ائلیمیز - دیلیمیز elimiz_dilimiz

✍ «گول آچان دئییل بو توپراق!» سنسیزلیک نه قدر چتین سنسیزلیک نه قدر آغیر یوخلوغون اؤلوم قوخوسو یوخلوغون اوخشاما دوغور ثانیه‌لر بیر ایل کئچیر هر یئردن داریخما یاغیر داریخما دولور جانیما نفس نفس، منی بوغور ایچیمده بوغونتو اسیر تیتره‌ییرم دیرین دیرین دومان دولور اوره‌ییمه داریخیرام درین درین اولموشام بویاسیز پاییز تؤکولورم یاپراق یاپراق مین باهار گلسه ده بئله گول آچان دئییل بو توپراق آیریلیق ایکی بؤلونمک آراز کیمی یالقیز آخماق هر گون بو تایدان او تایا او تایدان بو تایا باخماق... #میرحسین_دلداربناب ۱۴۰۳/۰۷/۲۰ @eldilimiz

✍ «آدام اؤز ایچینده ایتیر!» گئجه یاریدان یاریلیر چیراقلار ائولرده سؤنور سنده‌له‌یه سنده‌له‌یه بیر سرخوش ائوینه دؤنور گؤزلریمه یوخو گیرمیر مورگوله‌ییب داشلانیرام سونا چاتماز یاریش کیمی قورتاریرام، باشلانیرام هر یئره باخیرام، دوستاق هر یئره باخیرام، سینیر باغریم چاتلیر، جادار جادار اوره‌ییم سیخیلیر، سینیر قارانقوشلار اوچوب گئدیر کؤچر قوشلار کؤچوب گئدیر بوتون سارسیلماز اینسانلار اجل جامین ایچیب گئدیر بو نه ناغیل؟ بو نه اؤیکو؟ چن‌لی یوللار بیزیم اولموش! اؤیکوموزون باخچاسیندا گول‌لر آچیلمامیش، سولموش! یاشاماق بیر بوش سئودادیر دوشونمک یاساق‌دیر یاساق! بوردا شاعیر، شئعیر، شوعور یاراشماز یاماق‌دیر یاماق! سؤزلر قاچیر بوغازیما آغزیما چاتمامیش بیتیر بورا عجاییب اؤلکه‌دیر آدام اؤز ایچینده ایتیر... #میرحسین_دلداربناب ۱۴۰۳/۰۷/۱۴ @eldilimiz

✍ «یازیمیز پاییزا دؤندو!» بیزیم ائوده بیر آی باهار قالانی، پاییزدی، قیشدی! بو نئجه بیر پای بؤلوشدو؟! بو نه اویون، بو نه ایشدی؟! گئجه گیریر دریمیزه! گوندوز گیزلین گیزلین قاچیر آرزولاریمیز قوجالیر! اؤلوم بیزه قوجاق آچیر هامی یالقیز، تانری کیمی هامی یورغون، شیطان کیمی هامی اؤزونده قیوریلیر یارالانمیش ایلان کیمی آی دیدرگین قورشون قوشو گل کؤکسومو پارچالا کئچ قانیم سنه حلال اولسون هر نه قدر ایچیرسن، ایچ آنامی پاییز آپاردی! بابامین اوجاغی سؤندو! دومان چؤکدو باشیمیزا یازیمیز، پاییزا دؤندو! #میرحسین_دلداربناب ۱۴۰۳/۰۷/۰۶ @eldilimiz

✍ «سون نفس‌ده چیخیم گئدیم!» یوللار اوزاق، یوللار یاخین گئتمه‌ینلر یورولار می؟ لیل اورک‌لر، لیل باخیشلار گؤرن بیر گون دورولار می؟! یئر قارانلیق، گؤی قارانلیق گؤزلره دومان جالانیب! اورکلرین آیناسینا پرده پرده توز قالانیب! هامی بیر بیرینه اؤزگه هامی بیر بیریندن اوزاق بیر اودادا یاشایارکن بیر بیریندن مین ایل ایراق یئر دئمه‌یین، بیر دار قفس چکه بیلمیر هئچ کیم نفس داریخدیریر، بئزیکدیریر یاشاماغا یوخدور هوس جانیمی آلیم دیشیمه سون نفس‌ده چیخیم گئدیم اؤلومو باغریما باسیم بو قفسی ییخیم گئدیم... #میرحسین_دلداربناب ۱۴۰۳/۰۶/۲۷ @eldilimiz

