GRACE & TRUTH MINISTRY WORLDWIDE

እውቀትን ወደ ተግባር! ዸጉሜ 4 ክፍል አንድ ሰላም ተከታታዮቼ! ዛሬን ጨምሮ ለአምስት ቀናት፣ “እውቀትን ወደ ተግባር!” በሚል ርዕስ ለሕይወታችሁ ጠቃሚ የሆኑ መመሪያዎችን አጋራችኋለሁ። በማንበብ፣ በስልጠና ወይም በመደበኛ ትምህርት አንድን እውቀት ካገኘን በኋላ፣ የሚቀጥለው የቤት ሥራችን ያንን እውቀት ወደ ተግባር መቀየር ነው። ይህን ካላደረግን ባለንበት እየቆምን ብቻ ሳይሆን፣ ቀስ በቀስ ወደ ኋላ ልንቀር እንችላለን። “እውቀት መንገዱን ያሳያል፤ ተግባር ግን እግርን ያንቀሳቅሳል።” “የምናውቀው ነገር ሌሎችን ያስደንቃል፤ የምንተገብረው ነገር ግን እኛን ወደ ፊት ያራምደናል።” 1. ተግባር የሌለው እውቀት የሐሰት በራስ መተማመንን ይፈጥራል አንድ ሰው ምን ማድረግ እንዳለበት እያወቀ እንኳን ሊወድቅ ይችላል። ምክንያቱም ማወቅና ማድረግ አንድ ነገር አይደሉም። ለምሳሌ፣ ስለ ዋና ብዙ መጽሐፍትን ያነበበ፣ ስለ ዋና ቴክኒኮችም በደንብ የተማረ ሰው በተግባር ውኃ ውስጥ ገብቶ ካልተለማመደ መዋኘት አይችልም። ብቃት የሚመጣው ከተግባር እንጂ ከመረጃ ብቻ አይደለም። ስለዚህ፦ ማወቅ ብቻ በቂ አይደለም፤ በተግባር ማዋል አለብን። መመኘት ብቻ በቂ አይደለም፤ ማድረግ አለብን! 2. ጥቅም ላይ ያልዋለ እውቀት ቀስ በቀስ ኃይሉን ያጣል እውቀት እንደ ጡንቻ ነው። ካልተንቀሳቀሰና ካልተጠቀምንበት እንደሚዳከም ሁሉ፣ እውቀታችንም በተግባር ካልተገለጸ ከጊዜ በኋላ ኃይሉን ሊያጣ ይችላል። ብዙ ሰዎች ትምህርት ይማራሉ፣ መጽሐፍትን ያነባሉ፣ ስልጠናዎችን ይወስዳሉ፤ ነገር ግን የተማሩትን በተግባር አይተረጉሙትም። ጊዜ እያለፈ ሲሄድ የተማሩት ትምህርት የራቀ ትውስታ ብቻ ሆኖ ይቀራል። በተግባር ያልተገለጸ እውቀት ውሎ አድሮ ይደበዝዛል። 3. እውቀት ኃላፊነትን ይጨምራል ባወቅን ቁጥር፣ ላለመንቀሳቀስ የምንሰጠው ሰበብ እየቀነሰ ይሄዳል። ስለ ታማኝነት፣ ስለ ዲሲፕሊን፣ ስለ ጤናማ አኗኗር ወይም ስለ ዓላማ አስፈላጊነት እያወቅን ነገር ግን የተማርነውን ችላ ካልን፣ በእውቀታችንና በተግባራችን መካከል ላለው ክፍተት ተጠያቂዎቹ እኛው ነን። እውቀት ስጦታ ብቻ አይደለም፤ ኃላፊነትም ነው። አንድን ነገር ካወቅን በኋላ “አላውቅም ነበር” ማለት አንችልም። እውቀቱን እንዴት እንደምንጠቀምበት የእኛ ኃላፊነት ነው። ዛሬ ራስዎን ይጠይቁ፦ “ብዙ የማውቀው ነገር አለ፤ ከእነዚህ ውስጥ ዛሬ ወደ ተግባር የምቀይረው አንድ ነገር ምንድነው?” እውቀትዎን አያከማቹት ብቻ፤ ይጠቀሙበት! ነገ በሚቀጥለው ፖስት፣ አራተኛውን ነጥብ ጀምሮ ክፍል ሁለትን ይዤ እመለሳለሁ።