Najmiddin Turon

#назм Тун. Ёмғир. Қоришиқ ифор. Учқур хаёл, қадамлар аста. Борлиққа сочилиб келади кетгинг, Ёмғир бўлсам керак, аслида. Сен йўқсан. Ҳечким йўқ. Нималардир бор. Ненидир туярсан ёмғир остида. Мен ахир осмонда яшаганман-ку, Не қилиб юрибман замин устида?.. Шайтон. Тақиқ Ва ўша мева. Афсус бор қувғинди одам наслида. Негадир уларга алоқам йўқдек, Ёмғир бўлсам керак, аслида. Нажмиддин Эрматов t.me/pegas_portali — Ҳар лаҳза — илҳом вақти

Тил бу танглайингдан чиққан ортиғинг, Тумшуғинг тилингни тийиш-чун бешак. Юрагинг қўрқувни ҳис этмоқ учун, Қанотинг шунчаки ҳуснингга безак. Сайрамоқ? Нима у? Телбалар йўли, Англамоқ - аҳлоққа тескари ғоят. Осмон бу қонунга зид бўлган маскан, Учишга уриниш оғир жиноят. Тухумдан чиққандан шундай дедилар: Қафасдан ташқари - жиноят буткул. Фақат ичкарини ҳақ йўл деб билди, Eнди ҳеч жиноят қилмайди булбул. Нажмиддин Эрматов ноябрь, 2019

Ҳали кечилмаган кечувдай мубҳам, Ҳали шўнғилмаган уммондай сирли, Ҳали ёзилмаган шеърдайин бекам, Бир йўлга тушардим яралар битса. Ҳамда кўрилётган тушдайин эркин, Ҳамда сурилётган хаёлдай озод, Ҳамда айтилмаган сирдайин ичкин, Шамолга дўнардим қўйворса ҳаёт. Бироқ артилмаган мужгондай интиқ, Бироқ учолмаган қушдайин дилгир, Бироқ ўлолмаган дардчилдай тирик, Бандиман, Тушовим маҳкамлар кимдир... октябрь, 2021 Н. Э.

*** Tun. Yomg'ir. Qorishiq ifor. Uchqur xayol, qadamlar asta. Borliqqa sochilib keladi ketging, Yomg'ir bo'lsam kerak, aslida. Sen yo'qsan. Hechkim yo'q. Nimalardir bor. Nenidir tuyarsan yomg'ir ostida. Men axir osmonda yashaganman-ku, Ne qilib yuribman zamin ustida?.. Shayton. Taqiq. Va o'sha meva. Afsur bor quvg'indi odam naslida. Negadir ularga aloqam yo'qdek, Yomg'ir bo'lsam kerak, aslida. N. E.

Баҳор келгач фотиҳамизни, Қалдирғочлар ўқиб беради. Найсон- чевар, гулгун кўйлагинг, Камалакдан тўқиб беради. Узун қиш тунини яшаб ўтсак бас, Кишанларни бойчечак ечмиш. Япроғини бичиб ялпизлар, Кўзларима илар чимилдиқ. Гўшангамиз учун хонқизи, Тушларини беради тиниқ. Айрилиқ кунини яшаб ўтсак бас, Қатқалоқ ғовларни шабнамлар ечмиш. Пешонамиз ювади беҳишт, Тақдиру таъқиқлар қолади ортда. Бир мангу манзилни макон этамиз, Қувилмаймиз заминга қайта. Шу битта умрини яшаб ўтсак бас, Танимизни Азроил ечмиш. ©Нажмиддин Эрматов декабрь, 2018

