محمد درويش (بلوكتشينيات سابقاً)

من 3 سنين فيما فوق : فعندك برضوا الاستثمار العقاري بس بخطة امتلاك العقار يعني اللي انت تشتريه ولو مش معاك تمنه دلوقتي ممكن تدفع جزء من اللي معاك كمقدم و تخلي جزء يخليك تقدر تدفع منه اول دفعة و حاول تخلي الدفعات سنوية و في خلال السنة ده انت بتشتغل علي نفسك علشان تجمع قسط السنة اللي بعدها, هتلاقي نفسك مرتاح نفسيًا و في نفس الوقت مش هتحس ان عليك ضغط لان السنة اللي جاي ميعاد سددها فعليًا معاك فلوسها لكن انت بتشتغل للسنة اللي بعدها, ادخل جمعية بقي او حوش في حساب بنكي ميكنش عليه فوائد المهم انك يبقي عندك اصل ثابت يتمثل في وحدة تكون ملكك و باسمك. قسم ترشيحات بعض الكتب اللي ممكن تكون مفيدة ليك في طريقك للتعلم: كتاب How To Swing Trade كتاب Swing Trading: Make Money Online كتاب No and Low Money Down كتاب The Psychology of Money "" "" *البوست كله بيعبر عن وجه نظر و تجربة شخصية ممكن اللي كتبته يكون مناسب لبعض الناس و ممكن ميكنش مناسب للبعض الاخر, الغاية من اللي كتبته هو اني اسعدك تفتح مداركك و توسع حدود تفكيرك لافكار ممكن متكنش جات في بالك من قبل, مش شرط تلتزم بالقواعد اللي حطيتها ولكن افهم المغزي العام و خد القرار بعد دراسة مستفيضة و تاخد مشورة المختصين. *البوست مش غرضه التوصية بشراء سهم معين او الاستثمار في قناة معينة, الامثلة المطروحة فقط بغرض التعلم.

