Najmiddin Turon

Абдулкарим Баҳриддин (Карим Баҳриев) Наҳот бағринг тилинган эмас, Элнинг дарди билинган эмас, Ҳақорат гар шул мамлакатда Шеърларинг ман қилинган эмас. Қора рўйхат боқсалар эди, Қўлга кишан тақсалар эди. Ҳеч бўлмаса ёзганларингни Гулханларда ёқсалар эди. Ким бойиди, ким амалда – шод. Ким отилди, ким қамалди –дод. Эл-улус сукутда, улкан сабрда, Мардлар ё қафасда ва ё қабрда... Уялармиз – биз тирик, озод. *** УЯТ Бу юртда чинорлар кўкка чўзилган, Ҳаттоки юлинган ғўзалар тикка. Узилган, Ичимда недир узилган – Барибир, кўз тикдим мен юксакликка. Бу заҳил тупроққа бир чўп қадасанг, Осмонга талпинар, тик ўсар яккаш. Дарахтлар аскардай тик турган юртда Инсонга уятдир эгилиб яшаш. Далалар бепоён, саҳролар сўнгсиз, Адоқсиз, хадсиздир бу ер, бу борлиқ. Бу чексиз оламда, бу кенг дунёда Уят - дили танглик, юраги торлик. Чўққилар азалий, турар жойида, Турар салобатли тоғлар минг йиллик. Вазмин, оғир чўккан тоғлар пойида Уят - ҳовлиқмалик, уят - енгиллик. Уятдир эзилиб минг йилки шундоқ Далада тупроқдай сарғайган, ҳайрон Халқ кўзига боқиб ёлғон сўзламоқ... Ҳеч ким билмаса ҳам, уятдир ёлғон. Бир дон эксанг, униб ёзади япроқ, Гулларнинг атридан булбуллар сайроқ. Тош ҳам гуллаб ўзин англатган юртда Уятдир зулм кўриб, сассиз яшамоқ... https://t.me/NajmiddinTURON

Assalomu alaykum. Adabiy davra qaytmoqda!   Bu gal yozuvchi Erkin Aʼzamning qizg‘in muhokamalarga sabab bo‘layotgan yangi asari – “Momaqaldiroq ostida sayr” romani haqida suhbatlashamiz. Tadbirda muallifning o‘zi va adabiyotshunoslar ham qatnashadi.   Vaqt: 3-aprel soat 19:00. Manzil: Tez kunda eʼlon qilinadi. To‘lov: 100 ming so‘m (bir martalik).   To‘lovni https://www.tirikchilik.uz/adabiydavra sayti orqali ism-familiyangizni kiritgan holda o‘tkazib, @adabiy_club_bot manziliga yuboring va ro‘yxatdan o‘ting.   ❗️Eslatma: kirish faqat ro‘yxat asosida. Joy cheklangan. @adabiy_klub

МУСТАҚИЛЛИК ДЕКЛАРАЦИЯСИ 1990 йил. 20 июнь. Яна куз келмоқда. Дарёлар тинди. Шилдир-шилдир оқди покиза сувлар. Ургут боғларига сукунат қўнди, Хазонларни секин шамоллар қувлар. Ота элим, энди севингин, шодлан, Истиқлолинг келиб чертди дарвозанг. Олис манзилларга шу тонгда отлан, Йўқолиб кетмагай энди овозанг... Нега қувонмайсан, тошмайсан жўшиб, Ахир, мустақиллик келди ўлкангга?! Ўрис амалдори елкангдан тушиб, Ўз амалдоринг... минди елкангга. Нечун бахтдан яйраб, шод яшамайсан, Нечун бошинг эгик, ўзинг оввора?! Энди сен Московга пул ташимайсан, Энди сен ... Тошкентга ташийсан пора. Сен яйдоқ далангда ишлагин куйиб, Пахтангни ҳокимга топширу қувон – Пойтахт заводлари турибди қуйиб, Кўксингга шақирлаб тақарсан унвон! Ҳасратинг кўп – ичда, лек зўр – савлатинг, Шод бўл, деб мен ўзим бўлолмасман шод. Мана, озод бўлди буюк давлатинг... Бечора халқинг ҳам бўлсайди озод. *** ҚАБРТОШГА ЁЗУВЛАР 1. Яна баҳорлар келар, Жамбил исли ҳавони Симиради кўк савсан. Қари толнинг товонин Қитиқлайди ёш майса, Гуллар босар дунёни… Сен ўрнингдан турмайсан – Минг афсуски, ўлгансан, Минг афсуски, кўрмайсан. 2. Яна баҳорлар келар, Тушар оғир кўйлаклар. Дилга қутқу тўлади – Кимнингдир шод кулгуси Боғни нурга белади. Сен севган ойдай дилбар Бегонага кулади – Сен ўрнингдан турмайсан… Яхшиямки, ўлгансан, Яхшиямки, кўрмайсан. ©Карим Баҳриев

