منصة البدوي الخيرية

#Medicine

طيب بالنسبة للإمتياز حننزل ملفات orientation لكل قسم من الأقسام الاربعة ما عليك إلا تضغط على واحد من الهاشتاق #Medicine #obstetric #pediatric #surgery بالإضافة لي اي حاجة حنتكلم عنها حيكون عندها هاشتاق #OET #ILets

- الممرضين و الدايات زملائك ، احترمهم و ما تتعالى عليهم ، لانك بدونهم ما حتشتغل و بدونك هم ما حيشتغلو ، ما تسمح ليهم يتكلو شغلهم و لا يتطالو عليك ، اي زول ما عايز يتشغل شغلو و طلع ليك قرون تكتبو اقرار ف فايل العيان انو ما عايز يشتغل الشغلة دي للاسباب التالية ، يكتب اسبابو و يوقع ، و ما تنسى الشهود 😂. بجرو واطي برضو ! - - التوثيق اهم شي ف شغلك ، لو سحبت عينة وثق ! لو اديت جرعة وثق ! لو قست علامات حيوية وثق ! توثيق = documentation يعني تكتب انت عملت شنو بالتفصيل و تكتب الزمن و توقع باسمك ، ف فايل العيان. لانو ف قاعدة Not written , not done ! - ما تتجاهل شكاوي العيان و اسمع كويس ، سواء ف فلو اب او ف ال طوارئ ، كلمة منو ممكن تنقذو ، و سرحة منك ممكن تقتلو ! - - طبعا انت ما مسؤول من اي plan of management نهااائي ، بختها الرجسترار او البوص ، و انت تنفذ بس ، و دايما اي شي كتبتو سواء هستوري و اكزامنيشن او بلان ، خلي الرجسترار يشوفو. - لو انتو اتنين مرتبطين اتوزعتو سوا، حلو جدا ، اتوزعو مالو ، لكن بااااليز بااااليز خليكم عمليين و بروفشنال ف الشغل ،و بلاش غنجات الخلط و الهبلسة ف الديوتي ديك ! يفضل انو اليونت زاتها ما تعرف انكم مرتبطين عشان ما يركزو معاكم و يكرهوكم عيشتكم 😂 - - مع ظروف الجائحة دي ياريت تخلو بالكم من نفسكم ، المعقم و الصابونة و الكمامة ما يفارقوكم. حفاظاً ع سلامتكم و سلامة عيانيكم. اي مستشفى ما وفر ليك ال3 حاجات دي من حقك تدق جرس و ما تشتغل ! - البس سكراب و لابكوت ف الديوتي ، و اقلعهم و ختهم ف كيس قبل تطلع من المستشفى ، عشان انت بعد كل ديوتي بتكون عبارة عن مستنقع جراثيم حايم. - - don't victimize yourself in order to save another victim ! يعني ما تضحي بنفسك عشان زول نهااائي ، ما لابس قلوفز ما تهبش اي عيان ! - اخرص انك تاخد تطعيم HBV قبل تتوزع . - - enjoy the ride ! اخيراً الامتياز موضوعو ما خطير ، ما تخافو سنة بتعدي بخيرها و شرها ف الاخر حيفضل ليكم الذكريات بس 😌. So make the most out of it, don't lose your excitement.

