خَطْوة تَغيُر 💛

من البديهيات المفقودة أن يتصارح الخاطب والمخطوبة بكل العيوب الخفية أو المشاكل الصحية أو العادات الشخصية , التي قد تتسبب في إيذاء أو مضايقة الطرف الأخر وللطرف الأخر حرية قبولها أو رفضها , ورفض إكمال الخطبة إن أراد ذلك يعني إيه ؟ هاحكيلكم حكاية سريعة قد يجدها البعض مضحكة أو عادية لا تسبب مشاكل أحد الشباب من فترة بعد فترة خطبة ستة أشهر , وكانت العلاقة مع خطيبته جيدة بغير مشاكل , بعد ما أتموا الزواج بفترة بدأت المشاكل تحصل وبقت زوجته تنفر منه وبتتهرب بعد وقت اكتشفنا إن المشكلة بكل بساطة ,,, إن الشاب ده بيشخر وهو نايم بس مش شخير عادي , لأ هو كان لسبب ما _ يحتاج تدخل طبي غالبا_ بيشخر بشكل عالي جدا ومزعج لأقصى درجة , والبنت طبيعتها ماقدرتش تستحمل ده المشكلة زادت لما الشاب رفض يتعالج ومشي وراء كلام الجهلاء " الست الأصيلة تستحمل من جوزها أي حاجة " الأمر تصاعد لحد الطلاق هتلاقيها مضحكة غالبا لأن ذهنك هايستدعي الفيلم الكوميدي الشهير بس الحقيقية إن الأمر بالنسبة " للبعض" مزعج لأقصى درجة . حالة تانية لزوج بيرفض الاستحمام , ومهمل في نظافته الشخصية بشكل قذر وبالرغم من إنه محترم في التعامل , لكن المشكلة دي _ مع تحرج زوجته من إخباره صراحة في البداية , لحد إعتباره إنها إهانة جارحة لكرامته لما صرحت له لما فاض بها _ وصلتهم برضه لشبه إنفصال حاليا , لأنه شايف إنه عادي ! . البعض هنا سواء رجال أو نساء , ممكن يعلق ويقول " دي حاجة عادية ممكن تعدي " هاقولك صح , بالنسبة لك ممكن تعدي , لكن ممكن بالنسبة لغيرك نفسيا بيكون مستحيل تعدي أنا مثلا لا أطيق أبدا الجلوس مع شخص بيصدر أصوات وهو يأكل أو بيأكل وفمه مفتوح والأمر بالنسبة لي مش مجرد إزعاج , لأ ده بيوصل لإحساسي بألم حقيقي في صدري وضيق تنفس , لو كنت مجبر أقعد معاه لوقت لسبب ما ومع ذلك فالبعض هايشوفها عادية بالنسبة له , لكنه عمره ما هايتخيل الألم إللي شخض زيى بيحس بيه . وقس على ذلك كل المشاكل إللي انت _أو انتي _ عارف إنه عند بعض الناس ممكن تسبب أزمة ومشكلة , فيا إما تُصارح الطرف التاني " قبل الزواج " بها , أو ممكن تتعالج منها أو تجاهد نفسك للخلاص من العادة دي قبل الزواج لو كان ذلك في الإمكان .