Najmiddin Turon

ДАРАХТ ЎКИНЧИ Шохларимдан тортди, оҳ, совуқ шамол, Номаҳрам қўлдайин сийпади таним. Кофир нигоҳ ила тикилди ҳилол, Ногоҳ англаб қолдим ялонғочлигим. Жуда яқин қолди оқ сочли ёғий, Мен унга бегона, у ҳирсга ташна. О, замин, паноҳ бер, яширгин мени, Ялонғоч ҳолимда унга кўрсатма. Оқ бадан, ёт қучоқ, увада танам... Илдизимдан ўрлар реза-реза тер. Битта ожизангни асрай олмадинг, Ўзимни осайин, қўйиб юбор ер. © Нажмиддин Эрматов Декабрь, 2018

*** Қон ва Сиёҳ Қон: —пақ этди, отилди ўқ. ҳақ, деган ул ўғлоннинг тешилган кўкрагидан бўй чўздим гул мисоли. Сиёҳ: —пақ этди, отилди ўқ. зирхланган қўналғада қондан қўрққан қўлни ва кўрдим қоғоз висолин. Қон: —авлодим, эгилмагин, бошингни тик тут, дея жондан кечган ўғлоннинг исён тўла кўксидан Ватан дея тўкилдим. Сиёҳ: —келажакка кетди нома: “Бош эгмади исёнчи, Хоин эди, отилди”. Йиллар ўтиб авлодинг Бошин эгиб ўқийди. Қон: —Ватан дея тўкилдим. Сиёҳ: —хоин дея ўқилгай. ©Нажмиддин Эрматов

Эй, мусаввир, битта йўл чизгин, Мени олиб кетсин майхоналардан. Қиличи қинида қирқта алп ўлди, Дунё заҳар тутди мастоналардай... Қоражон қўлида сичқон еган ип, Сурхайл кавшади ғознинг гўштини. Жандамни тутатдим дуди чиқмади, Кимдир ёпиб қўйди зиндон устини. Ҳамон чиқолмайман тубсиз бу чоҳдан, Руҳимни шол қилиб ташлади оғу. Барчинни чизиб бер, етти йил нима? Етмиш йил ўтса ҳам кутган бўлсин у. Миллатнинг кўзини очиқ тасвирла, Басир синчиларнинг башорати талх. Яғринида панжа кўринмаса ҳам, Ўзининг алпларин таний олсин халқ. Кимдир шон талашди жонидан кечиб, (тусланди бу тарих, қолдирмади из). Улар чақа эмас, тушиб қолмасин, Ватаннинг чўнтагин бутун қилиб чиз. Бу чиркин сиёсат осмоннинг яна, Юзига паранжи тутган паллада. Сен шундай тасвирла, Бурғу чалгандай, Шоирлар ҳайқириб чиқсин даҳмадан. Кейин нима бўлар? Кейин... билмадим. Билмадим, бир четда қолса ҳамки тахт, Яна уч-тўрт зина тепага чиқиб, Суратни мадҳ этиб яшайди бу халқ. Эй, мусаввир, ўзинг кўр, майли, Сўнгра бу суратни ёндириб юбор. Н. Э. апрель, 2020

* * * Зардоли, шохингга илмагин маёқ, Саргашта нигоҳим йўлсиз кун сайин. Ахир томоғини гўшанга қилмай, Қалдирғочлар қайтди қора хатдайин. Қаҳратонга бўйин эгмаган исён — Бойчечак—баҳорнинг қўлидаги чўғ. Пешонамга туғён омочин тортди, Ҳануз бирор гиёҳ унолгани йўқ. Эй қамар, кўзимга урмагин ханжар, Руҳидан мосуво қаршингдаги тан. У бир қувғиндидир, удир бир банди, Ғарибин ҳур этмас пешона—ватан. Камалак, эгилгин, қилгин тиловат, Ахир келмайдими ҳижрон адоғи. Айрилиққа нуқта, висолга махзан, Очунда бормикин Сарандип тоғи?.. Севгилим, умримнинг поёни битди, Қалдирғоч қатлимга олиб келди ўқ. Ўқисам ўларман, борлигинг билдир, Ҳали қора хатни ўқиганим йўқ. ©Нажмиддин Эрматов март, 2019 t.me/yoshlikjurnali