✍ «سیغیناق» اؤلومون قوجاغینا سیغینماق ایسته‌ییرم یالنیز او منی بیتمز- توکنمز دهشت‌لردن قورتارا بیلر... #میرحسین_دلداربناب ۱۴۰۳/۰۶/۱۸ @eldilimiz

✍ «کروانلار یولو!» بو یول اوزون بیر یول، دؤنگه‌لی بیر یول چوخ آداملار گئدیب، ایزی قالماییب! بوردا گئجه گوندوز، کروان یورویوب سای‌سیز کروانلارین، توزو قالماییب! قارانلیق گئجه‌لر، ایشیق گوندوزلر سایسان سایا گلمز، مین‌بیردن چوخدور سانکی «مین‌بیر گئجه»، ناغیللاری‌دیر نه قدر سؤیله‌سن، بیتمه‌سی یوخدور سحرلری نیسگیل، آخشامی غوربت قیشلاری سورکلی، یازی تئز کئچن پاییزی اوخشاما، یایی مرثییه گونلری گونلرین، قانینی ایچن اوشاقلار قوجالیر، قوجالار اؤلور ماراقلار دؤنوشور، آرزولار سؤنور یازیق اینسان گزیر، حیات دالینجا پیرتلاشیق، دولاشیق، دؤنگه‌لر دؤنور نه کوسمه‌سی بللی، نه باریشماسی حیکایه ایچینده، مین حیکایه‌سی یالاواج آردیندان، یالاواج دوغور بیر سؤز ایچینده وار، مین کینایه‌سی گؤی یئره گلردی، خوش یاشاسایدیق؟ یاراتمیشدین بیزی، آجی چکمه‌یه؟ ایستیردین درد اکیب، موصیبت بیچک؟ گلمیشدیک باش اییب، دیزه چؤکمه‌یه؟ دردلریم اوستونه، بیر اؤرتوک سالین یوخسا اولو تانری، گؤرر اوتانار ایچیمین آلووون، سؤندوره بیلمز احوالی پوزولار، اوره‌یی یانار!... #میرحسین_دلداربناب ۱۴۰۳/۰۶/۱۴ @eldilimiz

✍ «دونیا، بیر آز دایان، دینجیمی آلیم!» یاشاماق دئییل بو، اؤلومدور اؤلوم گؤیلره باخماقدان، یورولوب گؤزوم نه قدر گونلری، ساییم دایانیم بئله بیر یاشاما، منده یوخ دؤزوم! داریخیر اوره‌ییم، غریب قوش کیمی چیرپینیر کؤکسومده، اوچا بیلمه‌ییر بوشونا چالیشیر، بوشلوق ایچینده دلی‌تک زنجیرین، آچا بیلمه‌ییر بئینیمی گمیریر، بوش دوشونجه‌لر باشیما تؤکولور دونیانین داشی یورولموش گئجه‌نی، یولا سالیرام یاخامدان ال چکمیر، گؤزومون یاشی تکی بیر قوش اولوب اوچا بیلئیدیم بوتون سرحدلری، کئچه بیلئیدیم کؤچری دورنالار، کؤچ ائدن کیمی من ده منلیییمدن، کؤچه بیلئیدیم بیلمیرم یولومو، هایاندان سالیم! هایانلارا گئدیم، هایاندا قالیم! یامان یورولموشام، نفسیم گلمیر دونیا، بیر آز دایان، دینجیمی آلیم! #میرحسین_دلداربناب ۱۴۰۳/۰۵/۲۷ @eldilimiz