عشان تسمح لل WBCs "الكريات البيضاء"🛡 تصل ساحة القتال. نخاع العظام هو البيجدد المقاتلين الجداد ويرسلهم لساحة القتال ، الهرمونات البتتفرز عندها دور ، خلايا مناعة عندها دور ... الخ. ■ كل عضو من الأعضاء عندو حاجة معينة في يدو بيقدر يعملها في نطاق تأثيره المباشر ، قد ما تكون عندها أثر مباشر في الجرح الهناك داك ، لكن حركة مع حركة مع حركة بتعمل حاجة بيصل تأثيرها لي الجرح مباشرة و بيأدي لي علاجو❗️ الفكرة ليست في الحزن في ذات نفسه كحاجة مطلوبة لذاته ، هو باعتباره ردة فعل طبيعية لمُصاب أخواننا العظيم. ◀️ الحاجة العملية المطلوبة >>> الحركة الإيجابية ! ♧ منو البعالج الجرحى؟ ، مش الدكتور؟ الدكتور دا جا من وين؟ ما من القراية ! ♧ استمر في البذل في دائرة تأثيرك و خلي الأحداث دي تقتل أي ذرة تكاسل فيك . ♧ خليك معاهم بالدعاء و الصدقة . ♤ الممارسات من نوعية تتبع تفاصيل الفيديوهات قد تأثر عليك سلباً و تحد و تقلل المساهمة ألفي يدك دي زاتها ! ■ لا زالت ورقة امتحان أي واحد فينا في يدو ، أي قتيل هناك نحن نحسبه عند الله شهيد بإذن الله و خلاص سلّم ورقتو. ◇ نحن واجبنا ورقتنا ألفي يدنا دي نعمل الحاجة ألفي القدامنا عشان حتى لو شفت إنها بسيطة فهي عندها أثر ولو غير مباشر و ربنا ما بيضيعها و درجتها محسوبة في نتائج ورقتك بعدين ! انصرهم : ⬅️ بقرايتك عشان تملك مهارة تقويك إنك تساعد عديل . ⬅️ ببناء أسرتك و تربيتهم على هموم المسلمين. ⬅️بنبذك للتفرّق و بجمع الكلمة و بالدعاء و الصدقة . #انصرهم ❤‍🩹 #مفاهيم⚫

﴿إِن يَمسَسكُم قَرحٌ فَقَد مَسَّ القَومَ قَرحٌ مِثلُهُ وَتِلكَ الأَيّامُ نُداوِلُها بَينَ النّاسِ وَلِيَعلَمَ اللَّهُ الَّذينَ آمَنوا وَيَتَّخِذَ مِنكُم شُهَداءَ وَاللَّهُ لا يُحِبُّ الظّالِمينَ﴾ [آل عمران: 140] #مجزرة_الفاشر