- دايما خلي اعصابك باااااردة و رايقة ، ما تفور طوالي ، اي مرافق قل ادبو معاك احسمو بادب و وريه حدو ، و المد يدو عليك ده تبيتو ف القسم ! بعد تاخد حقك بيدك طبعاً 🙈. - * لو انتو اولاد و بنات سادين سوا و مقسمين اليوم ، خلو البنات ياخدو الday احسن ، خصوصا لو مستشفى طرفي و المنطقة معروفة بالاعتداءات ، او اتقسمو قروب مختلط نهار و اخر ليل. يعني ما تخلو بنت براها ف الحوادث بليل ! * البنات اشترو صاعق كهربائي بتلقوه ف سوق امدرمان ، سعرو اقل من 2000 جنيه ، و خليه ف جيب اللابكوت حسيتي باي خطر طلعيه اصعقيه اقتليه ما تخليه حي 😂😂 ، امزح ! المهم وسيلة دفاع عن النفس و ما فيها خطر ع الزول ما تخافي. * * الاولاد صاعق كهربائي او سكين جيب صغير ، و عموما عضلاتكم بتعمل الواجب 😂. * لو انتو كلكم بنات ما تسدو حوادث براكم بدون حارس قدام الباب 🙂. * * كاطباء امتياز انتو جسم واحد ، خلو كلمتكم واحدة و لو حصل مشكلة لزميلكم اقيفو معاه ، و ماف داعي للخساسات لانو ببقى ليكم بمبي بعدين و الله 🌚. * اول شفت انتي كبنت اتوزعي مع صحبتك احسن ، او بالعدم زميلتك ف الدفعة ، لانو بتكون ف طشة حاصلة و حتحصل اصطدامات غالبا سواء مع المرافقين او الاداريين او السناير ، و حتحتاجي زول ف ضهرك . و عموما كده اارفقة سمحة 💛 . * - مرة تانية بقول ليكم الخساسات لا ! و الفتن لا ! و كل شي بتحل بالنقاش و التحاور ، ما تغلط ف زميلك لانك بلا شك حتلاقيه لقدام ، المجال ده ضيق و مصيرك تقع معاه لو ما ف نفس الديبارتمنت ، ف نفس المستشفى ! - احترِم تُحتَرم ! احترم الستاف كلو من الغفير للمدير ، و خلي علاقاتك طيبة معاهم كلهم ، حسن المعاملة بتلقاه لقدام صدقني ! - - سنيرك هو مرشدك ، لازم تحترمو و تقدرو و تخت اعتبار لكلمتو ، لانو خبرتو اكتر منك و عارف احسن منك اكيد ! ده ما بمنع انو ف سناير عاجباهم كلمة سناير دي و مستغلنها شديد 😂 المهم انت حتقدر تميز بين النوعين من اول يوم !. - سنيرك لو اتطاول عليك و قلل من احترامك باي شكل من الاشكال ، اتكلم معاه باحترام و خلي قلبك قوي و وصل ليه انو الحصل ما عجبك ، اوعك تسكت ع حقك ! و دايما الحوار ده يكون فيه اتنين شهود عشان ف سناير كده حسبي الله و نعم الوكيل بس 🙂. - - من حقك تشتكي سنيرك ده لادارة المستشفى ، او المجلس الطبي ، او حتى مجلس التخصصات ! انت هاوس اوفيسر ، يعني انت برضو طبيب و ليك مكانتك و كلمتك ، ما تستهتر بنفسك 😅. - طبعاً ما اي مشكلة بتطلع من اليونت ، حكم عقلك و خليك واعي و ما تتسرع !. - - اجتماعياتك مع اليونت شي مهم جداً ، ما تفوت طلعة او غنجة ، استمتع بالشفت و خلي ذكرياتك معاهم حلوة. - شغلك ده ممكن يدخلك الجنة ع فكرة لو اخلصت فيو ! ف احتسب الاجر عند الله و ما تتضايق. - - صحتك مهمة شديد ، سواء النفسية او الجسدية .. اكل كويس و اشرب كويس ، ما تفوت وجباتك و تجي نهاية اليوم تقع و تمرض ، لانو ماف زول بشيلك، انت بتشيل روحك 🙂. حتجيك ايام تتعب نفسياً و تحس انك ما عايز تواصل و لا تطلع تخلي بيتك و سريرك ، It's okay ! ممكن تاخد يوم اوف بعد تستأذن من زملائك و السنير بتاعك . ارتاح و ارجع واصل. - قبل تتطلع للمستشفى اكل وجبة كاملة و مشبعة ، و شيل معاك زيادة ف شنطتك عشان اكل المستشفيات اخير عدمو 😂. - - ما تخلي الكتاس ينسيك تشرب موية. - ما تفوت صلاتك عشان اي شي !. - - ما تتأخر في الاستلام من زملائك البايتين ، حرام ياخي ، حاجة ما مهنية نهائي ، استلم ف مواعيدك. - ما تتوزع مستشفى بعيد عن بيتك ، كتاس قريب و لا هبلسة بعيدة 😅 . المواصلات بقت نار ، ده لو في اصلا 😂. - و اخر شي عايزو انك تتشر ف المواصلات بعد ديوتي مكتس ! - - ما مهم انو المستشفى الاتوزعت فيه مهبلس و لا مكتس ، بقدر ما هو مهم انك ما تهبلس شغلك ! مرة تانية 😂 - اي سمنار او تيورتوريال انطلب منك تقدمو ، ما تتكاسل و تهرب ، ظبطو و قدمو لانك قطعياً حتستفيد - ماف اظبط من انو يتلمو ال - Theory and practice 💛. - - اي procedure او operation حضرتها و شفتها و عرفتها ، المرة الجاية حاول تعملها ، و البعدها حاول تعلمها لغيرك .. دي احسن طريقة تثبت بيها الشغل. - تقريباً حاجة متفق عليها انو اي مدير طبي بتاع حوادث انسان معقد و جنو مشاكل ، و وقت تحتاجو ما بتلقاو ، ما تقصر ف شغلك عشان ما تديو فرصة يغلط فيك او يهددك. - - ما تسد حوادث بدون سنير نهاااائي ! ما عندك رجسترار قاعد معاك قفل الحوادث و ما تشتغل ، و ماف حد بقدر يجبرك ، المدير الطبي لو هددك بالريجكشن طوالي تقول ليه اي اعمل لي ريجكشن ، و اكتب لي ورقة باسبباك و نوقع عليها انا و انت و معانا شهود ، و نمشي ادارة الامتياز نعرف الغلطان منو 😂 طوالي بجر واطي !

