دورة مرن عقلك

القرار الغلط أفضل ميت مرة من حالة اللاقرار

كل ما هيكون عندك بدائل متعددة للمشكلة الواحدة هتكون محتار اكتر لكن المهم لما تقرر تعرف ان دى مجرد محاولة لو مانفعتش ندور على بديل تانى و ادينا بنتعلم ما تخافش من اتخاذ القرار حتى لو هيطلع غلط

الجزء الاحمر من مخنا دا هو المسئول عن الغرائز و الانفعالات و دا احنا مشتركين فيه مع الزواحف ..يعنى دا عقل الزواحف الى مش بتعمل حاجة غير انها تاكل و تشرب و تخلف و تهرب من العدو او تهاجمه او تتسمر و تختفى منه لما دايما بتكون قراراتنا نتيجة انفعالاتنا و رغباتنا يبقى غالبا الفكرة او القرار طالع من الحتة دى الجزء الملون باللون الاخضر هو الجزء المسئول عن المشاعر الحب او الكره و الجزء دا هو مخ الثدييات الى بتزيد عن الزواحف انها بترعى صغارها لانها بتحبهم و بتنقى الزوج لان بيبقى فيه قبول او مابيبقاش و ممكن كمان تحزن و تبكى لما تكون قراراتك نابعة من حبك لحاجة او كرهك ليها بس دا للاسف نتايجه بتكون وخيمة على المدى البعيد اما الجزء المتلون بالاصفر من مخنا فهو دا الى ربنا ميز بيه الانسان دا مكان التفكير المنطقى و قدرات العقل و هو دا الى محتاجين أوى ندربه كويس لاننا لم نتلق تدريب ليه فى حياتنا للاسف الشديد لا فى بيوتنا و لا مدارسنا و هو دا الجزء الى احنا بنشتغل عليه فى الدورة دى على سبيل المثال : قرار الزواج النابع من رغبة جنسية علشان البنت حلوة اوى او الولد وسيم لما يكون نابع من عند و غضب من اهلى علشان هم مش موافقين عليه لما يكون نابع من احتياج لحد يخدمنى او حد يصرف على و يوفر لى طلباتى المادية دى كلها احتياجات غريزية لما القرار يكون نابع نتيجة الحب بس انا بحبه او هو بيحبنى دون النظر الى اعتبارات النجاح الاخرى بيبقى القرار طالع من الجزء الاخضر و المشاعر دى بتكون قوية جدا لدرجة انها بتطغى فعلا على العقل و قدراته لكن لما يبقى القرار طالع من المستوى الاعلى هتبص للشخص دا نظرة موضوعية و هنقدر نشوف ايه الحاجات الايجابية الى فيه و ايه السلبيات الى ممكن تعمل مشاكل بعد كدة ممكن هتسمع لرأى الاخرين فيه بموضوعية لان ممكن يكونوا شايفين حاجة انا مش شايفاها هتقدر تشوف الظروف الى حواليك الفرص منها و المعوقات هتبقى محدد اولوياتك فى شريك الحياة و هتشوفه من منطلق الاولويات بتاعتك مش هنقدر نلغى المستويين التانيين خالص لان لازم يبقى فيه ارتياح مبدئى للشكل (قبول غريزى ) و قبول نسبى للشخصية ( قبول قلبى ) اكيد لكن علشان قرارنا يبقى صحيح مهم جدا ندرب الجزء الاصفر علشان يبقى ليه الحاكمية فى النهاية علميا التفكير المنطقى الايجابى ممكن يثير الجزئين التانين مع الوقت و دا بيحصل لما الحب بييجى بعد العشرة الطيبة و لما الحب بيحصل الرغبة بتزيد مؤكد دوام النظر الى ايجابيات الاخر و التغاضى عن سلبياته غير المؤلمة بتولد حب و ممكن كمان رغبة

الخريطة او المخطط الى بنفكر بيه لاتخاذ القرار

مهارة عقلية جديدة نمارسها كل يوم داخل اسرنا لكننا للاسف نمارسها بشكل غير صحيح

لماذا لانحترم وجهات نظر الاخرين ؟ لاننا شفنا ابونا و امنا وهم بيتخانقوا على ا. اختلاف بينهم و الى رأيه بيمشى هو صاحب الصوت العالى لاننا ماشفناهمش وهم بيختلفوا و يتحاوروا مع بعض كانت الحوارات تجرى فى الحجرات المغلقة و ما شفناش كيف يدور حوار ناجح بين المختلفين لاننا اتربينا على القمع و انك صغير مابتفهمش و لازم تسمع كلام الكبار الى بيفهموا لاننا اتربينا على ان التعبير عن راينا ممكن يعرضنا للاهانة و السخرية و النقد و اللوم لاننا لما كنا بنختلف مع اخواتنا فى البيت كنا بنزعق و نصرخ او نضرب بعض او نعيط و محدش علمنا ازاى نقدر نتفاهم مع بعض لاننا لما رحنا المدرسة كنا بنعد زى الكراسى الى احنا قاعدين عليها متنحين للمدرس الى قاعد يتكلم يتكلم و ملكش حق انك تتكلم او حتى تناقش او تسأل فى الى بيقوله لاننا لما كنا شلة فى المدرسة كان فى الشلة زعيم هو الى بيقرر كل حاجة و الكل وراه من غير ما نتعود على ادارة حوار و الى يختلف مع الزعيم يطرد من الشلة لاننا لما اشتغلنا محدش كان بيسمعنا احنا بنسمع تعليمات المدراء و بننفذها بدون اى كلام او طرح للرأى أو اى اعتراض علشان أكل العيش طبعا لاننا لما اتجوزنا حاولنا نرضى اهل العروسة او العريس علشان الجوازة تمشى من غير مانحاول نتكلم و نتفاهم فى حلول وسط ترضينا احنا الاتنين لاننا لما بنخلف بنعمل كل الى اتعمل فينا و بنربى ولادنا بنفس الطريقة طريقة ان واحد يتكلم و التانى يسمع الكلام لاننا كمان كلنا عايشين مع بعض و بس فى بيئة كلنا فيها كدة فمشفناش نماذج حوالينا ازاى الناس ممكن تختلف باحترام

مهارة جديدة من مهارات العقل و احترام اراء الاخرين معذرة مش راضى ينزل كملف صوتى هنا و مش عارفة ليه هحاول فى وقت تانى انزله ان شاء الله https://www.facebook.com/permalink.php?story_fbid=1833866740207503&id=100007525837989