Nairi Hokhikyan / Նաիրի Հոխիկյան

Դաղստանի վրա ահաբեկչական հարձակման հետևում ուղիղ գծով պետք է փնտրել Թուրքիայի հետքերը։ Դրանք սպասելի ու բնական են և կշարունակվեն նաև Ինգուշեթիայում, Չեչնիայում և ընդհանրապես, ամբողջ Հյուսիսային Կովկասում' ձգվելով մինչև Կրասնոդար, Սոչի, Անապա, Ղրիմ ու վերևում' մինչև Ղազախստանի սահման։ Թուրքիան ու Ռուսաստանը բնական թշնամիներ են, որոնք իրավիճակից կախված, կարող են բարեկամանալ, բայց դրանց մրցակցությունը և թշնամությունը երբեք չի դադարում։ Ստանալով Արցախը' Թուրքիայի ճանապարհը ավելի է հեշտանում պանթյուրքիզմի տարածման համար։ Վստահ եմ, շուտով Թուրքիայի ականջները կտեսնեք Ռուսաստանում ահաբեկչական հարձակումների հետևում։

Բելառուսի իշխանությունը թշնամական է տրամադրված Հայաստանի նկատմամբ, և դա Լուկաշենկոն բազմիցս է ապացուցել ինչպես Սերժ Սարգսյանի, այնպես էլ Նիկոլ Փաշինյանի կառավարման ժամանակ։ Ժամանակին նույն Լուկաշենկոն էր Սերժ Սարգսյանին համոզում 5 մլրդ դոլարի դիմաց վաճառել Արցախը։ Ենթադրում եմ, Նիկոլին հաջողվեց համոզել, բայց դրանից մեր երկրի նկատմամբ Լուկաշենկոյի թշնամանքը չի պակասել։ Նույն Լուկաշենկոն էր Ալեքսանդր Զասի միջնորդությամբ 2018-ին Ադրբեջանին վաճառել մեծ քանակի համազարկային կրակի ռեակտիվ համակարգեր, իսկ 2020-ի պատերազմի ժամանակ մեր թշնամուն օգնում էր ՀԱՊԿ ներսում, նույնկերպ 2021-ին ու 2022-ին ՀԱՊԿ -ում արգելում Հայաստանին աջակցության ծրագրերի իրականացումը։ Ես կարծում եմ, որ Բելառուսի իշխանության նկատմամբ Հայաստանի իշխանության ներկա գործողությունները ճիշտ են, թեպետ դրանց պատճառահետևանքային կապերը նույն են և ամուր թելերով կապված են նաև Նիկոլի իշխանության հետ։ Ճիշտ է նաև ակտիվ համագործակցությունը Բելառուսի արմատական ընդդիմության հետ։ Բայց Հայաստանի ընդդիմությունը իր հերթին պետք է իմանա, որ որևէ պարագայում չի կարելի համագործակցել Բելառուսի իշխանության հետ, քանի որ ի դեմս Լուկաշենկոյի, մենք գործ ունենք թշնամու հետ։

Քարոզչությունը լինում է երկու տեսակ՝ ոտքի հանող և ծնկի բերող։ Երբ դու խոսում ես մի երևույթի կամ սպասվող իրադարձության մասին այնպես, որ մարդիկ հուսահատության մեջ են ընկնում ու մտածում՝ ամեն ինչ վերջացած է, ապա դա ծնկի բերող քարոզչություն է։ Վերջին առնվազն 4 տարվա ընթացքում հայերի նկատմամբ իրականցվում է հենց ծնկի բերող քարզչություն ինչպես դրսից՝ թշնամիներից, այնպես էլ ներսից՝ իշխանությունից ու ընդդիմադիրներից միաժամանակ։ ❌Ադրբեջանն ասում է՝ ամեն ինչ վերջացած է, Հայաստանը պարտվել է, եթե գլուխը բարձրացնի՝ կոչնչացնեմ․․․ ❌Հայաստանի իշխանությունն ասում է՝ ամեն ինչ վերջացած է, Արցախն այլևս մերը չի, մենք ինքնախաբեությամբ ենք զբաղված եղել, հիմա պետք է վիզներս ծուռ ապրենք՝ դա անվանելով ինքնիշխանություն։ ❌Հայաստանի ընդդիմությունն ասում է՝ Ադրբեջանը էլի է հարձակվելու, բոլորիս սպանելու է, քանի որ Նիկոլը ամեն ինչ հանձնել է, Արցախը հանձնել է, Տավուշը հանձնել է, Սյունիքը հանձնել է, ամեն ինչ հանձնել է, մենք ոչինչ չունենք։ Մեծ հաշվով, այս երեք քարոզչության մեջ չկա գաղափարական տարբերություն, միակ տարբերությունը ասելիքի ձևի մեջ է։ Իրականում երեք դեպքում էլ ազգին տանում են ծնկի բերելու ճանապարով՝ ամեն ինչ վերջացած է․․․ Մինչդեռ ոտքի հանող քարոզչությունն ունակ է դավաճանված, պարտված ու թուլացած, որդեկորույս ժողովրդին դարձնել հզոր և մարտական ազգ, որը կվերագտնի իր արժեքներն ու ինքնասիրությունը՝ ծնկի բերելով ցանկացած ներքին ու արտաքին թշնամու։ ✅ Հայաստանի ազգային իշխանությունը կասեր՝ ոչինչ էլ վերջացած չէ։ Արցախը վաղ թե ուշ մերն է լինելու, ընդամենը մեզ պետք է զինվել համբերությամբ, գոտիները ձգել և ուժեղանալ։ Մենք գուցե պարտվել ենք ճակատամարտում, բայց պատերազմը դեռ չի ավարտվել, և հաղթում է ոչ թե զենքը, այլ մարտական ոգին, ազգի ապագայի նպատակն ու ձգտումն ուղիղ մեջքով։ ✅ Հայաստանի ազգային ընդդիմությունը պետք է ասի՝ անկախ նրանից, թե ինչ դավադրություն է արել իշխանությունը թշնամու հետ գործարքով, մենք ունենք հայրենիք, պետություն և ազգ, որն ունակ է տեր կանգնել իր արժեքներին և ինքնությանը։ Մենք ունենք վտանգներ արտաքին թշնամու կողմից, բայց պիտի ամրապնդենք մեր բանակի հնարավորությունները, օգնենք մեր զորքին, որ կարողանա դիմակայել թշնամուն։ Այո, իշխանությունը քայքայում է բանակը, բայց մենք հո կարո՞ղ ենք բանակի համար հենարան լինել, օգնել ինչով կարող ենք։ Իշխանությունը հանձնել Արցախը է և խոստացել է հանձնել մեր մյուս հողերը։ Մենք կարող ենք ազատագրել Արցախը, եթե ունենանք ազգային ծրագիր, կարող ենք նաև նոր հանձնումները թույլ չտալ, եթե ազգային ծրագրի հետ ձևավորենք նաև միասնական ճակատ։ Երբ ընդդիմադիր գործիչները անձնական շահից ու եսի առաջմղումից ավելի կարևոր համարեն հայրենիքի շահը, կկարողանան միավորվել իրական ազգային ծրագրի շուրջ ու հաջողության հասնել ներքին ու հետևաբար նաև արտաքին թշնամու նկատմամբ։ Դա արդեն կլինի ոտքի հանող քարոզչություն, որը անպայման բերելու է մեծ հաղթանակների։ Ու ինչպես Գևորգ Էմինը կասեր «Սասունցիների պարը» հանճարեղ ստեղծագործության մեջ․ ․․․ և չի հաղթի ոչինչ այս հին ժողովրդին․․․

