Multaqa-😍 الملتقى 💖

https://whatsapp.com/channel/0029VanehCDEwEk1VcXsNL1o قناتنا محتواها قصص وبوستات أطول شوية ، وفيها خصوصية عالية مفيش عضو بيشوف من تفاعل أو موجود ف القناة اعمل عرض القناة واعمل من هناك متابعة وان شاء الله المحتوى هيعجبكم زى ما متعودين

كل يوم بتأكد إن الزواج حاليًا-معجزة من المعجزات-، إن ربنا يهدي ليك شخص ترتاح لـ شكله ويرتاح لـ شكلك، ترتاح لـ طباعُه ويرتاح لـ طباعَك، ترتاح لـ دماغه ودماغه تريحك، تعليمكم متقارب، مستواكم الاجتماعي، الاهل متفاهمين وطيّبين وراضيين بـ ظروف بعض.. محض رزق.

‏أتمنى أن تكون كُل الطرقات التي أسلكها من اليوم ولآخر حياتي آمِنة وصالحة لي .. وأن يرضى اللّٰه عني دائمًا.♡

ولعلنا من بعدِ بُعدٍ نلتقي ♡

حتة زلزال أثر فيكي حسيتي وجوده ف كل مكان وأنا ليا زمان مغرم بيكي ومافيش مره تقولي (وانا كمان)!

الحمد لله طلع زلزال مش عفريت بيمرجع السرير

رغم إن فترة الامتحانات دي بتبقى الأسخف والأتقل على الإطلاق بالنسبالي؛ لكن بجد أنا اكتشفت إن فؤاد حداد كان معاه حق لما قال "حمل الليالي خفيف لما يشيلوه اتنين".. لو غبت شوية كده بس ألاقي صحابي بيكلموني "ها وصلتي لفين، خلصتي إيه، بتعملي إيه، قومي ذاكري" وكل ما الإنسان يزهق كده في النص يلاقي ناس بتشجعه ومش سيباه، وكلنا واقفين في ضهر بعض. - هدى أحمد

واتاري الدُنيا فيها جميِل وحلو عكس متقٓالي وحظي الحلو مش ضايع وكان وياك متشالي💗

لما حد بيخسرني و يقرر يبعد عني مش بزعل اصل هزعل ليه و الله انت الخسران جمال و حلاوة و عيون حلوة و حنية و حد كان بيشجعك و يسندك ف ازعل علي خسارتك ليه انت اللي بكره تندم انك خسرتني ♡

انتي مين ولحقت السنين تعدي كل ده ازاي وانتي صاحبتي المفضلة وازاي بحبك كده وايه التفاهم اللي بينا ده و ازاي قمر كده ده يالهوي علي حلاوتك.

مش كفايه شخص يحبك ع قد ما كفايه يكون مريح. وجميل. ويفهمك. ويفتقدك. ويحتويك. ويستوعبك. ويقدرك. ويحترمك. والاهم من كل دا أنه ميخذلكش..

"من أعلى درجات الجهاد؛ جهاد الحزن، جهادك في التَّقبُل، جهادك في الحمد والشكر وأنت في شدة، وأنت ما حدش حاسس بعصرة قلبك ولا الأيام بتمرّ عليك ازاي؟! إنك تسلّم أمرك لله حتى لو مش فاهم الحكمة ولا مستوعب الأحداث، إنك تلجأ وأنت متيقن أن لا ملجأ من الله إلا إليه، إنك تستسلم وترضى حتى وإن خالف هواك، - صبرك وشكرك وتقبلك جهاد.. فالابتلاءات في الحياة ليست اختبار لقدرتك الذاتية بس اختبار لقوة استعانتك بالله. اللهم ثبتنا وأعنا."

