دوراق Duraq

سوچ، جزا و روحون دیریلمه‌سی: داستایئوسکی‌نین شاه‌اثرینی نئجه درک ائدک؟ ✍🏻 دوراق @Kitabtanitimi داستایئوسکی‌نین سوچ و جزا رومانینی صرف بیر پولیسی حئکایه و یا ۱۹-جو یوزایل روس جمعیتی‌نین یوخسوللوق تصویریندن عبارت سانماق، بو عظمت‌لی اثرین تکجه فضاسینی اوزاقدان گؤرمک کیمی‌دیر. بو رومان، اینسان روحونون ان قارانلیق قاتلارینا، کیبر و غرورون قوردوغو خولیالارا و نهایت، ویجدانین اویاقلیغی ایله گلن معنوی دیریلمه‌یه آچیلان بیر پنجره‌دیر. اثری تام اولاراق آلغیلاماق اوچون اونون دؤرد اؤنملی پسیخولوژی و فلسفی لایه‌سینه دیققت ائتمه‌لی‌ییک: ١- راسکولنیکوفون جنایتینی یالنیزجا یوخسوللوغون یاراتدیغی اؤزونو ساوونما مکانیزمی و یا اینقیلابچی ایده‌سی ایله ایضاح ائتمک یئترسیزدیر. اونو بو دهشتلی ائیلمه سوروکله‌ین اصل گوج، اونون اینتئللئکتوال غرورو و اؤزونو قایدالاردان اوستون بیر فوق‌البشر سانماسی‌دیر. او، بو جنایتینی ساده‌جه پول قازانماق اوچون یوخ، بیر تئورینی سیناماق اوچون گئرچکلشدیریر. فیلسوف کارل یاسپئرسین مئتافیزیک و اخلاقی سوچلولوغونا دایر فیکیرلرینه اساسلاناراق دئیه بیلریک، بورادا ایدئولوژی تکجه یوخسوللوقدان قاچماق سیغیناغی اولماییب، عئینی زاماندا اینسانین کیبر و غرورلا اؤزونو تانریلاشدیرما چاباسی‌دیر. ماراقلیدیر، روس دیلینده راسکول سؤزو پارچالانما آنلامینا گلیر. راسکولنیکوف دا ایچینده ایکی‌یه بؤلونموش بیر اینساندیر؛ اؤزونو ناپلئون سانان سویوق‌قانلی تئوریسین ائله‌جه خیاباندا ازیلن بیر آت اوچون آغلایان مرحمتلی اینسان. ٢- آرزویا چاتدیقدان سونرا یارانان بوشلوق و آنلامسیزلیق اینسانین ان بؤیوک فاجیعه‌لریندن بیری‌دیر. آنجاق راسکولنیکوفون یاشادیغی تراژدی ساده‌جه بو بوشلوقلا بیتمیر؛ بو، بوتون اوست-اینسان ایده‌آل‌لارینا باخمایاراق اونون ضعیف و ویجدانلی بیر مخلوق-اینسان اولدوغونو درک ائتمه‌سی‌دیر. بو دوروم، اؤزونو قایدالاردان اوستون سانان فوق‌البشر خولیاسینین تام قارشیسیندا دوران، گوناه ائده بیلن، ضعیف و ویجدان آغریسی‌نین آلتیندا ازیلن فانی اینسانی تمثیل ائدیر (کئشکه هئچ اولماسا تیتره‌ین بیر مخلوق اولدوغونو قبول ائده بیلسه‌یدی). او، قادینی اؤلدوررکن اؤز ویجدانینی دا یوخ‌ائده‌جه‌یینی دوشونسه ده، اصل جزاسی سیبری‌ده یوخ، بالتانی ائندیردیگی آنین صاباحیسی ویجدانی‌نین اویانماسی ایله باشلامیش‌دیر. او، بو جنایتی ائدرکن اؤزونو بوتون بشرییت‌دن آییران بؤیوک بیر واراولوشسال یابانجیلاشما یاشامیشدی. ٣- راسکولنیکوفون کاراکترینی ۱۹۱۷-جی ایل اینقیلابی و استالینیزم دؤنمی ایله تطبیق ائتمک اولدوقجا دقیق بیر یاناشما ساییلار. داستایئوسکی، ایدئولوژی‌لرین اینسانی نئجه سویوق بیر ماشینا دؤنوشدوره بیله‌جه‌یینی گؤسترمیشدی. بونونلا بئله، بورادا اؤنملی بیر قیریلما نوقطه‌سی مؤوجوددور: راسکولنیکوفون ایچینده قالان ویجدان قیرینتیسی اونو سونوندا سونیانین قارشیسیندا دیز چؤکمه‌یه و گوناهینی اعتراف ائتمه‌یه آپاردی. لاکین ۱۹۱۷ اینقیلابی و اوندان سونراکی توتالیتار دؤولت مکانیزمی هئچ واخت تسلیم اولماییب،گوناهینی اعتراف ائتمه‌دی؛ چونکی بو سیستمی روحاً آریندیرماغا چاغیران بیر سونیا و یا ویجدان عامیلی یوخ ایدی. نئجه‌ده کی سیستملرین روحو اولماز، آنجاق اینسانین روحو وار. ۴- سونیانی غیر-اینقیلابی، صبیرلی بیر آلترناتیو کیمی دگرلندیرمک و حللی زامانین آخیشینا بوراخدیغینی دوشونمک دوغرودور. لاکین اونون مؤوقئعیی ساده‌جه پاسیو بیر گؤزله‌نیشدن عبارت قالمیر. سونیا، باشقالارینین آغریسینی و گوناهینی اؤز اوزه‌رینه گؤتوروب عذاب چکه‌رک قورتولوشا چاتماغی سئچن آکتیو بیر کاراکتردی. او، شددتله یوخ، سئوگی و اضطرابلا دونیانی دییشدیره‌بیله‌جک معنوی گوجون ان آچیق تمثیلی‌دیر. روماندا سونیانین راسکولنیکوف اوچون انجیل‌دن لازارین دیریلمه‌سی ناغیلینی اوخوماسی تصادف ساییلمیر؛ معنوی اولاراق اؤلموش و چوروموش بیر روح، تکجه قورو ایدئولوژی ایله یوخ، معنوی تسلیمیّت و خالص سئوگی ایله یئنیدن دیریله بیلر. منه گؤره سوچ و جزا شاه اثری کؤهنه‌لمیش بیر ناغیلدان عبارت دئییل، هر بیریمیزین ایچیمیزده‌کی فوق‌البشر خولیاسی ایله ویجدانیمیزین سسی آراسینداکی ابدی ساواشین گؤزگوسودور. بو شاه‌اثری اوخویارکن اؤزوموزه بیر داها بو سوالی وئرمه‌لی‌ییک: بیز منطقین و تئورینین سویوق کیبرینه تسلیم اولاجاغیق، یوخسا ویجدان‌لا سئوگی‌نین دیریلده‌سی گوجونه؟ https://t.me/kitabtanitimi

