Apstolic songs🎧🎤

ቢሾፕ ዘኬዎስ ሳፋይ | የአዶላ ቅ/ሰበካ ኃላፊ #Part1 ጻድቅ በእምነቱ በህይወት ይኖራል የእግዚአብሔር ቃል በዕብ.10÷37-39 ላይ “ገና በጣም ጥቂት ጊዜ ነው፣ ሊመጣ ያለውም ይመጣል አይዘገይምም፤ ጻድቅ ግን በእምነት ይኖራል ወደ ኋላም ቢያፈገፍግ፣ ነፍሴ በእርሱ ደስ አይላትም። እኛ ግን ነፍሳቸውን ሊያድኑ ከሚያምኑቱ ነን እንጂ ወደ ጥፋት ከሚያፈገፍጉ አይደለንም።” ብሎ እንደሚናገር በዚህ ክፍል ውስጥ “ጻድቅ ግን በእምነት ይኖራል” የሚለው ቃል አለመለዋወጥን፣ ስፍራን አለመልቀቅንና ሁልጊዜ በእምነት ጸንቶ መገኘትን የሚገልጽ ነው። ችግርና መከራ ቢፈራረቁ፣ ፈተናም ቢበዛ፣ ብዙ የሚያናውጡ ነገሮች ቢከሰቱ ጻድቅ አይናወጥም፤ በእምነት ጸንቶ ይኖራል። ይህም ማለት ከሰማው መለኮታዊ ነገር፣ ከእግዚአብሔር ቤት፣ ከቅድስናውና ከመንፈሳዊ ሕይወቱ፣ አምላኩንም ከመከተልና ከማገልገል አይወሰድም፤ ሁልጊዜ እዚያው ይገኛል፣ አይጠፋም አለ ማለት ነው። ጻድቅ ዛሬም በእምነት ጸንቶ ይቆማል፤ ሊመጣ ያለውም ጌታችን ኢየሱስ ክርስቶስ እስኪመጣ ድረስ ወደ ፊትም በእምነት ይኖራል። መጽሐፍ ቅዱስ ሲናገር “እምነትም ተስፋ ስለምናደርገው ነገር የሚያስረግጥ የማናየውንም ነገር የሚያስረዳ ነው።” [ዕብ. 11፥1] ይላል። በዚህ ቃል መሠረት ጻድቅ አሁን በስጋ አይን በሚታየው ተጨባጩ ዓለም ሳይሆን፤ አሁን በስጋ ዓይን የማይታየውን በመንፈሳዊ ዓለም ግን ያለውን መለኮታዊ ነገርን በእምነት በማየትና በመረዳት የሚኖር ነው። ስለዚህም ነው ሐዋርያው ጳውሎስ “እንግዲህ ሁልጊዜ ታምነን በእምነት እንጂ በማየት አንመላለስምና” ብሎ በ 2ኛ ቆሮ. 5÷6 ላይ የተናገረው። ሙሴም በዚህ እምነት ነበር የፈርዖንን ቁጣ ሳይፈራ የግብጽን አገር የተወው፣ ምክንያቱም “የማይታየውን እንደሚያየው አድርጎ ጸንቶአልና።” [ዕብ. 11÷27]። በደረሰበት መከራና ስደት ስለ ክርስቶስ እጅግ መነቀፍ፣ ከእግዚአብሔርም ሕዝብ ጋር መከራ መቀበልን ወዘተ በአጠቃላይ በግብጽ ክፉ ተጽዕኖ ውስጥ ሙሴን ያጸናውና ያኖረው እምነት ነበር። ዛሬ እኛም በዚህች በክፉ በተያዘችና በተሞላች በአታላይዋ ዓለም ስንኖር በዓይናችን በምናየውና በጆሮአችን በምንሰማው እንዳንታለልና ከጽናታችን እንዳንወሰድ ብሎም በክፉ የዓለም ተጽዕኖ ስር እንዳንወድቅ ምንም አማራጭ የሌለው መንገድ በእምነት መኖር ነው። ጻድቅ ዓለምን የሚያሸንፍበት ትልቁ መሳሪያው እምነት ነው። እንዲህ ተብሎ እንደተጻፈ፦ “ከእግዚአብሔር የተወለደ ሁሉ ዓለምን ያሸንፋልና ዓለምንም የሚያሸንፈው እምነታችን ነው።” [1ኛ ዮሐ. 5÷4]። በተለይም አሁን እኛ ያለንበት ዘመን የመጨረሻው ዘመን ከመሆኑ ጋር ተያይዞ የሚከሰቱ ክፉ ክስተቶች፣ የሐሰተኞች ነቢያት ከልክ በላይ መብዛት፣ መለኮታዊ ነገርን ማወሳሰብና ግራ ማጋባት፣ ራሳቸውን የጽድቅ አገልጋዮች ማስመሰል፣ የሰውን ደካማ ጎን እያጠኑ መስራትና በኢየሱስ ስም መነገድ፣ ጦርና የጦር ወሬ መስማት፣ ሕዝብ በሕዝብ ላይ መንግስትም በመንግስት ላይ መነሳት፣ ረሃቡ፣ ቸነፈሩ፣ የዓመጻ መብዛትና የፍቅር መቀዛቀዝ፣ የሰዎች በዘረኝነት መንፈስ ተይዘው መለያየትና እርስ በርስ በጥላቻ መንፈስ መበላላት [ማቴ.24÷3-8] የማይታየውን ያየንበትን እምነት ከውስጣችን እንዳያጠፋና የእነዚህ ክፉ ክስተቶች ሰለባ እንዳንሆን ነቅተን የመጀመሪያ እምነታችንን እስከ መጨረሻው አጽንተን መያዝና መጠበቅ አለብን። “የመጀመሪያ እምነታችንን እስከ መጨረሻው አጽንተን ብንጠብቅ÷ የክርስቶስ ተካፋዮች ሆነናልና።” [ዕብ. 3÷14]ከፍ ብለን እንዳየነው በዚህ በመጨረሻው ዘመን እየተፈጠሩ ከሚታዩት አስጨናቂና ተስፋ አስቆራጭ በሆኑ ነገሮች ውስጥ ይድናል የተባለለት እስከ መጨረሻ የሚጸና ሰው ነው። [ማቴ. 24÷13]። ያለ እምነትም ጽናት የለም። “ባታምኑ አትጸኑም።” ይላልና [ኢሳ. 7÷9]። ጌታችን ኢየሱስ ክርስቶስ በሉቃ. 18÷1- 8 በእምነትና በጽናት መጸለይ እንደሚገባ በአመጸኛ ዳኛና በአንዲት መበለት ምሳሌ ባስተማረው ክፍል ውስጥ የተናገረው አሳሳቢ ቃል “ነገር ግን የሰው ልጅ በመጣ ጊዜ በምድር