Bhakthi TV

12th December 2023 కార్తిక అమావాస్య (కార్తికదీప వ్రతోద్యాపనం) : కార్తిక అమావాస్య నాడు పంచ పల్లవాలతో(రావి, మర్రి, జువ్వి, మోదుగు, మేడి) అభ్యంగన స్నానమాచరించాలి. దీనిని పంచత్వక్‌ ఉదక స్నానం అని అంటారు. ప్రదోష సమయంలో స్నానమాచరించి దేవాలయాల్లో, ఇంటిలో, దేవతా వృక్షాల వద్ద, కూడళ్ళలో దీపాలు వెలిగించి బ్రాహ్మణులను, పెద్దలను పూజించి భోజనం చేయాలి. హేమాద్రి పురాణానుసారం సూర్యుడు తులా రాశిలో ఉన్నప్పడు ప్రదోష సమయమున దివిటీలతో, ఆకాశదీపాలతో పితృదేవతలకు దారి చూపవలెను. అలాగే ఆశ్వయుజ, కార్తిక అమావాస్యల నాడు రాత్రి నిద్రించరాదు. ఆరోజు అర్థరాత్రి లక్ష్మీదేవి పురవీధులలో ఆకాశమార్గమున సంచరిస్తూ ఉంటుంది కావున ఇంటి వాకిలిలో, ఇంట్లో ముగ్గులు, తోరణములు, దీపాలతో అలంకరించి లక్ష్మీదేవికి స్వాగతం పలుకుతూ స్తోత్రములు, పూజలు చేయవలెను. ఈవిధంగా చేయని వారింటికి లక్ష్మీదేవి చేరదని పురాణ వచనం. అమావాస్య అపర రాత్రి దాటిన పిదప అనగా బ్రాహ్మీ ముహూర్తంలో ప్రతిపత్‌ స్పర్శతో జనులు డప్పులతో అలక్ష్మి(దారిద్య్రం)ని తరిమివేయాలి.

11th December 2023 మాసశివరాత్రి : ప్రతి నెల అమావాస్య ముందురోజు వచ్చే చతుర్ధశి తిథిని మాస శివరాత్రిగా జరుపుకుంటారు. ఈ రోజు ఉదయాన్నే నిద్ర లేచిన తర్వాత స్నానాధికాలు ముగించుకుని దగ్గరలోని శివాలయ దర్శనం చేయాలి. ఉపవాసము ఉండి సదాశివుడిని మనసులో నిలుపుకుని ఆయన నామాన్ని స్మరించాలి. ప్రదోష సమయంలో ఆ సర్వేశ్వరుడికి అభిషేకం జరిపి, బిల్వదళాలతో అర్చించాలి. ఈ విధంగా చేయడం వలన సమస్త పాపాలు నశించడమే కాకుండా దోషాలు తొలగిపోతాయి. దీర్ఘ కాలిక అనారోగ్య సమస్యల నుండి ఉపశమనం, సకలశుభాలు చేకూరతాయని పండితులు చెపుతున్నారు.

11th December 2023 చివరి కార్తిక సోమవారం : జడత్వం నుంచి జాగృతి దిశగా మనిషిని చైతన్యవంతం చేసే పర్వదినం కార్తిక సోమవారం. మనస్సు చేత, వాక్కు చేత, కర్మ చేత చేసిన పాపాలన్నిటినీ పోగొట్టే శక్తి ఆ పర్వదినానికి ఉంది. త్రికరణశుద్ధిగా కార్తిక సోమవార వ్రతాన్ని ఆచరించినవారు కైలాసాన్ని చేరుకుంటారని కార్తిక పురాణం చెబుతోంది. కార్తిక సోమవారాల్లో శాస్త్రవిధానంగా స్నాన, జప, తర్పణ, దానాలు చేసినవారికి వెయ్యి అశ్వమేథ యాగాలు చేసిన పుణ్యం లభిస్తుందని విశ్వాసం.