رضا يونس

للتذكير فقط الذي يسمونه "ترند"اليوم اسمه في الحقيقة : وَكُنَّا نَخُوضُ مَعَ الْخَائِضِينَ

هو يوم واحد بالعمر ! بهذه العبارة يبرّر البعض ارتكاب بعض المحرمات ! والمصيبة انه صار هذا اليوم الواحد يمثل كل السنة : مرة بعرس، مرة بسفرة، او حفلة، او عيد ميلاد ! ثم حتى لو كان يوم واحد فعلًا هل هذا مبرر حتى اسوي الحرام ؟ اكو لحظات غيّرت حياة إنسان، واكو زلّة صارت «غلطة العمر». فالإيمان الحقيقي يظهر وقت الفتنة والاختبار، مو فقط بالأيام السهلة. فافرَح بحياتك وعيش شلون ماتريد لكن خليها في طاعة الله وليس في معصيته لا تخلي «يوم واحد بالعمر»… سبب لخسارة كل عمرك !

كيف تحولت الهواتف ومواقع التواصل الاجتماعي إلى بيئة خصبة لتلقي الشبهات السريعة، وضرورة الحذر من الجلوس عند كل داعٍ يجر اليقين إلى الشك، مستندين إلى وصايا النبي الأعظم وأهل البيت (عليهم السلام). كيف يزلزل البلاء البعض فيفقد صوابه لعدم فهمه لطبيعة الصراع والابتلاء في هذه الدنيا، مقابل من يزداد إيماناً وتسليماً ؟ #محاضرات_استمعت_لها https://www.youtube.com/watch?v=FMxDT1dyMzU&t=787s

درس للنساء من سيدة النساء تخيل الزهراء عليها السلام، بنت النبي ﷺ وسيدة نساء العالمين، تستحي أن تطلب من أمير المؤمنين عليه السلام ما لا يقدر عليه! تقول: «يا أبا الحسن، إني لأستحي من إلهي أن أكلف نفسك ما لا تقدر عليه.» وهذا درس للمتزوجين لا الزوجة تحمّل زوجها فوق طاقته بالمقارنات: فلانة عندها، ليش إحنا ما عدنا؟ او انه الزوج يطلب من زوجته تتحمل كل شيء وحدها: البيت، الأطفال، ، والاهتمام به، وكأنها المرأة آلة بلا مشاعر. لذلك لابد انه العلاقة تكون مبنية على الرفق مو الاستنزاف ، وعلى التفاهم، مو التصادم. وهذا هو طريق أهل البيت للحياة الزوجية الناجحة .

انت صريح لو وقح ! يتجاوز على غيره، يحچي بكلام جارح، وإذا عاتبوه يگول: جاي اعبر عن رأي ! إلك حق تختلف، تنتقد، وتنصح… بس ما إلك حق تهين أو تتجاوز على احد الحق ما يحتاج وقاحة حتى يوصل والنصيحة إذا خلت من الأدب فقدت أثرها. والمشكلة مو بالنقاش، المشكلة من يتحول النقاش إلى استعراض وانتصار على الطرف الثاني. خلي هدفك من الحوار توصل للحق مو تثبت إنك صح. لأن قوة الإنسان مو بلسانه الجارح، وإنما بأدبه حتى وان كنت مامقتنع او مختلف مع الاخر .

سألني: شنو الشي اللي يخلّي الإنسان مقتنع بحياته ويحس اله معنى حقيقي؟ گتله اكو اية بالقرآن تجاوبك : ﴿قُلْ إِنَّ صَلَاتِي وَنُسُكِي وَمَحْيَايَ وَمَمَاتِي لِلَّهِ رَبِّ الْعَالَمِينَ﴾ فالغاية الوحيدة اللي تگدر تقنع روحك وعقلك بجدوى الحياة، هي أن تعيش لله، وتخلي كل حياتك ضمن هذا المحور

خلي يذنب براحته المهم گلبه نظيف ! صارت هاي الجملة غطاء لكثير من المحرمات: هي ما تلبس حجاب، بس گلبها نظيف! هو يشرب خمر، بس گلبه نظيف هو شنو المعيار اللي يثبت أن هذا القلب فعلًا نظيف ؟ لو گلتلك: الله يرزقك زوجة جميلة بس بلا أخلاق، راح تقبل؟ أكيد لا؛ لأن الجمال وحده ما يكفي كذلك الإيمان وحده ما يكفي إذا ما يرافقه عمل. قال تعالى: ﴿وَمَنْ أَرَادَ الْآخِرَةَ وَسَعَىٰ لَهَا سَعْيَهَا وَهُوَ مُؤْمِنٌ﴾ وقال رسول الله ﷺ: «لا يقبل إيمان بلا عمل، ولا عمل بلا إيمان». فلا تخدع نفسك بعبارة «گلبه نظيف»؛ لأن نظافة القلب ما تنفصل عن طاعة الله واللي يحب الله فعلًا، راح يبين هذا الشي بأفعاله قبل كلامه.