Инсон, шоир, журналист, таржимон Абдулкарим БАҲРИДДИН (Карим БАҲРИЕВ) вафот этди. Охирати обод бўлсин. ЎЗБЕКЛАРГА Музлар эриб битди. Уйғонмадинг сен. Баҳор ўтиб кетди. Ухлайвердинг донг. Ёз нури найзадек елкангдан ўтди – Турмадинг. Куз келди. Жигарим, уйғон. Булутлар ортидан кўринди тулпор, Уйғонди тупроқнинг тагида илон. Ваҳимага тушиб оғзин очди ғор, Бўрилар уйғонди. Кел, сен ҳам уйғон. Бир парча нон учун, қултум сув учун Дилдираб шукрона айтасан нолон – Қулни ҳам боққайлар иш берсин дея. Эслагин. Ўйлагин. Бехосдан уйғон. Кимга овоз бердинг – ўзинг бўлиб гунг, Ким сенинг номингдан сўзлаюр ёлғон?! Агар ухлайверсанг – тугамас бу тун, Қачон сен уйғонсанг – отажакдир тонг. Уйғонмоғинг учун не қилай, айтгин, Йиғлайин, кулайин – нима қилайин?! Майли, керак бўлса, мен берайин жон, Уйғон. Уйғонганинг кўриб ўлайин...

Ҳижрон ҳақида қўшиқ —Ўргимчак тўрига илинган шуъла, Неларни ўйладинг кунботар пайти? —Агарки фурсатинг бир умр бўлса, Кутганинг ҳеч қачон келмайди қайтиб. —Қара, уфқ қизарди, ниҳоя яқин, Ўргимчак ютмасдан кўзларимга қўн. —Менинг умрим битта, асралмоқ не наф, Ахир тонгга қадар минг умрлик йўл?.. —Ўргимчак тўрига илинмоқ нечун, Юрсанг бўлмасмиди ул шамсни қучиб? —Қисматим шу экан, ахир қуёшни, Топганим билмасдим айрилмай туриб. —Мана шам ёқяпман, оқшомдан аввал, Менинг ҳам ҳижроним ҳижронингга тенг. —Агар тонгга қадар фурсатинг бўлса, Кечада яшамоқ азобини енг. —Висол тонг бўлса гар, қисматимиз бир, Умримдан кечалар кўтармайди бош. —Бундан ҳам дахшати — шу тунда ўлсам, Менинг кутганимни билмайди қуёш. Ўргимчак тўрига илинди шуъла... февраль, 2020 https://t.me/Najmiddin_Ermatov

21 март-Ўзбекнинг буюк шоири Абдулла Орипов туғилган кун! ВАТАНИМ Ҳар бир уйда айғоқчи, Ҳар қадамда искович, Одамни кўрса қочар, Бедовларинг ҳуркович. Ошингга заҳар солди, Ғанимларинг бир ҳовуч, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Нон бермайди ва лекин Нон еганни ўлдирар, Ўсиб турган ниҳолни Аёз каби сўлдирар. Бозор бормай қўйнингни Пуч ёнғоққа тўлдирар, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Ҳар кўчада минг миршаб, Ҳар гўшада авахта, Ҳақ деганнинг оғзи берк, Қон ютар лахта-лахта. Ўзи-ку пахта эккан, Ёстиғи бўлди тахта, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Илму ирфон жаҳолат Ғорига кириб кетди, Ўлик тирикдан ўтди, Тирик ўликдан ўтди. Адолат истаб борсанг Ёлғон тиршайиб кутди, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Қайларгадир йўқолди Меҳр билан муҳаббат, Қўлида ханжар ушлаб, Адоват қолди фақат. Ёмон гап арзон-гаров, Яхши гап бўлди қаҳат, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Тўғригўйлар бир четда, Эъзоздадир иғвогар, Қайтдик ўрта асрга, Одам пуллар савдогар. Минг йиллик хазинангни Талаб ётар ўғри, ғар, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Ўлиб ҳам бўлмай қолди, Ювғич урар кафандан, Кимлардандир юққан кир Кетмас сира бадандан. Қуруқ ҳашаклар қолди Гуллаб турган чамандан, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Қувган ҳам халқим дейди, Халқим дейди қочган ҳам, Лекин халқнинг аҳволин Ўйламас бирор одам. Жаллод ҳам халқ номидан Ўқир фармонни у дам, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Турфа хил замонларни Кўрган битта инсонман, Гоҳ фахр этсам, гоҳо Баридан пушаймонман. Нетайки мен на Хорун, На ёки Сулаймонман, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. Барчасига сабабдир Асли нафснинг балоси, Меҳнаткаш халқнинг эса Ечилмас муддаоси, Иншооллоҳ, бандага Боққай бир кун Худоси, Ёвузларнинг қўлида Гулдай ватаним қолди, Бошида паноҳи йўқ Тулдай ватаним қолди. https://t.me/Najmiddin_Ermatov