ازاي نحدد ايه نوع الاستثمار اللي ينفعنا و ايه هي مصادر التعلم المناسبة (الجزء الأول)؟ في البداية لازم تعرف الاجابة علي بعض النقاط علشان علي اساسها هتقدر تاخد القرار في نوع الاستثمار اللي ينفع معاك فاسأل نفسك الاسئلة ده : [1- المبلغ اللي انت عايز تستثمر قد ايه ؟] ج: و الاجابة علي السؤال ده مهمة جدًا فلو عندنا 3 افتراضات : (الافتراض الأول) لو افترضنا انك معاك من 1000 ل 100 الف جنيه فافضل استثمار تحط فيه المبلغ ده هو الاسهم اللي بيكون كميتها مش كبيرة اوي و قيمتها صغيرة يعني نفترض ان في شركة اسمها "درويش" مهتمة بصناعة من الصناعات الحيوية في تصنيع المايكروشيب, و عدد الاسهم بتاعتها 1,000,000 سهم و القيمة الاجمالية لعدد الاسهم ده بالجنيه مثلًا 10,000,000 بكدة سعر السهم الواحد 10 جنيه, فلو قولنا انك اشتريت بال 1000 كلهم (و ده مش صح انك تحطهم في سهم واحد زي ما وضحت قبل كدة) كدة هنقول 1000 جنيه / 10 جنيه = 100 سهم, * طيب ليه انا اختارت الشركة ده ؟ اختياري كان لاكتر من سبب هقولهملك : السبب الاول ان الشركة واعدة و مجال عملها مهم جدًا و بتشكل صناعة اساسية في شركات تصنيع الاجهزة الالكترونية. السبب التاني ان الشركة لسة صغيرة و قيمتها صغيرة و سعر سهمها صغير و ده هيفرق معايا لما اجي احط مبلغ بسيط هلاقي نفسي معايا اسهم كتير و ده هيكون فيدة ليا علي المدي البعيد لان من السهل شركة زي ده قيمتها توصل ل 500 مليون جنيه و اكتر كمان فساعتها السهم اللي كنت شريه ب 10 جنيه هيبقي قيمته 500 جنيه بنسبة ربح 5000% او 50 ضعف. * يعني كدة مينفعش مثلًا اشتري سهم ب 100 جنيه؟ هي هتبقي نسبة و تناسب قيمة الفلوس اللي معاك الي سعر السهم و حاول تخليها ديمًا 1:100, و بكدة لو جينا حسبناها مثلًا لو معاك مبلغ 10,000 جنيه يبقي تقدر تستثمر في اسهم سعرها يوصل لحد 100 جنيه برضوا لو كان بينطبق عليه الشروط اللي فوق, طيب لو معاك 10,000,000 لو حسبناها بالمعادلة اللي فوق هنلاقي ان السهم اللي تقدر تشتريه ممكن سعره يوصل ل 100 الف جنيه و مفيش سهم بالسعر ده, اعلي سهم في البورصة المصرية عز الدخيلة و تقريبًا سعره 730 جنيه, اومال لو حد معاه المبلغ ده يعمل ايه؟! متشغلش بالك انت اكيد ربنا يزيده بس اللي معاه المبلغ ده هيكون عنده المستشار المالي او فعليًا عارف ايه مصادر الاستثمار اللي يحط فيها فلوسه. "" "" * طيب مش ممكن نشتري اسهم كبيرة و قيمتها السوقية كبيرة برضوا؟ تقدر تعمل ده في 3 حالات : الحالة الأولي لو انت عامل حساباتك و تقديراتك ان الشركة ده هيكون ليها شأن كبير في المستقبل و قيمتها هتفضل في ازدياد علي سبيل المثال "اسهم السيارات الكهربائية" ساعتها تقدر تشتري عادي طلاما انت ناوي تسيب فلوسك سنين قدام. " الحالة التانية لو انت متداول و شايف في فرصة في الشراء و تحقيق هامش ربح كويس و دارس السوق فساعتها توكل علي الله. " الحالة التالتة لو في توزيع ارباح بصورة منتظمة للأسهم و ارباح كويسة ساعتها ممكن برضوا تشتري عادي. " تحديث وعلشان تعرف معلومات عن الاسهم المصرية ممكن تعمل ده من خلال منصة مباشر بتجبلك كل المعلومات اللي محتاجها و الاخبار لكل سهم. "" "" (الافتراض الثاني) افتراضًا انك معاك ما يعادل 1,000,000 جنيه, ممكن تشوف شركات العقارات زي مثلًا شركة VibrantEgypt من الشركات المحترمة اللي بتقدر تستثمر معاهم المبلغ اللي متاح معاك و هم بيستخدموه في بناء العقارات و بيرجعولك المبلغ بتاعك بعد ما بيبيعوا الوحدة بنسبة الربح المقدرة وقت البيع, و ده مش قرض ولا ده فوائد, ده مشروع انت بتدخله و بتخلي الفاهمين عنك هم اللي يقوموا بالمهمة ده لانك ولا عندك خبرة في البناء ولا عمليات البيع ولا معاك السيولة الكافية اللي تخليك تشتري قطعة ارض و تبني عليها انت و ده نوع من الاستثمار جيد لان دورة راس المال مش بتاخد وقت و ربحيتها كويسة علشان الربح بيوصل ل 25% تقريبًا و دورة رأس المال بتاخد من 4 شهور لسنة تقريبًا. "" "" (الافتراض الثالث) لو معاك بقي مبلغ اكبر فأنت تقدر تشتري قطعة ارض او شقة او محل او مخزن …الخ و ياما تأجره و تستفاد من عملية تأجيره يا اما تسيبه كام سنة يدخلولك عائد كويس و يحافظوا علي فلوسك من التضخم. [2- السؤال الثاني اللي عايزين نسأله لنفسنا هو احنا عايزين نستثمر الفلوس ده لفترة قد ايه؟] شهور : لو قولنا مثلًا احنا عايزين حاجة كدة ندخل فيها فلوسنا كام شهر كدة يبقي لازم تعتمد علي تداول ال swing و انا هحطلك اسم كتب في الاخر تعلمك ازاي تتقن النوع ده من التداول. من سنة ل 3 سنين مثلًا : قدامك الأستثمار العقاري تدخل تشتري حصة من شركة من شركات الاستثمار العقاري و فلوسك ممكن تلحق تدخل من 3 دورات ل 6 دورات اذا ربنا شاء في خلال الفترة اللي انت محددها ده.

