Ethiopian Press Agency/ Afaan Oromoo/

"Faawundeeshinichi kaayyoo Artisti Alii Birraa akka milkeessuuf hundinuu deeggaruu qabna" -Aadde Caaltuu Saanii ** Gaazexaa Bariisaa Faawundeeshiniin Doktara Kabajaa Artisti Alii Birraa kaayyoofi mul'ata artistichaa milkeessuuf ka kaayyeffate waan ta'eef hundinuu deeggaruufi gargaaruu akka qabu Ministirri Manneeniifi Bu'uura Misooma Aadde Caaltuu Saanii dubbatan. Hundeeffamni faawundeeshiniichi har'a Finfinnee, Hoteela Iskaayilaayititti iftoomeera. Sagantaa hundeeffamichaarratti haasaa kan taasisan Aadde Caaltuun, Artisti Alii Birraa aadaafi seenaan inni hojjetee darbe yoomuu hindagatamu jedhanii, Faawundeeshinichis hojiisaafi mul'atasaa milkeessuuf kan hundaa'e waan ta'eef deeggaramuu qaba jedhan. Mootummaanis deeggarsa gamasaa akka taasisu dubbataniiru. Walitti Qabduu Boordii Faawundeeshinichaa Haadha warraa Artisti Alii Birraa Iliillii Marqos Birraa gamasaaniin, Artisti Alii Birraa wayita lubbuun tureetti kaayyoofi mul'ata hedduu akka qabu himanii, mul'atasaa kana milkeessuuf Faawundeeshinichi hundeeffamuu himaniiru. Aliin dhimmoota barnoota, seenaa, aadaa, misoomaafi jaalala biyyaa sirbaan faarsaa ture, gochaan hojiirra oolchuun mul'atasaa akka ture yaadachiisanii, kana dhugoomsuuf aniifi isin ummatni Itoophiyaa gahee olaanaa akka qaban dhaamaniiru. Milkaa'ina hundeeffama Faawundeeshinichaaf mootummaan Oromiyaafi Biiroon Aadaafi Turizimii Oromiyaa deeggarsa taasisaniif galateeffataniiru. Sagantaa kanarratti Asxaan Faawundeeshinichaa kan iftoome yoota'u, faaruufi sirboonni Artisti Alii Birraa leellisan dhiyaataniiru. Saganticharratti hoggantoonni olaanaa federaalaafi naannolee, abbootiin Gadaa, haadholiin Siinqee, artistoonnifi keessummoonni affeeraman hedduun argamaniiru. Wayinisheet Kaasaatiin

#Faawundeeshinii_Alii_Birraa‼️ ***** Gaazexaa Bariisaa Sirni iftoomsa Faawundeeshinii Doktara Kabajaa Artisti Alii Birraa bakka ministiroota, abbootii Gadaa, haadholii Siinqee, pirezidaantii duraanii Oromiyaa Obbo Juneyiddii Saaddoo, artistoota dabalatee keessumoonni adda addaa argamanitti Finfinnee, Hoteela Iskaayilaayititti gaggeeffamaa jira. Wayinisheet Kaasaatiin

Gaazexaa Bariisaa maxxansa har'aa!! Gaazexaa Bariisaa Waxabajji 15 bara 2016 maxxanfame https://press.et/oromifa/2024/06/22/bariisaa-sanbataa-waxabajjii-15-bara-2016/ - Telegram Ethiopian Press Agency/Afaan Oromoo ykn liinkii https://t.me/EthiopianPressAgency_AfaanOromoo - Marsariitii https://www.press.et/afanoromo/

