عشوائيات 🎶

أي وعكة أو ضيقة نفسية أو ندوب عاطفية ناتجة عن أيًا يكن اللي اتعرضت له، لو عاوز تتعامل بشكل صحي معاها.. محتاج في مرحلة ما تسيبها تمشي، كدا كدا أي شعور جواك سلبي أو إيجابي، ومهما كانت حدته بياخد وقت ويتلاشى، فـ الفكرة هنا إنك تساهم إن الوقت دا يقل، متمسكش في الشعور وتخليه يعتليك مدة أطول. مشاعر التحسر على التجارب القديمة، مشاعر التخوُّف من التجارب المجهولة الجاية، اتخلى عنها كلها، وعيش دلوقتي في تخفف تام من أي ثقل نفسي، في سمو روحاني غير مُقيَّد. كلام بسيط وسهل ممتنع، ورغم الوضوح والبديهية، معظم البشر مقتنعين بالعكس، شايفين إن حياتهم كلها لابد إلزامًا تتمحور حوالين تجاربهم السيئة ومعاناتهم، مش عاوزين يتجاوزوا بيرفضوا دا حتى لما يبقوا قادرين عليه لدرجة إن هويتهم بتبقى مبنية على الغرق في مأساة رافضين يسيبوها!! والموضوع مش مقتصر عليك انت لوحدك، بعض الفلاسفة أنا وانت عارفينهم استغلوا دا وبنوا مذاهب وتوجهات كاملة معتمدة على العدمية والتشاؤم والسلبية.. اتشهروا، والناس اعتنقت أفكارهم وقدسوها منغير ما يعرفوا إنها وليدة عن عقول ضحايا ألم نفسي لم يتم التعامل معاه بشكل صحيح، بل تم التمسك بيه ونسج آلاف الأفكار من خلاله.