ازاي نحقق دخل شهري يكون جنب شغلنا الاساسي بدون مجهود مستمر؟ السؤال ده لازم كلنا نفكر فيه علشان نقدر نزود مصادر الدخل علشان الاعتماد علي مصدر دخل واحد مش صح، و ده السبب االي ظهر علي اساسه مفهوم الدخل السلبي اللي بنجهله او منعرفش اهميته. ايه هو الدخل السلبي؟ الدخل اللي بتقدر تحصل عليه بدون مجهود مباشر منك، حاجة بترمي فيها مجهود او علم و تسيبها هي تجبلك عوائد شهرية. امثلة علي مصادر الدخل السلبي: ١- انك تستثمر في اسهم الشركات اللي بتدفع عوائد ربحية لاسهمها. ٢- انك يكون عندك عقار سواء شقة او محل او بيت كامل او قطعة ارض او هانجر و تأجرهم. ٣- انك تعمل موقع مثلًا بيقدم خدمات او اخبار و يكون فيه قسم للإعلانات. ٤- تقدم خدمة شهرية بمقابل مادي زي مثلا انك تكون reseller مقدم خدمات كبيرة علي سبيل المثال مواقع الاستضافات تاخد منهم خطة ال reseller و تقسم الاستضافة و تبيعها. ٥- تعمل موبايل ابلكيشن يكون بيقدم خدمات مدفوعة زي تطبيقات الاعلانات اللي لازم علشان تعلن تدفع فلوس. ٦- تشتري عربية ملاكي او ميكروباص Hiace و تاجرها للشركات او تدخلها في شركات النقل زي اوبر و كريم ...الخ. ٧- تكتب مقالات او فيديوهات او تعمل كورس مدفوع. ٨- تشتري معدات و تاجرها زي معدات التصوير . ٩- الاستثمارات طويلة الأجل. تقدر تتفنن انت في ايجاد الخدمات اللي تقدر تقدمها و تنساها و مع مرور الوقت تجبلك عائد. لازم تبذل مجهود علشان الموضوع مش سهل هتتعب فترة و هتلاقي نتاج تعبك و مجهودك. الدخل السلبي بيحافظ علي مواردك و بينميها. و اهم شيء تبعد عن الخدمات الربوية او المحرمة او الممنوعة علشان ربنا يبارك في رزقك و يبقي حلال.

