Your Home

مش عارف انا لوحدي اللي كده ولا لأ، بس أنا مقياس علاقتي بالناس هو تواجدهم في اللحظات المهمة "بالنسبالي" فترة مرضي، مناسبة مهمة ف حياتي، حدث محتاج أشوف اهتمامك بيه زي يوم ميلادي مثلاً، محاولتك للتواجد جمبي، بحثك عن وقت عشان تقضيه معايا، شعورك وتقديرك لفترة حزني آه بحط في الإعتبار مشاغل الناس ده أكيد، لكن لو أنا حاطط شخص ف مكانة مهمة أوي عمري م بقصر ف كل ده حتى لو انشغلت وبكون مستني المِثل على الأقل لو شخص فشل في كل ده ف هو بالنسبالي مبقاش محصل حتى علاقة زمالة ف حياتي

الحب وحده لا يكفي لنجاح اي علاقة، وهنا بكلم عن العلاقات الناضجة الواضحة اللي المفروض أن الجواز أهمها. الحب هو نقطة البداية غير العقلانية للعلاقة، وقد تكون نقطة البداية عقلانية بسبب إقتناع عقلي أو حتى توافق ظهر في قعدة صالونات. وفي الحالتين هنلاقي إن الشيء الوحيد اللي بيخلي العلاقة تستمر هو مجهود الطرفين مع بعض ولبعض. بمعنى أن كل طرف بيضحى، ويغير من نفسه عشان يقرب على قد ما يقدر من الصورة الكويسه اللي الطرف التاني شايفه عليها سواء في الصفات أو في الأفعال اللي الطرف التاني متوقعها منه. وفي نفس الوقت يحسسه دايمًا أنه مش لوحده وأنه جنبه ومعاه ومشاركه في كل حاجة، من أبسط الحاجات لأصعبها. وميكتفيش أن يقيس كل حاجة بعقله بس، ولكن لازم يحاول يشوف كل حاجة من منظور الطرف التاني، فيفهمه أكتر ويقرب من روحه أكتر. وهو ده معنى أن الطرفين بيبقوا واحد. والـ٣ حاجات دول لازم يحصلوا من الطرفين عشان العلاقة تفضل صحية وتستمر. وطبعًا المجهود ده صعب جدًا ومفيش فيه نجاح مطلق، بس لو عايز تكمل لازم تحاول وتتعب، عشان هتستسهل هتخسر الطرف التاني وصدقني هتندم. المجهود ده وحده هو اللي بيحول الحب أو الإقتناع لعِشرة، بمعنى إنك مش بتشوف الطرف الآخر حبيب أو شريك، بل الأمر بيتحول لإن وجوده في حياتك هو مُسلّمة بديهية أو شيء لا يمكن الإستغناء عنه، هو روحك في جسد آخر فعلًا. وطبعًا مش بقصد إن طرف واحد بس يفني ذاته في الطرف الآخر، ولكن قصدي أن الطرفين يفنوا ذاتهم في بعض ويكملوا بعض ويشجعوا بعض ويكبروا مع بعض ويكونوا شيء أكبر منهم، بل أكبر من الحياة نفسها، غير كده فالطلاق هو النتيجة الطبيعية. أو أن طرف يفني نفسه ويضحي بكل حاجه عشان الطرف التاني يتعامل براحته كأنه لوحده في العلاقة، فالعلاقة تكمل بطرف ميت وطرف لاهي، في صورة علاقة مريضة ومدمرة لكل الأطراف اللي فيها. لذا حاول تقرب من الصورة الي راسمهالك الطرف التاني وحسسه دائمًا أنك معاه وجواه وأفهم عقله بأنك تبص من منظوره المختلف عن منظورك، ضحوا جزئيًا مع بعض، مش لوحدك وإلا ابعد أحسن لك، وقربوا من النقطة المنتصف اللي تجمعكم أنتم الإتنين عشان تكونوا شيء أكبر منك يقدر يكمل

بعد أعوامٍ طويلة من التخبط والشك والأسئلة، ومقارعة الأيام صعودًا ونزولاً.. أرجو أنني قد وصلت أخيرًا إلى طمأنينة قلبي. وهذا ليس زهدًا، فلم أزهد في الدنيا بعد، ولا أعتقد أنني سأزهد فيها يومًا ما وإن شاب رأسي ورق عظمي، سأظل- برغم كلّ شيء- أحلم وأعمل وأرسم وألون وأكتب وألعب بحماسة الأطفال ودهشتهم وإنبهارهم بكل ما هو جديد وجميل وممتع وسحري. وستظل الأشياء البسيطة كضمة من الورد، أو وجبة لذيذة، أو سهرة أمام فيلم تُسعدني وتروقني، كما تُسعدني وتروقني الأشياء الكبيرة أيضًا. وفي الوقت ذاته، فلم ييبس قلبي بعد ولم يتحجر، ولم يفقد رهافته أو حساسيته للألم رغم إعتياده ذلك. وستظل تحزنني الأشياء وتبكيني.. سواء تلك التي تحدث لي، أو لغيري. لكن ما أختلف في داخلي هنا هو إختفاء الغضب والسخط. أنا لا أغضب أبدًا، أي أنني قد رضيت بنصيبي سواء كان خير أو شر.. فأفرح إن كان خيرًا وأحزن إن كان شرًا. لكن الحزن والفرح هذين، إنما ينبعان من رضائي بنفسي، وإيمانٍ لا يتزحزح أن كل ما يحدث لي هو علي أي حال خيرًا ما دمت واثقًا من خطواتي ونفسي. وللأمانة لم يحدث هذا التغيير بين عشية وضحاها.. أستغرقني الأمر أعوامًا طويلة وتجارب عديدة