እምነትን ያገኝ ይሆንን?” የሚለው ነገር በመጨረሻው ዘመን ከምድር እምነት እንደሚጠፋ አመላካች ንግግር ነውና ነቅተን እምነታችንን በውስጣችን እንጠብቅ። እምነት እንደ ጀርባ አጥንት ሊቆጠር ይችላል። አንድ ሰው ወይም ሌላም እንስሳ ቢሆን ያለ ጀርባ አጥንት ቀጥ ብሎ መቆምና መሄድ እንደማይቻለው ሁሉ እንዲሁ ሰው በክርስትና ሕይወት ያለ እምነት ጸንቶ መቆምና መመላለስ አይችልም። አንድ ወገቡ ወይም የጀርባ አጥንቱ የተጎዳ ማንኛውም ሰው ወይም እንስሳ ሽባ እንደሚሆንና በሌላ አካል ድጋፍ እንደሚንቀሳቀስ እንዲሁ እምነት የሌለበትን ሕይወት ሰይጣን ወደ ፈለገው አቅጣጫ በራሱ አሰራር እያሽከረከረ ሊነዳው ይችላል። ምክንያቱም እምነት የሌለው ሰው መንፈሳዊ ሕይወቱ ሽባ ነውና። ዲያብሎስን መቃወም የሚቻለው በእምነት ነው። “በመጠን ኑሩ ንቁም ባላጋራችሁ ዲያብሎስ የሚውጠውን ፈልጎ እንደሚያገሳ አንበሳ ይዞራልና በዓለም ያሉት ወንድሞቻችሁ ያን መከራ በሙሉ እንዲቀበሉ እያወቃችሁ በእምነት ጸንታችሁ ተቃወሙት።” [1ኛ ጴጥ. 5÷8-9]። እዚህ ጋ ማስተዋል የሚገባን ነገር እምነታችን የተተከለበትና የቆመበትን ወይም እምነታችን ማንን መሠረቱ እንዳደረገ ነው። ዲያብሎስን ልንቃወም የምንችልበት እምነት ማለት በክርስቶስ የሱስ ላይ የተመሠረተና የጸና ነው። እንዲህ ተብሎ እንደተጻፈ፦ “… ሥርዓታችሁንም በክርስቶስም ያለውን የእምነታችሁንም ጽናት እያየሁ ደስ ይለኛል።” [ቆላ. 2÷5]። የዚህች ጽሑፍ አንባቢያን ቅዱሳን ወንድሞችና እህቶች ሆይ በስጋ አይን ሳይሆን በእምነት አይን እንኑር! በእምነት አይን ማለት የማይታየውን ያየንበት አይን እምነት ነው። ሊመራን የሚገባ እምነት እንጂ የስጋ አይናችን መሆን የለበትም። በስጋ እይታ ስንመራ ነገሮች ሁሉ የሚከብዱ ይሆናሉ፤ በእምነት ስንመራ ግን ለሰው ልጆች ከባድ የሆኑ ነገሮች ሁሉ ለእኛ ቀላል ይሆናሉ። እምነት የእግዚአብሔርን እጅና ክንድ የሚያንቀሳቅስ ስለሆነ በሕይወታችንና በመንገዳችን ሁሉ የአምላካችንን ድንቅና ተዓምራት እያየን እንኖራለን። በእምነት ስንኖር የጊዜው [የአሁኑ] መከራችን ቀላል ይሆናል እንዲህ ተብሎ እንደተጻፈ፦ “የማይታየውን እንጂ የሚታየውን ባንመለከት ቀላል የሆነ የጊዜው መከራችን የክብርን የዘላለም ብዛት ከሁሉ መጠን ይልቅ ያደርግልናልና የሚታየው የጊዜው ነውና የማይታየው ግን የዘላለም ነው።” [2ኛ ቆሮ. 4÷17-18]። በእምነት ስትኖር የጊዜው መከራ ቀላል ይሆናል። አንተ ግን በመከራ ላይ ከባድ ወይም ተጽዕኖ ፈጣሪ ትሆናለህ። ያለ እምነት ስትኖር ደግሞ የጊዜው መከራ በአንተ ላይ ከባድ ይሆናል፤ አንተ ግን በመከራ የምትሸነፍ ቀላል ትሆናለህ። እግዚአብሔርን ደስ ማሰኘት የምንችለው በእምነት ነው በዕብ. 11÷6-7 “ያለ እምነትም ደስ ማሰኘት አይቻልም ወደ እግዚአብሔር የሚደርስ እግዚአብሔር እንዳለ ለሚፈልጉም ዋጋ እንዲሰጥ ያምን ዘንድ ያስፈልገዋልና ኖኅ ገና ስለማይታየው ነገር ተረድቶ እግዚአብሔርን እየፈራ ቤተሰዎቹን ለማዳን መርከብን በእምነት አዘጋጀ በዚህም ዓለምን ኮነነ በእምነትም የሚገኘውን ጽድቅ ወራሽ ሆነ።” ይላልና። ይቀጥላል ............. @apostolic_songs

ቢሾፕ ብርሃኑ ድጅቆ | የወላይታ ሰበካ ኃላፊ #part2 2. የመንፈስ ቅዱስ ሙላት ዝግጅት በዚህ በመጨረሻው ዘመን በእውነተኛይቱ ቤተክርስቲያን ውስጥ ያለን ሁላችንም ተነጥቀን ወደ ሰማይ ለመሄድ በመንፈስ ቅዱስ በኃይል መሞላት ይጠበቅብናል፤ ይህ ካልሆነ የዓለም ኃይል በእኛ ላይ እያየለ ሄዶ ከንጥቀት ወደ ኋላ ቀርተን ለዓለምና ለሰይጣን መጫወቻ እንዳንሆን በጊዜ ወደ መንፈስ ቅዱስ ፍለጋ እና ጥማት ውስጥ መግባት እና መሞላት ያስፈልጋል። በሕዝ. 47፥3 ላይ “ሰውዬውም ገመዱን በእጁ ይዞ ወደ ምሥራቅ ወጣ አንድ ሺህም ክንድ ለካ፥ በውኃውም ውስጥ አሻገረኝ፥ ውኃም እስከ ቍርጭምጭሚት ደረሰ።” ስለዚህ ከቁርጭምጭሚት የጀመረ የመንፈስ ቅዱስ ሙላት እስከ ወገብ ብቻ ደርሶ ካበቃ ተሻግረን በሥጋ እኛ ወደምንፈልግበት ልንሄድ እንችላለን። እስከ ፍጹም ሙላት ደርሰን ስንሞላ ግን በእኛ ክፉ ፈቃድ አቋርጠን