ازاي نختار السهم المناسب لو عايزين نستثمر؟ هكتبلك هنا بعض النقاط الاساسية اللي لازم تبقي قدامك علشان تقدر تختار السهم الصح و تستثمر بطريقة سليمة لو عايز تحط فلوسك في حاجة و تنساهم كام سنة: ١- ديما تركز علي اسهم الشركات اللي بتركز علي المستقبل و شغلها فيه ديمومة، فلو ضربنا مثال : * لو بنتكلم علي الاسهم الامريكية هيبقي عندنا ( سهم تسلا، سهم جوجل، سهم زووم ...الخ) * لو بنتكلم عن الاسهم المصرية هيبقي عندنا ( سهم فوري، سهم المصرية للاتصالات ...الخ) ليه ؟ علشان الشركات ده هتكمل معاك لقدام مش هتلاقي التقنية بتاعتها او خدماتها معرضة انها تنتهي او تختفي علشان ظهر خدمات اكثر تقدم. ٢- ركز علي الشركات اللي بتوزع ارباح علي اسهمها و ده دخل سلبي نقدر نقول عليه كويس. ٣- لازم تتأكد ان الشركة اللي هتستثمر فيها مش مخالفة للدين او الاخلقيات. ٤- تكون متأكد ان الشركة قوية و تقدر تصمد قدام المشاكل الاقتصادية العنيفة اللي ممكن تدور حوليها، يعني مش عند اول خبطة تنهار. ٥- زي ما بقول كل مرة و بكررها استثمر نسبة بسيطة من فلوسك او اتعلم ادارة المال و لو مش معاك مبلغ تقدر تستثمره يبقي اقتطع مثلًا ٢٠٪ من مرتبك الشهري اذا كان زيادة عن حاجتك و استثمره. ٦- اياك ثم اياك ثم اياك تجري ورا بيعين الهواء اللي يقولك انه بيدي توصيات محققة ارباح كبيرة. ٧- و جود مستشار مالي مهم فقط علشان يساعدك تاخد قرارك مش علشان يقرر مكانك. ٨- دور في القوائم المالية للشركة و الجمعيات العمومية و شوف ادارة الشركة عاملة ازاي و مدي قوتهم و تابع ديمًا اخبارها ولو تقدر كمان تروح بنفسك للشركة تبص عليها و تشوف طريقة عملهم و تنظيمهم او تسأل موظفين الشركة عن رايهم في الادارة و الشركة نفسها يبقي اضافة كويسة ليك و لقرارك. ٩- اتعلم و استخدم جوجل كتير و هات كتب تعلمك اذا استمريت ٦ شهور للتعلم فقط هتقدر تاخد قرارتك بلا قلق. ** الاسهم في الامثلة اللي فوق مش توصية بالشراء ولكن استخدمتهم كامثلة للتعلم. ** النقاط اللي ذكرتها فوق ده وجهة نظر و تجربة شخصية اعمل بحثك الخاص علشان تتأكد من المناسب لك ** السؤال اللي هيتسأل عايزين مصادر للتعلم فممكن تكتب في الكومنتات انت محتاج تعرف ايه بالضبط في التداول علشان ابقي اركز عليه و اتكلم عنه في البوستات الجاية.

الفيدرالي زود الفائدة 50 نقطة اساس، كدة الفائدة بقيت 4.50% زي ما كان متوقع.

لو فاتح صفقة متنساش تشغل ال STOP LOSS دلوقتي حالا و متطمعش علشان اعلان الفيدرالي كمان ساعة وربع.

شركة STC في البحريين هتبدأ توفر لعملائها الدفع عن طريق العملات المشفرة، و ده بالتعاون مع شركة EazyPay المتخصصة في تطبيقات برامج نقاط الدفع "POS" و محفظة بايننس " Binance wallet" علشان العملاء يقدروا يدفعوا بالكريبتو. *مع العلم ان البحرين من الدول اللي مصرح فيها تداول العملات المشفرة و فيها منصات تداول عملات مشفرة و رخصة مخصصة للمنصات.

شوية عيش و حلاوة بقي لبرميل النباهة Sam Bankman-Fried المدير التنفيذي لمنصة FTX علشان تم اعتقاله، - هيئة الاوراق المالية الامريكية SEC اصدرت بيان النهاردة بتتهم فيه Sam بالاحتيال و النصب علي المستثمرين. اتوقع انه هيلبسله بتاع ٥٠ سنة اذا تم اثبات التهم عليه "النصب و الاحتيال" ولنا في Charles PONZI عبرة لما اتقبض عليه بسبب سرقة ٦٥ مليار دولار و خد فيهم ١٥٠ سنة سجن، و انا شخصيًا اتمني انه يبقي مصيره زي مصير Faruk Fatih التركي صاحب منصة Thodex اللي نصب في ٢ مليار دولار و ال ٤٠،٥٦٤ سنة سجن اللي كان متوقع يلبسهم. 👇مذكرة الاعتقال من حكومة البهاماس.