-ربنا يعسَلِك❤ =أنا عسل بجد؟!🥺 -لا مش ده، مش ده!😂 سيدنا النبي صلى الله عليه وسلم وهو قاعد مع الصحابة رضوان الله عليهم، قالهم:"إذا أراد الله عز وجل بعبدٍ خيرًا عَسَلَهُ" فالصحابة أستغربوا الكلمة وسألوه صلى الله عليه وسلم وقالوا:"وما عَسَلَهُ"؟! (يعني إية عَسَلَهُ) فرد النبي صلى الله عليه وسلم وقال:"يفتح الله عز وجل له عملًا صالحًا قبل موته ثم يقبضه عليه"❤ عَسَلَنا الله وإياكم✨ والله أعلم.

طول ما أنت بتعمل مجهود طول ما أنت ماشي صح حتى لو النتيجة اتأخرت شوية.. الحمدلله على نعمة الفرك، والسعي، والشقى، والتخبيط يمين وشمال عشان الفرصة الأنسب.. الاستسلام لوضع الأنتخة أذية للنفس.. الدماغ الشغالة نعمة، لكن اللي صاحبها بيقرر يبطل تفكير هيخرج من الدنيا زى ما دخلها بالظبط.. زى قلب الإنسان كده.. القلب بيفرح، وبيحزن، وبيحب، وبيعمل كل حاجة عادي بس بدون ما يبطل دق!.. اللحظة اللي القلب بيقف فيها هيبقى مات.. جزء كبير من لذة الدنيا موجودة في فهم فلسفة "السعي"، وإنك تكون مآمن بـ ﴿إِنَّا لَا نُضِيعُ أَجْرَ مَنْ أَحْسَنَ عَمَلًا﴾.

- بحب أشوف صحاب داخلين المترو جري و بيضحكوا علشان كان هيقفل عليهم، بحب اشوف اتنين قاعدين حد بيحكي و منفعل و التاني مركز في كل كلمة و باين على وشه قد ايه متأثر، بحب اشوف الكلام اللي الناس بتكتبه لبعض في أعياد الميلاد و يكون مليان مواقف و صور ليهم في كل مكان، بحب اشوف اتنين دايماً قاعدين جمب بعض في كل حتة و لما حد فيهم يغيب يسألوا التاني، بحب مرحلة لما الاتنين يطبعوا على بعض و يبدأوا يتكلموا بنفس الطريقة ويقولوا حتى الكلمات اللي كانوا كارهينها زمان و لما صَاحِب يكون متعصب على التاني علشان شايفه بيأذي نفسه.. هفضل طول عمري أحب فكرة "الصُحاب"، فكرة أنك قابلت حد و قررت أنك مش هتسيبه و هتعمل أي حاجة علشان تشوفه مبسوط من غير أي مصلحة في النص ♥️.

أنا عمومًا متفقه مع أحمد خالد توفيق لما قال "لا أحب مخالطة الأشخاص الذين يجعلوني في حالة دفاع دائم، أدافع عن أفكاري ، عن قصدي، عن نفسي، عن حقي، وعن آمالي"