ማለፍ ስለማንችል መንፈሱ ወደሚፈልግበት ቦታና ስፍራ እየመራ ይወስደናል። ስለዚህ ምን ጊዜም የመንፈስ ቅዱስ ጥማትና ሙላት በእኛ ሕይወት እያየለ እንዲሄድ የእግዚአብሔር ፈቃድ ነው። በዋናነት ይህች የክርስቶስ አካል የምትሆን እውነተኛይቱ ቤተክርስቲያን ከመነጠቋ በፊት የማጠቃለያውን ዘመን የ11ኛውን ሰዓት ሥራ በመስራት እግዚአብሔር ለቤተክርስቲያን የገባላትን የተስፋ ቃሎች ሁሉ እንድትወርስ ከፍ ያለ የመንፈስ ቅዱስ ኃይል ወርዶ በዘካ.10፥1 ላይ እንደተፃፈው “በኋለኛው ዝናብ ጊዜ ከእግዚአብሔር ዘንድ ዝናቡን ለምኑ፤ እግዚአብሔር መብረቅ ያደርጋል፤” ስለሚል ወደ መንፈስ ቅዱስ መብረቅ ለመሸጋገር በየአጥቢያውና በየቦታው ብርቱ የሆነ የመንፈስ ቅዱስ ጩኸትና ልመና ውስጥ መግባት ያስፈልጋል። አሁን ባለንበት ዝናብ ውስጥ ዝናብ እየለመንንና እየፈለግን እግዚአብሔር ከዝናብ ወደ መብረቅ ያሸጋግራል፤ የዚህች ቤተክርስቲያን ማጠቃለያዋ ታላቅ የሆነ የመንፈሳዊ እንቅስቃሴ እንደሆነ በዘካ 4፥7 “ታላቅ ተራራ ሆይ፥ አንተ ምንድር ነህ? በዘሩባቤል ፊት ደልዳላ ሜዳ ትሆናለህ፤ ሰዎችም፦ ሞገስ፥ ሞገስ ይሁንለት ብለው እየጮኹ እርሱ መደምደሚያውን ድንጋይ ያወጣል…” የሚል የጸና ታላቅ የተስፋ ቃል ስላለን ለዚህ ሥራ ሁሉ የኃያሉ አምላክ መንፈስ በኃይል መውረድ ምንም አማራጭ የሌለው ጉዳይ ነው። ስለዚህ ፊታችን ወደ መንፈስ ቅዱስ ጩኸት ዳግም ማዞር ያስፈልገናል። ሐዋ. 1፥8“መንፈስ ቅዱስ በእናንተ ላይ በወረደ ጊዜ ኃይልን ትቀበላላችሁ፥” ይላል። (ዮሐ.3፥34፣ ኤፌ. 3፥16-17) 3. በአገልግሎታችን መትጋት ሉቃስ 12፥37 “ሲተጉ የሚያገኛቸው እነዚያ ባሪያዎች ብፁአን ናቸው፤” ማቴ 25፥14 “ወደ ሌላ አገር የሚሄድ ሰው ባሮቹን ጠርቶ …ለእያንዳንዱ እንደአቅሙ…” ይላል። ወደ እግዚአብሔር ቤት ተጠርተን የመጣን ሁላችንም ባዶ አይደለንምና እንደየፀጋችንና እንደየአቅማችን የተሰጠን የእግዚአብሔር ፀጋ ፍሬ እንዲያፈራ በፍጹም ትጋት፣ ታማኝነት፣ ቅንነትና ፍቅር በእግዚአብሔር እርሻ ላይ ተሰማርተን እየሰራን እንድንገኝ የእርሱ ፈቃድ ነው። ስንሰራ ግን የዘመኑን ማለቅና የሰዓቱን መድረስ እያየንና እተገነዘብን መሆን አለበት። በ11ኛው ሰዓት ላይ ወደ ጌታ እርሻ የገቡት እንዴት ያለ ትጋትና ታማኝነት ቢያሳዩ ነው በ3 ሰዓትና በ4 ሰዓት የተጠሩትን በመቅደም የተከፈላቸው። እኛም ዛሬ በ11ኛው ሰዓት የተጠራን የእግዚአብሔርን ሥራ በፍጹም ትጋትና ቅንነት ብንሰራ ይሳካልናል። ምክንያቱም ለእግዚአብሔር በ11ኛው ሰዓት ላይም ታላቅና መደምደሚያ ስራ አለው። በአንጻሩ በኤር. 48፥10 “የእግዚአብሔርን ሥራ በቸልታ የሚያደግ ርጉም ይሁን፥” ስለሚል ከርግማን ለማምለጥ የእግዚአብሔርን ስራ በትኩረትና በአክብሮት እንድንሰራ ስለሚያስፈልግ ነው። እግዚአብሔር በእኛ ላይ ያስቀመጠውን ፀጋ ቸል ሳንልና ሳንቀብር “አንተ በጎና ታማኝ ባሪያ በጥቂቱ ታምነሃል በብዙ እሾምሃለሁ ወደ ጌታህ ደስታ ግባ” እንድንባል በራዕይና በሸክም እየሠራን የእርሱን መምጣት መጠበቅ እንጂ ቀብረን እርሱን መጠበቅ ወደ ጨለማ እንድንገባ ስለሚያደርግ ተጠንቅቀንና ነቅተን ለሰዓቲቱና ለቀኒቱ እንድንዘጋጅ የእግዚአብሔር ቃል በጥብቅ ያስተምረናል። ኢየሱስ ይርዳን! 4. በፍጹም ፍቅር ተሳስረን በአካሉ ውስጥ በመኖር መዘጋጀት ተነጥቀን ወደ ሰማይ መሄድ የምንችለው በፍቅር ተሳስረን በአካሉ ውስጥ ሆነን የቤተክርስቲያንን የመንፈስ አንድነት በመጠበቅና በማክበር በመኖር ነው። ኢያሱ ረአብን ያንን ቀይ ፈትል አድርጋ እንድትድን ሲያስጠነቅቃት “ከቤትሽም ደጅ ወደ ሜዳ የሚወጣ ደሙ በራሱ ላይ ይሆናል፥ እኛም ንጹሐን እንሆናለን፤ ነገር ግን ከአንቺ ጋር በቤቱ ውስጥ ያለውን አንድ እጅ ቢነካው ደሙ በእኛ ራስ ላይ ይሆናል።” (ኢያሱ 2፥19) አለ። ዛሬ ላለን ሰዎች ስለ ቤተክርስቲያንና በአካሉ ውስጥ ስለመኖር ትልቅ ትምህርትን ይሰጠናል። ይህች ቤተክርስቲያን በመጨረሻው ዘመን ሰማይና ምድር ሲቃጠል ለምህረት ኢየሱስ የሰራት ቤት ስለሆነች ከቁጣው ለማምለጥ በአካሉ ውስጥ በፍቅር ተሳስረን ለመኖር ጌታ ኢየሱስ ክርስቶስ ኃይልን ይስጠን። የመጨረሻውን ዘመን ቤተክርስቲያን ከሚያጋጥማት ፈተናዎች አንዱና ዋነኛው የፍቅር መቀዝቀዝ (ማቴ. 24፥12 ፣ ራዕይ 2፥4፣ 1ኛ ቆሮ. 13፥2) በመሆኑ ከመቼውም ጊዜ በላይ በአንድ ልብና በአንድ መንፈስ በፍጹም ፍቅር እርስ በርሳችን ተያይዘን በአካሉ ውስጥ በመገኘት ለመነጠቅ መዘጋጀት አለብን። ኢየሱስ ይርዳን። በአጠቃላይ በዘመን ፍጻሜ ላይ የምንገኝ ሁሉ በራዕይ 22፥14ላይ እንደተጻፈው “ወደ ሕይወት ዛፍ ለመድረስ ሥልጣን እንዲኖራቸው በደጆችዋም ወደ ከተማይቱም እንዲገቡ ልብሳቸውን የሚያጥቡ ብፁዓን ናቸው።” ስለሚል ሕይወታችንን ቆም ብለን በማየት በቀሩት ጊዜያት ለቀኒቱና ለሰዓቲቱ እንድንዘጋጅ ጌታ ኢየሱስ ክርስቶስ ይርዳን እላለሁ። @apostolic_songs

ቢሾፕ ብርሃኑ ድጅቆ | የወላይታ ሰበካ ኃላፊ #part1 በእግዚአብሔር ፈቃድና አሠራር በአንዲት የክርስቶስ አካል በምትሆን፤ በእውነተኛይቱ ቤተክርስቲያን በክርስቶስ ደም ቀርበን በውስጧ መኖራችን ከእርሱ የተነሳ ነውና ለእርሱ ከዘለአለም እስከ ዘለዓለም ክብርና ምስጋና ይሁንለት። ሁሉ ከእርሱና በእርሱ ለእርሱም የሆነለት አንድ አምላክ ኢየሱስ ክርስቶስ የመረጠን ለቁጣ ሳይሆን ለመዳን ስለሆነ በዚህ በመጨረሻው ዘመን ላይ የምንገኝ ሁላችንም የእግዚአብሔር ፈቃድ በዚህ ሰዓት ምን እንደሆነ አውቀን እና ተረድተን በእግዚአብሔር ቤት መኖር በእኛ ውስጥ ትልቁን ቦታ ሊይዝ የሚያስፈልገው ጉዳይ ነው። ለምን ቢባል ከዚህ በታች በዝርዝር የተጠቀሱትን የእግዚአብሔር ቃል  ክፍሎችን ልብ ብለን ስንመለከት በመጨረሻው ሰዓት የሚቀርና የሚወሰድ፣ የሚነጠቅና የማይነጠቅ፣ የሚገባና የማይገባ፣ የሚመረጥና የማይመረጥ እንዳለ ስለሚያሳይ ይህ ዘመን የመጨረሻ ሰዓት መሆኑን አውቀን መንቃት እጅግ በጣም ወሳኝ ጉዳይ በመሆኑ ነው ። 2ኛ ጴጥ. 1፥10 “ስለዚህ፥ ወንድሞች ሆይ፥ መጠራታችሁንና መመረጣችሁን ታጸኑ ዘንድ ከፊት ይልቅ ትጉ፤” ይላልና በመጨረሻው ሰዓት ከተጠሩት መካከል ወደ ምርጫ ውስጥ ለመግባት መትጋት እንዳለብን ይህ የእግዚአብሔር ቃል ክፍል ያሳየናል። መጠራትም አለ፤ ከተጠራንም በኋላ መመረጥም አለ። ማቴ. 13፥47 “ደግሞ መንግሥተ ሰማያት ወደ ባሕር የተጣለች ከሁሉም ዓይነት የሰበሰበች መረብን ትመስላለች፤” በማለት መልካምና ክፉም በአንድ መረብ ውስጥ እንደተሰበሰበና በመጨረሻ መልካሙን ወደ ዕቃው ክፉን ደግሞ ወደ ውጭ እንደተጣለ ያሳየናል። ማቴ. 20፥16፦ “. . .የተጠሩ ብዙዎች የተመረጡ ግን ጥቂቶች ናቸው” ይላል። ከተጠሩት መካከል ጥቂቶች ወደ ምርጫው ውስጥ እንደሚገቡና የተቀሩት ደግሞ ወደ ሀዘን እና ጭንቀት ውስጥ እንደሚገቡ የእግዚአብሔር ቃል በግልጽ ያስተምረናል። ማቴ. 25፥1-2 “በዚያን ጊዜ መንግሥተ ሰማያት መብራታቸውን ይዘው ሙሽራውን ሊቀበሉ የወጡ አሥር ቆነጃጅትን ትመስላለች። ከእነርሱም አምስቱ ሰነፎች አምስቱም ልባሞች ነበሩ።” ይላልና በጥሪ ከመጡት መካከል በመንፈስ ቅዱስ ሙላት ምክንያት መብራታቸው ጠፍቶ የቀሩና ሕያው ሆነው የተመረጡ እንዳሉ ያሳየናል። ስለዚህ የጌታችን የኢየሱስ ክርስቶስ ዳግም ምጽአት ወደ እኛ እጅግ በጣም የተቃረበበት ምልክቶች ዛሬ በግልጽ ስለሚታዩና እየሆኑ ያሉት ነገሮች ለምሳሌ ቢጠቀስ፦ የሃሳዊ መሲህ አሰራርና ፕሮግራሞች በየቦታው ብቅ ብቅ ብሎ መታየት (ራዕይ 13፥16-18)፣ የሙሽሪት እንቅልፍ (ማቴ. 25፥1) ፣ የእርስ በእርሳችን ፍቅር መቀዝቀዝ (ማቴ.24፥12)፣ በየቦታው የምንሰማቸውና የምናያቸው ነገሮች ማለትም ሕዝብ በሕዝብ ላይ መነሳት፣ የጦርነትና የሁከት ወሬዎች፣ በየስፍራው የሚሰሙ የምድር መናወጦች፣ የእርስ በርስ እልቂቶችና ፍጅቶች ፣ ድርቅና ርሃብ እንዲሁም ሌሎችም ምልክቶች በዓለማችን ላይ በግልፅ እየታዩ ስለሚገኙ በ2ኛ ጴጥ. 3፥11-12 “ይህ ሁሉ እንዲህ የሚቀልጥ ከሆነ፥ የእግዚአብሔርን ቀን መምጣት እየጠበቃችሁና እያስቸኰላችሁ፥ በቅዱስ ኑሮ እግዚአብሔርንም በመምሰል እንደ ምን ልትሆኑ ይገባችኋል?” ስለሚለን በዚህ በዘመን ፍጻሜ በ11ኛው ሰዓት ላይ የምንገኝ የዚህ ዘመን አገልጋዮችና