فأصبح كدة العقد الذكي قادر انه ياخد بيانات خارجية و يكون متطور في العمليات اللي بيقوم بيها. " " فاللي حصل بقي ان صديقنا كتب عقد ذكي بال ChatGPT وظيفته انه يبعت email لو حصل تغير في سعر الذهب صعودًا او هبوطًا بنسبة 1% و العقد اللي طلعلوا ظهر انه بيستخدم مفهوم ال Oracle علشان يقدر يجيب اسعار الذهب من ال web2 و ده logic مكنش من السهل ان AI يقدر يوصله. " " طيب ممكن ده يكون حصل ازاي؟ ده من وجهة نظري انه حصل عن طريق تحليل تريليونات للسطور البرمجية و الاكواد و التطبيقات اللي موجودة علي ال gits و كون منها relations عن طريق تحليله للاسطر ده و فهمه للعلاقات بين ال functions و بعضها, و علي اساسه قدر يوصل لمرحلة انه قادر يفهم طلب الراجل لما كتبله Code a smart contract that sends email alerts when gold price goes up or down by over 1% " " طيب يعني كدة ال AI هيحل محل الإنسان ؟ من خلال وجهة نظري و الابحاث اللي قريتها قبل كدة فلا مش هيحصل الي الان بالاداء اللي احنا شايفينه لكن محدش عارف بكرة فيه ايه. طيب ليه مش هيحصل؟ سؤالك ده اللي هيخلي ال AI ياخد مكانك, لان ال AI مش بيسأل لكن بيدور بنفسه بعد ما بيعمل react علي البوست ده, فخد الخطوة و روح دور علشان تعرف الاجابة و تلحق نفسك قبل ال AI ما ياخد مكانك … بسرعة يلا.