#Fincaa'aa_Leephis‼️ **** Gaazexaa Bariisaa Godinaalee Oromiyaa keessaa tokko kan ta'e Arsii Lixaa iddoowwan hawwata turiizimiif oolan heddu qabaachuun beekama. Godinichi qabeenya uumamaa dilbii yemmuu daaw'ataman qorqalbii namaa hawwataniifi booharsan lageen, gaarren, bineensota bosonaa, paarkiiwwan, allaattiiwwan, aartuuwwan, harawwan, bishaan ho'aa uumamaafi fincaa'aawwanfaa qaba. Iddoowwan hawwata turiizimiif oolan kanneen godinichi qabu keessaa tokko Fincaa'aa Leephiis. Barana Afrikaa hanga Eeshiyaatti, Awurooppaa hanga Ameerikaatti miidiyaalee guguddoo addunyaatiin ajandaa ijoo ta'uun gabaafamaa kan tureefi qalbii uummata addunyaa booji'uun qabeenya dilbii miidhagaa addunyaan qabdu keessaa sadarkaa dursaa qabachuun kan galmaa'e iddoon ikoo turizimii #Leephis bal'ina bishaan gaararraa gadjiguun walakkaa hektaaraa uwwisee qabeenya guddaa dachiin Oromiyaa addunyaaf gumaachiteedha. Fincaa'aan Leephis Aanaa Nageellee Arsii, gandoota Ashookaafi Leephisitti argama. Leephis magaalaa Shaashamanneerraa gara kaaba bahaatti Kiiloo meetira 43fi Magaalaa Nageellee Arsiirraa gara Bahaatti kiiloo meetira 18 fagaatee argama. Maqaan "Leephis" jedhamus kan moggaafame naannawa kanatti biyyoo gabbataa omishaaf mijataa ta'eefi lafa uumamaan bishaan biyyoo jala yaa'u "leephoo" jedhamurraa akka ta'e manguddoonni ni lhimu. Maddi Fincaa'aa Leephis Aanaa Qoree lageen lamaan Gurraachoofi Anjelaaloo jedhamanirraa yommuu ta'u, bishaan lageen Anjelaaloofi Gurraachoo walitti dabalamuun humna horatanii gubbaarraa gadi konkolaatu fincaa'aa akkaan guddaa ta'eefi qalbii addunyaatti harkise kana uumuusaa jiraattonni nidubbatu. Fincaa'aan Leephis lafa ol fageenya meetira 85 ol dheeraturraa gadi konkolaachuun maqaa Laga Leephis jedhamu uumee kiiloo meetira 40 ol erga imalee booda gara Haroo Laangaanootti gala. Wantoonni uumamaafi miidhagina iddoo hawwata ikoo turizimii Leephis adda taasisan hedduun jiraatanis, argamni bosona Duuroofi seenaan raagdicha Sayyida Duuroo naannawa sanatti argamuun isa tokko. Fincaa'aan Leephis bosona uumamaa Duuroo lafa hektaara kuma 7,150.4897 uwwise jidduutti kan argamu yoo ta'u, bosonichis Birbirsa, Ejersa, Heexoo, Leemmana, Baddeessaafi Siigeda dabalatee akaakuuwwan mukeenii 100 oliifi bineensotaa 80 ol qaba. Kunis Fincaa'ichi sadarkaa addunyaatti bakka filatamaa ikoo turiizimii ta'uun akka filatamu taasiseera. Leephis ikoo turizimii addunyaa ta'ee akka filatamuuf qindoomina dhaabbata mitmootummaa Ameerikaa "ESTAfi USAID" jedhamaniin qorannoon jalqabaa waggoota sadiif bara (2003-2005)tti geggeeffame gumaacha guddaa taasiseera. Qorannoo kanaan booda waldaaleen torba hundeeffamuun hojiitti kan galan yommuu ta'u, waldaaleen kunis jiraattota naannoo keessaa madaalamanii filatamuun hojiitti kan galan yoo ta'u, waldaaleen kunneenis kan daawwachiiftotaa, kunuunsa naannawaa, omisha dammaa, kunuunsa biyyee, guluffii fardaa dirree Wontaashee, ogummaa harkaa Mishiqqeefi daawwachiiftota fardaa jedhamuun hundeeffamaniiru. Bara 2015 gara dhumaas naannawichi carraa gara paarkiitti guddachuu argate. Fincaa'aan Leephis yaa'ii waliigalaa 25ffaa biyya Uzbeekistaaan, Magaalaa Saamarkaanditti taasefamerratti Dhaabbata Mootummoota Gamtoomaniitti Jaarmiyaa Turizimii Addunyaatiin qe'ee turizimii filatamaa bara 2023 jedhamee filatamuudhaan sadarkaa addunyaatti galmaa'eera. Komunikeeshinii Arsii Lixaa

Dorgommii shaampiyoonaa atileetiksii 23ffaa Afrikaa, Kaameeruunitti adeemsifamaa jiruun meetira kuma 10n: 🥇Nibrat Malaak 28:52.26n 1ffaa🇪🇹 🥈Gammachuu Didhaa 28:52.78n 2ffaa bahuun xumuran🇪🇹

#Ergaa_Obbo_Shimallis_Abdiisaa‼️ ** Gaazexaa Bariisaa 👉"Sii ba'ee biyyaa sii ba'e yoo muujjaan ollaa siif ta'ee, jaldeessi daboo siif ba'een hundeeffama Shaggariin deebii argatee Oromoon hundi siif galee deebi'ee siif gale..hanga jedhamutti hojjetna 👉Maaster pilaanii Shaggar aarsaa qaaliin dhugoome hoggansi hundi of eegganno guddaan hojiitti hiikuu qaba 👉Ummatni Oromoo jireenya magaalaa jiraachuuf roga maraan of qopheessuu qaba. 👉Daandii ammayyawaan har'a ijaarsisaa eegalame ummatni harree osoo hintaane qabeenya horatee konkolaataa irra oofuuf of qopheessuu qaba 👉Oromoon magaalaa akkamii ijaaruu akka danda'u Shaggar ijaaruun firaafi diinaatti agarsiifna. Waaqshuum Fiqaaduutiin

