CivilNet

Բելառուսը հետ է կանչում Հայաստանում իր դեսպանին` խորհրդակցությունների նպատակով, Այդ մասին հայտնել է Բելառուսի ԱԳՆ մամուլի քարտուղար Անատոլի Գլազը, փոխանցում է ԲԵԼՏԱ-ն։ «Հաշվի առնելով իրավիճակի զարգացումը՝ մեր դեսպանը ևս մոտ ժամանակներս Երևանից կժամանի Մինսկ»,- ասել է նա։ Միևնույն ժամանակ, Անատոլի Գլազը նշել է, որ Բելառուսը չի պատրաստվում վատացնել հարաբերությունները Հայաստանի հետ․ «Մենք չենք պատրաստվում վատթարացնել այդ հարաբերությունները, որքան էլ արտաքին խաղացողները Հայաստանի ղեկավարությանը դրան դրդեն։ Մենք հարգում ենք հայ ժողովրդին և անկեղծորեն ցանկանում նրան ղեկավարներ, որոնք իսկապես կմտածեն երկրի ապագայի և մարդկանց բարեկեցության մասին»։

Ռուսաստանը կշարունակի աշխատել Հայաստանի հետ՝ հստակեցնելու համար Երևանի դիրքորոշումը ՀԱՊԿ-ի վերաբերյալ, հայտարարել է Ռուսաստանի նախագահի մամուլի քարտուղար Դմիտրի Պեսկովը։

Գերագույն հոգևոր խորհուրդը հայտարարություն է տարածել, որով կոչ է անում իշխանություններին զերծ մնալ բռնությունից։ Խորհուրդը դատապարտում է հունիսի 12-ին Բաղրամյան պողոտայում ցուցարարների նկատմամբ «ձեռնարկված ակնհայտ ապօրինի քայլերը և գործադրված միջոցները»։ https://www.civilnet.am/news/781700

Բելառուսում Հայաստանի դեսպանը կանչվել է Երևան՝ խորհրդակցությունների, հայտնում է ՀՀ արտգործնախարարության մամուլի քարտուղար Անի Բադալյանը։

Պաշտպանության նախարարությունը հերքում է ադրբեջանական դիրքերի ուղղությամբ կրակելու մասին տեղեկությունը։

«Բելառուս երբեք չեմ այցելի, քանի նախագահ է Ալեքսանդր Լուկաշենկոն: Այս պահից ՀՀ ոչ մի պաշտոնական ներկայացուցիչ Բելառուս չի այցելի»,- հայտարարել է վարչապետ Նիկոլ Փաշինյանը։ «Բա ՀԱՊԿ ղեկավարներից մեկը հայտարարում է, թե 44-օրյա պատերազմը նախապատրաստելուն մասնակցել է, քաջալերել է, հավատացել է, ցանկացել է Ադրբեջանի հաղթանակը։ Բա դրանից հետո ես պիտի գնամ Բելառուսի նախագահի հետ ՀԱՊԿ ֆորմատում նստեմ, հարց քննարկե՞մ։ Բա դուք չե՞ք, որ խոսում եք արժանապատվությունից, սկզբունքայնությունից»,- ասաց նա։

Վարչապետ Նիկոլ Փաշինյանը, անդրադառնալով հունիսի 12-ին Բաղրամյան պողոտայում լուսաձայնային նռնակների կիրառմանը, հայտարարել է, որ ոստիկանության հակազդեցությունը եղել է իրավաչափ և պրոֆեսիոնալ։ Նրա խոսքով՝ նմանատիպ բոլոր դեպքերում ոստիկանությունը գործելու է նույն կերպ։ «Ամենայն հայոց կաթողիկոսի և Ռոբերտ Քոչարյանի կողմից առաջնորդվող շարժման մասնակիցների կողմից տեղի է ունեցել հարձակում ոստիկանների վրա։ Ոստիկանության հակազդեցությունը եղել է իրավաչափ և պրոֆեսիոնալ և նմանատիպ բոլոր դեպքերում ոստիկանությունը գործելու է նույն կերպ։ Ցուցարարները փորձել են բռնությամբ ճեղքել ոստիկանության շղթան, որպեսզի հարձակում գործեն երկրի բարձրագույն օրենսդիր մարմնի վրա։ Ոստիկանությունը պաշտպանել է Հայաստանի օրենսդիր ինստիտուտը, պաշտպանել Հայաստանի պետականությունը»,- հունիսի 13-ին բյուջեի կատարողականի ամփոփիչ ելույթի ժամանակ ասել է Փաշինյանը։ Ըստ վարչապետի՝ տեղի ունեցած «զանգվածային անկարգությունների սադրիչները» պետք է պատասխանատվության ենթարկվեն։

Ընդդիմության ցույցը կառավարության շենքի մոտ https://youtu.be/RH6P2FJpzR8

«Տավուշը հանուն հայրենիքի» շարժման առաջնորդ Բագրատ սրբազանն աջակիցների հետ կառավարության շենքի դիմաց է։ Ժամը 11։00-ին պետք է տեղի ունենար գործադիրի հերթական նիստը, սակայն կառավարությունից հայտնեցին, որ նիստը տեղափոխվել է։ «Վարչապետ Նիկոլ Փաշինյանն այսօր Ազգային ժողովում ներկա է գտնվելու 2023-ի պետբյուջեի կատարման տարեկան հաշվետվության քննարկմանը, որի ընթացքում հանդես է գալու եզրափակիչ ելույթով: Ուստի՝ ինչպես սովորոբար արվում է, այս անգամ նույնպես Կառավարության այսօրվա ժամը 11:00-ի նիստը կտեղափոխվի ուրբաթ՝ հունիսի 14-ին»,- ասված է կառավարության հայտարարությունում։ Բագրատ սրբազանը խոսքով՝ կառավարության նիստ տեղի չի ունեցել, «որովհետև երկրում ո՛չ կառավարություն կա, ո՛չ էլ ժողովրդին պաշտպանող որևէ իշխանություն»։

📍Թարմացում` 09։30-ի դրությամբ Բաղրամյան պողոտայում տեղի ունեցած իրադարձությունների հետևանքով բուժօգնության է դիմել 101 քաղաքացիական անձ և ոստիկան։ 85 հոգի անհրաժեշտ բուժօգնություն ստանալուց հետո դուրս է գրվել։ Դաստակի վնասվածք ստացած պացիենտի առողջական վիճակը վիրահատությունից հետո գնահատվում է բավարար։ Մյուս 16 անձինք ստանում են անհրաժեշտ բուժօգնություն։ Ունեն թեթև և միջին ծանրության վնասվածքներ։ Առողջապահության նախարարություն