رُعب ال AI في سطور (مفاهيم كتير هتفهمها من خلال البوست ده) " برمجة العقود الذكية بعض الناس بتشوفها انها سهلة و مجرد كام سطر برمجي بيتحطوا تحت بعض بيكونوا العقد الذكي. " و ده يخلينا مسأل سؤال تاني وهو إيه هي في الاصل مخرجات العقد الذكي البسيط ده؟ مجرد اسم التوكن, و العدد بتاعه الاجمالي, و المحفظة اللي بتمتلك التوكن ده, مع شوية نسب مئوية خاصة بال taxes وخلافه. يعني ممكن واحد لسة بيدرس كورس PHP يقدر يكتب السطرين دول من كام حلقة بس اتفرج عليهم. " بص الكلام اللي فوق ده واقع فعلًا و مش اي كلام زي مثلًا لما اجي اكتب سطر برمجي واحد بياخد المدخلات من المستخدم مثلًا لو بالبايثون هنقول 1- userData = input(“username:”) هو هو نفس السطر ده 2- userData = input("username:").replace("<","%").replace(">","%") طيب ايه الفرق بين السطرين؟ السطر رقم 1 هو مجرد متغير بسيط بياخد البيانات من المستخدم و خلاص, اما السطر رقم 2 متقدم حبة صغيرة لانه بياخد البيانات من المستخدم و بيشيل ال tag اللي تمنع المستخدم من انه ينفذ اي كود برمجي في السيرفر علشان ميعملش مشاكل. " اهو السطر رقم 1 ده مستوي العقد الذكي اللي ممكن اي حد يعمله لو اتفرج 10 دقايق علي كورس ال ICDL المعتمد من جامعة كامبريدج بتاع الكلية ده لو تفتكره و ده بالمناسبة اللي بتستخدمه العملات ال meme coin السكام, اللي هو اي كود موجود يعدلوا عليه و يستخدموه فأي حد لو مخلص كورس HTML هيقدر يعدل مفيش مشكلة. " لكن السطر 2 ده المستوي التالي المتقدم من السطر رقم 1 اللي بيحتاج الشخص اللي بيكتب العقد الذكي يكون عنده logic في الكتابة شوية علشان يقدر يعمل filtration او زي ما بنقول sanitize لل data اللي بتجيله من المستخدم علشان متديش صلاحيات للمستخدم اكتر من كونه مستخدم عادي بصلاحيات محدودة. " لو فهمت الكلام اللي فوق ده حتي لو بنسبة 40% فكمل اللي جاي خلاف كدة اكتبلي في الكومنتات انك مفهمتش علشان نعلي درجة التبسيط اكتر. بقالنا كام يوم بنسمع طبعًا عن ChatGPT و التريند اللي عمله في ثانية الا ثانية, و انه وصل لاكتر من 1 مليون مستخدم في لحظة, "هقولك معلومة سريعة كدة ال AI بيقعد سنين يحلل و يعمل RELATIONS بين ال data اللي بياخدها علشان يذاكرها علشان يطلع بالمستوي ال wow اللي الناس بتحكي عنه مش في يوم وليلة بيعمل اللي انت شايفه ده" معلومة تانية " المليون مستخدم اللي استخدموا الاداة ده زودوا ال Intelligence بتاعت الاداة بنسبة كبيرة جدًا و علموه اكتر و اكتر شوية كمان و فعلًا هياخد مكان ال search engines و ال voice assistants الغبية اللي بنستعملها في الموبايلات و الاجهزة ال smart اللي بنستخدمها عمومًا" " كنت بقلب في الابلكيشن اياه بتاع الشركات و الوظايف اللي لونه ازرق ده كعادتي و اذ بيا الاقي الصورة اللي موجودة في الكومنتات ده, واحد كتب عقد ذكي من خلال ChatGPT , هتقولي و ايه المشكلة يعني عادي ما انت بتقول اي حد يقدر يكتب عقد ذكي ال AI مش هيكتبه ليه!! والله يا صديقي لو كان الموضوع زي ما انت متخيله كدة مكنتش هكتب عنه بوست اصلًا و كان زماني دلوقتي قاعد بلعب مع القط بتاعي, انما الموضوع تعدي السطر رقم 1 و السطر رقم 2 و 3 و4 و5 و6 و7 بتعرف تعد لحد كام؟! طيب ليه كدة طيب؟ ايه اللي في الكود اللي هو عمله خلاك تقول كدة ده مجرد كام سطر متعدوش ال 20 سطر, هقولك انت صح و برافو عليك ولكن المشكلة بتكمن ان الاداة مكتبتش الكود كدة و خلاص لكن دخلت فيه Logic و ده مينفعش يتم الا بإنسان, و علشان افهمك ال Logic ده لازم الأول افهمك ازاي العقد الذكي بيشتغل. " لما ظهرت فكرة العقود الذكية في 2015 علي شبكة الايثريوم كانت بتوفر ما يسمي بال EVM او ال Ethereum Virtual Machine و ده عامل زي كأنك نزلت virtual machine علي الكمبيوتر بتاعك, “ السطر ده مش ليك لو انت فهمت السطر اللي فوق: ال virtual machine ده عبارة عن برنامج بيكون علي الكمبيوتر بيخليني ااقدر انشئ اكتر من جهاز كمبيوتر مع تقسيم امكانيات الكمبيوتر الاساسي بتاعي يعني مثلًا لو عندي جهاز كمبيوتر في 4 جيجا رام و هارد 40 جيجا, ااقدر استخدم برامج المحاكاة زي مثلًا Virtual Machine او VMware و ااقدر انشئ جهاز كمبيوتر و اديله 1 جيجا رام و 10 جيجا للهارد كدة بقي عندي جهاز كمبيوتر حقيقي اللي هو انا بستخدمه و جهاز كمبيوتر جواه وهمي اللي انا انشئته بتخصيصي ليه مساحة مجتزئة من المساحة الأساسية بتاعتي. " نرجع تاني : فلما كنت تعمل عقد ذكي و تشغله علي ال EVM كان دوره بيتوقف في انه فقط مقفول عليه جوة الشبكة ميعرفش ايه اللي بيدور برة, فكان علشان يقدر العقد يكون ذكي فعلًا ظهر مفهوم اسمه ال Oracle و ده بدوره بيخلي العقد الذكي قادر يحتك بالبيانات اللي خارج الشبكة علي ال web2, يعني يقدر يجيب نتايج مباراة كاس العالم و يدخلها للعقد الذكي و يقدر يجيب درجات الحرارة و اسعار الاسهم …الخ