Қанот парвоз бўлса осмон устида. Унда нега эркнинг шакли Ерда қафас тусида... Кетай десам этак силтаб озод руҳим измида. Ичимдан бир қўрқув чиқар тинмай нафас тусида. Жумбоқ борми, ечим бордир. Топай дебон изласам. Бунда барча башоратлар англамсиз сас тусида. Ўшал одим ўшал сўқмоқ устимдаги ўшал жанда ўзим бўлиб юрдирмайди бари мерос тусида. Мерос қафас тусида... Н. Э. апрель, 2020

Масалан, ёмғирли кечада унсиз, оқсуяк ойқизни ўйлашинг мумкин, жиққа ҳўл қанотин силкитолмасдан, кўлмакка қулаган аридай тушкун. Масалан, ёмғирдан беркиниб ҳамма, ёмғирпўш тутганча, уйига чопса, сен эса эгасиз итдайин озод, мумкиндир адирда ағанаб ётсанг. Масалан, зангори экранни узиб, (бу экран алдамчи тўралар мулки) томидан сув томар онангни эслаб, тонггача бемалол йиғлашинг мумкин. Масалан, шу маҳал кўчага чиқиб, уйига беркинган барча бийларни, четдаги мардикор уканг учун ҳам, бақириб сўкишинг мумкин уларни. Ёинки, қўққисдан жасорат битиб, (сен кимсан? бу йўлда ўлганлар камми?) ҳеч йўқса, хаёлан асрашинг мумкин, ҳалиям чопони йиртиқ ватанни. Ва ёки, барига қўл силтаб бирдан, шоирга шул дея азал ақида, ижара ҳужрангда ғамга беланиб, шеър ёзиш мумкиндир севги ҳақида. Масалан, ёмғирли кечада унсиз, ёмғирдай ёғилиб кетиш ҳам мумкин... Н. Э. февраль, 2020

Назмий каналлар каталоги ҲУРМАТЛИ КАНАЛИМИЗ КУЗАТУВЧИЛАРИ! Сизнинг эътиборингизга телеграмдаги адабий каналларнинг ҳаволаларини тақдим қиламиз. Марҳамат, дидингизга мос канални танланг ва шеърият билан ҳамроҳ бўлинг! 1) Шеърият муҳибларининг «She’r sehri» канали: https://t.me/sherSehri 2) Ўзбекистон халқ шоири «Иқбол МИРЗО шеърлари» канали: https://t.me/Iqbol_Mirzo_ijodi 3) Ўзига хос шоир «Икром ИСКАНДАР шеърлари» канали: https://t.me/Ikrom_Iskandar_ijodi 4) Овози ўктам шоир «Аъзам ЎКТАМ шеърлари» канали: https://t.me/Azam_Uktam_ijodi 5) Таниқли шоира Хосият РУСТАМОВА шеърлари эълон қилиб бориладиган «Очиқ деразалар» канали: https://t.me/xosiyat_rustamova 6) «Матназар Абдулҳаким» шеърлари эълон қилинадиган канал: https://t.me/M_Abdulhakim 7) Шоир Хуршид Абдурашид шеърлари канали: @xurshidabdurashid 8) Шоир Суҳроб Зиё шеърлари канали: https://t.me/suhrob_ziyodov 9) Шоир Нажмиддин Эрматов шеърлари канали: https://telegram.me/Najmiddin_ERMATOV 10) Шоир Бобур Элмурод шеърлари канали: https://t.me/Bobur_Elmurod 11) Шоир Мансур Жумаев шеърлари канали: https://t.me/Mansur_Jumayev 12) Shoir Bahodir BAHROM sheʼrlari kanali: https://t.me/Bahodir_Bahrom 13) Ёш шоира Мадина Норчаеванинг ижодий канали: https://t.me/Madina_Norchayeva 14) Эътиқоди бутун, миллатпарвар шоир Чўлпон ЭРГАШ шеърлари канали: https://t.me/Cholpon_Ergash 15) Шоир Алибек Анварийнинг ижодий канали: @Taqdirdan_tashqarida 16) Шоир Дадахон Муҳаммадиевнинг "КЕЧИККАН ЙЎЛОВЧИ" ижодий канали: https://t.me/dadaxonmuhammadiy 17) Шоир Шуҳрат Ориф канали: https://t.me/shomuz 18) Шоир Дилмурод ДЎСТнинг ижодий канали: https://t.me/Dil_Dost 19) Ёш ижодкор Шаҳриёр ШАВКАТнинг ижодий канали: http://telegram.me/shahriyor_shavkat 20)Устоз шоир, мутаржим Мирзо КЕНЖАБЕК ижодидан воқиф этувчи канал: https://t.me/mirzo_kenjabek 21) Ёш ижодкор Фаррух Ҳасановнинг ижодий канали: https://t.me/farrux_hasanov 22) Ёш ижодкор Дурдона Бобомуродованинг ижодий канали: https://t.me/Durdona_Bobomurodova МАРҲАМАТ, ЎЗИНГИЗ ИСТАГАН КАНАЛГА АЪЗО БЎЛИНГ!