Գրեթե միաժամանակ Հայաստանի իշխանական ու ընդդիմադիր առաջնորդների հետ հանդիպեցին ու հրապարակային ուղերձներ հղեցին ԱՄՆ բարձրաստիճան պաշտոնյաները և նրանց շահերի սպասարկող քաղաքական ուժերը։ Նախ հունիսի 11-ին Հայաստան ժամանեց ԱՄՆ փոխպետքարտուղար Ջեյմս Օ՛Բրայենը և Նիկոլ Փաշինյանի հետ հանդիպմանը հայտարարեց, որ ԱՄՆ-ը Հայաստանի հետ երկկողմ առևտուրն ընդլայնելու, ինչպես նաև գլոբալ առևտրում Հայաստանի մասնաբաժինը մեծացնելու հնարավորություններ է տեսնում։ Ակտիվ քննարկում եղավ ԱՄՆ և Հայաստանի իշխանությունների միջև փակ դռների հետևում։ Հետո, հունիսի 16-ին Բագրատ Սրբազանի հետ հանդիպում ունեցան ու այդ հանդիպման լուրը լայնորեն տարածեցին ամերիկյան երազանքով ու ԱՄՆ -ից սնվող ԱԺԲ կուսակցության առաջնորդները' շեշտելով համագործակցությունը խորացնելու մտադրությունը։ Դրանից ուղիղ մեկ օր անց' հունիսի 17-ին, Հայաստան ժամանեց ԱՄՆ պետքարտուղարի տեղակալ Ռիչարդ Վերման, ով պաշտոնական հանդիպումներ ունեցավ ՀՀ վարչապետի, նախագահի և ԱԳ նախարարի հետ, քննարկեց տարածաշրջանային կոնկրետ հարցեր։ Իշխանության խոհանոցից տեղեկատվական արտահոսքից իմանում ենք, որ ԱՄՆ -ն շտապեցնում է Հայաստանի իշխանությանը' օր առաջ կյանքի կոչել դեռևս 2020 թվականի պատերազմից առաջ խոստացված "Զանգեզուրի միջին միջանցք" նախագիծը, որով Ադրբեջանը ուղիղ ցամաքային անվերահսկելի կապ կունենա Նախիջևանի և Թուրքիայի հետ, ապա' դեպի Եվրոպա և հատկապես Անգլիա' Արցախից տեղափոխելով անսահման քանակության ոսկու, պղնձի, ուրանի և այլ հանքանյութեր։ Մյուս կողմից Ռուսաստանը և Իրանը թույլ չեն տալիս Հայաստանի հարավը դարձնել արևմտյան բեռնափոխադրումների անվերահսկելի հարթակ' ձգտելով իրենց հսկողության տակ պահել այն։ Այս համատեքստում պատահական չէին ԱՄՆ փոխպետքարտուղար Ջեյմս Օ՛Բրայենի և պետքարտուղարի տեղակալ Ռիչարդ Վերմայի իրար հաջորդող այցերը Հայաստան։ ԱՄՆ -ն սկսել է ավելի կոշտ միջոցներով ճնշել ՀՀ կառավարությանը' արագացնելու տված խոստման կատարումը' սպառնալով, որ եթե Նիկոլը դրժի տված խոստումը, ԱՄՆ -ն աջակցություն կհայտնի Բագրատ Սրբազանին։ ԱԺԲ-ի հունիսի 16-ի հանդիպումը Սրբազանի հետ և լայնորեն լուսաբանումը հենց այդ նպատակն ունի։ Կարևոր է, որ ազգային ընդդիմությունը զգոն լինի և չդառնա գործիք աշխարհաքաղաքական կենտրոնների ձեռքին։

Արարատի մարզի Տիգրանաշեն գյուղի հետ կապված լուրերը, թե բնակիչներին իբր գումար են առաջարկում տները լքելու համար, դեռևս չի հաստատել գյուղի որևէ բնակիչ։ Ես չունեմ որևէ փաստական տեղեկություն այդ մասին։ ԶԼՄ-ներին և Ֆեյսբուքի օգտատերերին խնդրում եմ այդպիսի լուրեր հաղորդելիս հղում տալ կոնկրետ մարդկանց, այլապես օդի մեջ խոսակցությունը էժանագին քարոզչություն է։ Տիգրանաշենի բնակիչներին խնդրում եմ ինձ անձնական նամակով տեղեկացնել, եթե նման բան կա։ Խոստանում եմ պահպանել անձի գաղտնիությունը։

