قصص ومواعظـ دينية♥️🌸

ماشاء الله تبارك الله " منقول " والله العظيم ماقد دعيت دعوة بقيام الليل إلا رأيتها مرئى العين غير عن الراحة العظيمه الي تجي بعدها صرت أحب هذي الصلاة لدرجة إذا مر يوم ماصليتها أحس إني تركت فرض مو نافلة لأنها شيء مريح للنفس والروح وقرب من الله ♥️♥️

ماشاء الله تبارك الله من " الخاص " بنات انا سبق كتبت قصتي بقروب مدري مرت عليكم .. عندي اجهاضات سابقه وحملت والحمدلله تم لما وصلت الرابع طحت وجاني نزيف انهرت تماما .. غسلت وجهي توضيت ومسكت القران واقراء ١٠ اجزاء وانفث بماء واشرب وهكذا الختمه الاولى خف نزيف ختمه ثانيه ب ٣ أيام اختفى تماما ولله الحمد وتم حملي الحمدلله القران معجزه لكل شي 🥺🤍🤍 هاذا موقف واحد من كثير مواقف ،، سبحان الله ..

ماشاء الله تبارك الله " من الخاص " والله يبنات عليكم بالختم سبحان الله من بديت في الختم كل جمعه انتظر وش بيصير لي شي حلو كل ختمه اختمها اسمع اخبار حلوه الحمدالله .. مشاءالله تبارك الله .. شي ثاني هالفتره تعسرت امور بحياتي وتلددت كثير بس بفضل الله والقرآن تيسرت الحمدالله كل ماتعسر علي امر اتكلت على الله وكملت وردي والحمدالله يارب

ماشاء الله تبارك الله " منقول " كنت استهين بالدعاء بصلاه الوتر و كنت اقول يعني مستحيل كيف ! لمين مره كان بخاطري شي و امي كانت حالفه ما يصير ابدًا تخيلو قمت صليت و دعيت دعيت دعيت نمت قمت على امي تقومني علشان اروح اسوي هالشي !!!!!!! ما تمت 24 ساعه متخيلين !! هنا فعليًا ادركت فضل صلاه الوتر 😢😢😢

كنت تعبان نفسياً وفيني ضيقة لي شهور ما أقدر أجلس من الوسواس يومي يخلص وأنا اوسوس أنام وأقعد على الوسواس تخيلوا على ابسط الأشياء واحس كأني كنت مغيب عن الدنيا مو مع الناس.. ما أعرف وش اللي كان فيني وتركيزي صفر انسى كل شي احس كنت فاقد ذاكرتي الاشهر اللي راحت و بدأت بقراءة سورة البقرة لي تقریباً اسبوع والله ثم والله إني ارتحت كأن احد سكب ماء بارد علي، وقتي صار كله بركة ونفسي هدأت وحسيت الوسواس وضيقة الصدر راحت، الحمدلله ادعوا لي اني استمر بقرائتها. _منقول.🕊️ #فضل_سورة_البقرة رابط القناه.♥️ https://t.me/al_pkrah

ماشاء الله تبارك الله " منقول " مرّت علي أيام شينه وحزينه لدرجة فقدت الصبر والأيمان عجزت أتخطى قلت صعبه بس دايم كنت قريبه من ربي بعد كل صلاه كنت اقرأ قرآن التزمت بسورة البقره ما أبالغ الله يعلم أن الدنيا بعيني صارت جدًا صغيره القرب من الله جبر وفرح تأكد مهما بلغ حزنك وهمك ربك ما كتبه لك ألا للأجر وقادر يجبرك🤍.