ምዕመናን ስለሁኔታዎችና ስለሚሆኑ ነገሮች እንዲሁም ፍጻሜያችን የሰመረ አንዲሆን በሁሉም ነገር የእግዚአብሔር ቃል እንደሚያዝዘን የፍጻሜ ሰዎች ሆንን መኖር፣ መዘጋጀትና መጠበቅ ይገባናል። በመጠራታችን ብቻ ተጽናንተን መዘናጋት ውስጥ ገብተን ቀኒቱንና ሰዓቲቱን አውቀን መንቃት ሲገባን ሳንነቃ ቀርተን ተስፋችን እንዳያመልጠን ከመናገር አልፈን ወደ ተግባር እንቅስቃሴ ውስጥ እንድንገባ ጌታ ኢየሱስ ክርስቶስ ይርዳን። በተጨማሪም በ1ኛ ተሰ. 5፥1-5 “ወንድሞች ሆይ፥ ስለ ዘመናትና ስለ ወራት ምንም እንዲጻፍላችሁ አያስፈልጋችሁም፤ የጌታ ቀን፥ ሌባ በሌሊት እንደሚመጣ፥ እንዲሁ ይመጣ ዘንድ ራሳችሁ አጥብቃችሁ አውቃችኋልና። …እናንተ ግን፥ ወንድሞች ሆይ፥ ቀኑ እንደ ሌባ ይደርስባችሁ ዘንድ በጨለማ አይደላችሁም፥ ሁላችሁ የብርሃን ልጆች የቀንም ልጆች ናችሁና።” ስለሚል ከዛሬ 1950 ዓመት በፊት ሐዋርያው ጳውሎስ የዘመኑን ማለቅና መዘጋጀት እንዳለብን አስረድቷል። እኛ በፍጻሜ ጫፍ ላይ የምንገኝ የእግዚአብሔር ቤት ሰዎች የተሰጠንን ጊዜ እንደትልቅ ፀጋ በመቀበል ቢያንስ ከዚህ በታች በዝርዝር በሚገኙ ነጥቦች የዘመኑን ማለቅ ተገንዝበን የብርሃን ልጆች እንደመሆናችን መጠን መዘጋጀት ይጠበቅብናል። በራዕይ 3፥17 “…ሀብታም ነኝና ባለጠጋ ሆኜአለሁ አንድም ስንኳ አያስፈልገኝም የምትል ስለ ሆንህ፥ ጐስቋላና ምስኪንም ድሀም ዕውርም የተራቆትህም መሆንህን ስለማታውቅ፥” ስለሚል ሁልጊዜ በመንፈስ ድሆች ሆነን እንድንዘጋጅ ጌታ ኢየሱስ ይርዳን። 1. የቅድስና ዝግጅት በዚህ በመጨረሻው ዘመን ላይ የምንገኝ ዓለምን ሳንመስልና ሳንከተል ፣ የማንም ወገን ሳንሆን በዕብ. 12፥1-2“….የእምነታችንንም ራስና ፈጻሚውን ኢየሱስን ተመልክተን፥ በፊታችን ያለውን ሩጫ በትዕግሥት እንሩጥ፤” በዕብ. 6፥11ላይ ደግሞ “… በእምነትና በትዕግሥትም የተስፋውን ቃል የሚወርሱትን እንድትመስሉ…” ስለሚል ኢየሱስንና የእምነት አባቶታችንን ተመልክተን፤ እርሱንና ቤተክርስቲያንን በሚወክል ሕይወትና መልክ፤ የኢየሱስ በእኛ መካከል መገኘት እየተሰማን መኖር በዚህ በመጨረሻው ሰዓት ላይ ተገቢ ነው። በቅድስና የመዘጋጀት ጉዳይ ሲነሳ በ2ኛ ቆሮ. 6፥14 -18 ላይ እንደተጻፈው ከዓለም መንፈስ፣ ጥምረትና አሠራር ጋር ተቀላቅለንና ተደባልቀን ከምንኖርበት ሕያወት ተለይተን እግዚአብሔር በእኛ መካከል ወደ ሚገኝበትና ወደ ሚከብርበት የቅድስና ሕይወት መሸጋገር አስፈላጊ ጉዳይ ነው። ቃሉ ‘‘ከመካከላቸው ውጡና የተለያችሁ ሁኑ!’’ ይለናል፤ ቅድስና መለየትንም ጭምር የሚያጠቃልል ነውና። ተለይተን ካልወጣን ኢየሱስ በመካከላችን እንዴት ይኖራል? የእግዚአብሔር ቃል በ2ኛ ቆሮ. 7፥1 “በእግዚአብሔር ፍርሃት ቅድስናን ፍጹም እያደረግን ሥጋንና መንፈስን ከሚያረክስ ሁሉ ራሳችንን እናንጻ።” ስለሚለን ፍጹም ዓለማዊ ከሆኑና የባህል ካባ ከለበሱና በዓለም ላይ እየተከበሩ ካሉ፤ ኢየሱስን እጅግ ከሚያሳዝኑና ክብሩንም ከሚጋፉ ጣኦታትና የአጋንንት አሰራሮች ራሳችንን መለየት ያስፈልገናል። በተጨማሪም የክርስቶስ አካል በምትሆን ቤተክርስቲያን ውስጥ ያለን ሁላችን ሕያው ለሆነው ለእግዚአብሔር ቃል በመታዘዝ፣ የቤተክርስቲያንን ድምጽ በመስማት፣ የቤተክርስቲያንን የመንፈስ አንድነት በመጠበቅ በዘር፣ በጎሳ፣ በቀለም እና በሌሎችም ነገሮች ምንም አይነት ልዩነት ሳይኖር እርስ በርሳችን በፍጹም ፍቅር ተሳስረንና ተያይዘን በክርስቶስ አካል ውስጥ እንድንኖር የእግዚአብሔር ቃል ያዝዘናል። መጽሐፍ ቅዱስ በዕብ. 12፥14 “…ትቀደሱም ዘንድ ፈልጉ፥ ያለ እርሱ ጌታን ሊያይ የሚችል የለምና።” ስለሚለን መንፈሳችንና ሥጋችንን ከሚያረክሱ ከምናያቸውና ከምንሰማቸው ነገሮች ሁሉ ራሳችንን ለይተን ለኢየሱስ ክርስቶስ መቀደስ አለብን። ለምሳሌ በማህበራዊ ሚዲያ [Social Media] የሚለቀቁ ማየትና መስማት የማይገቡንን ነገሮችን ሁሉ ያጠቃልላል። በዘጸ. 39፥30 እንደተጻፈው የአክሊል ምልከታችን “ቅድስና ለእግዚአብሔር” ይሁን! @apostolic_songs