Ես ունեմ դաշնակցական բազմաթիվ ընկերներ, բայց ինքս կուսակցական չեմ։ Լուսահոգի հայրս եղել է նվիրյալ դաշնակցական, բայց ես երբևէ որևէ կուսակցության շարքեր չեմ մտել և նպատակ էլ չունեմ կուսակցական դառնալ' իմ քաղաքական անկախությունը վեր դասելով։ Ես դաշնակցության գործողությունների հետ հաճախ ունենում եմ տարակարծություններ, մենք հաճախ վիճում ենք քաղաքական տարբեր հարցերի շուրջ, կան ՀՅԴ մի քանի անհաջող անդամներ, որոնք ինձ ատում են ու չարախոսում, բայց դրա հետ մեկտեղ ես համարում եմ, որ Հայաստանում այսօր միակ կայացած կուսակցությունը հենց ՀՅԴ -ն է, որի անդամների համար չկան անվիճելի առաջնորդներ, և կարևորը գաղափարն է։ Նաև դա է պատճառը, որ բոլոր ժամանակների իշխանությունները հետապնդել են հենց շարքային դաշնակցականներին' նրանց մեջ տեսնելով իրենց քաղաքական գոյության վտանգը։ Շարքային դաշնակցականները ռոմանտիկ հայրենասերներ են, որոնց նվիրումը երբեմն լինում է չափից շատ։ Արցախի Վարնկաթաղի (Լուլասազ) բարձունքի կռիվը մեր պատմության հերոսական դրվագներից մեկն է, որի հիմքում հենց այդպիսի ռոմանտիկ հայրենասեր դաշնակցականներն էին, շատերը' հերոսաբար զոհված։ Հայաստանի ներքին ու արտաքին թշնամիները ինձ միշտ անվանում են "դաշնակ"' առանց հասկանալու, որ դրանով ոչ թե վիրավորում են, այլ լավություն անում։ Ես դաշնակցաական չեմ, բայց ուրախ եմ բազմաթիվ դաշնակցական ընկերներ ունենալու համար ու աջակցում եմ նրանց հայրենիքի պահպանության այս դաժան պայքարում։ Ձեզ հետապնդել են կոմունիստները, որոնք հիմա չկան, ԽՍՀՄ-ը չկա, բայց դուք կաք։ Ձեզ հետապնդել է ՀՀՇ-ն, որը հիմա չկա, բայց դուք կաք։ Ձեզ հետապնդել են նաև նախկին իշխանությունները, երբ սիրախաղ էին անում Թուրքիայի հետ։ Այսօր նրանք չկան, բայց դուք կաք։ Ձեզ հիմա հետապնդում է Նիկոլը։ Վաղը նա չի լինելու, բայց դուք կլինեք, եթե շարունակեք մնալ ռոմանտիկ հայրենասերներ։