* * الموقع بفتح كل يوم 25 من كل شهر ، غالبا اول يوم 25 يمر عليك بعد فتح الملف الاكتروني ده حيكون يوم اول توزيع ليك. * الخانات بتكون 4 صفوف لل4 شفتات ، و 4 رغبات لكل شفت. * * التقديم بقفل بعد 5 ايام عادة من يوم فتح ، و النتيجة بتطلع يوم 5 من بداية الشهر الجديد. * بعد كل شفت حتلقى عدد الصفوف نقص واحد ، لكن خانات الرغبات زي ما هي! * * ما فرقت مليت رغباتك متين ، اول زول و لا اخر زول ، ف الاخر بجدعوك محل هم عايزين 😂 * الموقع في احيان كثيرة بكون غير عادل ف التوزيع ، و ممكن عادي يجدعوك ف مكان ما ختيتو ف رغباتك اصلاً ! ف اهدأ كده و ما تضرب البانيك اتتاك ، تركِّب وش و تصحى "دُغُش" تمشي ادارة الامتياز مكفكف قميصك مستعد للردحي ! * * تمشي شباك اطباء الامتياز تقول ليهم وزعتوني خارج رغباتي ، عايز اعمل اعادة توزيع ، و تكتب طلب ف ورقة A4 فيو اسمك و رقمك التمهيدي و رقم تلفونك ، و المستشفى العايز تتوزع ليه و معاه شوية كلمتين تلانة كده مهذبات ، تسلم طلبك و تستنى التعديل ف الموقع. غالبا بتعدل خلال 48 ساعة. * اول ما تظهر النتيجة تعمل سكرين شوت لنتيجة التوزيع و معاه صورة من التمهيدي و تمشي المستشفى الاتوزعت ليه تخش مكتب المدير الطبي تقول ليهم عايز استلام عمل ، تعمل اجراءاتك و تشيل نسختين من استلام العمل ، واحد طبقو و احفظو ف مكان كويس و اوعك تضيعو ، و التاني بتمشي بيه وزارة الصحة الولائية تسلمهم ليه ( فاتحة ف هندسة الخرطوم البوابة الغربية ). هم بدوك ورقة برضو ترجع بيها للمستشفى. * * ف نفس اليوم المشيت فيه الوزارة تشد حيلك و تتمشى لادارة الامتياز ، تسلمهم ورقة الحساب البنكي ، معاه صورة من التمهيدي و صورة من استلام العمل ، عشان المرتب ينزل ليك مع الناس و ما يتأخر او يسقط اسمك. _________ كده خلصنا ، طيب الامتياز ده شنو ؟ * هو سنة تدريبية قافلة 12 شهر ، 3 شهور لكل تخصص من التخصصات ال4 الرئيسية ، اوبس ، بدياترك ، ميدسن ، و سرجري. * * قلنا هي سنة "تدريبية" ، يعني انت متدرب ، ما مسؤول من وضع خطة علاجية او عمل اي اجراء طبي بدون اشراف. * سنة الامتياز هي السنة البتوصل بين الجامعة ، و الممارسة ، انت حتبني الطبيب الحتكونو مستقبلا خلال السنة دي ، ما قصدي من ناحية معرفة و علم ، لا ، قصدي من ناحية اخلاقيات مهنة و احترافية ، ف احرص انك تكون طبيب راضي عن نفسك . * * انت مهمتك في السنة دي تتعلم كيف تكون safe doctor ! و تتعلم كيف تتعامل مع الطوارئ و الاشياء الاساسية البتواجهك ك طبيب عام بعدين ان شاء الله. * طبعا غالباً انت حتكون مرمطون المستشفى ، اي مشوار اي كتاس بقع فيك انت ، الحاجات الصغيرة زي مراسيل بنك الدم، الطلوع مع العيان بالاسعاف ، تحضير العيانين للعمليات الصغيرة و الكبيرة ، تجديد التعليمات ، حل مشاكل العيانين بكل انواعها 😂 ده كلو مهمتك ، و بس تحتسب ركبك و رجولك و تنطلق 😂. * *انك تستفيد او لا بعتمد ع السناير اي ، بس بصورة اكبر بعتمد عليك انت. باري سنايرك و شوف. * قبل تنزل افهم و فهم اهلك ، انو انا شغال مجان ل 9 شهور ع الاقل ، لانو المرتبات بتنزل بعد 6 ل 9 