عَوْن♥️✨

من انهاردة خلي التاريخ الهجري يظهر علي موبايلك زي التاريخ الميلادي.. والتطبيق ده هيساعدك انك تظهره علي الخلفية دوس علي البوست وتابع بالخطوات ✅

لا تعتبروا التاريخ الهجري شيئًا تكميليًّا، بل هو من هُويّتك. - الشيخ أحمد السيّد.

متنسوش تدعوا لطلبة ثانوية عامة♥.. هيبدأوا اول امتحان ليهم بكرة

بص يا صديقي.. أنا مش هقولك متسهرش عشان تشوف ماتش الأهلي.. ولا هقولك انك مينفعش تنام وتصحي مخصوص عشان الماتش.. بس لو هتعمل حاجة من الاتنين دول وهتكون صاحي وقت الفجر.. فا انزل صلي الفجر في المسجد.. لعل دي تكون البداية وتستمر بعدها.. وال 5 او ال 10 دقايق اللي هيفوتوك من الماتش هيتعرضوا وهيتعادوا عشروميت مرة وهينزلوا في كل حتة متقلقش.. الماتش كله هيتعاد تاني.. إنما الصلاة في وقتها مش بتتعاد روح صلّي بس، وبعد كدة وقتك وانت حر فيه، اعمل فيه اللي انت عايزه

تخيل معايا يوم القيامة بعد ما أعمالك تتوزن وتلاقي إن حسناتك كتير وغلبت سيئاتك.. فتفرح وتقول خلاص كده الطريق للجنة بقى مفتوح. ويادوب تيجي تمر على الصراط، فتلاقي طابور طويل عريض من الناس مستنيينك - مئات ويمكن آلاف - ناس أول مرة تشوفهم في حياتك وناس كنت فاكر إنهم نسيوك من زمان، وكلهم جايين ياخدوا منك حقوقهم. تلاقي واحد جاي يطلب حقه عشان زمان وأنت عندك 13 سنة اتريقت عليه، سواء على لبسه أو شكله أو اغتبته في قعدة، فياخدله شوية حسنات على قدر اللي أنت عملته فيه. وتلاقي واحدة متعرفهاش جاية تاخد أجر كام فرض صليتهم عشان شتمت ابنها بأمه في لحظة غضب، وعلى حسب اللفظ اللي أنت قُلته بالظبط، لأن مش كل الألفاظ زي بعضها، وربنا بيحاسب بمثقال الذرة! وتلاقي شخص مجهول جاي ياخد حقه لأنه حوّل لك رصيد بالغلط واتصل عليك ترجّعه، وأنت تجاهلته.. فجاي هو كمان ياخد حقه على قد المبلغ اللي أنت أخدته بالظبط، الله أعلم يساوي أجر كام فرض صليته ده؟ ولا أجر كام نافلة؟ ربنا هيحدده بالظبط لا هيظلمك ولا يظلمه. وتلاقي لاعب كورة مشهور ومعاه مراته وعياله جايين ياخدوا من حسناتك.. ليه ياعم؟ عشان ضيّع ضربة جزاء أو اتسبب في هدف في فريقه أو مضى مع نادي منافس، وأنت قعدت تلعنه هو وأهله كلهم على الفيس. الله أعلم هياخدوا منك حسنات كام صدقة أنت تصدقت بيها ولا كام ركعة أنت صليتها قيام ليل. وواحد تاني متعرفهوش جاي عايز حقه لأنه ضاع منه موبايله وأنت لقيته، وروحت شايل منه الخط وأخدته لنفسك. وواحدة وجوزها جايين عايزين حقهم لإنك كنتِ أو كنت سبب في خراب بيتهم، وواحد ألقى عليك السلام في مرة وأنت سمعت وتجاهلته. وتلاقي واحد صاحبك وأنتيمك! هو كمان جاي عايز حقه لأنك مسكت موبايله وشوفت محادثاته على الواتس مثلًا بدون علمه أو نقلت سكرين أو سجلتله مكالمة وسمّعتها لحد تاني. وواحد اشترى منك حاجة وكان ليه عندك رُبع جنيه باقي، وأنت قُلتله "ماشي" يبقى ليك وطنّشته، وواحد أنت استلفت منه فلوس ولما جه يطالبك بيها قولتله مش معايا.. وأنت معاك عادي. وواحدة روّجت عنها سمعة إنها مش كويسة ووقفت حالها، وواحد أنتِ وصحباتك قعدتوا تتكلموا عليه وتقولي ده ماشي مع فُلانة ولا مصاحبها وشوّهتي صورته.. وواحد قعدت تعمل عليه ميمز على الفيس وتشيّر، وجارك اللي كنت بتسرق منه الواي فاي بدون ما يعرف. وغيرهم كتير من يوم ما بلغت ليوم وفاتك، كل صغيرة وكبيرة متسجّلة في صحيفتك، محدش هيفتري عليك ولا ينسبلك حاجة أنت معملتهاش، وتتفاجئ إن حسناتك خلصت مفيش ولا حسنة ولسة في ناس واقفة عايزة حقوقها! تقولهم: "معنديش حاجة تانية أديهالكم"، يقولولك: "خلاص خد من ذنوبنا اتحاسب عليها أنت". وبرضو هتاخد ذنوب على قدر الظلم اللي أنت ظلمته، يعني مش هتاخد ذنب أكبر من الظلم بتاعك مثلًا ولا أقل منه، فتلاقي بعد ما كانت حسناتك كتير، بقيت صفر حسنات، وشايل كمان ذنوبك وذنوب ناس تانية أنت معملتهاش، وتيجي تعدي من على الصراط فتقع في النار والعياذ بالله! واحنا بنتكلم دلوقتي الموضوع ممكن تحسّه سهل، أنا بكتب البوست وأنا قاعد على المكتب وأنت غالبًا على السرير ومشغّل التكييف، فمش هتحس بخطورة الكلام ده، لكن يوم القيامة كل ده هيحصل والجو حر جدًا ونار قدامك وصراط أرق من الشَعرة وأحدّ من السيف! وشايف الناس اللي خلصت حساب قبلك بتتزحلق من عليه وتقع، ساعتها كل حسنة هتتاخد منك هتخلي قلبك يقف، ده حتى الحيوانات والطيور هيحصل معاهم كده، متخيل؟! لأن اليوم ده يوم العدل المطلق! مفيش أي حاجة مش هتاخد حقها، بس الكائنات التانية مش هيكون عندهم رد الحقوق بالحسنات والسيئات وكده، لأ القطة اللي ضربت، هتاخد نفس الضربة وهكذا، وبعد ما الحساب بينهم يخلص ربنا هيقولهم "كونوا ترابًا" فيرجعوا تاني إلى العدم ميبقاش ليهم وجود، ساعتها الكافر هيشوفهم وهما بيتحولوا لتراب ويقول:

"يا لَيتَني كُنتُ تُرابًا"

📌 لكل الشباب اللي بتشجَّع الأهلي أو بتحب الكورة عمومًا.. الكلام ده ليا وليكم: ▫ماتشات كأس العالم للأندية قرَّبت، وهتبدأ خلال أيَّام قليلة، والمصيبة إن مواعيد الماتشات هتكون ما بين ٣ و٤ الفجر! وعايز أقولك بصراحة.. الموضوع ده مُرعب! ليه؟! - لأنك لو مش متعوِّد تصحى تصلي الفجر، وفجأة صحيت مخصوص علشان تتفرَّج على الماتش، فأنت كدة أقمت الحُجَّة على نفسك! يعني لما ربنا يسألك يوم القيامة: كنت بتفوت صلاة الفجر ليه؟ - هترد تقول إيه؟ وهيكون عندك رد أصلًا؟ - ولا هتفتكر يوم ما صحيت بكل نشاط علشان تشوف الأهلي؟ ✅ فالحل دلوقتي إنك تبدأ تصلي الفجر من النهاردة ، وتثبت إنك قادر تقوم لله قبل ما تقوم للكورة، وخدها عادة قبل الماتشات ما تبدأ؛ علشان متقعش في الغلطة دي.

كل عام وأنتم بخير وعيد مبارك عليكم جميعًا 🤍🌱 تقبّل الله منّا ومنكم صالح الأعمال💗 ▫ لا تنسوا قراءة سورة الكهف❤

📌 وفي الساعه الأخيرة من يوم عرفة - نسأل اللهم أن يتقبلنا و أن يشملنا برحمته و أن يستجب دعواتنا وأن يقرّ بها أعيننا يارب العالمين، وأن يجعلنا في صفوف الحجاج العام القادم لا تغفلوا عنّا بالدعوات فضلًا💗

يوم عرفة.. ده يوم العهد❤❤❤

- م. أحمد عامر | وعي #وليال_عشر

"تعظيمك للأيام اللي ربنا بيحبها ده من أكتر الحاجات اللي تهيأك نفسيًا"