Վերջերս Արցախցի մի աղջնակ ջերմ խոսքերով անդրադարձել էր Հայաստանի ՔՊ-ական մի քանի չինովնիկների՝ նշելով, թե նրանք լավ են վերաբերվել իրեն, անգամ «հացի պատիվ են տվել»։ Ինձ համար ցավալի էր Արցախցու կողմից այդպիսի հրապարակումը թեկուզ այն պատճառով, որ գովասանքի խոսքեր էին հնչում կոնկրետ մարդկանց նկատմամբ, ովքեր 2020-ի պատերազմի ժամանակ լինելով պետական պաշտոնյաներ, անգործություն էին ցուցաբերել, երբեմն էլ առերևույթ միտումնավոր պատճառ դարձել, որ, օրինակ, Գեղարքունիքի մարզից մարդիկ չկարողանան կամավորագրվել ու գնալ Արցախում կռվելու թշնամու դեմ։ Ու հիմա, երբ նույն այդ իշխանության ձեռամբ Արցախն ամբողջովին հանձնված է թշնամուն, նույն այդ չինովնիկների ժպիտների կամ «պատիվ տալու» համար իր ունեցվածքը, կենսագրությունն ու գերեզմանները կորցրած Արցախցին շնորհակալություն է հայտնում դահիճներին։ Մեծ հաշվով տարբերություն չկա՝ շնորհակալություն հայտնել Նիկոլին ու նրա չինովնիկներին, թե՞ Իլհամ Ալիևին։ Երկուսն էլ Արցախի դահիճներն են։ Սիրելի Արցախցիներ, այսօրվա ջերմ խոսքերի, «պատիվ տալու» կամ թեկուզ նյութական աջակցության դիմաց նետվել իշխանության չինովնիկների գիրկը, հավատացեք, պատիվ չի բերում։

Առաջնագծում հարաբերական հանգիստ վիճակ է, կրակոցները քիչ են, թշնամին ժամանակավորապես չի հարձակվում, և մեր հանրությունը կրկին թմրության մեջ է, կարծես ոչ մի վտանգ այլևս չկա առաջնագծում։ Տևական ժամանակ էլ մարդիկ չեն արձագանքում առաջնագիծը քողարկիչ ցանցերով զինելու կոչերին։ Բայց հենց թշնամին նորից հարձակման անցնի, ըհը, էլի համատարած կսկսեն անվադողեր հավաքել, փողոցներում քաղցրավենիքի փող կհանգանակեն, կշտապեն խանութներից բառացիորեն թռցնել բոլոր տռուսիկ-մայկաները, կարծես դիրքերում կռիվ տվող հայ զինվորը հենց կոնֆետի ու տռուսիկ-մայկայի պակաս ունի, որ հաղթի թշնամուն։ Սիրելի հայրենակիցներ, զինվորի մասին մտածում են մինչև կռիվ սկսվելը, որպեսզի թշնամու հարձակման դեպքում հնարավորինս պաշտպանված լինի։ Իսկ բուն կռվի ժամանակ ոչ կոնֆետը օգուտ կտա, ոչ էլ նույնիսկ անվադողը, քանի որ դրանք դիրքեր հասցնել այլևս չեն կարողանա։ Մենք շարունակում ենք առաջնագիծը զինել քողարկիչ ցանցերով, հեռադիտակներով ու գիշերային տեսանելիության սարքերով, որոնցից ամեն մեկը անգնահատելի դեր է կատարում զինվորի անվտանգության ու առաջնագծի պահպանության համար։ Մի ալարեք։ Օգնեք ձեռք բերենք այդ ապրանքները, որպեսզի ոչ մի օր կանգ չառնի մեր դիրքերի վերազինումը։ Դրանից կախված է մեր երեխաների, եղբայրների ու հայրերի անփորձանք ծառայությունը, հետևաբար նաև մեր հայրենիքի ամրությունը։

Բիզնեսը սիրում է մրցակցություն, որտեղ թույլերը պարտվում են նորարարներին ու համառներին։ gg taxi-ն այս հարցում ունի իր յուրահատկությունը' ոչ միայն նորարար ու համառ է, այլև ազգային ու նվիրյալ։ Բայց իշխանությունը փորձում է ծնկի բերել ամեն ազգային, այդ թվում gg-ին ու իմ ընկեր Խաչատուրին։ Խաչատուրին ճանաչում եմ ավելի քան 10 տարի ու երբեք չեմ տեսել նրա թուլանալը։ Հիմա էլ չի թուլանա, բայց մենք պիտի օգնենք նրան։ Եկեք ամեն կերպ կանգնենք gg-ի կողքին, շատ մարդկանց ներգրավենք նրա ծառայությունների մեջ, որ իշխանության հարձակումը հակառակ արդյունք տա։ Ներբեռնեք gg հավելվածը և դուք էլ օգնեք ազգայինին։