ماشاء الله تبارك الله " من الخاص " انا احكي قصتي بعد ولادتي ب ولدي مريت ب حاله جدا صعبه اكتئاب وكمان ضعف شخصيه ومااتحمل زوجي ودايما كنت اسوي المشاكل معاه وكمان كنت مااقدر اشتغل في بيتي وانظفه غير ماكنت اقدر اتحمل ولدي ابدا ابدا مااتحمل شقاوته وهو الله يصلحه شقي وكنت ضايعه احس حياتي متلخبطه طبعا جلست على هذي الحاله قرابة السنتين بعدها التزمة ب صلاة الوتر وقرات سورة البقره وذكر الله كثير والصلاه على النبي واتحرى اوقات اجابة الدعاء والحمد الله جدا صارت حياتي الان ميسره وربي كل حاجه انفتحت في وجهي وخصوصًا اني صرت الحمدلله اشعر بالراحه وربي شعور جدا جدا رائع ☺️ وطبعًا غير بر الوالدين ومعاها اردد هذا الذكر ( اللهم اعني على ذكرك وشكرك وحسن عبادتك ) سبحان احس ربي يسهل لي العباده هذا الدعاء انا مره احبه واحبه ادعيه لاي شخص واذكر فيه اي شخص

ماشاء الله تبارك الله " منقول " احسني مبسوطه جد والسبب؟ ‏دعيت دعوه بأخر ساعه من عصر الجُمعه وقلت يارب بشرنِي فيها بأقرب وقت والله ماجاء أخر المغرب الا ودعوتي متحققه والشي اللي أبغاه تحقق ‏الرّب قريبٌ مُجيب

ماشاء الله تبارك الله " منقول " ماخاب من قال يارب . سبحان الله امس دعيت الله بشي متعطل من ٣اشهر دعيته بيقين وبصدق وهالصباح استجاب لي ياررررب لك الحمد حمدا كثير مبارك فيه ♥️♥️♥️.

مش صدفة ♥️ ‏سيُحدث الله لأجل قلبكَ الموقن بعزتهِ وقدرته أمرًا، لن يتركك بعد أن بشرك، لن يتركك بعدما أرسل لك الرؤى والآيات، لن يتركك تائهًا فهو القوي اللطيف، ما يَحدُث لك الآن ما هو إلا لتتهيأ لتدبيرٍ يَسُرك إقباله ويبهجك . إن الله لا يترك اليد التي مُدت له بحُب أبدًا. سيستجيب

ماشاء الله تبارك الله " منقول " يالله كان فيه ثلاث اشياء شبه مستحيله انها تصير وجلست سنتين وعليها الوتر كل يوم ما اخليها وادعي الي بقلبي كل شي بقلبي اقوله واكرره مادخلت السنه الثالثه الا تحقق اول شي وكمللت والي بعده تحقق والي بعده يالله ياشعوري احس حمدالله يارببب 😞♥️♥️♥️♥️♥️

‏سِر إلى الله وإن أثقلتك الذنوب، ولو أن تسير إليه حبواً، فعفوُ الله أكبر من معاصيك، ورحمته أوسع من سيئاتك، ومغفرته أعظم من غدراتك، وكرمه أجلُّ من عثراتك، وصفحه أكثر من هفواتك، أقبل على الله تائباً مُنيباً وارجع نادماً أسيفاً، فالله يحبّ ذلك الإقبال من عباده السائرين

ماشاء الله تبارك الله " منقول " قبل فترة قرأت وحدة كاتبة عن تجربة دعواتها كانت تستجاب بعد الله ثم كل مرة كانت تقول بعد كل صلاة " رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ " ومن بعدها ما دعيت دعوة بعد دا الدعاء الا واستجابت الحمدلله❤️

ماشاء الله تبارك الله من " الخاص " بقولك هيه بنت خالتي كانت دائما توصينا على اخر ساعة من عصر يوم الجمعة الله يجزاها الجنة يعني احيانا تكون موجوده عندنا بالبيت وسوالف وقت العصر مع ذلك تقول يلا نوقف سوالف وندعي ماشاءالله تبارك الله يعني انا م ادري وش تدعي فيه بالضبط بس ماشاءالله تبارك الله زوجها فيه كل المواصفات اللي البنت تتمناها وظيفتها كذلك الله البارك ماشاءالله تبارك الله وكانت دائما توصيني بالحوقلة مع انها مرت بظروف صعبة جدا جدا من وهيه تدرس ثالث ثانوي مادري ايش هو بالضبط اللي كان عندها عين حسد ماني عارفة بس الحين الحمدلله مره تغيرت حياتها الحمدلله رب العالمين ماشاءالله تبارك الله وزي ماقلت لك الذكر اللي دائما توصيني فيه هو الحوقلة