سوچ، جزا و روحون دیریلمه‌سی: داستایئوسکی‌نین شاه‌اثرینی نئجه درک ائدک؟ ✍🏻دوراق @Kitabtanitimi

اسکی یازیلاریمدان بیر کسیت: سوشال مئدیا، ایکی اوزلو بیر آینایا بنزه‌ییر: بیر طرفدن دونیانی بیزه گؤستریر، دیگر طرفدن ایسه بیزی یالنیزجا اؤز عکسیمیزه باخماغا مجبور ائدیر. بو پروسس، تکنولوژیک بیر گلیشمه اولماقدان چیخیب، توپلومسال آزادلیقلار و فردی اؤزارکلیک اۆچون جدی بیر تهلوکه‌یه چئوریلمیشدیر. توتالیتار رژیم‌لر، بو بنزرلشمه‌نین یاراتدیغی حاصلخیز تورپاقدان فایدالاناراق، نظارت‌لی مخالیفت و الگوریتمیک پروپاگاندا کیمی یئنی نسیل آراجلارلا کیتله‌لری کنترول آلتیندا ساخلاییرلار. بو دیجیتال چاغدا، فردلرین و توپلوملارین اؤزونو قوروماسی اۆچون، تنقیدی دوشونجه و مئدیا ساوادلیلیغی حیاتی اهمیت داشیییر. هانسی ایچریگی مصرف ائتدیگیمیزی، الگوریتملرین بیزی نئجه یؤنلندیردیگینی و هانسی سسلرین حقیقی، هانسیلارین ایسه ساختا اولدوغونو سورغولاماق، بو گوجلو منیوپولاسیا مکانیزم‌لرینه قارشی دورماغین یئگانه یولودور. عکس حالدا، آزادلیق و موختلیف‌لیک وعده ائدن بو تکنولوژی، تاریخین ان موکممل نظارت آراجینا چئوریله بیلر.

سرابلارین کؤلگه‌سینده؛ غنی‌نژادین سؤزوندن شریعتی‌نین بزکلی تله‌سینه دک ✍🏻 دوراق @kitabtanitimi بو گون‌لر شریعتی باره‌ده یئنی‌دن آلوولانان دارتیشمالار، موسی غنی‌نژادین کسکین و سس‌کویلو موصاحیبه‌سیندن باشلادی. غنی‌نژاد اونو آچیقجا «شیاد» آدلاندیریب، کؤهنه‌لمیش ایدئولوژیلرین اوستوندن پرده‌نی گؤتورمک ایسته‌دی. آنجاق بیر آذربایجان تورکو گؤزویله باخدیقدا، غنی‌نژادین اؤزونون دایاندیغی فیکری دونیا دا او قده‌ر قوصورسوز دئییل. او، آزاد بازار ایقتیصادیاتی و لیبرالیزم شوعارلاری آرخاسیندا گیزلنه‌رک، ایرانین مرکزچی و تمامیت‌خواه مدنی-سیاسی قورولوشونو مودافیعه ائدیر. غنی‌نژادین آچیق دونیا و آزادلیق ناغیللاری، غئیری-فارس میللت‌لرین ائتنو-مدنی گئرچکلیکلری و حاقلارینا چاتاندا، بیردن-بیره دؤزومسوز بیر ائلیتیزمه و درین بیر مرکزچی تمامیت‌خواهلیغا چئوریلیر. بیزجه شریعتی حاقدا اونون سؤزلری دوغرو دا اولسا، اخلاقی دئییل. (رطب خورده کی کند منع رطب) او، باشقالارینی اویونبازلیقلا سوچلایارکن، اؤز ایدئولوژیک کورلوغونو و ایران‌مرکزلی فاناتیزمینی لیبرالیزم دونونا بورومک ایسته‌ییر و بو فاجعه‌نی گؤرمزدن گلیر. قاییداق شریعتی‌یه؛ بیزیم زامان، دبیرستان ایللرینده او قاریشیق دؤنمین ان بلیرگین اؤزللیکلریندن بیرینی، فضانین باسقیسی و آلانسیزلیق ایچینده سس‌کویلو دوشونجه‌لره مئیل ائتمک تشکیل ائدیردی. او گون‌لر هامی شریعتی اوخویوردو؛ او، سانکی دؤورون قاچیلماز بیر دَبینه، روشنفکری فضالارین آیریلماز بؤلومونه چئوریلمیشدی. آنجاق زامان کئچدیکجه، او سؤز ییغینلاری‌نین آرخاسینداکی بوشلوق اؤزونو گؤسترمه‌یه باشلادی و او سارالماز سانیلان ماراق، درین بیر ایلگی‌سیزلییه دؤنوشدو. سونرالار هر دفعه او یازیلارا قاییتماق ایسته‌دیییمده، آرتیق او سؤزلرده اینسانی اؤزونه چکن هئچ بیر گوج قالمامیشدی. شریعتی‌نین ان بؤیوک و بلکه ده ان ییخیجی قوصورو، توپلومو عقلانی، قورومسال و حقوقسال بیر یؤنتمه دوغرو یؤنلتمکدن قاچیب، بونون یئرینه رومانتیزه ائدیلمیش، بزکلندیرمیش دویغوسال بیر فضا یاراتماسی ایدی. بو فضا اینسانلاری دوشونمه‌یه دئییل، استحاله‌یه اوغراتماغا خیدمت ائدیردی؛ بیر فضا کی، بوگون ثمره‌لرینی آجی شکیلده گؤردویوموز فاناتیک شریعتچی جریانلاری و اونلارین تایلارینی اؤز بطنینده بسله‌دی. شریعتی‌نی اؤزتله‌سک؛ منجه او، ادبیاتین گوجونو قوللاناراق فرقلی گؤرونسه ده، اصلینده باشقالاریلا عئینی اولان، اینسانلاری هیجانلاندیریب بزه‌دیلمیش و روتوشلانمیش دوشونجه‌لرین تله‌سینه سالماق ایسته‌ین بیریسی ایدی، دئمک اولار. بیر زامان بیزدن بیر نئچه بللی شخص، آیريلاری طرفیندن آذربایجان و تورکیه فضاسیندا اورانین جمعیتینه شریعتی اوخوتدورماقلا سوچلانمیشدیلار. بو بیر اتهام اولاراق، هر زامان و حتّی ایندی ده جاوابسیز شکیلده اونلارین چیینلرینده داشینماقدادیر. دریندن دوشوننده آدام حئیرت ائدیر: شریعتی‌نین اؤز دوشونجه‌سی‌نین ایچی بو قده‌ر بوش و دویغوسال تله‌لرله دولو ایدی‌سه، اونون مفکوره‌سینی تورکجه‌لشدیریب یایانلار، گؤره‌سن هانسی باغیشلانماز گوناها ال آتمیشدیلار و هانسی ممنوعه میوه‌نی دریب اؤز خالقلارینا دادیزدیرمیشدیلار؟! یانی منجه بوشونا بیر دارتیشما ایمیش! بوگون گئرچکلیک سویو اؤز دوغرو یولونو تاپیب/تاپاجاق‌دیر دا. ------- https://t.me/kitabtanitimi

