أبو عايد

للبشر أنواع .. من قدم الزمان تختلف أنواعهم حسْب الظروف منهم اللي يتّقي .. له جنتان منهم اللي عاصيٍ ربٍّ رؤوف غافر الزلّات .. من ناسٍ وجان مْجاوب الداعي إذا مدّ الكفوف منهم اللي تاب عن ذنبه وصان مقعده في جنةٍ ... بين الألوف منهم اللي مْجاهرٍ في كل مكان يستبيح المعصية  .. فيها شغوف منهم اللي .. لا فعل شيٍ حسان نيّته يبْي البشر .... كلّه تشوف الرّيا يا صاح .. ما به أي هوان إن فعلت الخير استر في كهوف واسبق المذّن إذا حان الأذان واعتكف يا صاحبي نعم العكوف - أبو عايد

إن بكيت أبكي على فقد القريب وان شكيت أشكي من الهمّ الجلل وان حكيت أحكي معَ خلّ أو حبيب وان شرهت أشره على أكبر فعل وان ندمت بْليل ما نومي يطيب وان شقيت بْيوم ما أفقد أمل وان بغيت أطلب أنا ماْطلب غريب وان تعبت أصبر وصبري ما يمل وان هقيت بشيّ ظني ما يخيب وان خطيت آسف كريمٍ ما بخل وان سكتّ الصمت بي دايم رهيب وان نطقت القول ما يومٍ كمل وان كتبت الشعر به نظْمٍ عجيب وان تغنّيت القوافي ما تكل - أبو عايد

لو خذاك الوقت عنك ما خذاني لو نكرت الشوق عني ما نكرته الوفا والصدق هي ذيك المعاني استحالة يا ضنيني لو فهمته لو كتبت أبيات عنك أو أغاني تستحق البيت اللي بك كتبته؟ الوله غنّى ومن كاسه سقاني والشعور أحيان يفضح لو كتمته والسهر ذاك السهر يومه عطاني ما عطاك ولا خذاك ولا أخذته ما شقاك البعد اللي قد شقاني ما جفاك النوم اللي قد سرقته والعيون السود في ذيك المحاني ساكنة فيها من يومٍ نظرْته ما نكرت الود عنك لو ثواني ما نكرته حتى لو إنك نكرته - أبو عايد

يا ملاك الموت عجّل بالزيارة من قريب أحتريك وماني خايف ما أذلّ مْن الممات تسألوني ليه تزهد شالسبب أمرك عجيب السبب فيني خفايا من هموم ومن شتات ما أبوح بكلّ شيٍّ ربّي عالم بي رقيب والكدر والضيق فيني كنّهم دجلة وفرات أرتوي منهم دموع وما يجفّ أبدٍ صبيب ما وقفن يومٍ عن الما دايمٍ هن ساكبات ما نفع فيني علاج ولا سرير ولا طبيب أجرع الونّات في ليلي وحيد وفي سكات شبْت في عزّ الشباب وابتدى راسي يشيب تايهٍ دربي وناسي لي مسافات وجهات للحزن شمسٍ تضوّي لي سماي وما تغيب للهموم أقمار فيني حايمة دوم بْثبات يا منيّة قرّبي لي يا وطن قلبي غريب يا ملاك الموت عجّل غربتي كانت حيات - أبو عايد