مُشكلة الرفاهية أنها تضلّل البشر عن حقيقة هشاشة عالمهم؛ حد أنهم يخلطون بين ما هو قيد غير موضوعي لا ضرورة له وما لا يزال كذلك، وما بين العَابر العَارض الذي يتحتم تجاوزه، وما هو نتاج لتقدم الوعي بالواقع مما تراكم عن خبرة آلاف السنين؛ فيسائلون كل شيء دون منهجية أو سياق، ويعيدون إختراع العجلة باستمرار

من المؤشرات الأساسية اللي تعرفك زبالة البني آدمين إنهم مهما أدعوا قيم ومبادئ أخلاقية وتغنوا بيها هتفضل مفاهيمهم المُشوهة عن النجاح والفشل، وعدم تمييزهم بين القيمة والتمن هي حجر الأساس لتقيمهم؛ لأنها تقريبًا بتنعكس على كافة ممارساتهم التانية، بدءًا من سلوكياتهم الشخصية ودواير معارفهم وطبعًا مسيرتهم المهنية؛ وهكذا بقي.. لو لقيت حد بيحترم نجاح بالتعريص أو مكاسب شرمطة إعرف إن جواه معرص وشرموط كبير، لسه ماخدش فرصته في التورتة

تخيل تصحي يوم تلاقي ابوك وامك بيقولولك بص يابني احنا مش متوقعين منك حاجة..تبقي ناجح فاشل ..اتجوزت عنست..مفيش مسيرة عشان تكملها..انت حر. بعدين جالك ممثل من الدولة وقالك احنا بنعفي حضرتك من اي مهام وطنية..النهاردة من حقك تبقي نفسك مش لازم يكون عندك سردية ليها علاقة بحبك لبلدك...مفيش حاجة مطلوبة منك عشان تثبت ده. انت حر.. وبعدها شوفت شيخ وقالك ربنا راضي عنك كدة كدة..انا مليش اقولك اي حاجة..انت حر في علاقتك بيه. مينفعش احكم عليك ولا اخمن اي حاجة في السياق ده عنك. بعدين الناس في الشارع اتجمعوا وقالولك ..بص احنا من هنا ورايح في حالنا..لا هنبصلك بعين ولا هنتدخل في عيشتك. طول ما انت في حالك احنا في حالنا. تفتكر هتعمل ايه باقى اليوم؟ ...مش عارف..اعتقد انك مش هتلاقي حاجة تعملها ..المجهود اللي بتبذله كل يوم عشان اللي فوق ده محصلش مدالكش فرصة تعرف انت ايه بالظبط. كل اللي انت عارفه عن نفسك هو اللي الناس اللي فوق دول هيوافقوا عليه ..ومين عارف يمكن لو سابوك تبقي نفسك احتمال تبقي زي ما هما عايزين برضه.. بس اعتقد مش هتعرف ده في حياتك من غير خناقة

الموضوع كبر مني عالاخر والله ف يارب

ما زلت محتفظ بهواية تأمّل وشوش الناس. في الترام والزحام والقهاوي.. ما زلت مشدوه بفكرة إن ورا كل واحد منهم حكاية ولكل واحد فيهم عالم وتفاصيل ومخاوف وأحلام ومصير ونصيب من الخير و الابتلاء والفرح والبُكا عايشهم بتنوعات مختلفة. بحاول أخمن واتخيلهم كلهم.. مش دايما خيالي بيقدر يساعهم لكن دايما بتسري جوايا رهبة غريبة الجمال.. واقول سبحان من عنده علمهم جميعا، لا يضل ولا ينسى.. وافتكر من تاني ليه روحي بتحب الفن.. مش بس عشان بيخرجني برة حدود فُقاعتي وتصوراتي الشخصية عن الناس والمعايير والحياة، لكن كمان لإنه بيحطني ف قلب الحدودتة اللي معنديش مفردات كافية للتعبير عنها. فا ييجي الفن ويخليني اشوف، واكتشف، واحس. يمكن عشان كدة بسقف ف آخر أي فيلم احترم الشارع وأعماقه. كإني ببقى عايز اقول أيوة بالظبط، بالظبط....شكرا!

يا عبيط افهم؛ الحياة عمالة تخزوقك مع الناس الغلط عشان يبقى عندك ريفرنس تقدر تعرف بيه الشخص الصح وتحس بقيمته لما أخيرا يظهر. واللي هو غالبا مش هيطلع الشخص الصح أوي ولا حاجة لإن فكرة الـ ذا وان والشريك المثالي ما هي إلا حيلة رومانسية من خيالنا الطفل لنستمر في البحث والتحمل بينما واقعيا فهو وعلى حسن الحظ الشخص الذي سيكون في مقدورك الانسجام أخيرا مع مساوئه حيث أنك تعرضت من قبله لمن هو أسوأ منه

معلش أصله طول عمره مش متعود غير ع الحب المشروط اللي لازم يتساوم عليه أو يدفعله قرابين فا لما بيتقدمله ببلاش أي حاجة طيبة بيتلغبط ويرتبك زي م انت شايف كدة