بیز و عزیز نه‌سین‌ین ائششه‌یی ✍🏻 دوراق @kitabtanitimi ایرانین باشی اوزرینده دولاشان قارا بولودلار آرتیق اوزاقلارین ناغیلی ساییلماز؛ بو فیرتینا بوتون دوزه‌نی کؤکوندن سارسیتماقدادیر. ساواشین آغیر نفسینی بوغازیمیزدا حیس ائدیریک و ایچه‌ریده قاینایان مین جوره سیاسی ائله‌جه ایجتیماعی بؤحران یوردون هر بوجاغینی اؤز کامینا چکمک‌ده‌دیر. ایقتیصادی چؤکوش اینسانلاری جان ییغناغینا گتیریب چیخاریب. اکولوژیک فاجیعه‌لر، قورویان تورپاقلار، محو اولان دوغال قایناقلار، ائله‌جه الدن گئدن طبیعی وارلیقلاریمیز، صاباحیمیزین داها دا قارانلیق اولاجاغیندان خبر وئریر. گؤرونن اودور، بوندان بویانا دا آرتیق هئچ نه اسکیسی کیمی اولماياجاق‌دیر. دئمیشدی «گل سنه تسللی وئریم، داریخما دوزلمه‌یه‌جک!» 😔 بیز آذربایجان تورک‌لری ده بو ییخیجی دالغالارین، بو دهشتلی خطرلرین تام اورتاسینداییق مع‌الاسف. قولاغیمیزین تام دیبینده، سرحدلریمیزده مئیدان اوخویان کورد ترور قروپلاری هر گون یئنی بیر تهدیدله اورتایا چیخماقدادیرلار. بو قارانلیق گوجلرین هر آن سولدوزا، اورمویا، خویا، تبریزه و بوتون شهرلریمیزه سالدیرما احتیمالی وار. دئمک کی اونلار ایچ ساواشین قورخونج آلووونو آلوولاندیرماق اوچون آن به آن فورصت آختاریرلار. حیاتیمیزین قایداسی، یاشاییشیمیزین دوزه‌نی، وارلیغیمیزین آنلامی اینجه بیر تئلدن آسیلی‌دیر. بوتون بو داغیدیجی گئرچک‌لر قارشیسیندا، اوره‌گیمیزی ان چوخ تیتره‌دن مسئله، عزیز نسین‌ین «آه، بیز ائششک‌لر» حئکایه‌سینده‌کی او آجی تابلونون ائله بیزیم حیاتیمیزدا جانلانماسی‌دیر. او حئکایه‌ده‌کی قوجا ائششک، قوردون ایی‌سینی آلدیغی، آیاق سس‌لرینی ائشیتدیگی و حتی داغین باشینداکی دومانین ایچینده اونو آچیق-آیدین گؤردویو حالدا، اؤزونو اوتلارین آراسیندا گیزله‌دیب یوخ گئرچک اولماز دئیه اؤزونو آلدادیردی. بیز ده عئیناً او قوجا ائششک سایاغی، فاجیعه‌نین قوخوسونو آلیر، ییخیلیشین سس‌لرینی ائشیدیر، تهلوکه‌نی بوتون چیلپاقلیغی ایله گؤروروک؛ آنجاق باشیمیزی اوتلاغا سوخوب هئچ نه اولمامیش کیمی داورانیريق. نه‌سین‌ین قوجا ائششه‌یی بو اؤز-اؤزونو آلداتما و قورخو اوزوندن او گؤزل، زنگین دیلینی ایتیریب، تکجه آنلامسیز بیر قیشقیریغا محکوم اولدوغو کیمی، بیز ده بو درین، آنلامسیز سس‌سیزلیگیمیزین ایچینده دیلیمیزی (گئنل آنلامیلا دانیشیغیمیزی؛ وارلیغیمیزی بللندیرن نسنه‌نی)، ایراده‌میزی و دوشونجه‌میزی ایتیریریک. بئله بیر قارا تابلونو ایزلرکن نه ائدیریک؟ تام آنلامیلا هئچ نه! بو ایسه موطلق سوسغونلوق، شرّ ایله فاجیعه‌نین عادی‌لشمه‌سیندن، ظولمون قارشیسیندا تفککورون دونماسیندان باشقا بیر شئی دئییل‌دیر. قوردون آغزیندا پارچالانماغی گؤزله‌یه-گؤزله‌یه بیگانه‌جه‌سینه دوروب باخماق، اؤلومون اؤزوندن داها آجی، داها ییخیجی بیر سوندور. ------- https://t.me/kitabtanitimi