ماهي صفات اهل الخير ؟ (لَا يَرْضَوْنَ مِنْ أَعْمَالِهِمُ الْقَلِيلَ، وَلَا يَسْتَكْثِرُونَ الْكَثِيرَ فَهُمْ لِأَنْفُسِهِمْ مُتَّهِمُونَ، وَمِنْ أَعْمَالِهِمْ مُشْفِقُونَ) ! _ امير المؤمنين عليه السلام | نهج البلاغة

طريقُ نشرِ الدّينِ وهدايةُ النّاس لم ولن يقف على أحد أبداً، إن كُنّا سببًا فهي منّةٌ من الله ﷻ علينا ونعمةٌ تستوجبُ الشّكر،وقد تُسلَبُ مِنّا ويستبدل سُبحانه غيرنا بنا في أي لحظة .. واجعلنا ممّن تنتصر به لدينك وتعزّ به نصر وليّك ولا تستبدل بنا غيرنا ، فإنّ استبدالك بنا غيرنا عليك يسير وهو علينا كبير إنّك على كلّ شئ قدير. بالفيديو _ سماحة الشيخ حسن البلوشي

شلون أعرف أن الله يحبني ام لا ؟ الإمام الباقر (ع) يقول: «إذا أردت أن تعلم أن فيك خيرًا فانظر إلى قلبك، فإن كان يحب أهل طاعة الله ويبغض أهل معصية الله ففيك خير والله يحبك». يعني راقب قلبك: منو تحب؟ ومنو تحب تجالس؟ لأن الصحبة تأثر عليك، ولهذا يقول الإمام الصادق (ع): «لا تصحب الفاجر فيعلّمك من فجوره». وبالمقابل، الصحبة الصالحة تحصّن إيمانك وتعينك على الخير. ويقول أمير المؤمنين (ع): «خير إخوانك من سارع إلى الخير وجذبك إليه». فإذا تريد خير الدنيا والآخرة، اختار البيئة اللي تقرّبك من الله، لأن الإنسان يتأثر بمن حوله.

لاتخليني اكفر بالله ! هاي من العبارات الي صارت تقال بسهولة، خصوصاً من الواحد يضوج أو يتعصب ! بس تعال شوف العلاقة بين أهل البيت (ع) ورب العالمين. الإمام زين العابدين (ع) لما كان يقف للصلاة، كان يتغير لونه وترتعد أعضاؤه من خشية الله، تخيل الامام الحسن المجتبى (ع) وهو واقف بباب المسجد، يقول: فقيرك ببابك، مسكينك ببابك . فلا تخلي كلمة تطلع منك وقت العصبية، تتحول مع الايام الى لسان معتاد على التجرؤ على الله. ودقق بكلامك… لان بعض الكلمات نضحك عليها بس اثره بالدنيا مانعرفه وما نكدر نتحمل حسابها العسير بالاخرة !

معقولة إذا سمعت شوي اغاني الله راح يحاسبني ؟ المشكلة مو بـ بهاي (الشوية) المشكلة باستخفافك بحكم الله ! أمير المؤمنين (ع) يقول : «أشد الذنوب ما استهان به صاحبه». فلا تنظر إلى صغر المعصية ولكن انظر إلى من عصيت ! يعني لا تخلي كلمة «شوية» تخليك تستهين بأمر الله. لان لازم المؤمن مو فقط يخاف من حجم الذنب فقط… بل لازم يخاف من أنه يصير الذنب عادي بعينه، وقلبه ما عاد يتأثر بيه !