وانا في خامسة ابتدائى كنت طفل مقفول عليا من أهله أوي .. فجيت مرة سألت أمي هو العيال بتيجي الدنيا ازاي بتخلفونا ازاي يعني؟ .. فقالتلي لو الراجل باس الست تبقى حامل منه .. فأنا كنت بصدق أمي في أي حاجة تقولها .. فقلتلها ماهما بيبوسوا في الأفلام .. قالتلي لا ده مش حقيقة دول بيحطوا كاميرا على الممثل وكاميرا تانية على الممثلة ويقربوا الكاميرات فانت تشوفهم بيبوسوا بعض بس دي الكاميرا .. هما بيبقوا وافقين مكانهم .. الكاميرا هي اللي بتتحرك .. فاقتنعت ولساني حالي بيقول تصدقي انت صح .. حقه يا ولاد اللي يعيش ياما يشوف .. فكان ليا عم متجوز جديد واحدة من البندر ( أهل المدينة يعني ) واحنا من الأرياف ، فكانت مراته يعني واااو وشقية وعسولة وبتركب عجل ومش شبه مرتات أعمامي الحرابيق خالص ، فأول ما شافتني وهي جاية تزور جدتي أم جوزها .. قالت مين العسل ده أبو خدود .. وقعدت تبوس فيا وتقولي خدودك حلوة .. وانا ازقها وامسح البوس .. بس لأنها كانت بندرية وريحتها حلوة كدا الواحد استسلم للأمر ، واخدتني جنبها وتقريبا انا كنت بحب على نفسي .. فسبتها تبوس .. فكانت بتعملي علامة في خدودي حمرا كدا .. لما طلعت شقتنا فضلت قاعد قلقان .. مرات عمي دي باستني أقول لأمي طيب ؟ أقول لعمو ؟ أحكي لمين بس يا ناس .. بعدها بمدة لقيت أبويا بيقول لأمي إن مرات عمي حامل .. !! فأنا كطفل كنت هموت فيها .. حامل؟ أهو ده اللي كنت خايف منه .. هيعرفوا .. وهتضرب وهتبقى ليلتي سودة .. انا كل يوم جايب مصيبة اكبر من اللي قبلها .. وقعدت في قلق طول الأيام .. أسال امي كل يوم مرات عمو هتيجي امته ؟ لحد ما جت تزور جدتي وهي حامل ، نزلت أشوف المصيبة اللي أنا فيها .. فأول ما شافتني قالتلي ازيك وهاتك يا بوس قالتلي تعالى بتوحم عليك ، انا عايزه الواد ابني يطلع شبهك .. وأنا طبعا مش عارف أقولها ايه .. ( ما تقلقيش ياختي هيطلع شبهي مانا أبوه ) .. قالتلي عايز النونو اسمه ايه؟ فجدتي قالت نسميه أحمد .. قلتلها لا ما ينفعش انا أسمي أحمد .. قالولي ما ينفعش ليه؟ عادي نسميه على اسمك فقمت معيط .. هقولهم ايه بس .. فيه حد هيبقى اسمه أحمد أحمد .. المهم .. الاجازة جت بتاعة خامسة ابتدائى ونزلت اشتغل في الغيط ، طول اليوم ننقى القطن و كان بجنية ونص ، وكل ده عشان أحوش للواد اللي جاي ده .. قلت انا هحوش فلوس واديهالها ، فحوشت طول الاجازة ٣٩ جنية ولما هي خلفت رحت مع أمي واديتهم ليها على اساس انهم نقوط .. بس انا كنت بديهم لابني مش بديهم نقوط .. وقالتلي سميته هشام .. ومن وقتها وانا متعايش مع موضوع اني أبو هشام .. وطول الوقت بعدها قاعد أفكر .. هي هتقول لحد ؟ لما الواد ده يكبر هتقوله ؟ لما يكبر ممكن يضربني عشان انا سبته ؟ المهم دخلت الاعدادي في مدرسة مختلفة مع عيال مختلفة تماما .. أول يومين في المدرسة لقينا الواد محمد كمال باس بت ورا حمامات البنات .. والعيال كلها بتحكي الموضوع .. فأنا سألت الواد زميلي هي كدا هتبقى حامل ؟ قالي حامل ازاي .. هو البوس مش بيخلي حد حامل .. قلتله انت ايش عرفك انت ، أنا أمي حكيالي كل حاجة أصلا .. اذا كنت انا أصلا ليا ابن .. قالي فين ابنك ده .. قلتله عند مرات عمي وهي باستني وبعدها بقت حامل .. قالي لا مفيش بوس بيخلي الست حامل وقعد يشرحلي وماكنتش فاهم اوي وقتها ، فاضطريت أروح أسأل أمي تاني بقى واحكيلها .. قلتلها عارف الواد هشام بن مرات عمو ده أبوه مين ؟ قالتلي مين؟ .. قلتلها أنا .. قامت ضرباني بالقلم وقالتلي ايه قلة الحيا دي حد يقول كدا .. فاعترفت ليها بقى ان مرات عمي كانت بتبوسني .. فقعدت تضحك بتقولي يخريبتك لا مش ابنك .. العيال ما بتجيش كدا .. قلتلها مش انتي قولتي ليا لو راجل باس ست يجيبوا عيال .. قالتلي مش مرات عمك باست خدودك بس قلتلها اه .. قالتلي العيال بتيجي لما الراجل يبوس ست والهوا اللي في بؤقه يدخل بؤقها تقوم بطنها تكبر .. فقعدت احمد ربنا انها باستني من خدودي .. الحمدلله لا ماكنش فيه هوا .. والله الواحد مش عارف لولا شرح أمي كنت هضيع فعلا .. اللي مزعلني اني كل أما افتكر طفولتي أقول لا منى طلع ليا عيل يشيل اسمي في الدنيا .. ولا مني استفدت بال٣٩ جنية اللي شقيت بيهم في اجازة خامسة ابتدائى ..