[ایچریمیز اؤزوموزو یاندیریر، ائشیییمیز عالمی!] ✍️ دوراق @kitabtanitim میللی دوشونجه‌سی اولمایان بیر دوستلا دانیشیردیم تلویزیون کاناللاری‌نین بیرینده بیر نفرین ضعیف دانیشماسیندان گیلئلنیردی دئییردی گؤره‌سن کیم بونلاری بیزه نماینده سئچیب؟ باخیشی سلبی اولسا دا آنجاق منه گؤره دوشوندوروجویدو. یوردوموزون، میللتیمیزین حاقلارینی، کئچمیشینی، بوگونونو و گله‌جه‌یینی دوزگون و قاپساملی بیر شکیلده ساوونا بیلمه‌ین‌لر، گؤره‌سن نئجه بو آدی داشیماغا جسارت ائدیرلر؟ هاردان هارا چاتمیشیق؛ بیزی بیر زامان میر جعفر پیشه‌وری ساوونوردو ایندی ایسه فیلان بوش بوغاز! ایچریمیز اؤزوموزو یاندیریر، ائشیییمیز عالمی! نه یازیق کی دیل‌لرینده ازبرله‌دیکلری نئچه قورو و کلیشه‌لشمیش، ایل‌لر بویو تکرارلانان جومله‌لردن باشقا بیر یئنیلیک سئزمک اولمور. هم ده مسئله‌نی ترس آنلادیقلاریندان دولایی بو میللتین درینلیگینی، فلسفه‌سینی ائله‌جه وارلیق موجادیله‌سینی آنلاداجاق هئچ بیر شئیلری‌نین اولمادیغی چیخیشلاریلا آشکارا چیخیر. سیستملشمیش حذفی دوشونجه‌لر قارشیسیندا اونلارین آخسانلی ساوونماسی، بیر داغین قارشیسیندا اسن ضعیف بیر کولک کیمی گؤرونور. اسینتی حددینده قالیرلار. قوپاراجاقلاری فیرتینا کیمسه‌نی اویاندیرمیر؛ قارشی طرف ده او ضعیفلیکدن اولدوقجا اؤز نفعینه یارارلانیر! بو قدر دردی اولان، یوز ایل‌لردیر گئری ساخلانیلان، وارلیغی دانیلان، دیلی ایله مدنییتی دار آغاجینا چکیلن بیر میللتین نماینده‌سی‌نین سسی ائله‌جه دوشونجه‌سی بئله تیترک، بئله جانسیز اولمالی‌دیرمی؟ ابداً! منه گؤره بو قدر درد، بو قدر گئری ساخلانیلمایلا، آذربایجان نماینده‌سی‌نین، آذربایجان آدینا ساوونماجی کیمی چیخیش ائدنین آغزیندان اود یاییلمالی‌دیر! اونون سؤزلری بیر وولکان کیمی پاتلامالی، ایچیمیزده‌کی او یوز ایللیک نیسگیلی بوتون دونیایا چاتدیرمالی، عالمی، آدمی یاندیرمالی‌دیر! اونون چیخیشی قارشیسیندا دونیا کاریخیب قالمالی، حاقسیزلیقلار سوسمالی، کار قولاق‌لار آچیلماق مجبورییتینده قالمالی‌دیر. ساوونماجی دئدیگین، میللتین سینه‌سینده‌کی او آلووو دیله گتیرن، حاقی باغیرا-باغیرا دونیانین اوزونه چیرپان آدام اولمالی‌دیر. نه یازیق، بوگون بیز تام ترسینی یاشاییریق. دردیمیزی وولکان کیمی سسلندیره‌جک یئرده، اؤز کیچیک منفعت‌لری، غرض‌لری و یا قورخولاری ایچینده بوغولانلار بیزی تمثیل ائدیرلر. کئچمیشده بابالاریمیزین قالدیردیغی او آغیر بایراغی، داشیماغا گوجو چاتمایانلارین الینده، بو سایاق چابالاماسینی گؤرمک، بیزه هر شئید‌ن داها چوخ عذاب وئریر. اودور کی دئییریک: [ایچریمیز اؤزوموزو یاندیریر، ائشیییمیز عالمی!] بیز بو یئترسیزلیک‌لری، بو باشاریسیزلیقلاری ائله‌جه قیسیلمیش سس‌لری گؤردوکجه ایچریدن قورویوب یانارکن، ائشیگیمیزده‌کیلری دونیایا وئردیگیمیز او ضعیف گؤرونتویله یابانجیلارین الینده بیر اویونجاغا دؤنوشدوروب عالمی ده یاندیریریق. نه زامان، اؤزوموزو تانیییب، لاییق اولدوغوموز او اودلو دیل ایله ایراده‌نی یئنیدن قازانارساق، باخ او زامان ایچریمیزین ده، ائشیییمیزین ده دردی ساغالاجاق‌دیر. یولوموز کول‌لرین آلتیندان یئنیدن آلوولانماقدان کئچیر. @Kitabtanitimi

[ایچریمیز اؤزوموزو یاندیریر، ائشیییمیز عالمی!] ✍️ دوراق یازینی بوتون اولاراق بوردان اوخویا بیلرسینیز 👇🏻👇🏻👇🏻 @kitabtanitimi

