🧠عەطا شێخ عەلی::عەطایی

⚡️🧠ئەو جەنگەی پێش دەستپێکردنی دەیدۆڕێین! ئەگەر پێش پەنجا ساڵ لە خەڵکی بپرسرایە دەربارەی گەورەترین ئەو تەحەدییانەی ڕووبەڕووی گەنجان دەبنەوە، باسی ھەژاری، نەزانی، یان کەمیی دەرفەتەکانیان دەکرد. بەڵام ئەمڕۆ تەحەدییەکی تەواو جیاواز سەریهەڵداوە: لاوازیی توانای بەرەنگاربوونەوەی ئارەزووەکان. ✍🏻🔴بەشێکی زۆری جیهانی هاوچەرخ لەسەر یەک بیرۆکە بونیاد نراوە: مرۆڤ هەرچییەکی بوێت، دەبێت دەستبەجێ دەستی بکەوێت! * هەست بە بێزاری دەکات؟ مۆبایلەکەی دەکاتەوە. * کات بەسەربردن و کەیفسازی دەوێت؟ لە چەند چرکەیەکدا هەزاران ڤیدیۆ دەدۆزێتەوە. * ئارەزووی شتێک دەکات؟ تەنها بە داگرتنی دوگمەیەک داوای دەکات. * دەیەوێت سەیری هەرچییەک بکات؟ هەموو شتێک بەردەستە. لەگەڵ تێپەڕبوونی کاتدا، تەنها ئامرازەکان نەگۆڕان... بەڵکو دەروونی مرۆڤەکانیش گۆڕان. 🎯🧨🧠ئیرادە ڕێک وەک ماسولکە وایە؛ ئەگەر ڕابێت لەسەر ئەوەی هەموو شتێک دەستبەجێ بەدەست بهێنێت، توانای ئارامگرتنی لاواز دەبێت. وە ئەگەر ڕابێت لەسەر وەڵامدانەوەی هەموو حەز و ئارەزوویەک، توانای بەرەنگاربوونەوەی نامێنێت. > لەبەر ئەمەشە، ئەو کێشەیەی کە زۆرێک لە گەنجانی ئەمڕۆ بەدەستیەوە دەناڵێنن کێشەی کەم مەعریفەیی و نەزانین نییە؛ چونکە ئەوان زیاتر لە نەوەکانی پێش خۆیان چاکە و خراپە لەیەک جیا دەکەنەوە و دەیناسن. بەڵکو کێشەکە ئەوەیە لە ژینگەیەکدا دەژین کە جێبەجێکردنی ئەو شتانەی دەیزانن، لە هه‌موو کاتێک قورستر بووە. تەحەدیی ڕاستەقینە چیتر گەیشتن بە حەقیقەت نییە، بەڵکو جێگیربوون و ڕاوەستانە لەسەری. بۆیە یەکێک لە مەزنترین تایبەتمەندییەکانی شەریعەتی ئیسلام ئەوەیە کە تەنها مەعریفە و زانین بونیاد نانێت، بەڵکو ئیرادەش بونیاد دەنێت: * **نوێژ**، فێری دیسپلین و ڕێکخراوەییمان دەکات. * **ڕۆژوو**، فێری دواخستنی حەز و ئارەزووەکانمان دەکات. * **پاراستنی چاو لە حەرام**، فێری کۆنترۆڵکردنی دەروونمان دەکات. * **زیکر و یادکردنەوەی خودا**، فێری بەرەنگاربوونەوەی غەفڵەت و بێئاگاییمان دەکات. ئەمانە تەنها عیبادەتگەلێکی دابڕاو نین لە ژیان، بەڵکو ڕاهێنانی ڕۆژانەن بۆ سەرکردایەتیکردنی دەروون، لەبری ئەوەی دەروونەکە پێشەوایەتی خاوەنەکەی بکات. هەر کەسێک سەرنجی حاڵی زۆربەی خەڵکی ئەمڕۆ بدات، بۆی دەردەکەوێت کە گەورەترین زیان و دۆڕان کاتێک ڕوونادات کە مرۆڤ دەکەوێتە هەڵەیەکی دیاریکراوەوە... بەڵکو کاتێک ڕوودەدات کە توانای بەرەنگاربوونەوەی هەڵەکەی نامێنێت! کاتێک کە ئارەزووەکان دەبنە سەرکردە، و عەقڵ و ئیمانیش دەبنە پاشکۆ و شوێنکەوتە. لەبەر ئەمەش، ئەو پرسیارەی کە لە ساڵانی داهاتوودا گرنگییەکی زیاتری دەبێت، ئەوە نییە: «چەندە دەزانین؟» بەڵکو ئەوەیە: «ئایا هێشتا توانای کۆنترۆڵکردنی خۆمانمان هەیە؟» نەتەوەکان بەو کەسانە بونیاد نانرێن کە ئارەزووی بەهێزتریان هەیە... بەڵکو بەوانە بونیاد دەنرێن کە ئیرادەی بەهێزتریان هەیە. 🧠✍⚡️هیچ گەنجێک نییە سەرکەوتن بەسەر نەفسی خۆیدا بەدەست بهێنێت، ئیللا لە داهاتوودا زیاتر توانا و هێزی دەبێت بۆ سەرکەوتن بەسەر زۆربەی ئەو کۆسپ و تەگەرانەی کە لە ژیاندا دێنە ڕێی. د. عبد الکریم بکار