* * * Зардоли, шохингга илмагин маёқ, Саргашта нигоҳим йўлсиз кун сайин. Ахир томоғини гўшанга қилмай, Қалдирғочлар қайтди қора хатдайин. Қаҳратонга бўйин эгмаган исён — Бойчечак—баҳорнинг қўлидаги чўғ. Пешонамга туғён омочин тортди, Ҳануз бирор гиёҳ унолгани йўқ. Эй қамар, кўзимга урмагин ханжар, Руҳидан мосуво қаршингдаги тан. У бир қувғиндидир, удир бир банди, Ғарибин ҳур этмас пешона—ватан. Камалак, эгилгин, қилгин тиловат, Ахир келмайдими ҳижрон адоғи. Айрилиққа нуқта, висолга махзан, Очунда бормикин Сарандип тоғи?.. Севгилим, умримнинг поёни битди, Қалдирғоч қатлимга олиб келди ўқ. Ўқисам ўларман, борлигинг билдир, Ҳали қора хатни ўқиганим йўқ. ©Нажмиддин Эрматов март, 2019

*** Тилкалаб, тилкалаб тонглар дон сочди, Пешонангга қўнди қисмат қушлари. Яна бегонадай томоша қилдинг, Ёстиғингга оққан шаффоф тушларни. Эшилиб, эшилиб ингранди арқон, Дордаги ёстиғинг оқ нурлар қучди. Яна бегонадай томоша қилдинг, Парланиб, парланиб тушларинг учди. Қоралаб, қоралаб чўкди-я оқшом, Бошинг-а яна шу болишга етди. Суйилиб, суйилиб оққан тушлардан, Ёстиқдаги гуллар очилиб кетди. Куйиниб, куйиниб яна кўз очдинг, Ёстиқда гул унган, уза олмайсан. Туш ўша, гул ўша - танийсан менман, Менга бегонадай термилолмайсан. ©Нажмиддин Эрматов ноябрь, 2018

Баҳор келгач фотиҳамизни, Қалдирғочлар ўқиб беради. Найсон- чевар, гулгун кўйлагинг, Камалакдан тўқиб беради. Узун қиш тунини яшаб ўтсак бас, Кишанларни бойчечак ечмиш. Япроғини бичиб ялпизлар, Кўзларима илар чимилдиқ. Гўшангамиз учун хонқизи, Тушларини беради тиниқ. Айрилиқ кунини яшаб ўтсак бас, Қатқалоқ ғовларни шабнамлар ечмиш. Пешонамиз ювади беҳишт, Тақдиру таъқиқлар қолади ортда. Бир мангу манзилни макон этамиз, Қувилмаймиз заминга қайта. Шу битта умрини яшаб ўтсак бас, Танимизни Азроил ечмиш. ©Нажмиддин Эрматов декабрь, 2018

Сен ёқтирган ёмғирлар ёғди, Ойнага урилди видо шитири. Уяси бузилган қушдай руҳимни, Ололмадим уйга киритиб. Босган изларимиз кўлмакка дўнди, Оқчарлоқ мисоли учди нигоҳим. Во ажаб, кўлмакдан нилуфар эмас, Бақалар чиқарди бошини, моҳим. Тўр ташлаб ўтирдим балиқчи чолдай, Бисотимда қолган хўрагим жондир. Тилла балиқнимас, дуридан айри Тутиб қайтаяпман чиғаноқларни. Ҳорғин одимлайман чўлоқ турнадай, Эзилиб ёғмоқда эзғинваш ёмғир. Тешик товоғига тикилиб уйда, Умидвор кутадир қаримсиқ кампир. Бу кампир ўлмади, тинчитмас мени, Борига кўнмаган бу кампир - висол. Гар тирик бўлса у ушбу дунёда, Менинг ҳам тирикдай юрмоғим маҳол. Уйга кириб келдим, яна ғалаён, Кўчага итқитар итдайин хўрлаб. Ё танга кишанла, чиқарма мени, Ё руҳим ол, мана, эй руҳи талаб. Бундай яшамоққа мажол қолмади, Ё куч бер, ёки бу юрагим тинсин. Келгин, кутаяпман, агар келмасанг, Сен ёқтирган ёмғир ёғмасин! Сен ёқтирган ёмғирлар ёғди... Н. Э. апрел, 2020