[ملخص تحريك ١٢٧ الف بيتكوين من بايننس لمحفظة مجهولة] " يوم ١٣ نوفمبر كتب CZ ال CEO لمنصة بايننس تغريدة بيقول فيها " لو اي منصة حولت عملات مشفرة بكمية كبيرة بعد ما اعلنت للناس عن عنواين محافظها فلازم تعرف ان في مشكلة كبيرة في المنصة و لازم تبعد" " شكرا يا سيدي علي النصيحة " النهاردة يوم ٢٨ الساعة ١:٣٧ الظهر اداة whale alert رصدت تحرك ١٢٧،٣٥١ بيتكوين من بايننس لمحفظة مجهولة بما يعادل اكتر من ٢ مليار دولار تقريبا. " " الناس لسة هتعمل بنصيحة CZ قام كتب تغريدة قالهم " هو اي حد يقولكم اي كلام تصدقوه، انا مستغرب ازاي اداة whale alert معندهاش علم بده، البيتكوين اللي حركناه ده تنفيذا لمبادئ ال PoR او ال Proof of Reserve اللي حطيناه، و حولنا العملات لما المُراجع اللي بيراجع علينا حب يتأكد ان احنا اللي عندنا القدرة علي التحكم في المحفظة" " و بعدها قال "خلوا بالكم الموضوع ده هيتكرر كتير الساعات او الايام الجاية كجزء من المراجعات اللي بتتم علينا في المنصة، بعضهم متتبع من اداة whale alert و الباقي لا، فأتمني ان الاداة تكون اذكي من كدة شوية" " معلومة سخنة : منصة بايننس بتمتلك موقع coinmarketcap ضافت عليه indicator بيوضح المنصات اللي اعلنت عن كمية العملات اللي بتمتلكها في محافظها، الموضوع ده ازعج منصات كتير لان في منهم كتير ماشي شمال، لكن في منصات التزمت و بالفعل خادت score علي الموقع لامتثالها للمؤشر الجديد لبيان مدي شفافية المنصات.

⚠️⛔️حدث ما توقعته! كتبت post يوم ١٦ نوفمبر عن منصة Blockfi و قولت وقتها ان انهيار العملات المشفرة الجاي هيجي بسبب منصة Blockfi، وان كلهم بيقولوا معندناش مشكلة و هم عندهم جوة. " " فنقول ولله الحمد الواحد برضوا عاصر انهيارات كتير و بقي خبرة ^_~ " شوية هدوء بقي علشان تعرف ايه اللي بيحصل ….. " منصة Blockfi بتقدم طلب حماية قانون الافلاس الامريكي الفصل ال ١١، ولو مش عارف ايه هو الفصل ال ١١ من قانون الإفلاس ارجع لبوست بتاريخ ١١ نوفمبر علي الفيسبوك. " " طيب ليه ده بيحصل، الخلاصة المنصة كانت بتنهار من فترة و صندوق Alameda عرض انه بستحوذ علي المنصة و يفتح ائتمان ب ٢٥٠ مليون دولار ووصلت ل ٤٠٠ مليون دولار علشان سداد الديون. " بعدها يا مُحترم يقال انه حصل العكس، عارف مثل "جيتلك يا عبد المعين تعيني" منصة Alameda مدت ايديها ل Blockfi و قالتلها حاجة لله علشان اخوك بينهار، قامت المنصة مسلفها (معلومة غير مؤكدة الي الان). " " عايز تعرف الديون قد ايه؟؟ طيب بتعرف تعد لحد كام؟!! بعض دائني المنصة شركة تابعة ل FTX US بإسمها التجاري West Realm Shires بقيمة ٢٧٥ مليون دولار. " لجنة تنظيم الاوراق المالية SEC المسؤلة عن اصدار تصاريح و مراقبة سوق المال في امريكا ليها تسوية بقيمة ٣٠ مليون دولار. " شركة Ankura Trust ليه حاجات بسيطة مجرد ٧٣٠ مليون دولار تقريبًا. " اكتر من ٥٠ دائن كمان لسة ما تمش الاعلان عنهم. " و بعد انتشار الخبر يا مُحترم سوق العملات المشفرة طار منه ٣٠ مليار دولار. " اول دومينو لما بيتزق بيجر كل إللي وراه. (معلومة لا يعلم الغيب الا الله لكن المؤشرات المبدائية و متابعتي للاخبار و حيثيات قضية FTX هي اللي خلتني اتوقع انهيارها)