Сурнайнинг бўғзига кишанланган сас, Видо фурсатида симрилган нафас, Ташқарида висол, ташқари қафас, Айрилиқнинг минг йиллик эҳроми ичиндамиз. Гул парини ютган уч бош аждаҳо, Баҳодирин кутган ул кўзи шахло, Ташқарида дунё—ташқари рўё, Рўёлиғнинг унутлиғ достони ичиндамиз. Қувғинлиғ наҳрида чўмилган андуҳ, Сандулоч томоғин макон қилган руҳ, Дулдулнинг ёлида уялаган ''чуҳ'', Бу дунёнинг чиндан чин ёлғони ичиндамиз. “Севаман” сўзидан титраган ҳаво, Ҳаво титроғидан яралган наво, Биз ўша лаҳзада қолиб кетиб, о, Асрлардан барҳаёт бир они ичиндамиз. Рўёлиғнинг унутлиғ достони ичиндамиз. ©Нажмиддин Эрматов 2019, апрел

Сўров Ҳайронман, ким кимга отаяпти ўқ, На ўқни тўхтатдим, на бўлдим қалқон. Кеча oкопидан чиқмаган аскар Бугун тирикман деб бўлса қаҳрамон... Ҳайронман, не учун Ҳақ демас тилим, Ёки ўчирдимми дилдаги чўғни? Нега кўнаяпман ҳақсизликка жим, Менга бир қаранглар, ўлганим йўқми? ✍Н. Эрматов @sheriylahzalar

* * * Қонялоқ тусига киради уфқ, Тоғларнинг қуёшга санчган тиғидан. Дарахт панасида мизғиган соя, Ҳуркиб туриб кетар ўрнидан. Чингиз лашкаридай ёғилар оқшом, Таслимман - аммо йўқ менда оқ байроқ. Кўнглим ўғирланган, таланган руҳим, Эгасиз кулбадай туришимга боқ. Осмонга қадагач оппоқ туғини, Зулматга юлдузлар ёғдиради шон. Кўзлари кўр бўлган умид ва ҳамда Фонуслар кўтарар кучсиз бир исён. Барча кишанларни ечади кеча, Барча кишангарга эшикбон уйқу. Кунли қувончларни бўғизлаб бунда, Оч қолган қашқирдай изғийди қайғу. Одамлик сиёҳи ўтирмас танга, Одамлик қолипи бу лаҳза жимдай. Вахший жондор каби ўкираман ва Мунис оҳу янглиғ йиғлайман тинмай. ©Нажмиддин Эрматов

Hijron shomiga kirdim, tonglarim xush qol endi, Shabixun nayzalarga umrim giriftor endi, Ko‘zim, mendan ranjima, ko‘rmasam bahor endi, Sabuhiy tug‘yonlardan judo bo‘lgan yo‘ldamiz. Ko‘rganimiz nur emas, bizdan kahkashon baland, Ul somon sochig‘idan tiklangan narvon baland, Hali jism langarim, hali bu osmon baland, Yetim qovurg‘a yanglig‘ tanho bo‘lgan yo‘ldamiz. Bunda faqat boyqushlar ko‘zida mung tashiydi, Bunda faqat alaflar hasratimni taniydi, Bunda faqat ashk yog‘ar- anduhimdan chayindi, O‘ssa faryod o‘stirib, ado bo‘lgan yo‘ldamiz. Bir umr va bitta Ishq, faqat visol oz bo‘ldi, Ko‘rar kunim boyqushning ko‘zlariga mos bo‘ldi, Netay endi, qismatim shu yo‘llarga xos bo‘ldi, Atodan meroslig‘ ul xato bo‘lgan yo‘ldamiz. ©Najmiddin Ermatov may, 2019

*** Жонтемирга Балки яна келгайдир баҳор, Балки яна гуллар дарахтлар. Балки яна булбуллар тўккан, Кўзёшидан унгайдир бахтлар. Балки яна масъум келинчак, Сойга бориб айтар тушини. Бу сафар ҳам сувлар айтмайди, Тушда юрган ул ёт кишини. Балки рашкдан увлайди бўри, Ой қилмишин ошкор этса доғ. Балки яна кофир хаёллар, Ҳаётимга тўқийди сиртмоқ. Балки ўлган оҳу кўзидан, Сачраб кетар борлиққа чирой. Балки яна қиздай бокира- Оғринмасдан оқа бошлар сой. Балки яна кутган, кутмаган Ҳар жон учун келгайдир баҳор. Аммо бунинг баҳордан ҳоли, Симёғочга нима даҳли бор?.. ©Нажмиддин Эрматов май, 2018.

