bac 2024

إليكم ملخصاتي الخاصة نتمنى تستفادو منها بالقدر اللي راني حاباتو 🥰

تذكير : هذي قناة وفاء اللي تلقاو فيها ملخصاتها اللي قلتلكم فادتني بزاااااف عام الباك !!!

وعليكم السلام أختي , أولا مانقدرش ننصحك بحاجة 100% لأنه جامي كنت في الموقف نتاعك ، لكن : راح نقلك بلي كاين ناس قرات في الجامعة وهي تعاود في الباك ووصلت للمعدل اللي حاباتو ، وكاين ناس بلوكات وعاودت وجابت واش حابة ، من جهة أخرى كاين ناس أخرى عاودت وهي تقرا في الجامعة وماوصلتش لوين حابة ، وكاين ناس عاودت وهي مبلوكية العام وماجابتش ، بمعنى أن النجاح في الباك يعتمد على جهدك الشخصي -بعد توفيق ربي طبعا- + على شحال مديتولو الأولوية والوقت !! فإذا قررتي تعاودي الباك لازمك تديري في بالك بلي خصك تديريه أولوية : تضاعفي جهدك ، تخصصيلو وقتك وتركيزك (هذي أهم حاجة) + تصححي أخطاء العام الأول نتاع لباك !! وبالتالي إذا كنتي قادرة تركزي مع باكك وتعطيه حقه وتديري اللي عليك كااامل وفي نفس الوقت تقراي في الجامعة بلا ماتأثرلك على قرايتك للباك واحد مايقدر يشيخ عليك يقلك بلوكي العام اذا ماكيش حابة ، أما اذا كان علابالك بلي جهدك وطاقتك راح يستنزف في محاولة التوفيق بيناتهم وبلي ماتقدريش تركزي في قراية الباك بسبب الجامعة فمن الأفضل تبلوكي وتعاودي ، فالقرار راجع ليك وعلى شحال ناوية تمدي تركيز و جهد ووقت للباك !! ثانيا : شخصيا لو أنا فمكانك كنت نعاود الباك ونبلوكي لعام ووقتي كامل نمدو الباك باه نكون مديت لروحي فرصة إعادة كااملة نمد فيها كل واش عندي من طاقة ونخصص فيها كل وقتي وجهدي وتركيزي للباك فقط !! باه لا وصلت للمعدل اللي حاباتو مايكونش العام اللي بلوكيته يروح خسارة !! ولو مالحقتش لوين حابة نعرف بلي هذا واش كتبلي ربي فنكون راضية على محاولتي الثانية لأنها كانت محاولة كااملة ! فالعام ماراحش بلا فايدة لأني درت اللي عليا على أكمل وجه وهذا هو المطلوب —> أفضل من أني نقرا في الجامعة في تخصص ميش حاباتو ويشتتني على الباك وفي الأخير نتحسر نقول كون غير ركزت مع باكي ثم ندخل في دوامة الإعادة مرة أخرى !! —> وفي الأخير هذا رأيي الشخصي فقط ! نكرر ونعاود أنه القرار يعتمد على واش حابة أنتي + على قدراتك + على إرادتك وشحال ناوية تمدي جهد ووقت لعام لباك !! (وبالتأكيد أنه يحتاج تمديله بزااف جهد ووقت باه توصلي لمعدل اللي حابة )