كان ليا خال مسافر الخليج واحنا صغيرين وليه مشاكل كتيرة مع أبويا وحب يتصالحوا .. فلما نزل من الخليج جاب لأبويا شنطة كبيرة فيه هدايا.. بس وهو بيقدمها ليه ادهاني على اساس يعني انهم كانوا شادين مع بعض وكدا وكان محرج منه .. كان جايب ليه ازازة برفان وساعة غالية وشويا حاجات مش فاكر منها غير إن كان معاهم شامبو .. واداني الشنطة وقالي خد يا واد يا احمد الحاجات دي .. فأنا كأي طفل فرحت بقى ورحت أقيس الحاجات ونمت وأنا فرحان أوي .. المهم إني قبل ماأنام أمي قالتلي إوعى تنسى تصلي العشا .. اللي ما يصليش العشا الشيطان بلليل يطوف عليه .. والشمامة تشم بؤقه .. قمت الصبح يا مؤمن بدور على هدايا خالي مش لاقي الهدايا .. قلبت البيت مافيش حاجة .. فدخلت الحمام لقيت الشامبو بتاع خالي في الحمام.. أقول لأمي مين اللي خد الشامبو وحطه هنا تقولي تلاقيك ما صلتش العشا والشيطان طاف عليك وخد الحاجات ليه وحط الشامبو في الحمام لأن الحمام بيت الشيطان .. ولك أن تعلم اني كنت في تانية او أولى ابتدائي .. وصدقت الموضوع .. طيب فين الساعة والبرفان الجميل .. قالتلي الشيطان تلاقيه لبسهم ماهو الشيطان ريحته وحشة فأكيد اخد البرفان عشان ماحدش يشم ريحته ويعرفه.. يا خيبتك ياحمد مش قلتلك تصلي .. اقولها والله صليت .. تقولي لا كنت صلي في الجامع .. والموضوع عدى وعادي وشربته .. بس بعدها بفترة طويلة لقيت في درج أبويا البرفان والساعة بتوع خالي .. هنا بقى انا ذهلت .. معقولة ؟ أبويا ؟ ابويا هو الشيطان والناس دايخة عليه .. معقولة؟ فرحت للشيخ سيد بتاع تحفيظ القرآن والراجل ده كان بالنسبالي هو معلمي الأول .. سالته هو فيه بني ادمين ممكن يبقوا شياطين ؟ قالي طبعا ده ربنا بيقول شياطين الإنس والجن.. وقعد يفهمني .. فأنا خفت أحكيله بقى ويعرف ان أبويا كدا ما يجبنيش عنده تاني .. أساله هو عادي الشيطان يسمع قرآن ويروح الجامع .. يقولي الشيطان أصلا بيقعد عند الجامع دايما .. ده قال لربنا لأقعدن لهم صراطك المستقيم .. مشيت من عند الشيخ وانا هتجنن .. أقول لأمي الغلبانة ؟ طب أقول لأعمامي .. طب أعرف خالي ؟ يمكن عشان كدا خالي مش بيحبه ؟ المهم فضلت مخبي الموضوع وفي عذاب نفسي رهيب .. لدرجة اننا على الغدا أبص لشفايف أبويا الاقيه مش بيقول بسم الله الرحمن الرحيم .. أقعد احسب قد ايه بيقعد في الحمام وأقول لأمي هو بابا بيطول في الحمام ليه كدا .. تقولي أبوك باله طويل في الحمام ..