ታላቅ ሽብር ቄስ ኤልያስ ሽባባው | የአዲስ አበባ አስኮ ጽዮን አጥቢያ መጋቢ #Part2 ዳግም የመምጣቱን ቀን ለጌታ ለራሱ በቅዱሳኑ የሚከብርበት እና የሚገረምበት ቀን ነው። በአንጻሩ ይህ የጌታ መገለጥ የበቀል ወይም የቅጣት የሚሆንባቸው እግዚአብሔርን በማያውቁ እና ለወንጌል በማይታዘዙ ላይ ነው። በዚያ ቀን ከጌታ ፊት ከኃይሉ ክብር ርቀው በዘላለም ጥፋት ይቀጣሉና። ስለዚህ እኛ በእርሱ ዘንድ ልንከብር እርሱ በእኛ ዘንድ ሊከብር የምንጠባበቀው ቀን ስለሆነ ማራናታ (ጌታ ኢየሱስ ሆይ ና!) ሊያስብለን እንጂ ሊያስፈራራን አይገባም። ዛሬ (ዘወትር) የሚያስፈራ ኑሮ እየኖርን ወደፊት እንዳንፈራ ተመክረናል ወደፊት እንዳንገደል ዛሬ (ዘወትር) ስለ አንተ እንገደላለን እንደሚታረዱ በጎች ተቆጠርን ዛሬ የምንሞት መስለናል ነገር ግን ሕያዋን ነን። ከላይ እንደተመለከትነው ከጌታ መምጣት ጋር ተያይዞ እንደ ዕውር እስኪሄዱ ድረስ የሚጨናነቁበት፣ “ጨለማ እና ጭጋግ፣ መፈታት እና መሸበር ፣ መዓት እና የመፍረስ ቀን፣ የምጥ ጣር እና ታላቅ ሽብር፣ ፈጥኖ የሚጨርስ እና የሚበላ እሳት፣ መራራ ለቅሶ እና የእግዚአብሔር ቁጣ፣ በቀል፣ ቅጣት እና የዘላለም ፍርድ ቀን ይሆናል።” የተባለው ለማን መሆኑን አለማወቅ ስለጌታ መምጣት የሚኖረንን ዕይታ ያዛባዋል። በእውነት ይህ ሁሉ አስፈሪ ነገር ውስጥ ማራናታ ወይም ጌታ ኢየሱስ ሆይ ና ማለት እንዴት ይቻለናል። ማራናታ ለማለት የተባረከውን ተስፋ የምንጠባበቅ ኢየሱስ ሲገለጥ ምንቀበለውን ጸጋ የምንናፍቅ በምድር ስንኖር በስደት እንደምንኖር ታምነን ከሰማይ የሚሆን መኖሪያን የምንናፍቅ ልጆች ልንሆን የምንችለው እርሱ ከሰማይ ሲገለጥ የሚጠብቀንን ክብር በማወቃችን ነው። ለእኛ ለቅዱሳን ኢየሱስ ክርስቶስ ቢገለጥ የምናገኘው (የምንቀበለው) ክብር ይናፍቀናል። ነገር ግን፥ ወንድሞች ሆይ፥ ስለ ጌታችን ስለ ኢየሱስ ክርስቶስ መምጣትና ወደ እርሱ ስለ መሰብሰባችን፥ በመንፈስ ወይም በቃል ወይም ከእኛ እንደሚመጣ በመልእክት፦ የጌታ ቀን ደርሶአል ብላችሁ፥ ከአእምሮአችሁ ቶሎ እንዳትናወጡ እንዳትደነግጡም እንለምናችኋለን። እንደሚል ቃሉ የጌታ ቀን ደርሶአል ብሎ መናወጥ ትክክል አይደለም። ዛሬ ዛሬ ብዙ ክርስቲያኖች በተበተኑበት ስፍራ ከሚሆኑ የመምጫው ምልክቶች አንጻር ይናወጣሉ ብዙ ሰባኪዎች በጌታ መምጣት ህዝቡን ማናወጥ ማስፈራራትን ይወዳሉ። በእርግጥ ቅዱሳንን የሚያስፈራ እና የሚያስደነግጥ የሰራዊት ጌታ እግዚአብሔር ብቻ ሊሆን ይገባዋል። ነገር ግን በአውሬው እና በስሙ ቁጥር በመጨረሻ ዘመን ክስተቶች እና ምልክቶች መገለጥ (መታየትን) የሚያስደነግጠው ኃጢአተኞችን እና ኃጢአትን እተለማመዱ ያሉትን ሊሆን ይገባል። የዚህ ዓለም ስርአት መቀየር እና ራሱን ለአውሬው (ለሃሳዊ መሲህ) ለማዘጋጀት በሚደረገው እንቅስቃሴ ምክንያት ትጋት ጸሎት ጥንቃቄ መንገድን ማጥበቅ የሚሉ ትምህርቶች ከመስጠት ጋር በደስታ ወደ ሽልማቱ የሚቸኩል አሸናፊ ትውልድን ማየት ያስፈልጋል። ስብከታችን ከማሸበር ይልቅ የእግዚአብሔርን ሕዝብ ለማንቃት እና በጽድቅ እንዲበረታ ለማሳሳብ ቢሆን ይመረጣል። @apostolic_songs #via https://acieth.org/

በስፍራው ሁሉ ላላችሁ የቤተክርስቲያን ልጆች ሰላም ለእናንተ ይሁን! እንኳን ለ 2016 ዓ.ም አዲስ አመት በሰላም አደረሳችሁ! አዲሱን አመት በልባችን ለጌታ እየተቀኘንና እየዘመርን ለመጀመር የኢትዮጵያ ሐዋርያዊት ቤተክርስቲያን ኦዲዮቪዥዋልና ስነ-ጽሑፍ ክፍል በዘማሪት ዮርዳኖስ መለስ የተዘጋጀውን አዲስ የዝማሬ ሰንዱቅ (Album) ለመታነጽና ለበረከት እንዲሆንላችሁ ወደ እናንተ ሲያደርስ በታላቅ ደስታ ነው። ይህንን አልበም አዘጋጅታ ለእግዚአብሔር ክብርና ለቤተክርስቲያን መታነጽ ያበረከተችውን እህት ዮርዳኖስንና በዝግጅቱ የተሳተፉትን ሁሉ እግዚአብሔር በማያልቀው በረከቱ እንዲባርካቸው እየጸለይን ጌታችን ቢፈቅድ ብንኖር አልበሙ በጥቂት ቀናት ውስጥ እጃችሁ ባለው ስልክ ላይ በሚገኘው የአፖስቶሊክ ሶንግስ መተግበሪያ ላይ ዝግጁ ይሆናል። የኦዲዮ ቪዥዋልና ስነ-ጽሑፍ ክፍል ነሐሴ 2015 ዓ.ም