дерлар: баҳорни соғинган уруғ, кута-кута гуллаб кетади, ўзи айланади баҳорга. дерлар: ёмғирни соғинган дарё, кута-кута парланиб кетар, ўзи эврилади ёмғирга. билмам: сени соғинётган мен, кута-кута яшасам, не бўлади охири?.. ©Нажмиддин Эрматов ноябрь, 2018

Масалан, ёмғирли кечада унсиз, оқсуяк ойқизни ўйлашинг мумкин, жиққа ҳўл қанотин силкитолмасдан, кўлмакка қулаган аридай тушкун. Масалан, ёмғирдан беркиниб ҳамма, ёмғирпўш тутганча, уйига чопса, сен эса эгасиз итдайин озод, мумкиндир адирда ағанаб ётсанг. Масалан, зангори экранни узиб, (бу экран алдамчи тўралар мулки) томидан сув томар онангни эслаб, тонггача бемалол йиғлашинг мумкин. Масалан, шу маҳал кўчага чиқиб, уйига беркинган барча бийларни, четдаги мардикор уканг учун ҳам, бақириб сўкишинг мумкин уларни. Ёинки, қўққисдан жасорат битиб, (сен кимсан? бу йўлда ўлганлар камми?) ҳеч йўқса, хаёлан асрашинг мумкин, ҳалиям чопони йиртиқ ватанни. Ва ёки, барига қўл силтаб бирдан, шоирга шул дея азал ақида, ижара ҳужрангда ғамга беланиб, шеър ёзиш мумкиндир севги ҳақида. Масалан, ёмғирли кечада унсиз, ёмғирдай ёғилиб кетиш ҳам мумкин... Н. Э. февраль, 2020

Сен ёқтирган ёмғирлар ёғди, Ойнага урилди видо шитири. Уяси бузилган қушдай руҳимни, Ололмадим уйга киритиб. Босган изларимиз кўлмакка дўнди, Оқчарлоқ мисоли учди нигоҳим. Во ажаб, кўлмакдан нилуфар эмас, Бақалар чиқарди бошини, моҳим. Тўр ташлаб ўтирдим балиқчи чолдай, Бисотимда қолган хўрагим жондир. Тилла балиқнимас, дуридан айри Тутиб қайтаяпман чиғаноқларни. Ҳорғин одимлайман чўлоқ турнадай, Эзилиб ёғмоқда эзғинваш ёмғир. Тешик товоғига тикилиб уйда, Умидвор кутадир қаримсиқ кампир. Бу кампир ўлмади, тинчитмас мени, Борига кўнмаган бу кампир - висол. Гар тирик бўлса у ушбу дунёда, Менинг ҳам тирикдай юрмоғим маҳол. Уйга кириб келдим, яна ғалаён, Кўчага итқитар итдайин хўрлаб. Ё танга кишанла, чиқарма мени, Ё руҳим ол, мана, эй руҳи талаб. Бундай яшамоққа мажол қолмади, Ё куч бер, ёки бу юрагим тинсин. Келгин, кутаяпман, агар келмасанг, Сен ёқтирган ёмғир ёғмасин! Сен ёқтирган ёмғирлар ёғди... Н. Э. апрел, 2020

