BÅMY squad🤞

“የሳቃችን ምንጭ” ያልነው ተዋናይ ሕይወቱ የሀዘን ጅረት ነበረ፤ ዓይኑም ሰው እንደራበው አረፈ። ለተዋናዩ ፣ ለመልከ መልካሙ ፣ ለዝነኛው ተዋናይ ታሪኩ ብርሀኑ “አረፈ” የሚለው ቃል ይገልጸዋል። ታሪኩ ብርሀኑ በእርግጥም ከዚያ የመከራ ሕይወት አረፈ። ያ መልከ መልካም ፣ የሀገራችን ፊልም አበባ ፣ የሁላችንም ሳቅ ምንጭ ትክክለኛ ሕይወቱ በመራር ሀዘን የተሞላ ነበረ ። እኛን በስራው የሚያስፈነድቀን ትንግርተኛው ተዋናይ ወደራሱ ሕይወት ሲመለስ ግን መልኩ ሌላ የማናውቀው አይነት ነበረ ። ማናችንም ስለ ስራው እንጂ ስለ ሰውየው ግድ የለንም ። ኑሯችን እንዲህ ነው ። ማናችንም ስለማናችንም ሕይወት ደንታ የለንም ። ታሪኩ በተለይ ከትዳሩ መፍረስ በኋላ ያለው ሕይወቱ ሀዘን የሞላበት ነበረ ። ትዳሩ የፈረሰበት መንገድና ተያያዥ ጉዳዮች ፣ የፊልሙ ገበያ መቀዛቀዝና ያ ተፈላጊ ተዋናይ በስራ አለመጠመዱ ታሪኩን በስነልቦና ሰብረውታል ። ብቸኝነት ጎድቶታል ። በሕዝብ ዓይን በጉጉት የሚታየው ብርቱው ተዋናይ ዓይኑ ሰው ተርቧል ። ሰው ፈልጎ ሰው አጥቷል ። እንደ መጀመሪያው ሁሉ በመጨረሻም እናቱ ብቻ ከጎኑ ነበረች ። ታሪኩ ከህመሙ በላይ ህመም የሆነበት ሰው ማጣቱና ብቸኝነቱ ነበረ ። እንደዚያ ውድ የነበረው ተዋናይ በህመምና በስሜት ስብራት ታሞ እናቱ ደሳሳ ጎጆ ውስጥ በወደቀ ጊዜ ማንም ዞር ብሎ አላየውም ። " እግዜር ይውሰድህ " ሊለው እንኳ ቤቱ የሚሄድ ወዳጅ አልነበረውም ። በዚህ የተነሳ የታሪኩ የቀንና ሌሊት ሀሳብ ዳግም ከወደቀበት ተነስቶ ሰው መሆኑን ማሳየት ነበረ ። እንደገና ከአስገራሚ ትወናው ጋር ካሜራ ፊት መቆም ነበረ ። ግን አልሆነም ። ዛሬ የታሪኩ እናት ቤት በታዋቂ አርቲስቶች ተሞልቷል ። ዛሬ ለታሪኩ አልቃሹ ብዙ ነው ። ነገ ቀብሩ ይደምቃል ። የአስከሬን ሽኝት ፕሮግራም ወጥቶለታል ። የአበባ ጉንጉን ይጎርፍለታል ። ይህ ሁሉ ግን ለታሪኩ አንዳች የሚረባው የለም ። ዛሬ ለቅሶውን ካደመቁት አርቲስቶች ጥቂቶቹ እንኳ ከጎኑ ቆመው ቢሆን ምናልባት በትዳሩ መፍረስ ፣ በሚስቱ ፣ በስራ ባልደረቦቹ ፣ በሰው እጦት ከተፋጠነው ሞቱ ማገገም ፣ ምናልባትም መዳን በቻለ ነበር ። በሰው ተከቦ ኖሮ ብቻውን ተኝቶ አለፈ ። ታሪኩ ዛሬ ከብዙ ስቃይ ነው ያረፈው ። ታሪኩ ብርሀኑ ሰው እንደሌለው ሰው ተስፋ ቆርጦ ተመልሶ እናቱ ቤት በተኛ ወቅት ከእነዚያ ሁሉ ወዳጆቹና ፈላጊዎቹ ተክለ ሆስፒታል አስተኝታ የመድሀኒትና ሙሉ የህክምና ወጪውን የሸፈነችው ተዋናይት ረቂቅ ተሾመ ብቻ ነበረች ። እኔ ይቺን ልጅ የማመሰግንበት ቃላት የለኝም ። ካሁን ቀደምም ሰው የታጣበት ቦታ ላይ እንዲሁ ሰው ሆና ተገኝታ አመስግኛታለሁ ። አሁንም በድጋሚ አመሰግናታለሁ ። በተረፈ ጥቂት ወዳጆቹ ፊልም አሳይተው ገንዘቡን ሊሰጡት ቢጠይቁት ታሪኩ ፈቃደኛ አልሆነም ። ምናልባት ብዙ ምክንያት ይኖረዋል ። አንድ ተዋናይ የቀድሞ ወዳጁ ታሪኩ ወደተኛበት ተ/ሀይማኖት አካባቢ የእናቱ ቤት ሊጠይቀው ሲሄድ አልቅሶ ነበረ የተቀበለው ። ሰው ማጣቱ የዚያን ያህል ነው ። እናንተ ግብዞች አያችሁ ዝናና ተወዳጅነትን ( በተለይ ፊልሙ መንደር ) የታሪኩን ያህል እጁ ያስገባ አልነበረም ። አሁን የእሱን ቀብር ማሳመር ሰው አያደርጋችሁም ። " ታሪኩን ብታጫውቱት ፊልማችሁ ገበያ ያገኛል " የተባላችሁና ተለማምጣችሁ ያሰራችሁት ፕሮዲዩሰሮችና የሙያ አጋሮቹ አሁን የታሪኩን ለቅሶ ተዉት ። ዓይኑ እናንተን በተራበ ጊዜ አጠገቡ አልነበራችሁም ። መታከሚያ ባጣ ጊዜ አልከፈላችሁለትም ። ዛሬ ደረታችሁን ብትደቁ ምንም አትጠቅሙትም ። ይልቅ ህሊናችሁ ከወቀሳችሁ ልጃቸውን በማስታመምና በመጨረሻም ያን ሸበላ ልጃቸውን ያጡት እናቱን " አለንልዎት " በሏቸው ። ለታሪኩ ልታደርጉ የምትችሉት የመጨረሻው ነገር እናቱን መደገፍ ነው ። ቀብር ማሳመርን ለቀብር አስፈጻሚዎች ተዉላቸው ። ወንድምዓለም ነፍስህ በሰላም ትረፍ 🙏🙏 ፀሃፊው ቴዎድሮስ ተ/አረጋይ  @albotv1212    @albotv1212