ታላቅ ሽብር ቄስ ኤልያስ ሽባባው | የአዲስ አበባ አስኮ ጽዮን አጥቢያ መጋቢ #Part1 ስለመጨረሻው ዘመን ወይንም ስለ ጌታ ዳግም መመለስ ለክርስቲያኖች በመጽሐፍ ቅዱስ የተላለፉ መልእክቶች ምንድን ናቸው? ክርስቲያኖች ስለመጨረሻው ዘመን ሲነሳ በእምነት እንደሌሉት አህዛብ ለምን ይናወጣሉ፣ ይጨነቃሉ፣ ይረበሻሉ? በሃገራችን ለረጅም ዘመን ሲወራረስ የመጣ የስምንተኛው ሺ ትርክት እና ፍካሬ ተጽዕኖ በሚመስል መልኩ ከጌታችን ኢየሱስ መገለጥ ጋር አብሮ ታላቅ ሽብር ይነዛል። ከቅርብ ጊዜያት ወዲህ ፍጹም ዓለማዊ እና ፍጥረታዊ በሆኑ ሚዲያዎች እና የልብወለድ ስራዎችን በመከታተል ቅዱሳን አብረው ከዓለም ጋር ሲናወጡ ማየት የተለመደ ሆኗል። የዚህ ጽሁፍ አቅራቢ በብዙ ቅዱሳን ወገኖች የተነበበ ባለሁለት መደብል ልቦለድ መጽሐፍ ሃብት ማካበቻ መሆኑን ምስጢሩን ከሚያውቁ ቅርብ ሰዎች ጭምር ማረጋገጫ በመጠየቅ ለማጣራት ጥሯል። በ Y2K እና በ2012 በሚል በተደረጉ ታላቅ ሽብር ብዙ ክርስቲያኖች ዘንድ ፍርሃት እና አለመረጋጋት ተፈጥሮ እንደነበር የቅርብ ጊዜ ትዝታ ነው። የእነዚህ እንቅስቃሴዎች እና በተለያየ ዘመን የተነሱ የምጽአት ቀን ናፋቂዎች ባስነሱት ነውጥ ብዙ ትርምስ የንብረት ኪሳራ እና አለመረጋጋት እንዲሁም ትልልቅ ወንጀል ሲፈጸም የታየ ሲሆን ለአዳዲስ የእምነት እንቅስቃሴ እና ኑፋቄ ሁሉ መነሻ ነበር። ሐዋርያው ጳውሎስ ስለ “ጌታ መምጣት” በተሳሳተ መላምት ለተናወጡት የተሰሎንቄ ሰዎች “ነገር ግን፥ ወንድሞች ሆይ፥ ስለ ጌታችን ስለ ኢየሱስ ክርስቶስ መምጣትና ወደ እርሱ ስለ መሰብሰባችን፥ በመንፈስ ወይም በቃል ወይም ከእኛ እንደሚመጣ በመልእክት፦ የጌታ ቀን ደርሶአል ብላችሁ፥ ከአእምሮአችሁ ቶሎ እንዳትናወጡ እንዳትደነግጡም እንለምናችኋለን።” 2ኛ ተሰሎንቄ 2፥1-2 በማለት አጓጉል ውሳኔ ከሚከተላቸው መላምቶች እንዲርቁ አስገንዝቧል። በ20ኛው ክፍለ ዘመን በ1914 ዓ.ም የአንዳንድ የእምነት ተቋማት የፈጸሙት ነገር ብዙዎችን መጽሐፍ ቅዱስን እንዲጠሉ እምነትን እንዲቃወሙ እና ሃይማኖት የለሽ እንዲሆኑ እና አዳዲስ ኑፋቄ እንዲፈጥሩ ምክንያት ነበር። በተለይ ቃሉን እና ኃይሉን በካዱ በመናገራቸው ምንም ጸጋን በማያካፍሉ ሰዎች አቅም እና ብርታትን የማያካፍሉ የሽብር ሰብከቶች ምክንያት ዘባችነት (በመዘበት የሚመጡ) የተስፋውን ቃል የሚያቃልሉ የመዝናኛ እና የቢዝነስ ማድመቂያ የመሰሉ ትምህርቶች እየተሰጡ ይገኛሉ:: ቅዱሳን እነዚህን በማንበብ እና በመስማት ምንም አያተርፉም። “ከአዳም ጀምሮ ሰባተኛ የሆነ ሄኖክ፦ እነሆ፥ ጌታ በሁሉ ላይ እንዲፈርድ፥ በኃጢአተኝነትም ስላደረጉት ስለ ኃጢአተኛ ሥራቸው ሁሉ ዓመፀኞችም ኃጢአተኞች በእርሱ ላይ ስለ ተናገሩ ስለ ጭከና ነገር ሁሉ ኃጢአተኞችን ሁሉ እንዲወቅስ ከአእላፋት ቅዱሳኑ ጋር መጥቶአል ብሎ ለእነዚህ ደግሞ ትንቢት ተናገረ። እነዚህ እንደ ምኞታቸው እየሄዱ የሚያንጎራጉሩና ስለ ዕድላቸው የሚያጕረመርሙ ናቸው፥ እንዲረባቸውም ለሰው ፊት እያደሉ አፋቸው ከመጠን ይልቅ ታላቅ ቃል ይናገራል። እናንተ ግን፥ ወዳጆች ሆይ፥ በጌታችን በኢየሱስ ክርስቶስ ሐዋርያት ቀድሞ የተነገረውን ቃል አስቡ፤ እነርሱ፦ በመጨረሻው ዘመን በኃጢአተኝነት እንደ ገዛ ምኞታቸው እየሄዱ ዘባቾች ይሆናሉ ብለዋችኋልና። እነዚህ የሚያለያዩ ሥጋውያንም የሆኑ መንፈስም የሌላቸው ሰዎች ናቸው።” ይሁዳ ቁጥር 14-19 እንደሚል ከጥንት ጀምሮ የጌታ መምጣት ከፍርድ ጋር ተያይዞ የሚነገር ድንቅ ትምህርት እንጂ የዘባቾች የፕሮግራም ማጣፈጫ አይደለም። ስለዚህ ስለመጨረሻው ዘመን በጌታችን በኢየሱስ ክርስቶስ ሐዋርያት (በቤተክርስቲያን) የተነገረን ነገር በቂ ነው። በተመሳሳይ የዓመጽ ምሰጢር አሁን እንደሚሰራ ይታወቃል። ይህም ሊመጣ ላለው ክህደት ብዙ ዝግጅት እና መንገድ ጥርጊያ ሊኖር እንደሚችል በቅዱሳኑ ዘንድ የሚታወቅ ሆኖ እያለ አስቀድሞ ሊሆን የሚገባው ነገር ባልተነሳበት በአእምሮ መናወጥ ውስጥ የሚገቡ ክርስቲያኖች በብዙ ሲታወኩ ይታያሉ። ከላይ እንደተመለከትነው ሐዋርያው ጳውሎስ የተሰሎንቄን ቅዱሳን የጌታን መገለጥ እና ወደ እርሱ ስለመሰብሰባችን በቃል በመንፈስ እና በመልዕክት በማስተማሩ ብዙዎች የዕለት ተዕለት