ئیتر لە دەرگا نادات پۆستەچی

کەس ستەمی لێنەکراوە هەمووان شایستەی ئەو ژیانەن کە تیایدان.

مرۆڤ ئەوەندە تەنیایە، لە خاڵی کۆتایی دەترسێت! بۆیە لە کۆتایی نامەکانیدا دەنووسێت؛ خۆشم دەوێی. -نارین ڕۆستەم

پارێزگاری لەوانە بکە کە خۆشیان دەوێی دوونیا مرۆڤانی ئازیز نابارێنێ.

ڕەنگە پێتان سەیر بێت یەکێک هاوار لە دیوارەکان بکات بوەستێت؟ دیوارەکان گەورەترین ئافەتی سەر ئەم ئەستێرەیەن، پتر لە با دەجوڵێن و خێراتر لە شەپۆل دەڕۆن. ئەگەر دیوار نەبایە، شەرم نەدەبوو، شەرەف نەدەبوو، موڵک نەدەبوو، جەنگ نەدەبوو. لێمگەڕێن دەزانم ئەمە لۆژیکی پیاوێکی عاقڵ نییە، بەڵام ڕاستییەکی سادە و لەبیرکراوە، ئێمەی مرۆڤ بۆ ئەوەی تۆزێک باران لێماننەدات ئەو هەموو دەردەمان بۆخۆمان دروستکرد. -بەختیار عەلی غەزەلنوس و باغەکانی خەیاڵ

ھەموو شەوێک شارەکان تۆپباران ئەکران من و تۆش بێ وەستان یەکتریمان خۆشئەویست. کییڤ، ئۆکرانیا ©Ivana Kottasova

بە نیشتیمانەکەم بڵێن؛ زۆرم خۆشئەوێت ئەگەر هەموو خەونە جوانەکانیشم لەناو ببات.

بە باشی ئاگاداری خۆتبە بیر لە من مەکەرەوە ئاو کە ڕژا ڕێگای خۆی ئەدۆزێتەوە. -ئەحمەد کایە

‎شەوێکیان کە مانگ لە ئاسماندا بازنەیی هەڵهات و بە ئاسماندا شۆربۆوە، هەموو عەردیش سادە و ساکار لە بۆشاییدا مەلەی دەکرد، فرانسیسکۆس لە کۆڵانە باریکەکانی ئاسیزییدا پیاسەی دەکرد و بەملاولای خۆیدا دەینۆڕی، بەڵام چ کەسێکی نەبینی لەبەر دەرکەی ماڵەکەیدا ڕاوەستابێ و لەزەت لەو موجیزە مەزنە وەربگرێ. گوڕیدایە خۆی، بەسەر بورجی ناقوسی کڵێساکەدا هەڵزنی و کەوتە لێدانی ئەو زەنگانەی لە ساتەکانی خەتەردا لێدەدرێن. ‎خەڵکیی زەندەقچووانە لە خەو ڕابوون و پێیانوابوو ئاگرێکی گەورە کەوتۆتەوە. نیوە ڕووت بەرەو کڵێسای قەدیس ڕوفینۆ وەخۆ کەوتن. لەوێ فرانسیسکۆسیان بینی وەک شێت زەنگەکانی هێناوەتە زرنگە خەڵکەکە بە تووڕەیی هاواریان کرد: "ئەرێ بۆچی لە زەنگەکە دەدەیت؟ چ قەوماوە؟" ‎فرانسیسکۆس لەسەر بورجەکەوە وەڵامیدانەوە؛ "هاوڕێ مەسیحییەکانم، سەر هەڵبڕن، بنۆڕن چ مانگەشەوێکە!" ‎فرانسیسکۆس قەدیسی من ‎-نیکۆس کازانتزاکیس ‎وەرگێڕانی؛ دلاوەر قەرەداغی

هەموو ئێوارەیەک بەهیوای ئەو پەندە کوردییەی کە دەڵێ؛ «مانگەشەو سەر لە ئێوارە دیارە»، چاوەڕێم کردی.

لە کەنار دەریایەکی جیاوازدا خانوویەک دروست دەکەم، کۆمەڵێک کتێبم هەیە کە کڕیومە بەڵام هەرگیز دەستم لێی نەداوە، لاپەڕە بە لاپەڕە دەیانخوێنمەوە، وەک ئەوە وایە هەموو ئەو کاتەی کە لەدەستم داوە بگەڕێنمەوە. نانامی -جوجتسو کایسن