دكان السعادة.

أحد الأخوة يكبرني بحوالي 10 سنوات، كنا بنحضر مجالس ودروس مع بعض، وهو ما شاء الله ملتزم بمعنى الكلمة، ملوش في السوشيال ميديا ولا الجو ده خالص، حياته عبارة عن من الشغل للبيت للعبادة فقط! وهذا الأخ معروف بينا إنه بيصلي صح، بيصلي بجد مش الصلاة الأي كلام بتاعتنا دي، الركعة الواحدة بيعطيها حقها، لدرجة إنه بيرفض يدخل إمام عشان الناس مش هتستحمله! عنده صبر إنه يفضل ساجد يدعي، أو واقف يقرأ بشكل عجيب جدا حرفيا، كأنَّه واحد من الـ بنقرأ عنهم من السلف.. المهم كنت معاه من شوية، فقالي أنا هنصحك نصيحة، أثرها هيكون ليك ولذريتك ولأهل بيتك، قالي: صلِّي بطأنينة وخشوع، ووالله والله هتلاقي كل حياتك كويسة، وذريتك ربنا مبارك فيها، ووقتك وشغلك وفلوسك وزوجتك وكل حاجة ربنا هيطرح فيها البركة بسبب إنك مؤدب مع ربنا، وبتقف قدامه بطمأنينه وخشوع! أنا أرى أنَّ هذه النصيحة من أفضل ما نُصحت، وأنا أنصحكم بها. - محمود الرفاعي

لا تجلس صامتًا (سبّح، هلّل، كبّر) فأنت في أفضل أيام الدنيا على الإطلاق.. حرّك لسانك.

أنتَ تُصلِّي علىٰ النَّبي ﷺ واحِدة، واللَّه فِي عليَائِه يُصلِّي عليك بهَا عَشرًا!

العشر الأوائل!

جايلك موسم طاعة عظيم؛ وأنت حي ترزق مد الله في عمرك اليوم بعد اليوم لينظر؛ أتشكر أم تجحد أنعمه عليك. العشر من ذي الحجة - أعظم أيام الدنيا - هتبدأ أول ليلة فيهن من مغرب الخميس بكرة بإذن الله تعالى. انوِ التوبة انوِ إنك تقدم بين يدي ربك عملا صالحا يحبك لأجله ويقربك إليه. إنت مش عايز حاجة من الدنيا دي إلا إنك تدخل الجنة! جاتلك فرصة عظيمة بأجور عظيمة، لا تغفل عنها وتكون من الخاسرين! استحضر عظمة الصيام والذكر والقول الصالح والابتسامة والحث على المعروف والنهي عن المنكر. لا تترك ثغرا إلا وتملؤه، واستحضر نية التغيير طويل الأجل، مش بس في العشر دول، وإنما تغيير حقيقي تريد به وجه الله. افطن يا عبد وابصر الخير! لا تجعل الدنيا تلهيك. - إسلام منصور

أيام الامتحانات رغم شدتها على أي حد مهما كان جامد إلَّا إنها بتكشفك، وتحرجك جامد أوي قدام نفسك: - لإنك بتقدر تواصل أكتر من ساعتين مذاكرة فما فوق؛ فتعرفك إنك تقدر تعمل دا في الأيام العادية. - لإنها بتعرفك إنك ممكن عادي تنام قبل الفجر بساعة أو ساعتين، وتصحى عادي زي ما بتعمل ليلة الامتحان، وممكن تكمل اليوم عادي من غير ما تنام بعد الفجر بس الموقف بيبقى مخزي أوي، اللي هو لدنيا زائلة قمت، ولربنا بتظبط المنبه وخلاص وغالبًا مبتقومش! - لإن ليالي الامتحانات وضغطها حاجة بتبقى مرهقة نفسيًّا وذهنيًّا وبدنيًّا، بس دايمًا متنساش تشكر ربنا إنه مستعملك، دي نعمة ربنا أنعم عليك بيها، غيرك عايش تافه بلا هدف، مقضيها نوم وقهاوي وماتشات بدون أي معنى لحياته، فدي نعمة كبيرة لازم تشكر ربنا عليها؛ لأنك لو ماشكرتش هتُسلبها أو تُحرم بركتها، مننساش نحتسب ده كله عند ربنا، ونسأله إنه يُلقِّنَّا الحُجة لما نتسأل عن شبابنا، احنا في زحام من النِّعم والله! - د. أحمد غلوش.

"ميدانكم الأول أنفسكم"

مش عارفة أجيبهالك إزاي أوي بس عمر فتّشت في قلبك عن الإيمان الأبدي بالغيبيات البسيطة جدًا اللي بيشتمل عليها الكتاب والسُنة في ديننا؟ يعني هل وانت بتقرأ مثلًا أذكار الصباح وجيت عند فضل قراءة آية الكرسي ولاقيت مكتوب إنها بتُجير من الجن لو قرأتها الصبح لحد بالليل: فهل انت مصدق من قلبك إن بجد مفيش جِن هيقدر يلمسك من لحظة ما قولتها لحد المساء؟ أو وانت بتقول ذِكر "لا إله إلا الله وحده لا شريك له له الملك وله الحمد وهو على كل شيء قدير" _اللي بيتقال عشر مرات بعد المغرب وبعد الفجر_ ولاقيت في فضله تلات حاجات: إنه كأنك عتَقت عشر رقاب، وكُتب لك به عشر حسنات ومُحي عنك عشر سيئات، وكمان كان حماية ليك من الشيطان. فهل انت من قلبك متخيّل ومصدّق إن دا بجد وحقيقي؟ لما بتصوم يوم عرفة: مصدّق إنه بجد هيغفر لك سنة فاتت من عمرك وسنة جاية؟ ليلة القدر قيامها يعدل قيام ٨٤ سنة؟ متخيل العدد ومصدّقه؟ وانت بتقول في سرّك يا رب اغفِر لي ما تقدّم من ذنبي وما تأخّر، يا رب اغفر لي ذنبي سرّه وعَلَنه. مِصدّق من كل قلبك إن بس خلاص هو فعلًا ربنا استجاب للدعوة دي، وصفيحتك اتمحت من السيئات؟ شَعرة يا صديقي، شَعرة اليقين أهم أهم العبادات.. وهي الشَعرة دي اللي بينك وبين الخشوع، وبين التدبّر، وبين عمل الطاعة بحُب وإقبال من كل قلبك، وبين استجابة الدعاء. ولو هنصحك بحاجة من قلبي تشتغل عليها لسنوات، إن مع كل عبادة تعملها تدرّب نفسك على استحضار اليقين في حدوث فضلها، والتأكد من قلبك إن طالما تيقّنت فخلاص هي حصلت. واليقين في الغيبيات من أقوَى مُثبّتات الإيمان بالله، ومن أجمل المداخل اللي تتذوَق بها حلاوة الإيمان. - يسر يونس.

من ذاق حلاوة القُرب من الله عزّ وجل، يخشى مرارة البُعد عنه. - د. أحمد عبدالمنعم.

أنصحكم بيه بجد - لنك التطبيق https://drive.google.com/file/d/10wnhiDYEkFtudRhI5hTVXHQCILLfiMIq/view?usp=drivesdk - ودا لينك الأيفون. https://apps.apple.com/gb/app/sa7wa-%D8%B5%D8%AD%D9%88%D8%A9/id6472701442 طبعًا مننساش نغض بصرنا عن صور الرجال اللي في التطبيق + نوطي الصوت لو فيه إعلان فيه موسيقى:)