Наврўз—инсониятнинг энг қадимий байрами. Кишилик жамияти тун ва куннинг, қиш ва ёзнинг алмашинувини идрок этиб, оқ ва қоранинг, ёвузлик ва яхшиликнинг мангу курашувини англай бошлаган замонлардан буён бу байрам нишонланади. Инсонларнинг Йилбоши сабаб ўтказадиган урф-одатларида, айтиладиган куй-қўшиқларида, турфа ўйинлари, курашу кўпкарисида Оқнинг, Эзгуликнинг тарафида туриши мужассам. Йўлдоши мангулик бўлган Йилбоши қутлуғ келсин барчамизга!!! https://t.me/Najmiddin_Ermatov

“Отангни айтдинг, кўп айтдинг, Энангни айтдинг, кўп айтдинг...” “Алпомиш”дан ДЕҲҚОНОБОДГА! Бобом сўзи ўнглигим, Момом кўзи мунглигим, Тоғлардан улоқдиму Унутдимми кимлигим... Қирлар бағрида отар Армондай тўзиб ётар, Қўзи қувлаган бола Таёғин ортга отар... Шаҳарга келиб дайдиб, Кўрганимни кўп айтиб, Куйганимни хўп айтиб, Чол-кампирнинг шамдайин Сўнганин бир айтмадим. Отамнинг ховрин босди Шу тоғлару кўпкари, Энамнинг айтар сўзи Халқумидан ичкари, Аллағайтиб келдим, деб Кетдим шамол сингари, Бу дунёнинг торлигин Кўп айтиб борган сари, Иккисининг шу кунга Кўнганин бир айтмадим. Эл, дедим бисёр айтдим, Ҳақ, дедим хушёр айтдим, Бу ватанда ҳар киши Шод, дедим—бекор айтдим. Айтмадим, хонлар ғофил— Кўнгилда минг хавотир, Икки иним мусофир Юрганин бир айтмадим. Синглим, бўтакўз синглим Қирларга сингиб борар, Туёқдай қаттиқ турмуш Қўлларин танғиб борар, Дунёга бир келганин Англамай ганггиб борар, Алп миллатнинг эртаси, Шовури тиниб борар— Ойбарчиндан мерос қон Тўнганин бир айтмадим. Лалмикор эл, осмонга Қараб кўзи куйган эл, Тўртта қўйнинг тошдайин Туёғидан унган эл, Толган бир тўп турнадай Шу қирларга қўнган эл, Бирда қуруқ йилгаю Бир зуғумга кўнган эл Кўнглида бир кун исён Унарин бир айтмадим. Унганин бир айтмадим... https://t.me/NajmiddinTURON

Dindoshim, eshiting azon ovozin, Undan kelib turar Tangrim unlari. Poyingiz yetmasa Kabatulloga, Yuragimga keling Hayit kunlari. Nargiza Yunusova Qutlug‘ ayyom muborak bo‘lsin barchangizga! https://t.me/NajmiddinTURON

UYG‘OTAY DEB KELGAN UL BAHORLAR BEKOR KETAR... She'rni turk qardoshlarimiz o‘zbek va turk tillarida kuyga solibdi! Ohangi yoqdi. Sizlar ham eshitib ko‘ringizlar qani! @NajmiddinTURON

Yomg‘ir bo‘lsam kerak aslida... 🎙 Alisher Uzoqov (#) ✍️ Najmiddin Ermatov

🟠Turon sog‘inchi, Najmiddin Ermatov ⚫️Narxi: 34 000 so‘m 🟠Xarid: t.me/akademsavdo | +998994331677 ⚫️Manzil: Alisher Navoiy ko‘chasi, 40.

