احمد الريح "زحزحة"

بت الخرطوم حاشاك اللوم بيتك مهجور خاطرك مكسور قلبك مهموم عارفك ياراقية على وطنك بتغيري عموم ماتشيلي هموم كل السودان بيتك خشي نقاسمك زادنا نطرز ليك من حبنا ليك يا غالية هدوم ده قدر مقسوم ده سهم مسموم لكن محسوم في كل مدينة وقرية اخوك وابوك واختك مروان هادية ومروة وعشة وصالحة وكلتوم الليل مابدوم لابدَّ صباح باكر يشرق لوحتى جفا عينيك النوم وانا اخوك يابت دقي الأبواب تلقي الأحباب راجياك بالكوم والنبرة حترجع لي بيتا والعبرة الفيك أنا خبيتا وثقافتك كلها حبيتا والإبره حتدخل في خيتا ونغزل غنواتنا ونتشابل ونزغرد رغم الزمن الشوم حتلاقي حبيبك لابدَّ أيام يابينية وتتعدَّ والمقرن يضحك من تاني ومن تاني نعوم بت الخرطوم يابت على كيفك ماتخافي انا قلبي عليك وانا حاسس بيك ده طريق مرسوم أمشيهو وأضحكي عز الخوف أمشيهو وباكر تبقى حكاوي وتبقى رسوم أمشيهو كماشاءت قدميك ومحل ماتختي وطن يرجاك وكل السودان يابت خرطوم بت الخرطوم .. زحزحة