طبیعتین سس‌سیز فاجعه‌سی: چؤلله‌شن گله‌جک! [سویون دیبی سودان دئییل!] ✍️دوراق @Kitabtanitimi ---------------- هر بیر خالقین آیاقدا قالماسی و یاشاماسی، اونون اوستونده یاشادیغی تورپاغین، ایچدیگی سویون و ایچینه چکدیگی هاوانین ساغلام قالماسیندان آسیلی‌دیر. بو، فلسفی بیر دوشونجه و یا شاعیرانه بیر تشبیه کیمی نظره گلمه‌سین؛ بو دانیلماز بیر گئرچکلیک‌دیر. سون ایل‌لرده اورمو گؤلونون جان وئرمه‌سی بیزه چوخ آجی بیر درس اؤیرتدی: طبیعی بیر سیستمین دوزنی پوزولاندان سونرا، اونو نه پوللا، نه بوش وعده‌لرله، نه ده گئجیکدیريلمیش پشیمانلیقلارلا گئری قایتارماق ایمکانسیزدیر. گؤل قورویاندان سونرا اورتایا چیخان دوز طوفانلاری، اکین یئرلری‌نین محو اولماسی و بؤلگه‌نین اکولوژی تعادولونون آلت-اوست اولماسی بیر گئجه‌ده باش وئرمه‌دی؛ بونلار ایل‌لرله سس‌سیز قالان بیر لاقئیدلیگین، بیلیمسل پلانسیزلیغین و قیسسا دوشونجه‌لی ایداره‌چیلیگین نتیجه‌سی ایدی. بو آغیر تجروبه بیزه گؤستردی، اکولوژی مسئله‌لرده سونرا دوزلدریک دئیه بیر قایدا یوخدور؛ بیر سیرا ایتکی‌لر موطلق و گئری‌دؤنمزدیر. بو گون آماری و رقم‌لره باخاندا فاجعه‌نین درینلیگی داها دا آیدینلاشیر. یئنی علمی آراشدیرمالار گؤستریر، اؤلکه‌ده یئرآلتی سو قایناقلاری‌نین کسری (کسری آب‌های زیرزمینی) ۱۶۰ میلیارد مترمکعب‌دن آشیب. دونیا مقیاسیندا یئرین ایل‌لیک ۴ میلی‌متر چؤکمه‌سی (فرونشست) بحران ساییلدیغی حالدا، بو رقم بیزیم مملکتده اورتالاما ۱۵-۱۸ سانتی‌متره، بعضی یئرلرده ایسه حتی ۲۵ سانتی‌متره‌دک چاتیب. بو، او دئمکدیر، تکجه سو یوخ، تورپاق دا آیاغیمیزین آلتیندان قاچماقدادیر. بو ایسه بیرباشا گله‌جک نسیل‌لرین مقدراتی ایله اویناماق دئمک‌دیر. بو گونون منظره‌سی، تأسف کی، اورمو گؤلونون فاجعه‌سیندن هئچ بیر درس آلمادیغیمیزی گؤستریر. یئنیلنه‌بیلن و یاشیل انرژی (گونش و کولَک) اؤزلویونده چوخ دیرلی و واجیب بیر یؤنلمه‌دیر؛ دونیا بو یولا گئدیر، بیز ده اوندان گئری قالا بیلمریک. آنجاق مسئله بوندادیر کی، بیر طرحین آدینین یاشیل و یا تمیز اولماسی، اونون دوزگون و علمی شکیلده ایجرا اولوندوغونو ثبوتلاماز. بو گون ان اوجقار کندلرده، داغلارین اته‌یینده، ال چاتماز یئرلرده قورولان گونش پنل‌لری، اگر دقیق مهندیسلیک استانداردلاریندان، اکولوژی آراشدیرمالاردان و شفاف حقوقی مرحله‌لردن (قانونی مجوز و سایره) کئچمه‌دن قورولورسا، او زامان بو ایش تکنولوژیک اینکیشاف یوخ، یئنی بیر تالانین شیک اؤرنه‌یینه چئوریلر. نظارتین اولمادیغی بو پروسه‌ده، سو قایناقلاری غیراستاندارد یوللارلا تالانار. دئمیشدی بیری الینده بیر قورو چؤرکله گلیرمیش بیر پیالا قاتیغی اولان باشینا چالیب آغلامایا باشلاییر. آغلادیغینین ندنینی سوروشاندا او چؤره‌یی منیم قاتیغیما باتیراجاق دئیه اؤنجه‌دن آغلاییرام. ایندی بو پنل مسئله‌سی ده بونا تای اولوب. من اؤز گؤردوکلریمی یازسام: او پنل‌لر سایه‌سینده اینانیلماز یئرلرده غیرمجاز قویولار قازیلیب، یئر آلتی سو قایناقلاری تالان اولور. دئم یئرلر تغییر کاربری ائدیلیب اورالاردا باغ احداث اولماقدادیر. اراضیلرین دقیق سرحدلری پوزولاراق میللی یئرلر زمین‌خوارلارین تصروفونا کئچیر. بیزسه گؤبه‌لک کیمی هر گون چوخالماقدا اولان اینستاگرامین یئنی اینفلونسرلریله تانیشی اولوروق کی بیر یازیق اکینچی‌نین الینه بیر لوله خورتومونو وئریب، بونو بیر فوتو-فورصت و تبلیغات مالزمه‌سی کیمی قوللاناراق، بیز نه بتر آدامیق، مهندیس فلانی معجزه ائدر کیمی سؤزلری ایزله‌ییجی‌لره دئدیتدیرمک ایسته‌ییر. اصلینده دریندن باخارساق بو ایشین آدی تالان‌دیر و بوتون بونلار، دؤولتین آچیق-آیدین ترک فعلی و ناظیر قوروملارین سس‌سیزلیگی آلتیندا باش وئرمک‌ده‌دیر. اینسانلارین هر گونکو یاشام مجادله‌سی و معیشت قایغیلاری اونلارا اوزاق گله‌جه‌یی دوشونمه‌یه ماجال وئرمیر؛ دیگر طرفدن ایسه، بو مملکتده بیلیمین و قانونون هله ده «بیرینجی سؤزو» دئمه‌مه‌سی اؤزونو گؤستریر. بیر اؤلکه‌ده کی، قرارلار و دوغال قایناقلارین طالعی علمی کومیته‌لر و متخصص‌لر طرفیندن اولمایا، رانت و سیاسی مصلحت‌لر اساسیندا آلینا، اورادا هر بیر پروژه ایستر سدسازی اولسون، ایستر گونش پنلی، پوتانسیال بیر تالان آلتینا چئوریلیر. https://t.me/kitabtanitimi