شهور من بداية الامتياز ، فطول بالك و كلمك اهلك يطولو بالهم معاك ، صرفك حيكون تقيل. * * ما ضروري تقرا بداية كل شفت ، كل شي بثبت ليك مع الزمن ، لكن لو فتحت ميدسكيب ف كل ديوتي او ريفير و قريت عن الكيسات المرت عليك بتكون ممتاز عديل 💪. *طيب ، نصائح عامة لكن ما بالضرورة تكون قواعد يعني 😅 : *- ابدا باكتر شفت بتكرهو، عشان تخلص منو. - اغلبكم طبعا حيبدو بالاوبس 🙈😂 و احسن تبدا بيه ف رأيي لانو شفت خفيف من حيث المسؤولية الطبية ، بتتعلم فيه الاساسيات بتاعة الممارسة و بتتعلم كيف تتعامل مع العيانين و المرافقين و السناير. - - خلي الشفت البتفكر فيه ك لاين ، تاني شفت تشتغلو ، لانو بتكون طشة البداية ديك راحت خلاص و بقيت عارف الحنك كلو ، و كمان من الشفت الثالث انت حتبدا تزهج و تمل و تقرف من الشغل ، ف الاحسن تشتغل لاينك بمزاج و حب 💛. - خليك مسؤول ! و ما تهبلس ع حساب زملائك و تشيل وش القباحة و تبقى السيرة ملازماك للابد "المهبلس" ، ما تتكل شغلك ع غيرك. و كمان ما تسمح لزميلك يستغلك و يتكل شغلو عليك. اي الناس بتجامل بعضها و بتتساعد ، لكن ما تزودوها. - العيان هو الاولوية الاولى و القصوى ، دايما خلي ف بالك انو الزول ده مؤمنكم ع روحو ، و العيان ده مسؤولية امام رب العالمين قبل ما يكون مسؤولية امام البوص او السنير. - - عيانك عندو اهل خايفين عليه ، فاتحمل قلقهم و اسئلتهم الكتيرة و خليك متفهم . افرض احترامك عليهم بحسن التعامل ، و اياك و النهير و الشكل و الردحي 😂 .

إجراءات_ما_بعد_التخرج: #زيت_الامتياز الجزء الثالث : طيب يا جماعة ، المرة دي نخش ف الزيت الامتياز زاتو ! سنة كأنها 7 سنينٍ عجاف 😂 سنة زي ال اوبسترتكد ليبور كده ، تلقى روحك اتورطت لا قادر تطلع لا قادر ترجع 😂😂 امزح 🙈 و الله سنة جميلة عموما و الواحد بيطلع منها بالكتير 🌸 * طيب احنا ف الجزء الاول وصلنا لحد مرحلة التسجيل ف موقع مفوضية الاختيار للخدمة المدنية القومية صح ! * اها و بعداك ؟ تستنى يا حبيبي .. تستنى و تطول بالك و تشيل الصبر .. * * كل الناس الاقسمت اسماءها بتتطبع ف قوائم مرقمة ، القوائم دي حتوصلكم بطريقة ما ، اما من صفحة المجلس ، او زول برسلها ف قروبات التلغرام و الواتس ( طبعاً القروبات دي ما معروف اتعملت متين و وين و العملها منو 😂 المهم بتلقى نفسك جوة !!). المهم ، حينزل اعلان ف موقع ادارة الامتياز او ف نفسس القروبات دي انو الناس اصحاب الارقام ف اللستة مثلاً من 1 ل 250 يمشو يعملو الكورس التوجيهي ف القاعة الفلانية . . * الكورس التوجيهي ده كورس قصير مدتو 3 يوم ، بوروكم فيه كيفية فتح الملف الورقي و كيفية التسجيل ف موقع ادارة الامتياز و الكلام الكتير داك كلو ، فيه و لكشرز كمان ف مواضيع مختلفة ، ما بتفرق كتير من لكشرز الجامعة ، بوروك كيف تتعامل مع الامراض الشائعة الحتلاقيك كطبيب امتياز في السودان. * بنهاية الكورس حيطلبو منكم صورة من التمهيدي و صورة من اثبات شخصية و صورة فوتوغرافية ، حتستلمو شهادة بتفيد بانك حضرت الكورس ده ، ظابط ! * * طبعا الكورس بتكون فاكرو مجاني لحد ما تنصدم بعدين انهم خصمو رسومو