Біраз бұрын ресейлік интернет кеңістікте осы сарындағы видеоны байқаған едім. Соны
massaget.kz айна қатесіз көшіріп жариялапты.
Бұл видеода бірқатар этикалық мәселе байқалады. Авторлар дереккөзге сілтеме жасамаған. Бейтарап хабарламай, керісінше, "ерлерден асып түсеміз деп", "өзіне көп алатын" сияқты оқиғаға жеке баға беретін сөздерді қолданған. Сонымен қатар, ақпаратты бұрмалап, манипуляция жасаған. Ең өкініштісі, мұның бәрі әйелдерге қарсы өшпенділік тілін өршітуге, феминист ой-көзқарасты қаралауға бағытталған.
Бұл оқиға жайлы интернеттен іздеп көрген едім. Канаданың бірнеше консерватив бағыттағы медиасы
хабарлаған екен. Олардың өзі "ерлерден асып түсеміз деп", "өзіне көп алатындар" демеген. Тек оқу-жаттығу кезінде жағдай бақылаудан шығып кеткенін жазады және олар жасаған ең үлкен критиканың өзі шектеулі — "өрт сөндірушілердің жынысы маңызды емес, әйел өрт сөндірушілер деп бөлудің қажеті жоқ" деген сарында. Олардың дәстүршіл ұстанымдағы медиасы мен біздің медианың хабарлауын салыстырып көріңіз 🤦♂️
Дереккөзге сілтеме көрсетпеген
massaget.kz жалын 400 мың шақырымға жайылғанын айтады. Жалпы осы видеоны дайындаған автор 400 мың шақырым дегеннің көлемі қандай болатынын біле ме екен?) Осы жағдаят болған Канададағы ұлттық саябақ өрттің белгіленген аумақтан 3 гектар артық жерге жайылып кеткенін
жазыпты. Бұл дегеніміз 400 мың шақырым емес, 30 мың шаршы метр.
Оқиғаның қалай өрбігеніне келер болсақ, Канадада әйел өрт сөндірушілерге қолдау көрсету, инклюзияны арттыру, білігін шыңдау мақсатында бірнеше мемлекеттен келген әйел өрт сөндірушілер оқу-жаттығу жиынын өткізген. Жел күрт күшейіп кетіп, белгіленген аумақтағы қолдан жасалған өрт бақылаудан шығып кеткен. Қосымша тікұшақтар, өрт сөндірушілер келіп, өртті сөндіре білген.
Дамыған мемлекеттерде ғылым, жаңа технологияға қатысты күн сайын қаншама жаңалық болып жатыр. Бірақ оларды назарға ілместен, мынадай жағдаятты құштарлана хабарлап (мұны тіпті Канаданың медиасы бұлай хабарламаған), "әйелдердің қолынан іс келмейді" деген идеологиясын таратып әлек.