آمریکا، ۲۵۰ – بیرینجی بؤلوم آمریکا بیرلشیک ایالت‌لری رسمی بیر اؤلکه اوْلاراق ۲۵۰ یاشلی اولدو. بونو یازدیغیمدا هله‌ده آتش‌بازی سسینی بوْستون‌دان، آمریکانین باغیمسیزلیغینا* ایلک آتدیم آتان شهردن، ائشیتمک اولور. ۱۷۷۶دا فیلادلفیادا گئچیریلن بیاننامه اساسیندا اؤلکه‌نین ۱۳ دوْغو* ایالتی بؤیوک بریتانیادان مستقل اوْلوب دنیا تاریخینده یئنی بیر صفحه آچیلدی. آمریکا هئچ زامان معمولی بیر اؤلکه اولماییب: باشقا اؤلکه‌لره رغما، موروثی قۇراللار* یئرینه اوْرتاق* ایده‌آللار اۆزرینده* قۇرولوب*. ۲۵۰ ایل سوْنرا، بو اؤلکه سیاسی سیستمی انسانیت تاریخینین ان اؤنملی* آتدیملاریندان ساییلیر: دولت، گۆجونو حکم ائتدیگی خالق‌دان آلیر و اؤزگورلوک*، برابرلیک و اؤز-یؤنتیم* امتیاز یوخ، بلکه توْپلوما* عائد حاقلاردی. البته کی بو ایده‌آللار محقق اولماییب و هر دوره یئنی زورلوق‌لارلا* اۆزله‌شیر. کؤله‌لیک*، یئرلی* آمریکالیلارین سوْی قیریمی*، مدنی حاقلار حرکاتی و درین ائشیتسیزلیک* بو وعده‌لری نقض ائدیب. آنجاق آمریکانین حکایه‌سی ائله بودور: ایده‌آللار و گئرچک آراسیندا سۆرکلی* مجادله و دارتیشما. بئله‌لیکله، اؤز وطنداشلاری اؤلکه‌نی قیناماقلا بو ایده‌آللارا یاخینلاشماق امکانینی ساغلایا بیلیرلر. اطرافینیزا بیر باخین. آمریکانین تاثیری‌نین گؤرمه‌مک اولماز. سیاسی باخیمدان، آمریکا انقلابی دنیا سویه‌سینده دموکراتیک حرکتلره الهام قایناغی* اولوب. اؤلکه‌نین آنایاساسی* متفکرلر طرفیندن اینجه‌له‌نیب* و ملتلر طرفیندن اؤرنک* آلینیب. اقتصادی باخیمدان، صنعتی دئوریمدن* دیجیتال عصره قدر آمریکا دنیانین ابتکار و اختراع موتورو اولوب. اؤلکه‌نین شرکتلری و دانشگاهلاری دنیا سویه‌سینده تکنولوژیک گلیشمه‌لرله* صنعتلری آلت-اۆست ائدیب و یاشام کیفیتینی یۆکسلدیبلر*. سیاسی باخیمدان، آمریکا گۆنوموزده‌کی بین‌المللی دۆزننین* قۇروجوسو، انسان حاقلارینی مدافعه ائدن، و دموکراسی‌نی تشویق ائدن اؤلکه‌دیر. کۆلتورل باخیمدان، آمریکا موزیکی، فیلمی، و ادبیاتی دنیا مشهورودور و اؤلکه‌نین دگرلرینی*، کۆلتورونو و یوموشاق گۆجونو هر بیر اۇزاق بوجاغا داشیماقلا جهانی ذائقه‌نی شکیللندیرمکده‌دیر. سؤزلوک: باغیمسیز: مستقل – دوْغو: شرق – قۇرال: قاعده، قانون – قۇرماق: تاسیس ائتمک – اؤنملی: مهم، اؤزگورلوک: آزادلیق – یؤنتیم: حاکمیت، حکومت ائتمک – توْپلوم: جامعه – زورلولوق: چلنج، challenge – کؤله‌لیک: برده‌داری، slavery – یئرلی: بومی – سوْی‌قیریم: قتل عام – ائشیتسیزلیک: نابرابری – سۆرکلی: مستمر – قایناق: منبع – آنایاسا: قانون اساسی – اینجه‌له‌مک: بررسی ائتمک، مطالعه ائتمک – اؤرنک: نمونه، مثال - اؤرنک آلماق: تقلید ائتمک – گلیشمه: پیشرفت – یۆکسلتمک: یوخاری آپارماق، to improve – دۆزن: نظم – دَگر: ارزش #رحمان #کمبریج

تورکجه یازان دوستلاری دستک‌له‌ییریک 😍

یازماق ✍🏻دوراق @kitabtanitimi --------------- تاریخی یئنیلگی‌لریمیزدن دولایی اولوس دؤولت دوغرولتوسوندا، اوزون بیر یوخلوقدان ائله‌جه سس‌سیزلیکدن سونرا، اینسانین یازماغا، اؤزو ده دریندن یازماغا باشلاماسی، سانکی قیشدان سونرا تورپاغین یئنیدن نفس آلماسینا بنزه‌ییر. دونیانین باش‌گیجللندیریجی سورعتی و هر گون اوزه‌ریمیزه یاغان مینلرجه خبر، چوخوموزو ۲-۳ صفحه‌لیک بیر تحلیل یازماقدان، حتی اوخوماقدان بئله اوزاقلاشدیریب‌دیر. آنجاق ایچیمیزده‌کی او «یازماقلا دوشونمک» ایسته‌یی یئنیدن باش قالدیراندا، دؤنوب اطرافیمیزا، خصوصیله ده سوسیال شبکه‌لرده‌کی دوروموموزا داها فرقلندیرمه‌یی و تنقیدی بیر باخیشلا باخماق مجبوریتینده قالیريق. پلاتفورملارین، توییترین، اینستاگرامین و فئیسبوکون سس-کویوندن اوزاقلاشیب، مسئله‌یه داها گئنیش بیر پرسپکتیودن، داها دریندن باخاندا، قارشیمیزدا دوران ان بؤیوک و مؤحتشم حقیقت «یازماق» ائیلمی‌نین تام اؤزودور. یازماق، ساده‌جه حرفلری یان-یانا دوزمکدن عیبارت اولان بیر مکانیزم دئییل؛ او، اینسانین اؤز ایچ دونیاسینی، سوسموش سس‌لرینی و کئچیردیگی فیرتینالاری کاغیذا (و یا کیبوردا) کؤچورمه‌سی، یعنی بیر نؤوع اؤزونو یئنیدن یاراتماسی‌دیر. یازماق تکجه بیر واسیطه و یا آراج یوخ سانکی اوجقار بیر کنددن توتموش بؤیوک بیر شهرین قایغیلارینا قدر هر شئیی ایچینه آلان ایلاهی بیر لذت و آغیر بیر مسئولیت‌دیر. یازماغین ایچینده غریبه بیر سِحیر، دادیلماسی گرکَن درین بیر لذذت وار. اینسان فیکیرلری‌نین دومانلی فضاسیندان چیخیب، اونلاری دقیق، اؤلچولو و گؤزل بیر دیل‌له فورمالاشدیراندا، سانکی دونیانین خائوسونا بیر نیظام باغیشلاییر. بو، داشدان بیر هیکل یونماغا بنزه‌ییر. دوشونون: سیزین ذهنینیزی مشغول ائدن، سیزه کدر یا سئوینج وئرن بیر حیس، قلمینیزین اوجوندان سوزولوب باشقاسینین اوره‌یینه و بئینینه توخونور. بو پایلاشیم حسسی، بو اؤزونو ایفاده ائتمک آزادلیغی، یازماغین ان بؤیوک موکافاتی‌دیر. ان اؤنملیسی ایسه، بو یارادیلیش پروسسینی اؤز آنا دیلینده، تورکجه‌ده یاشاماق‌دیر. دونیانی هانسی دیلده گؤرورسونوزسه، او دیلده یازماق روحی بیر بوتؤولشمه‌دیر. دیلین اؤز موسیقی‌سی، سؤزجوکلرین تاریخی یوکو سیزی اؤز کئچمیشینیزه و گله‌جه‌یینیزه باغلاییر. بیزیم توپلوم اولاراق، اؤزللیکله ده فیکری و مدنی ساحه‌ده دیلیمیزله باغلی بؤیوک بوشلوقلاریمیز وار. بیزیم یالنیز شعمار و حماسه‌یه دئییل، عئینی زاماندا فلسفی باخیشلارا، درین سوسیال تحلیل‌لره، آنالیتیک دوشونجه‌لره احتیاجیمیز وار. یازدیغیمیز هر بیر متن، بو بؤیوک بوشلوقدا بیر کرپیج یئرینه کئچیر. یازماق، سس‌سیزلیکله محو اولماغا محکوم ائدیلمیش بیر مدنییتی یئنیدن دیریلتمک و مدنی بلله‌ییمیزی (حافظه‌میزی) قوروماق اوچون ان گوجلو سیلاح‌دیر. بیز بو مساله‌نی جیددی بیر رسالت (مسئولیت) اولاراق قاورامالیییق. یازماق گؤره‌وی، تکجه بؤیوک تئوریلر، قالین کیتابلار و یا آکادمیک مقاله‌لر یازماقلا محدودلاشمیر. مساله‌نین اؤزو «هر شئیی تورکجه یازا بیلمک» باجاریغینی و عادتینی فورمالاشدیرماقدیر. گونده‌لیک بیر حیسسیمیزی، دوستوموزا یازدیغیمیز قیسا بیر مئساژی، یاغیشلی بیر گونون بیزده یاراتدیغی تأثیری و یا ساده‌جه گونده‌لیک بیر حادیثه‌نی تورکجه یازماق. بو، دیلی یاشاییشین تام اورتاسینا، حیاتین بطنینه سالماق‌دیر. یازماق، بوش بیر زامان اَیله‌نجه‌سی دئییل. بونو درک ائدیب عملی‌لشدیرمک، اؤزونه، کیملیگینه و گله‌جک نسیللره قارشى بويون بورجوموزدور. بیز یازما‌ساق، بیزیم یئریمیزه باشقالاری یازاجاق و بیزیم حیکایه‌میزی باشقالاری اؤز ایسته‌دیکلری کیمی فورمالاشدیراجاقلار. یازماغین جیددییتینی آنلاماق، اؤز طالعیینین سوککانینی اؤز الینه آلماق دئمک‌دیر. https://t.me/kitabtanitimi