Kominikeeshinii bu’aqabeessa tajaajila si’ataaf ****** Gaazexaa Bariisaa Wirtuu Leenjii Dhaabbata Pireesii Itoophiyaafi Bulchiinsi Magaalaa Shaggar wajjin ta’uun leenjiin mataduree, ‘Kominikeeshinii bu’aqabeessa tajaajila si’ataaf’ jedhuun qophaa’e kominikeetarootaafi ogeessota miidiyaa Magaalaa Shaggariif Finfinneetti kennamaa jira. Leenjicha kennaa kan jiran miseensi Mana Maree Bakka Bu’oota Ummataafi miseensi Boordii Dhaabbata Pireesii Itoophiyaa Doktar Nagarii Leencoo akka jedhanitti, kominikeeshiniin namaafi nama, mootummaafi mootummaa, mootummaafi ummata, dhaabbileefi dhaabbilee, biyyaafi biyya gidduutti hariiroo uumuuf daran murteessaadha. Mariifi hariiroon akka uumamu kan taasisu kominikeeshiniidha. Kominikeeshiniin yaada waliif hiruufi odeeffannoo waljijjiiruuf gargaara. Ajandaan kominikeeshinii keenyaa yeroo hunda kan waa irraa barannuufi biyya keenya kan ijaaru ta’uus eeraniiru. Kominikeeshiniin akkuma bu’aa guddaa qabu yoo sirnaan itti hinfayyadamne miidhaa guddaa qaqqabsiisa. Kanaafuu ittifayyadama miidiyaafi kominikeeshinii keenyatti sirnaan fayyadamuu qabna jedhan. Ittigaafatamaa Waajjira Kantiibaa Magaalaa Shaggar Obbo Darajjee Magarsaa akka jedhanitti, hojiileen misoomaa, hawaasummaafi dinagdee magaalattiitti adeemsifamaa jiran kominikeeshiniidhaan deggeramuu baannaan bu’aqabeessa ta’uu hindanda’n. Leenjichi humna kominikeeshiniifi miidiyaa magaalattii cimsuu keessatti gahee guddaa qaba. Leenjichi hojii kominikeetaroonniifi ogeessonni miidiyaa keenya barumsaafi muuxannoon hojjechaa turan caalaatti cimsuun hojii bu’aqabeessa akka hojjetaniif kan isaan kakaasu ta’uu himanii, leenjicharratti ogeessonni miidiyaafi kominikeeshinii kutaalee magaalattii 12 keessaa walitti babba’an 160 irratti kan hirmaatan ta’uus eeraniiru. Leenjiin saayinsii miidiyaafi kominikeeshiniirratti xiyyeeffachuun kenname kun hojii miidiyaafi kominikeeshinii keenyarratti daran nu gargaara kan jedhan Obbo Darajjeen, bulchiinsi magaalaa keenya gara fuulduraattis Dhaabbata Pireesii Ittoophiyaa waliin hariiroo cimaa uumee waliin hojjechuuf sanada waliigalee qopheessuuf karoorfatee hojjechaa jiraachuus eeraniiru. Leenjitoonni leenjicharratti hirmaatan akka jedhanitti, Dhaabbanni Pireesii Itoophiyaa dhaabbata miidiyaa muuxannoo waggaa 80 ol qabuudha. Leenjiin bu’aqabeessummaa kominikeeshiniirratti hundaa’uun isaaniif kenname hojiisaaniirratti daran kan isaan gargaaru ta’uufi gara fuulduraattis cimee ittifufuu akka qabu gaafataniiru. Dhaabbata Pireesii Itoophiyaatti Dursaan Garee Wiirtuu Leenjii Obbo Sulxaan Mahaammadnuur akka jedhanitti, Dhaabbanni Pireesii Itoophiyaa dhaabilee miidiyaa buleeyyii biyyattiin qabdu keessaa isa tokko. Dhaabbatichi muuxannoo miidiyaa waggoota 83f kuufate leenjiilee garagaraa qopheessuudhaan dhaabbilee biyyattii biroof qooduuf wiirtuu leenjii hundeessee hojjechaa jira. Wiirtichi erga hundaa’ee waggaa sadii yoo ta’u, kaayyoon hundeeffamasaa hanqina gama miidiyaafi kominikeeshiniitiin mul’atu guutuudha. Wiirtichi waggoota sadan darbaniif dhaabbilee mootummaa federaalaafi naannoleef leenjiilee gaggabaaboo hojiirraa kennaa turuu kan himan Obbo Sulxaan, leenjiin wiirtichi kennu gara fuulduraattis cimee kan ittifufu ta’uu himaniiru. Natsaannat Taaddasaatiin