🤍 جنة الدنيا 🤍

السلام عليكم ورحمة الله وبركاته صباح الخير يا شباب سيدنا عمر بن الخطاب رضي الله عنه كان له كلمة قوية جدًا، تستوقف أي حد حاسس إن أيامه بتضيع منه! كان بيقول: «إني لأكره أن أرى أحدكم سَبَهْلَلًا؛ لا في عمل دنيا، ولا في عمل آخرة». يعني إيه «سَبَهْلَلا»؟ يعني إنسان سايب نفسه فاضي من غير عمل.. لا هو بيجتهد في دنياه، ولا مهتم بآخرته!! يعني مثلًا لا بيشتغل ولا بيدرس بضمير، ولا بيحاول يطور من نفسه ويبني مستقبله.. ولا بيحافظ على صلاته، ولا بيجاهد نفسه في فعل الطاعة والبُعد عن المعصية.. والأخطر إن الأيام بتعدي وهو مش واخد باله! يوم ورا يوم، وفجأة يكتشف إن سنين كتير عدت، وهو لسه مكانه. وعشان كده إوعى تنسى إن يومك اللي بيبدأ دلوقتي ده رأس مالك؛ فما تسيبهوش يعدي منك من غير قيمة.