یازماق ✍🏻دوراق @kitabtanitimi --------------- تاریخی یئنیلگی‌لریمیزدن دولایی اولوس-دؤولت دوغرولتوسوندا، اوزون بیر یوخلوقدان ائله‌جه سس‌سیزلیکدن سونرا، اینسانین یازماغا، اؤزو ده دریندن یازماغا باشلاماسی، سانکی قیشدان سونرا تورپاغین یئنیدن نفس آلماسینا بنزه‌ییر. دونیانین باش‌گیجللندیریجی سورعتی و هر گون اوزه‌ریمیزه یاغان مینلرجه خبر، چوخوموزو ۲-۳ صفحه‌لیک بیر تحلیل یازماقدان، حتی اوخوماقدان بئله اوزاقلاشدیریب‌دیر. آنجاق ایچیمیزده‌کی او «یازماقلا دوشونمک» ایسته‌یی یئنیدن باش قالدیراندا، دؤنوب اطرافیمیزا، خصوصیله ده سوسیال شبکه‌لرده‌کی دوروموموزا داها فرقلندیرمه‌یی و تنقیدی بیر باخیشلا باخماق مجبوریتینده قالیريق. یازینین آردینی بوردان اوخویا بیلرسینیز 👇🏻👇🏻👇🏻👇🏻👇🏻 @Kitabtanitimi

قیسیر دؤنگودن یاراتماغا دوغرو: دیلیمیز، دوشونجه‌میز و قلمیمیز ✍🏻 دوراق @Kitabtanitimi --------------- بیز آذربایجان تورکلری اولاراق اوزون ایللردیر بیر حاق موباریزه‌سینین ایچینده‌يیک. آنجاق بعضاً آداما ائله گلیر، بو تاریخ، سادجه تکرارلانان بیر قیسیر دؤنگودن (دور تسلسل) عیبارت‌دیر. بو تکرار، یالنیزجا بیزیم تاریخی عاجیزلیگیمیز دئییل؛ عئینی زاماندا سئچیملریمیزین ده تهلوکه‌لی بیر نتیجه‌سیدیر. چوخ زامان باشیمیزا گلن فاجیعه‌لردن سونرا، دایانیشمانیز داها داغینیق، داها چاشقین و سارسیلمیش بیر حالا دوشور. استراتژیک یئنیلگیلریمیزی و اوغورسوزلوقلاریمیزی داواملی اولاراق تاریخی گوجلرین یا دا باشقالارینین بوینونا آتماق، بیزیم سوروملولوغوموزو اوزریمیزدن آتماغیمیزا سبب اولور. بو گوجلرین کؤلگه‌سینه سیغیناراق، اؤز سوسقونلوغوموزا برائت قازاندیرماق و ساختا تارتیشمالارلا واخت ایتیرمک، فاجیعه‌نی داها دا درینلشدیریر. تانینمیش دوشونورلر، میللی فعال‌لار ائله‌جه سیاستچی‌لر ده بونو یاخشی بیلیرلر. شیکایتلریمیز و دائم بیر-بیریمیزه دئدیگیمیز سؤزلر آرتیق تکرار مکرراتا چئوریلیب. حاق ایستکلریمیزین بوغولماسی، سادجه خاریجی بیر باسقینین یوخ، اؤز ایچیمیزده‌کی تولیداتسیزلیغین دا نتیجه‌سیدیر. دوزدور، استراتژیک آدیملارلا چوخلو چیرکین اویونلارین اؤنونو آلا بیلمیشیک، آنجاق سادجه موضع دفاعدا قالماق بیزی راضی سالمامالی‌دیر. بوتون بو استراتژیک چتینلیکلره باخمایاراق، یالنیز بیر چیخیش یولوموز وار: اؤز آنادیلیمیزده، آذربایجان تورکجه‌سینده قات-قات یوخاری حجمده اینتللکتوال (فیکری) اوره‌تیم یاراتماق‌دیر. بو، سادجه کیم‌لرله‌سه دالاشماق و یا قورو شعار وئرمک اوچون دئییل. آماج؛ صاف تورکجه اوخوماق، صاف تورکجه دوشونمک و صاف تورکجه یازماق‌دیر. دیلیمیزین گوجونو سادجه بیر ایله‌تیشیم (ارتباط) واسیطه‌سینه ایندیرگه‌مک اولماز. دیل؛ مدنیتی و توپلومسال کیملیگی یارادان ان اؤنملی فاکتوردور. تورکجه یازماق، قلمی اؤز دیلیمیزده توتماق و سسیمیزی اؤز دیلیمیزده اوجالتماق ساده‌جه مدنی بیر ایش دئییل؛ بو، ان درین سیاسی و واراولوشسال آددیمدیر. کئچمیشیمیزی (قاجارلاردان توتموش قافقازین آیدینلانما چاغینا قدر) بو دیلده دئشمه‌لی، دونیا ادبیاتینی و مدرن سینمانی بو دیلده نقد ائتمه‌لی، اکولوژیک بؤحرانلاری (اؤزللیکله اورمو گؤلو کیمی حایاتی قونولاری)، تورپاقلاریمیزین حقوقی ساوونماسینی و مهندیسلیک پروبلئملرینی بو دیلده دارتیشمالیییق. دیلیمیز، قورو بیر دانیشیق واسیطه‌سیندن چیخیب علم، فلسفه و اینجه‌صنعت دیلی اولمالی‌دیر. هئچ بیر دؤولت و یا خاریجی گوج، حق-حقوقوموزو بیزه هدیه ائتمه‌یه‌جک. بیزیم کیملیگیمیز، وارلیغیمیز و گله‌جه‌ییمیز یالنیز و یالنیز عقلیمیزدن، دیلیمیزدن و قلمیمیزدن دوغاجاق. بوندان باشقا بیر یول یوخدور. #تورکجه #دیل #آنادیل #تورکجه_یاز #دیلیمیز_کیملیگیمیز #تورکجه_یاز_و_اؤزگور_اول