📘 @akademnashr

Бир юпанч бор эди айтарли, Бир ишонч бор эди идраган. Битта йўл бор эди қайтарли, Битта гул бор эди қайтмаган. Оппоқ қор ёққанда гупуриб, Оҳ-зорлар оғдирди эсимдан. Оқшомга юз бурдим тонг туриб, Оҳ, Соғинч, сен кимнинг исмисан?.. Бу қисқа кўринган кунмиди, Бу қистаб жон олар тундир-а? Май тусаб турибман тўлдиру, Ҳа, истаб юрибман ўлдира... Ютганда энг сўнгги ютумни, Чиққанда оғринчнинг измидан, Айтқани, унутган отимни, Айт, Соғинч, сен кимнинг исмисан?.. https://t.me/NajmiddinTURON

*** Qovogʻingga kimdir don sepgan, Kiprigingga qushlar qoʻnibdi. Dil yedirib boqdingmi, gulim, Bo'ldi uchir... ular toʻyibdi. Oʻzing tusab, axir dilingni tutaversang qushlar ketmaydi. Seni yolgʻiz bu ogʻriqlardan qutqarishga kuchim yetmaydi. O‘quvchi qiz: Qamashi tumani 95-maktabning 5- sinf oʻquvchisi Kumushbonu Nurmamatova.

Ўзга юртлик ва фаластинлик бола суҳбати —Бизнинг юртга баҳор                                        тоғлар оша келади, —Бизнинг юртга мозорлар оралаб. —Бизнинг боғни гуллар                                       турфа рангга белади, —Бизларда қон белар қоралаб. —Капалак қувармиз қирларда, —Бизларни ўқ қувар тинимсиз. —Кўксимиз тутамиз елларга, —Сезамиз андуҳнинг тамин биз. —Отам айтар бизга,                                      қушдай парвоз эт, —Отамни отганлар, айтолмас. —Онам айтар, болам,                                     умринг гулзор эт, —Онам у дунёдан қайтолмас. —Дунёга боқ, қандай чароғон, —Дунё қаро тундан иборат. —Одамлар шод, тинч ахир замон, —Шайтонга қилурлар ибодат. —Менинг орзуйим бор                                         дунёни кезмоқ, —Қарзим бордир—Ватанни асраш. —Фазода учгим бор,                                        уммонда сузмоқ, —Бурчим бордир—ёв билан саваш. —Ёшимиз тенг, гапинг ғалати, —Боламан-у болалигим йўқ. —Бу сўзларни кимлар ўргатди? —Қўшиқ айтиб учаётган ўқ. —Менинг вақтим битди,                                        ухлашим керак, —Ухласам, эҳтимол турмасман. —Улғайгач кўп гаплар                                        айтарман бешак, —У вақтлар мен балки бўлмасман. —Бизнинг юртга баҳор                                        тоғлар оша келади, —Бизнинг юртга мозорлар оралаб. https://t.me/Najmiddin_Ermatov

Yaqinda Toshkent davlat Sharqshunoslik universitetida “Shoir-u, sheʼr-u shuur...” atalmish adabiyot va ashula kechasi boʻlib oʻtdi. Umuman, soʻnggi yillarda shu kabi tadbirlab koʻpayib bormoqda. Odamlar-da qiziqishyapti. Bu juda ijobiy hol. Viloyatlarda ham shu kabi ijodiy kechalarni uyushtirishni soʻrayotganlar bor. Nasib, hammasiga yetkazsin! (Bu chiqishning birgina aybgʻinasi bor. Sheʼr aytishda hayajon boʻldimi, odamlarning ruhi bosdimi, ishqilib, ikki-uch joyida adashib ketdim. Aybga buyurmaysizlar))) @NajmiddinTURON

Бойчечак кучини йиғмабди ҳали, Аёзнинг қуршовин енголмабди март. Оппоқ қор сингари қора андуҳга Кўмилиб ётибди улкан бир сарҳад... https://t.me/Najmiddin_Ermatov