እንቅስቃሴ ለማድረግ አስኪቸገሩ ስራ ለመስራት እስኪያቅታቸው ተሸበሩ። ይህን ለማስተካከል  በሁለተኛው መልዕከቱ እንዲረጋጉ እና እንዳይናወጡ መከራቸው። ዛሬም በግልጽ የሚታይ የአውሬው እና የመንግስቱ እንቅስቃሴዎች በአለማችን በልዩ ልዩ ሁኔታ ይ ስተዋላሉ በዚህ ዘመን እነዚህን ነገሮች ስንመለከት የቅዱሳን ምላሽ ምን መምሰል እንደሚገባው በቅዱስ ቃሉ ላይ በስፋት ተጽፎ ይገኛል። ለእኛ የጌታ መገለጥ የመምጣቱ የተስፋ ቃል (ቃልኪዳን) የተባረከ ተስፋ ነው። ከሰማይ የሚገለጥ መድኃኒት የምንጠብቅበት ቀን ነው። “እነሆ፥ በቶሎ እመጣለሁ፥ ለእያንዳንዱም እንደ ሥራው መጠን እከፍል ዘንድ ዋጋዬ ከእኔ ጋር አለ። አልፋና ዖሜጋ፥ ፊተኛውና ኋለኛው፥ መጀመሪያውና መጨረሻው እኔ ነኝ። ወደ ሕይወት ዛፍ ለመድረስ ሥልጣን እንዲኖራቸው በደጆችዋም ወደ ከተማይቱም እንዲገቡ ልብሳቸውን የሚያጥቡ ብፁዓን ናቸው።” ራዕይ 22፥12-14እንደሚል ሽልማት፣ ስልጣን እና ዝግጅት፣ ቅዱስ ኑሮ፣ እግዚአብሔርን በመምሰል መመላለስ (ቅድስና) ዋናው ትኩረታችን ነው። ይህ ሁሉ ሲሆን “ቅድስት ቤተክርስቲያን ተለዪ አትደባለቂ!” የሚል መልዕክት እና ጨለማን መቃወም ዋነኛው ትኩረታችን ነው። በእርሱ ፊት ለመቆም መጽናትን ማሰብ፣ የሰውነታችንን ቤዛነት ልጅነትን መናፈቅ፣ ቤዛን መጠባበቅ፣ የእግዚአብሔርን ቀን መምጣት መጠባበቅ እና ማስቸኮል፣ ዘመኑ አጭር መሆኑን በመረዳት ሁሉ የሚቀልጥ መሆኑን በማሰብ በመጠን መኖር ያስፈልገናል። በመጽሐፍ እንደተጻፈ እምነት እና የፍቅር ጥሩር ለብሰን የመዳን ራስ ቁር አድርገን የምንነቃ እንጂ የምናቀላፋ ሳንሆን በተቀደሰ ሃይማኖታችን ራሳችንን መጠበቅ ያስፈልገናል። ሐዋርያው ጳውሎስ ክርስቲያኖችን (ቅዱሳንን) ስለመጨረሻው ዘመን የመስበክ፣ የማስተማር እንዲሁም የማንቃት አስፈላጊነት ሲጽፍ “ለእርሱ ደግሞ መከራ ለምትቀበሉለት ለእግዚአብሔር መንግሥት የምትበቁ ሆናችሁ ትቈጠሩ ዘንድ፥ ነው” [2ኛ ተሰ. 1፥5] በሚል ትልቅ ምክንያት በዚህ ርዕስ ይሰብክ እና ያስተምረው እንደነበር ከመልዕክቱ እንረዳለን። በዚህም ምክንያት ስለ ጌታችን ኢየሱስ ክርስቶስ መገለጥ እንደ እግዚአብሔር ልጆች ስናስብ በእኛ እና በዓለም መካከል የሚኖረው ዕይታ ፍጹም የተለየ ሊሆን ይገባዋል። “ጌታ ኢየሱስ ከሥልጣኑ መላእክት ጋር ከሰማይ በእሳት ነበልባል ሲገለጥ፥ መከራን ለሚያሳዩአችሁ መከራን፥ መከራንም ለምትቀበሉ ከእኛ ጋር ዕረፍትን ብድራት አድርጎ እንዲመልስ በእግዚአብሔር ፊት በእርግጥ ጽድቅ ነውና።” [2ኛ ተሰ. 1፥6-7] እንደሚል ቃሉ ከክርስቲያኖች ማለትም ከዳኑት ቅዱሳን መካከል ማናችንም ቢሆን የጌታ መገለጥ መከራን ይዞብን እንደሚመጣ ማሰብ አይገባንም። ለእኛ ለቅዱሳን የጌታ ቀን ድቅድቅ ጨለማ ቀን ሳይሆን እረፍትን በብድራት (ካሳ) የምንቀበልበት የሚናፈቅ ቀን መሆኑ መታወቅ አለበት። ይቀጥላል ............ @apostolic_songs #via https://acieth.org/

Watch "Apostolic Church of Kenya Amharic Song: ዘመኔ በከንቱ አይለቅ |Zemene Bekentu Ayelek|" on YouTube https://youtu.be/Z4yqXMK0BmY

#ComingSoon! "ቢሰሙ ቢያገለግሉትም፥ ዕድሜአቸውን በልማት፥ ዘመናቸውንም በተድላ ይፈጽማሉ።" (ኢዮ 36፥11) ይህ ዘመኔ የተሰኘው መዝሙር በኬንያ ሐዋርያዊት ቤተክርስቲያን አለምአቀፍ ሕብረት በናይሮቢ አጥቢያ የአማርኛ መዘምራን ተዘጋጅቶ የቀረበ ሲሆን በቅርቡም (https://www.youtube.com/@ACIFKACIFK) በዚህ YouTube Channel ላይ የሚለቅ እና በመልዕክቱም መንፈስን እጅግ የሚያድስ በመሆኑ ቻናሉን ሰብስክራይብ በማድረግ ቤተሰብ ይሁኑ! ለሌሎችም ወንድሞች እና እህቶች ሊንኩን ሼር በማድረግ በረከቱን ያጋሩ! ተባረኩ!!

Singer : saron seifu Background singer : kebron Music arrangement mixing & mastering : yonatan Samuel Masinko: gezahegn(Geze) @apostolic_songs