من اول مرتب امتياز اخدتو 😂 عارفنك مفلس هسه ! *طيب بعد خلصتو الكورس التوجيهي حينزل اعلان في موقع الامتياز انو القروب الفلاني يتوجه لادارة الامتياز لفتح الملف الورقي. ** ادارة الامتياز دي موقعها ف شارع عبدالله النور ، جنوب المجلس الطبي ، جنوب وزارة العدل. * الرقم بتاعك ف اللستة القبيييل ديك ، احفظو ، لانك حتكتبو ف ملفك ب برة. * * الملف الورقي ده فيه الوثائق حقتك البتبدأ بيها توزيعك. - التمهيدي الاصل ( ما تنسو تصورو منو نسخ كتيييرة قبل تسلموه ليهم ، عشان تاني ما حتشوفو الاصل ). - - شهادة الميلاد الاصل ( برضو صورو منها نسخ لانو ما حتستلموها تاني الا بعد تمتحنو بيرماننت ). - صورة من اثبات الشخصية ( رقم وطني ، جواز ، بطاقة قومية). - - كرت العمل اصل ( ده بطلع من اقرب مكتب عمل ليك ، اسأل عن مكتب العمل بتاع المحلية الانت ساكن فيها ، و شيل معاك اثبات شخصية و صورة منو "اي الاتنين" و صورة من التمهيدي، و شهادة سكن ، مفترض انو مجان بدون اي رسوم ). - صورة من شهادة الكورس التوجيهي. - - صورة من افادة التخرج " الريليز". - صورة فوتوغرافية. - * فتح الملف الورقي ده مجان ، لكن حتشتري ملف من المكتبة الفاتحة ف الادارة ، عندو شكل معين هو ، ما اي ملف. * حتسحب فورمتين من مكتب شؤون العاملين جوة الادارة ، تملاهم و بعد كده هم بوجهوك تعمل شنو. * * امشي بدري عشان تخلص بدري و ما تتجرجر. * كرت العمل يفضل انكم تطلعوه ف الفترة انتظار الكورس التوجيهي عشان تكونو جاهزين ، و كذلك شهادة الميلاد لازم تسودنوها و تخلوها جاهزة " سودنة شهادة الميلاد " اذا كانت اجنبية. لانها مرات فيها جرجرة. ( للاسف انا ما عارفة الخطوة دي بتتعمل كيف لكن اسألو سنايركم الشهادة عربية بالذات) . * * مطلوب منك تفتح حساب في بنك امدرمان الوطني (غالبا) او بنك فيصل عشان ينزل فيه المرتب ، لكن لا يتم ارفاق رقم الحساب في الملف الورقي. بوريكم بعدين تعملو بيه شنو 😅. * فتح الحساب البنكي كمان يفضل انو يتعمل بدري ، في العادة بكون ف بنك امدرمان الوطني فرع المقرن. مطلوب صورة من التمهيدي و صورة من الجواز او البطاقة القومية (ما بقبلو رقم وطني) ، و صورة فوتوغرافية ، و مبلغ رمزي يتم ايداعه ف الحساب للاولاد (لكن غير مطلوب للبنات). * * بعد خلصنا من الملف الورقي ، حتجو تفتحو الملف الالكتروني ، طبعاً حتكونو كتبتو رقم التلفون في الفورمات المليتوها ، حتجيكم باسوورد تقدرو تعملو بيها حساب ف موقع ادارة الامتياز. * بتخش بالرقم التمهيدي بتاعك + الباسوورد الرسلوها ليك. * * لفتح الحساب الالكتروني مطلوب منك ترفع فيو صورة من التمهيدي ، و صورة من اثبات الشخصية ، و صورة من افادة التخرج. و بتكتب شوية معلومات شخصية. * لازم حجم الصور دي مع بعض ما يتجاوز 500 كيلوبايت ( الموقع بتاعهم ده معولق خلاص 😅). * * عشان توصل للحجم ده رسلوها لاصحابكم بالواتس و خلوهم يرجعوها ليكم تاني ، كده حجمهم حيقل 😂. * طيب بعد خلصتو من المعطة دي ، حتستنو التوزيع ، و برضو حينزل اعلان ف موقع الامتياز ، و لما تخش حسابك حتلقى الخانات فتحت ليك عشان تكتب رغباتك.