Соялар кирмоқда зулмат қўйнига, Милтиқ қўндоғини тарк этар ари. Айбларин илишиб мазлум бўйнига, Яна оппоқ бўлиб чиқишар бари. Ўқларнинг шовури—мотамий оҳанг Қашқирлар рақсига чалинар уйғун. Гўрларнинг сатхида минг йилдирки жанг, Минг йилки очидан ўлмайди қузғун. Илонтус йўлларда ёйилар раста— Турфа хил ўликлар, ҳаммаси текин: (Савдо гуллаб кетар ҳар дам бир паста) Бизларнинг ғояга эргашинг лекин. Катта минбарларда кўкимтир чорлов, “Ўргимчак тўри”да миллионлаб ўлжа. Кичик ҳужраларда тўхтовсиз йўқлов, Кичик ҳужраларнинг каттаси ўлган. Ой совуқ боқади иблис тиғидай, Сулувлар тушда ҳам ечмас совутин. Эрлар уввос солар, уввос—йиғидай, "Худолар" қайтадан бошлар овутиб. Қайтадан бўлинар бўлинган дунё, Тўпдай туға бошлар бева кампирлар. Лак лашкар тилига қайтади урҳо, Ер қари қалтирар, само қалтирар. Бир ёқда енгилган, бир ёқда енгган, Ўртада бўлинган, ўлинган ҳаёт. Турналар сув излаб саҳрога энган, Майсалар қувраган тополмай қанот... Бу мунглар узундир, ҳасратинг узун, Ўзича яшайдир руҳсиз жасадинг. Бу қора ўпқонга тушмасдан бурун, Ўлган болаларга келар ҳавасинг. Ўлган болаларга келар ҳавасинг... https://t.me/NajmiddinTURON

Нотўғри тизим, жамиятнинг нотўғри йўли қандай бўлади? Унда мактаб директорининг боласи яхши ўқигани учун эмас, ўқимасдан “аъло” баҳолар олаётгани билан мақтана олади; Участка нозири яқинлари даврасида нечта қонун бузилишининг олдини олгани билан эмас, қанча “левий” қилгани билан кўкрак керади; Одамларга бирор ўқиган, зиёли танишининг гапларидан кўра, яқинда қамалиб чиққан “зик”нинг гурунги қизиқ туйилади; Туман даражасидаги мансабдорларнинг қариндошлари ва танишлари номига бизнес очиши, давлатнинг (аслида халқнинг) пулини ўзлаштириши ишнинг кўзини билиш дейилади; Вилоят даражасидаги амалдор арзандасининг қилғиликлари қонундан устун ҳисобланади. Агарда, қонун доирасида иш қилиб қолса, одамлар “наҳотки” дея ҳайратга тушади; Талим вазиринг боласи давлат эмас, хусусий ё чет мактабларда ўқийди: Соғлиқ вазири ё оиласи касал бўлса, ўзи масъул касалхоналарда эмас, хорижда даволанади; Элнинг эртасига масъуллар ва “келажагимиз буюк” дейдиганлар пулларини ўз мамлакатидан ташқарида сақлайди; Амаллаб катта курсига ўтириб олганлар, курсининг кучугига айланади, яқинлашганни тишлашга чоғланади; Бу бузуқ тизимни созламқочи бўлганлар эса лойқа дарёни адоғидан тиндиришга киришади, бошидан эмас... Шукрки, бизнинг тизим, жамиятда бундай эмас! Ё шундайми?.. Бир неча кундан бери боғчада болаларнинг оммавий заҳарлангани, заҳарлаганлар эса валломатларга алоқадорлиги, мен тенги йўл ҳаракати сафдорини машина уриб юборгани ва унинг вафот этгани (уч нафар боласи етим қолди(((, уни уриб юборган эса кимнингдир арзандасилиги ҳақдаги гаплар қишнинг сўнггида кишини музлатиб юборяпти. @NajmiddinTURON

🔈Shoir Najmiddin Turon bilan uchrashuv❗️ Muloqot “Yoshlik” jurnali telegram sahifasida boʻlib oʻtadi. Suhbatni “Yoshlik” jurnali badiiy muharriri Bahodir Jovliyev olib boradi. 📆Sana: Bugun ⏰ Vaqt: 20:00 📍Manzil: https://t.me/yoshlikjurnali 📣 E’lon postini tanishlaringizga yuboring❗️ 📱Telegram 📱 Instagram 📱Veb-sayt 📱Facebook

Ertak aytmang bolalarga,  siz, Shoirlardan uzoqroq oling. -mana bu yoʻl, deng, mana bu qorin: shu gʻam deya tolsin oyogʻing. Ertak aytmang bolalarga, oh, Kimligini bilib qolmasmi: Farogʻiydek yigʻlabon, e voh, Gulxaniydek kulib qolmasmi?.. Ertak aytmang, kitobni yoping, Boqmasin dil tilkalariga. Axir u bolaku, Vatanning gʻami Ogʻirlik qiladi yelkalariga. Hali bir kun oʻzni taniydi, Vatanni taniydi, taniydi alar-- U kun bizga la'nat aytadi, Ertak tinglab oʻsgan bolalar. https://t.me/Najmiddin_Ermatov