- م. شريف علي | وعي #وليال_عشر

📌 وهنا أخيرًا وصلنا لنهاية دراستنا الأكاديمية.. اليوم كان آخر امتحان في الكلية.. فيه شوية مشاعر متناقضة.. ما بين حب المكان (حتي وهو بيطلع أسوأ ما فينا) وحبي لدفعتيَّ (من مساعدات لتلخيصات وتربيطات وحل امتحانات، وناس تصيح وناس تهوّن، لخناقات برضو مخلوش😂) وحبي لبعض من الدكاترة، والأكتر كمان المعيدين اللي كانوا مسهليييين ومهونييييين علينا عقبات كتيرة.. وحبي لفترتي الجامعية حقيقي بكل تخبطاتها وتنقلاتها.. واني عيشت ما بين دفعتين الاتنين أجمل من بعض.. بتمني لكل فرد في دفعتيّ انهم يكونوا في أفضل حال وأجمل شكل علي المستوي المهني وإنهم يكونوا أفضل ناس في المكان اللي هما فيه لأنهم بجد يستحقوا وتعبوا كتير.. حزين اني هفتقدهم، مش متخيل ان هزارهم وتهوينهم ومساعدتهم وكل ما هو جميل وكل ما هو كمان وحش انه خلاص هيروح كدة! محطة جديدة قادمة... دعواتكم بالتوفيق والسداد ليا ولدفعتي جميعًا ▫دفعتي اللي كنت فيها الأول هيبدأوا امتحانات  بكرة.. متنسوش تضموهم في دعواتكم وان ربنا يفرح قلوبهم وييسرلهم آخر شهر في حياتهم الجامعية♥ لا تنسونا من صالح دعواتكم، وصلوا علي النبي دُمتم بخير💗

يارب يارب يارب اللهم لك الحمد أن بلغتنا أحب الأيام إليك اللهم ارزقنا طاعتك فيها على نحو يرضيك اللهم أعنا على ذكرك وشكرك وحسن عبادتك اللهم ارزقنا حج بيتك الحرام والمتابعة بين الحج والعمرة اللهم لا تحرمنا فضلك اللهم وسع لنا في أرزاقنا وارزقنا شكرها اللهم اغفر لنا ذنوبنا وإسرافنا في أمرنا اللهم اغفر لنا وارحمنا وعافنا واعف عنا اللهم لا تؤاخذنا إن نسينا أو أخطأنا اللهم لا تحملنا ما لا طاقة لنا به اللهم استرنا فوق الأرض وتحت الأرض ويوم العرض اللهم اجعل ما تحت سترك عفو ومغفرة اللهم اهد قلوبنا واجعلها سالمة من كل داء اللهم ارزقنا ألسنة ذاكرة وجوارح طائعة اللهم اصرف عنا شرار خلقك اللهم اصرف عنا السوء وأهله اللهم ارزقنا صحبة الصالحين اللهم اجعلنا مقيمين الصلاة ومن ذرياتنا ربنا وتقبل دعاء 🤲🏻 اللهم اهد ذرياتنا واجعلهم هداة مهتدين اللهم اجعلهم صالحين بارين اللهم اجعلهم أئمة للمسلمين اللهم اصرف عنهم السوء كله اللهم ارزقنا بر آبائنا أحياءا وأمواتا اللهم بارك لنا فيهم ومتعهم بالعافية اللهم ارحم من مات منهم ومتعه بالجنة اللهم ارزقنا حفظ القرآن واجعلنا من أهله وخاصته اللهم احفظنا بالقرآن واجعلنا هداة مهتدين اللهم اشرح صدورنا للقرآن وارزقنا فهمه والعمل بما فيه اللهم انفعنا وانفع بنا اللهم استعملنا في طاعتك وخدمة دينك اللهم اكفنا بحلالك عن حرامك وبفضلك عمن سواك اللهم ارزقنا الحلال ولا ترزقنا غيره اللهم فرج عن المسلمين همومهم اللهم استودعناك إخواننا من المسلمين فانصرهم واحفظهم اللهم أصلح لنا شأننا كله ولا تكلنا إلى أنفسنا طرفة عين اللهم صل وسلم وبارك على سيدنا محمد ارفعوا أيديكم بالدعاء واسألوا الله من واسع فضله ولا تنسونا من صالح دعائكم #دعاء #آخر_ساعة #الجمعة

متوقفش طول الايام دي عن إنك تقول: سبحان الله والحمد لله ولا إله الا الله والله اكبر وانت ماشي وانت راكب وانت بتذاكر وانت نايم علي السرير وانت في الشغل وانت في المواصلات وانت في اي وضع وفي اي مكان.

📌 مهم للشباب.. مينفعش تقلد وخلاص، احنا مبنعزلش الشيء عن أصله

خلي شعارك في الأيام دي

"وعجلت إليك رب لترضي"

الفيديو ده نزلناه في نفس التوقيت ده السنة اللي فاتت، وحقيقي المعني اللي فيه مهم أوي في أيام مُباركة زي دي.. استعينوا بالله، وجددوا نواياكم💗 لا تنسونا من صالح دعائكم، وصلوا علي النبي.. دُمتم بخير❤

يبدأ صيام العشر الأوائل من ذي الحجة يوم الاربعاء 28/5/2025

هنيئًا لمن أدركهم وذكّر غيره. «وَلَيَالٍ عَشْرٍ»

وَذَكِّرْ فَإِنَّ الذِّكْرَىٰ تَنفَعُ الْمُؤْمِنِينَ.