Gamal's Library 📜

ذاك الذي ينتصر على نفسه، إنما هو المحارب الأعظم! كونفوشيوس |

أجدادنا موجودين فينا! لو جبنا مجموعة من الفيران وحبسناهم في مكانٍ ما ، ورشينا عليهم عطر معين وبعديها مباشرةً ضربنهاهم بتيار كهربائي ، و قمنا كررنا نفس العملية، رشينا عليهم نفس العطر وضربنهاهم بتيار كهربي وكررنا العملية مراراً وتكراراً عطر يليه كهرباء .. تتوقع أول ما الفئران تشم العطر بيحصل شنو؟! أكيد بتهيج وتجري، دا الطبيعي، لأنها بتدرك إن العطر دا مقدمة لحدث سيء ألا وهو الكهرباء. بس اللي ما طبيعي ومثير للاهتمام إننا لو وقفنا العملية دي و قعدنا مدة واستنينا الجيل التاني من نفس الفئران دي (اللي ماعنده أي علاقة خالص بالتجربة دي ولا شهدها قبل كدا) ورشينا عليهم نفس العطر اللي كنا بنرشه على أجدادهم، الفيران مباشرةً بتخاف وتهيج بالضبط زي ما أجدادها كانت بتعمل، تخيل!! التجربة مسجلة و اتعملت بالفعل على فئران وأنواع تانية زي الجواميس وفي تجارب تانية كتير بتشير لأن الذكريات والتجارب قابلة للتوريث من جيل لآخر! في دراسات كتير بتشير لإنه العادات اللي بتكونها والمهارات اللي بتكتسبها حالياً بارادتك الحرة بصورة ما بتورثها لاولادك في المستقبل، يعني قابليتهم لتعلم الحاجات دي ونسبة انهم يسلكوا نفس السلوك بتكون مرتفعة جداً، وربما دا بفسر نبوغ أسر معينة في مجالات معينة، زي الاقتصاد أو الشعر أو الموسيقى أو اللغات. أو بعض الحرف زي صناعة المراكب أو النجارة. يعني باختصار شديد، انت حالياً قاعد تربي في أولادك، انت حرفياً بتربي في أولادك من قبل ما يتولدوا حتى !