گون آیدین دوستلار واختیتیز اولاندا بو گؤندریدن باشلایین یازیلاریمیزا باخین؛ حالینیز و حووصله‌نیز ده اولسا اوخومادیغینیز یازیلاردان بیر ایکیسینی اوخویوب اؤز یورومونوزو یازسانیز داها آرتیق سئویندیررسینیز 🙏🏻🤗🤍

ائلچی‌بی: سیاست مئیدانیندا بیر درویش، یالنیزلیقدا بیر مکتب ✍🏻دوراق @kitabtanitimi تاریخ، بعضاً فیلسوفلاری ائله‌جه دوشونورلری زورلا سیاست مئیدانینا چکر. میللی آزادلیق حرکاتی، یانی‌سیرا ۲-جی جمهوریتین لیدئری ابوالفضل ائلچی‌بی بئله بیر طالعین یولچوسویدو. او، اصلینده بیر پرئزیدئنتدن یا دا مقصدی یالنیز گوج اولان بیر سیاستچیدن چوخ، کیتابلارینین آراسیندا حقیقت آختاران بیر بیلگین، اؤنونده اولان چاتیشمازلیقلارلا اوزلاشمایان بیر دوشونجه آدامی ایدی. ائلچی‌بی‌ین سیاسی دونیاگؤروشو تکجه سووئت دؤورونون تضییق‌لری ایله یوخ، اوندان قاباق ۱۹۶۰-جی ایل‌لرین باشیندا مصرده، آسوان سدی‌نین اینشاسیندا ترجمه‌چی کیمی چالیشدیغی ایللردده فورمالاشمیشدی. اورادا شرقین آنتیک تاریخینی دریندن اینجه‌له‌ین ائلچی‌بی، امپریالیزمین نه اولدوغونو ائله‌جه ائورنسل سیاستین نئجه ایشله‌دیگینی یاخیندان گؤرموشدو. او، اؤز خالقی‌نین باغیمسیزلیق توخوملارینی، محض او اوزاق قاهیره گئجه‌لرینده، عرب دیلی و تاریخینی آراشدیرا-آراشدیرا اوره‌یینه اکمیشدی. حاکیمیته گلدیکده ایسه، دبدبه‌لی سارایلاردان ایمتیناع ائدیب ساده بیر وطنداش کیمی معاشینی احتیاجی اولانلارلا بؤلوشدوروردو. رقیب‌لرینه کین بسله‌مزدی؛ چونکی او، قان و اینتیقام اوزرینده قورولان بینانین صاباح اؤز اوشاقلارینی یئیه‌جگینه اینانیردی. ١٩٩٣-جو ایلین قارا یاییندا، سیاسی ایختیلافلارین نتیجه‌سینده قارداش قانی تؤکولمه‌سین دئیه حاکیمیتدن چکیلیب دوغما کندی کله‌کی‌یه (Kələki) گئدیر. او، اورادا دؤرد ایله یاخین کله‌کی‌نین سرت قایالاری آراسیندا، دونیانین چیرکین سیاسی اویونلاریندان اوزاق، قوروموش توتونونون توستوسو و سارالمیش ال‌یازمالاریلا باش-باشا قالیب، اؤز ایچ دونیاسینی قورودو. شخصی حیاتیندا تاریخین ان یوخسول، آمما ان غرورلو لیدئری ایدی. حلیمه خانیملا قوردوغو حیات، سارای دبدبه‌سیندن اوزاق، آنادولو درویش‌لری‌نین دخمه‌سی کیمی ساده ایدی. عایله‌سینه هئچ بیر مادی ثروت، هئچ بیر ویللا یا دا بانکلاردا حئساب قویوب گئتمه‌دی؛ اونلارا قویدوغو تک و ان آغیر میراث، شرفلی و لکه‌سیز بیر آد ایدی. ۱۹۹۷-جی ایلده باکی‌یا قاییتدیقدان سونرا، زامانینی فعال سیاسی چکیشمه‌لردنسه، گنجلری اطرافینا توپلاییب بوتؤو آذربایجان بیرلیگی‌نی قورماغا حصر ائتدی. او، تبریزی باکیدان هئچ واخت آیری دوشونمه‌دی. بو گونون اوخوجوسو اوچون ائلچی‌بی‌ین ان اؤنملی میراثی، میللتچیلیگی رادیکالیزم و نیفرت ایله دئییل، تمامیله دموکراسی، اینسان حاقلاری و مدنییت سئوگیسی ایله هارمونیا ایچینده تصوور ائتمه‌سی‌دیر. «اوردا بیر یول وار اوزقدا او یول بیزیم یولوموزدور دؤنمه‌سک ده، وارماساق دا او یول بیزیم یولوموزدور»

ائلچی‌بی: سیاست مئیدانیندا بیر درویش، یالنیزلیقدا بیر مکتب ائلچی‌بی‌یین دوغوم گونو بهانه‌سینه 👇🏻👇🏻👇🏻 @kitsbtanitimi