Yomg‘ir yog‘sa, umid gulday unar bo‘lsa, Kemtik ko‘ngil xalqobdayin to‘lar bo‘lsa. Yo‘l chetida yomg‘irpo‘shsiz turgandir deb, Ketgan yoring qaytishiga ko‘nar bo‘lsa. Ko‘lob yo‘llar yag‘rinida yo‘l ko‘rsatib, Yolg‘izlikning azobini cho‘ng ko‘rsatib. Pinhon tutgan sog‘inchini etib oshkor, Boshlab kelsa ro‘molchasin ho‘l ko‘rsatib. Nigohidan yomg‘ir yuvgan so‘z taralsa, Ifor sochib barmog‘ingda soch taralsa. Peshonangga bitgan taqdir bo‘lib mulzam, Ul yor bilan bir ketgulik yo‘l yaralsa. Xovuchida gulgun gulob quyib bersa, Tag‘in yomg‘ir tinmay battar quyib bersa. Tosh ko‘chada chopsalaring qo‘l ushlashib, Oh, bu dunyo o‘z holingga qo‘yib bersa. Olib borsang, qo‘rg‘oningda issiq tancha, Ostonada oyoq ilsa rafiq kecha. Derazadan borligini etib isbot, Yomg‘ir tinmay yog‘aversa jon chiqquncha. Bir tong kelsa avvaliga o‘xshamayin, Yengillashib borsang quyosh chiqqan sayin. Yomg‘ir tingan dunyosiga etak siltab, Uchib ketsang ul yor ila bir bug‘dayin. Yomg‘ir yog‘sa... N. E. fevral, 2021

Shunqor Choriyev ga Cheksiz koinotdan kichik joy olib, Hamon suzayapti tebranma beshik. Hamon quvgʻindilar uxlaydi bunda, Hamon ochilmadi yopilgan eshik. Hamon anglamaydi qaydan kelganin, Hamon qanot qoqmas dilda tuygʻular. Vazmin tebranishdan toʻxtabon beshik, Qattiq silkinmasa uchmagay ular. Uygʻonsin, anglasin, yigʻlasin, bilsin- bu mudroq ular-chun abadiy qiynoq. Oʻzi ham sezmasdan koʻz ochar bir kun, kech bo'lar, beshikda yotmagay uzoq. Boʻldi, tebranishni toʻxtagin, zamin, Yetar, allalashni bas qilgin, osmon. Yopilgan eshikka borar yoʻl topib, Uygʻonishga axir haqlidir Inson. 27. 01. 2017 N. E.

ЧИН ДЎСТ Шоир укам, дўстим Нажмиддин ЭРМАТОВга Ҳали ёш эдимку буни англашга, Ҳали орзуларга тўла юрагим. Қай вақт адашдим мен йўлни танлашга, Борар манзилимни кимдан сўрадим?! Девлар борар эмиш Кўҳи Қоф сари, Парилар чорлармиш Беҳишт томонга. Муштдай вужудимда руҳим сарсари, Питирлар тушгандай худди зиндонга. Лабларим шивирлаб сўрар қатим нур, Зулматга кўниккан нигоҳда не ғам? Зулматдошим менинг, сизга ташаккур, Асодошим менинг – умримга ҳамдам. Ўттиз йил ўткир тиғ устида юрдим, Яхшиям товонда эмаскан жоним. Ўлмадим, ўзимни оловга урдим, Кўзёш пардасидай бу хонимоним! Неки хато бўлса ўзимдан ўтган, Неки ютуғим бор, сабаби ўзи. Дераза ортида дунёни ютган Ким эди, тополмай ўртанар кўзим. Омон қолар эмиш кемадагилар, Бўронга дош бериб ўтолса елкан. Елканга ёпишган денгизчи мисол – Чин дардкаш бўлса ким, яқин дўст экан. Баҳодир Баҳром