فأنا أبصلها وأشفق عليها .. مش عارف اقولها انه فعلا تلاقيه نايم في بيته دلوقتي.. والموضوع حطيته في قلبي وسكت .. فكنت عند الشيخ سيد بنحفظ قرآن فقالنا حكاية كمثل غيث أعجب الكفار نباته .. وقالنا الآية دي معنى الكفار فيها يعني المزارعين .. لأن الفلاح المزارع اسمه بردوا كافر .. وأنا أخدت منه المعلومة دي واعتمدتها ان اي فلاح كافر .. وكان معانا واحد إسمه أحمد علاء باين .. وأبوه كان فلاح في البلد وعنده أرض .. فأنا قلتله يابن الكافر .. وحصل مشكلة كبيرة في المدرسة بسببي ازاي تقول لصاحبك كدا .. أقولهم والله الشيخ سيد قايلي ان أبوه كافر .. وضربوني وخلوني أعتذرله وأبوه جالنا البيت وكانت قصة .. واتصالحت أنا والواد أحمد علاء ده بعد ما المدرسة كلها بقت بتعايريه انه بن الكافر .. فجيت في يوم واحنا بنلعب بلي وزلط في الشارع .. قلتله انت زعلان اني بقول على أبوك كافر .. قالي اه يا عم زعلان .. قلتله يابختك ..عارف أنا أبويا يبقى مين ؟ وبصتله بأسى كدا وقلتله أبويا يا عم الشيطان نفسه .. ده انت ابوك أحسن من أبويا .. وحكتله القصة بتاعة الشامبو والساعة .. وبقينا أصحاب في الابتدائى جدا من ورا الموضوع ده .. اللي هو لا تعايرني ولا أعايرك ده الهم طايلني وطايلك زي ما بيقولوا يشعر الذين تجمعهم المأساة الواحدة بشيء خالص من الحنين تجاه بعضهم البعض .. واحنا في الحصة بتاعة الأبلة امل كانت احتياطي وكانت بتحكي لنا قصة سيدنا ابراهيم فبتقول انه أبوه كان كافر بس سيدنا ابراهيم هيدخل الجنة حتى لو أبوه كان كافر لانه هو انسان كويس .. فالواد احمد علاء ده سألها هو بن الشيطان هيدخل الجنة قالتله لا الشيطان وولاده في النار .. فبصلي بصة مش نفس اللون ما نتساويش يا لحمة نية ما تستويش .. ومن بعدها قالي أنا مش بحبك ومش عايز أمشي معاك تاني .. وبقى يقولي انا هدخل الجنة وانت هتدخل النار .. وفضلت شايل في قلبي الموضوع ده لحد ما كبرت وانا متخيل إني استحملت كتير عشان العيلة دي وهمها .. ويجيوا يسألوك انت مش بتتجوز ليه وعايش لوحدك ليه .. ده احنا مربينك أحسن تربية .. انت مخك طالع بايظ من إيه ويستعجبوا .. ماهو من اللي عملتوه فيا ..

كل ما قُدر لك هو الذي يناسبك ‏حتى جارك، والحي الذي تسكن فيه، وتفاصيل تفاصيل حياتك ‏لو زاد مالك درهمًا لطغيت ‏ولو زاد أولادك ولدًا لشقيت ‏فلا تحوّل مافتحه الله لك مِن أبواب للعلو في الآخرة إلى مضائق تغلق بها على نفسك! ‏واعلم أنك مُختبَر أترضى عنه عند النقص، وتشكره عند العطاء، أم لا اللهم اجعلنا ممن يرضون بقضاءك.

اكتر حاجة خايف منها في حياتي اني الاقي حد واخد اسكرين لبوست انا منزله ويقول اهو ده نموذج علي اللي كنت بكلمكم عليه ويقعد يقول كلام مثقفين يوضح من خلاله اني فيا خلال والناس عنده تعمله لاف علي البوست