سألني عن الإرادة قال : اني اريد ادرس بس مالي خلگ ! قلت : ومن قال بأن الناجحين يعملون وفق مزاجهم ؟! قال : أنا لدي أهداف ولكن لا أعرف كيف احققها قلت : فرق شاسع بين الشخص الذي عنده إرادة للتغيير والشخص الذي يحلم ويتمنى فقط من دون أن يعمل ! قال : ولكن كيف أُنمي عندي الإرادة ؟ قلت : ببساطة : بالتدريب المستمر تماماً مثل لاعب كمال الأجسام فهو يتدرب يومياً لكي يقوي عضلاته ومن دون التدريب لن ينفعه اي شي . كذلك الإرادة ينميها الإنسان بالتدريب بشرط أنه تكون ضمن حدود الشرع . فهذا هو الطريق وبالارادة فقط يمكنك الحصول على الإرادة أمير المؤمنين عليه السلام يقول: (من شرفت همته عظمت قيمته )

ليش بنتج مامحجبة؟ تكول: بعدها صغيرة! ليش بنتج مامحجبة؟ تكول: «بعدها صغيرة». طيب، لمن دخلتوها للمدرسة، جانت مقتنعة؟ لو لأنكم تعرفون هذا الأفضل إلها؟ وإذا مرضت، تشربوها الدواء المر حتى لو ما تحبه، ليش هنا ما تكولون: «بعدها صغيرة»؟ ليش بالأمور الشرعية ننتظر الاقتناع، وما نبدأ بالتعويد والتربية؟ الإمام الصادق (ع) يقول: «إنا نأمر صبياننا بالصلاة إذا كانوا بني خمس سنين». فلازم نفهم انه التربية تبدأ من الصغر، لأن إذا ما كنت أنت قدوة ابنك اليوم، لا تستغرب باچر إذا بحث عن القدوة من خلال بثوث التيك توك !

انت فارسي لو محمدي !؟ فد يوم دخل "سلمان المحمدي" للمسجد وسلم على اخوانه من المؤمنين. فرادوا يعرفون نسب هذا الرجل الفارسي، فبدأوا يتكلمون مع بعضهم البعض بصوت يسمعه "سلمان". فگال واحد منهم أنا من قبيلة تميم. والثاني گال أنا من قريش. والثالث گال: أما أنا فمن الأوس.. وهيج ظل سلمان ساكت ورادوا يعرفون نسبه، فگالوا: وأنت يا سلمان شنو هو نسبك وحسبك ؟ هنا جاوب سلمان حتى يعلمهم معنى الإيمان ويعلمهم الإنتماء الحقيقي الي يكون للإسلام وليس للأرض او الحدود الجغرافية ! فگال سلمان: أنا ابن الإسلام... كنت ضالاً فهداني الله بمحمد. وكنت فقيراً فأغناني الله بمحمد. وكنت مملوكاً فاعتقني الله بمحمد. فهذا حسبي ونسبي. وفجأة سكتوا الجماعة الموجودين ! ولكن تعلموا درس من دروس الإيمان والإسلام المحمدي الأصيل

لا تصير متدين، لا يحچون عليك ! رسالة من رسول الله الى الشباب انك تتمسك بدينك، وتحافظ على مبادئك، وتفتخر بهويتك الإسلامية: هذا هو القوة الحقيقية. رسول الله (ص) يعلمنا ويقول : “إنّ الله يحبّ الشابّ الذي يفني شبابه في طاعة الله.” تدري شنو يعني؟ يعني رب العالمين يحبك، ويكتبك من المقربين ، لأنك، بعمر المغريات والشهوات، اخترت طريق الطاعة بدل طريق الضياع. ولاتنسى انه الالتزم بالطاعة بهذا الزمن الصعب بطولة. لأنك لما تقول “لا” للحرام، “نعم” للطاعة، تثبت أنك قوي فعلاً . لذلك خلي التدين هويتك ولاتخجل من هذا الشي . خليك أصيل، واضح، مرفوع الراس. تدينك ما ينقص من هيبتك… تدينك يزيدك احترام وقوة، ومحبة عند الله واهل البيت ( ع) والناس.

" وَدَّ الَّذِينَ كَفَرُوا لَوْ تَغْفُلُونَ عَنْ أَسْلِحَتِكُمْ وَأَمْتِعَتِكُمْ فَيَمِيلُونَ عَلَيْكُم مَّيْلَةً وَاحِدَةً " لازم نتوقف عند هذه الآية هواي ونتدبر فيها لان تكشف عن طبيعة العدو الي يترقب لحظات الغفلة حتى ينقض عليك بضربة واحدة. فلابد أن نستخلص منها العبرة، ونكون دائمًا على وعي واستعداد، واعيين لأدوات قوتنا، سواء كانت مادية أم معنوية، حتى مانوگع في يوم من الأيام فريسة لمكائد الأعداء .

من أعظم مصائب الجهل أن يجهل الجاهل جهله. !