Шоир Нажмиддин Эрматов асли Чучукқудуқ қишлоғидан. Аммо қишлоқ тақрон ер бетида, чучук қудуқлар қаерда, нордон(аччи) бўлса ҳам чиқар суви йўқ, оқар ариғи йўқ. Атрофда тош уйлар, дош деворлар, тош йўллар, аммо тоғи йўқ. Кун тиккага келмай соялайман, дейсан бош ургани, қишда ўтин қилгани дарахт йўқ, гул йўқ, шамолнинг тўсини йўқ, бери йўқ, орти йўқ, саратонда иссиқ уради, совуқда совуқ... Болалар папкасига паналаб мактабга боради, папкасига паналаб орзулар қилади, қиш кунлари тутунни аёз қисиб тошуйга қайтариб уради, болаларнинг кўзи ачиб-ёшланиб илм олади ва орзулар қилади, Чучукқудуқданман ака, деб мақтанади. Мен чуччи сув қидираман. Бундай сувлар ширин булоқлардан сизиб, эриниб-эркаланиб чиқади, шошқалоқ сойларда оқади, кекса тоғларнинг манглайида тердай ялтирайди, одам етмас, қўлдан тоядиган иффатли бўлади. Кейин билсам бу қишлоқ асли шундай жойдан кўчирилган экан, боболари Чучук булоқлардан, адоқсиз қудуқлардан сув ичиб катта бўлган, сўнг замон уларни кўчирма қилган, замон уларни чўлларга ҳайдаган. Тоғни севган ва уни қумсаган авлод болалари, тоғни ватан билган тошжонлар - чучукқудуқликлар. Бу ерга чақалоқлигида йўргак билан келганлар ҳозир бобой бўлган, аммо ўзини чўллик эмас, тоғлик, деб билади. Тоққа қараб дуо қилади, тоққа қараб йиғлайди ва тоққа қараб ўлади. Моллар тоққа қараб ўтлайди, қўйлар тоққа қараб марайди, тўй бўлса тоғлар ҳам айтилади, калонкалар тоққа қаратиб қўйилади: "Давраларда эй, ўйнасин Тоғлар!" Мен Чучукқудуқдан чучук сув ичмадим, чучук меҳрлардан тотдим, катта боболарни кўрдим, катта болаларни кўрдим. Шоир ўғлини севадиган чучук юзларни кўрдим. Буларни ҳис қилмоқ учун суҳбатлашиш ҳаддан ташқари ортиқча бўларди. Алар тоғдан айрилган авлод, аммо уларнинг болалари миллатга чучук қудуқлардан сувлар улашмоқда, катта шоир етиштирмоқда! Сира қақрамасин, айнимасин миллатнинг чучук қудуқлари бор бўлсин! @javlonjovliyev

Ўттиз қуш қонимни бўзадай ичди, Оҳулар кўзига сиғмади умрим. Менинг осмонимда учмаган ҳурни, Бир тунда алафлар пойида кўрдим. Бўзла энди, бўзтўрғай. Кафтимнинг чизиғин талади йўллар, Пиллақурт касбидан бермади улгу. Қопқонда чорасиз ётган қашқирдай, Бўғзимни йиртгудай увилладим "у-у-у-ув’’, Бўзла энди, бўзтўрғай. Кечалар ожизман, кечалар - хунбор, Куздузлар кифтимга қўнмаган бахтқуш. Ҳар оқшом бўғзимда уяласа мунг, Ҳар сахар кўзимдан сачраб кетар туш. Бўзла энди, бўзтўрғай. Булбул сайроғида висолга умид Куйган кўкайимга ботмоқда тиғдай. Эртамни кўролмай қурига ўша Кўзим косасида узатаман май. Бўзла ўзинг, бўзтўрғай. Олдинда нима бор - илон ютган йўл, Имкон йўқ, қайтиб ҳам бўлмайди изга. Андуҳга чайилган узу-у-ун умрда Ўлув битталиги кам бўлди бизга. Бўзла энди, бўзтўрғай. Ҳар лаҳза - косадай азобга тўла, Тушун, қисмат бўлди симирмоқ жабри. Бутун ҳаётини шундай куйдириб, Бўзлаб ўтар одам айтяпти. Бўзлагин-ай, бўзтўрғай. Нажмиддин Эрматов сентябрь, 2019

Сўров Ҳайронман, ким кимга отаяпти ўқ, На ўқни тўхтатдим, на бўлдим қалқон. Кеча oкопидан чиқмаган аскар, Бугун тирикман деб бўлса қаҳрамон... Ҳайронман, не учун Ҳақ демас тилим, Ёки ўчирдимми дилдаги чўғни? Нега кўнаяпман ҳақсизликка жим, Менга бир қаранглар, ўлганим йўқми? ©Нажмиддин Эрматов