#إجراءات_ما_بعد_التخرج : الجزء الثاني : #إجراءات ما بعد القسم : ريثما تعلن المفوضية فتح باب التسجيل لديها يمكنكم البدء بإجراءات استباقية لفتح الملف الورقي الخاص بالامتياز: 1-فتح حساب بنكي (والحصول على إفادة بفتح الحساب) لدى: بنك فيصل - الفرع جوار المجلس الطبي. بنك امدرمان الوطني - فرع المقرن. بنك السلام. * إن كان لديك حساب بالفعل من أي فرع؛ قم باستخراج إفادة بذلك. 2- استخراج بطاقة الطبيب (بطاقة اتحاد أطباء السودان). ◀المستندات المطلوبة: صورة من شهادة التسجيل التمهيدي ◀الموقع: اتحاد أطباء السودان - شارع النيل، أو عبر النافذة الالكترونية: http://aloob.com/docunion/apply.php 3-استخراج كرت العمل من أي مكتب عمل حسب منطقتك. ◀المستندات المطلوبة: أ-إثبات شخصية. ب-صورة التسجيل التمهيدي. ج-صورة شخصية. ◀الموقع:- (فرع الخرطوم): جنوب شرق نادي الفروسية - الشعبي: https://t.me/c/1673515080/1866 (فرع بحري): بعد كبري المك نمر مباشرة - جوار مجمع محاكم الخرطوم بحري: https://t.me/c/1673515080/1791 4-استخراج شهادة ميلاد جديدة (في حال عدم توفر الأصل). ◀الموقع: السجل المدني.(مكاتبهم بفروع مجمعات خدمات الجمهور / أو مكتبهم بشارع المك نمر غرب مستشفى أمبريال). ◀المستندات المطلوبة: أ- إثبات شخصية. ب- صورة شهادة الميلاد + صورة جواز السفر(لمواليد خارج السودان). ج-وجود شاهد/ أو الرقم الوطني للأب والأم

#إجراءات_ما_بعد_التخرج : #الجزء الأول : - اول ما اتخرجت الجامعة بتطلع الريليز الجماعي و الفردي بالإضافة للشهادات الجامعية حاليآ انت ما محتاج للشهادات - كل زول بشيل الريليز الفردي بتاعه و بمش زول معاه الريليز الجامعي بطلع فوق لمركز الحاسوب بشيل موقعهم و بتواصل مع الجامعه بترسل الريليز الجماعي للمجلس - بعد المجلس اتأكد ريليزكم الجماعي وصل بتبدأ إجراءات التسجيل للقسم من الموقع بتحتاج للريليز و صورة بخلفية بيضاء و اثبات شخصية جواز او رقم وطني بتسحل طبعا بالتلفون و بتدفع الرسوم كانت عبارة عن 1250 جنية - بعدها بجيك اصال الكتروني بتعمل ليو اسكرينشوت و تعمل ليع برنت اوت بتشيلوا طوالي تمش المجلس برا على يدك الشمال في الساحه اول ما تدخل في شباك بتديهم الايصال بدوم واحد تاني و بدبسوهم ليك سوا بتمش تصورهم و تخلي نسخة معاك و يشيلوا منك الاصل - تاني بتابع صفحة المجلس الطبي sudanese medical council - https://www.facebook.com/SMCcouncil - بنزلوا تاريخ القسم بتمش تقسم و الدخول بإثبات شخصية و الصورة بتاعة الايصال الصورتها قبيل و بعد القسم بتمش في نفس مكان القسم تستلم تسجيلك التمهيدي - بتشيل التسجيل التمهيدي تصور منو كم نسخة و بترجع المجلس الطبي بياخدوا منك نسخة - كدا الإجراءات انتهت في المجلس الطبي

السلام عليكم ورحمة الله سنبدأ بنشر إجراءات ما بعد التخرج