Архарлар чиқолмас қоядан бир ҳовуч кул топдим қақнуснинг кули пуфла-a-aб ўтирдим минг йил. Парига айланди бақалар кул чўғга дўнгунча кўзимни юмиб йиғла-a-aб ўтирдим минг йил. Манглайимга уясин қуриб қалдирғоч шайланди тухум қўймоққа ''кишт''лa-a-аб ўтирдим минг йил. Қарчиғай бошлади кўксимни чўқиб қаршилик қилмадим мадорим битди чидa-a-аб ўтирдим минг йил. ва ниҳоят чўғга жон битди қўлимни теккиздим кулга айландим пуфлa-a-аб ўтирма минг йил. март, 2020 Н. Э.

Бахтли бўлмоқликка тўсиқ кўп менда: йўл тўсиқ, дил тўсиқ, кўз ёш ҳамда ғам, икки ўрим сочини юлиб, сийрак қилган ушбу ватан ҳам. Яшамоққа тўсиқ кўп менда: қўлида тутганча фироқнинг тиғин- ҳаётим тўсиқдир яшашга ҳатто. Ўлимгачи? Биргина Худо. ©Нажмиддин Эрматов mart, 2019

Сурнайнинг бўғзига кишанланган сас, Видо фурсатида симрилган нафас, Ташқарида висол, ташқари қафас, Айрилиқнинг минг йиллик эҳроми ичиндамиз. Гул парини ютган уч бош аждаҳо, Баҳодирин кутган ул кўзи шахло, Ташқарида дунё—ташқари рўё, Рўёлиғнинг унутлиғ достони ичиндамиз. Қувғинлиғ наҳрида чўмилган андуҳ, Сандулоч томоғин макон қилган руҳ, Дулдулнинг ёлида уялаган ''чуҳ'', Бу дунёнинг чиндан чин ёлғони ичиндамиз. “Севаман” сўзидан титраган ҳаво, Ҳаво титроғидан яралган наво, Биз ўша лаҳзада қолиб кетиб, о, Асрлардан барҳаёт бир они ичиндамиз. Рўёлиғнинг унутлиғ достони ичиндамиз. ©Нажмиддин Эрматов 2019, апрел

оҳунинг шохига капалак қўнди токи бу гўзаллик кўзга сиғгунча ҳуркитиб юборди сулувлар ботқоқнинг сатхида мавсумий раста нилуфар сотарди ишқнинг гулобин токи мен киссамдан танга топгунча чўктириб юборди сулувлар тоғора ичида тилла балиқча ҳаллослаб чопардим денггиз қидириб токи мен у томон йўлни топгунча қайнатиб юборди сулувлар қочиб чиқдим тор бу кулбадан шеър бўлиб кетяпман энди ёдлаб қол паришон боққанча даричалардан унутиб юборди сулувлар март, 2020 Н. Э.

Жим кетинг. Тегинманг. Қараманг, қўйинг, Кўзига мунг экиб қўйгандир уйқу. Қулочи кенг-ку деб беҳад севинманг, Йиғи довушига ўйнаяпти у. Йиғлаётган ўзи, Ўйнаган ўзи, Йиғлатган ҳам асли ўзининг насли. Ғамбода ҳолига таскин қидириб, Йиғи-ла куйлайди ҳурликнинг васфин. Ачинманг ҳам энди, Бори шу экан, Йиғи билан ювиб бўлди осмонни. Ўзи-ку кўникди мазлум ҳолига, Кўниктирмак истар энди жаҳонни. Ажаб, Ғамларига меҳр бойлаган, Ажиб ҳузурдайин туйилар қайғу. Ўзи-ку ишониб, ўзгани авраб, Йиғи довушига ўйнаяпти у. Лек умид боқийдир, Ёруғ кунлар бор! Аммо келганида кутилган фурсат, Ҳайронман, эркини қандай танийди, Йиғи довушига ўрганган миллат. Нажмиддин Эрматов 2019, октябрь