علشان اخرج من مستنقع الفيسبوك ده الاكونت اللي هنزل عليه المواضيع المتعلقة بالبلوكتشين علي تويتر، هينزل هناك الاول و بعدين هنا، الرابط 👇👇 https://twitter.com/blockchainniat1

نتايج جديدة لتحقيقات منصة FTX عمالة تطلع كل شوية و اخرهم " - ان ابوه و امه بيمتلكوا عقارات في البهاماس بقيمة ١٦.٤ مليون دولار في حين انهم دكاترة في جامعة ستانفورد و مرتبهم السنوي ١٨٥ الف دولار فازاي جابو البيوت في البهاماس بالملايين ده بدون مساعدة ابنهم!! " - اشتري ابوه و امه للاستخدام الشخصي ١٩ بيت باجمالي ١٢١ مليون دولار. " - المنصة كانت مدمرة مركزها المالي لدرجة انهم كانوا بيستنوا إيداعات العملاء الجدد علشان ياخدوا فلوسهم ده يسددوا بيها التزامتهم و ده كان حاصل كمان في وقت السوق الصاعد. " فقولا واحدا لا يدعو للشك ان المنصة ده كانت عملية SCAM كبيرة و فعلًا تبقي اكبر عملية نصب في التاريخ الحديث. " و النص_اب سام هياخد حكم بمليون سنة سجن، هو مش احسن من فاروق اوزير التركي اللي نصب علي منصته في ٢ مليار درلار و اتقبض عليه و تقديرا يلبس في ٤٠ الف سنة سجن. " كل حاجة حلوة بتظهر لازم يظهرلها اشخاص سيئين يدمروها زي مؤسسي كابيتر و القلق اللي عملوه في عالم ال fund raising. " المركزية المالية بكل اشكالها و صورها هي وجه قبيح للنصب و الاحتيال و الفساد المتأصل.

الشات الخاص يمجتمع بلوكتشينيات 👇👇 https://t.me/blockchainniat

ده معظم استثمارات الن_ص_اب Sam Bankman عن طريق FTX و Alameda. معظم الشركات ده هتنهار ان مكنش منهم كتير انهار بالفعل، عارف المشكلة من البداية في ايه؟؟ (المركزية) اللي بسببها ظهرت البلوكتشين من الأساس، شخص واحد اتحكم في اقتصاديات شركات كاملة و كان بيصرف فلوس العملاء كيفما شاء. شرح الألوان علشان لو حد تايه : 1- اللون الأصفر ده المؤسسات اللي استثمرت في FTX. 2- اللون الازرق ده الشركات اللي خادت استثمارات او تم الاستحواذ عليها من Sam Bankman. 3- اللون الاخضر ده شركات راحة جاية بتدي استثمار و بتاخد استثمار. 4- اللون الاحمر ده الشركات اللي مش هتقدر تسحب استثماراتها.

بلومبرغ نشرت تقرير عن منصة بايننس بيوضح ما تمتلكه المنصة من احتياطيات العملات المشفرة اللي وصل ل 74.7 مليار دولار، منهم ٤٠٪؜ في عملات مستقرة زي عملة المنصة BUSD بقيمة 23 مليار دولار و 6.4 مليار دولار في عملتها BNB بالاضافة ل 10.5% من الاحتياطي في عملة البيتكوين و 9.8% في عملة الايثر، و تم نشر التقرير من خلال منصة Nansen المتخصصة في تحليلات البلوكتشين. و أكد المعلومة المدير التنفيذي لمنصة بايننس “ CZ “ بعد ما قرر انه يركز علي الشفافية مع المستخدمين تجنبًا لحدوث اي مشاكل زي ما حصل في منصة FTX. و ده بدوره شجع منصات زي OKX, KuCoin, Poloniex, Huobi انهم يوعدوا بالاعلان عن احتياطيات منصتهم في سبيل تعزيز الثقة بين المنصة و المستخدمين. و اضافت CNBC عربية ان احتياطي منصة بايننس اكبر من احتياطي استراليا اللي بيعادل 55.3 مليار دولار.