جــرعــة طــب

بسم الله الرحمن الرحيم،

الحمد لله وحده، والصلاة والسلام على من لا نبي بعده..

حبينا نتكلم في سلسلة من البوستات الخفيفة عن، كيفية إستغلال الإجازة بشكل صحيح؛ خصوصًا إن أغلبنا خلص امتحاناته وبدأ الإجازة — واللي لسه بيمتحن أو ما بدأش، مش ناسيينكم، ربنا يوفقكم وعقبال ما تحصلونا، إن شاء الله. 🫡 وحبينا نفتتح السيرة بأننا نناقش قضية مهمة، والـ هيكون عنوانها، إن شاء الله: الشّرود المدعىٰ. 🧠 كلنا بنستنى فترة الإجازة دي عشان نرتاح من زنقة الوقت، وتراكمات المواد، والضغوطات النفسية الـ بتلاحقنا طول مدة السيميستر الدراسي، ومـ بنصدق ناخد استراحة محارب، ودا مش غلط، بل بالعكس صحي، وأمر مستحق. لكن الغلط لما الفراغ المتاح لينا دا نتمادى في تضييعه، بحيث ان وقت ثمين، وايام كثيرة ممكن نستثمرها في مشروع عمري، تضيع هباء، ولن نراها إلا يوم القيامة. ففي البخاري عن حديث عبدالله بن عباس - رضي الله عنهما - أن رسول الله ﷺ قال، 📍 "نعمتانِ مغبونٌ فيهما كثيرٌ منَ النَّاسِ... الصِّحَّةُ والفراغُ." قف عند الحديث دا وتفكر فيه شوية كدا، وٱسال نفسك بصدق. هل أنا مغبون في النعمتين دول ولا لأ؟؟ انت غالبا يومك بيبدا بمسك التيليفون اول ما تقوم من النوم، تقعد تقلب في السوشيال ميديا، ما بين عوشروميت بوست ورِيلزات شتى، من مختلف الأقاليم والمجالات — ممهدة بخواريزميات، ممنهجة، وموجهة، ومفصلة، لكل مستخدم ولكن بهدف موحد، ألا وهو:

"ازاي نسحب منك إهتمامك ونستنزف تركيزك"

وبالفعل. هو دا الـ بيحصل، وبتفضل على نفس الحال دا — متقلب، بين بوست وبوست، تطبيق لـ تطبيق — لانك بتفضل تشغل وقتك ووتركيزك هرباً من "الملل" اللاحق بالفراغ الكبير المتاح لك دا. وفي آخر اليوم، هتغدوا مكتئب بسبب التيه والتشتت وعدم الإنجازية الـ حطيت نفسك فيها دي. ليه؟ لأن غالبا من لفّك الكثير دا في المواقع، مش هيظهر لك غير الناجح؛ واحد واصل وبيوثق لحظات الوصول لمسعاه المراد، لكن مش هتشوف سنين التعب وفترات المكابدة الـ وصلته لهناك. واكيد مفيش داعي طبعا اننا نجيب سيرة المحتوى التافه السخيف الذي لا يهتف لشيء. وهتشوف النموذج المثالي دا متكرر لك كثير. اللي يخليك تحس إنك متأخر، وإنك ضيعت فرصة، وإن كان ممكن تبقى في مكان تاني لو بدأت بدري شوية. نفس النماذج دي الـalgorithm بيغذيها لك، وهيضربها لك أوس ١٠. هتقعد كل ريل ولا بوست تشوف نفس النمط، حد شاطر جدا في حاجة في المجال (او خارج المجال، عادي برضه) تحبطك، تحسسك ان في "potential ما" راحت منك، بس انت يا غلبان ملحقتش السباق. والله يا شباب الملل دا نعمة، ومساحة تفكير عظيمة؛ بس إحنا الـ مش عارفين ازاي نواجه الملل دا ونستغله صح في ان احنا نسعى ونصنع لنفسنا مشروع مثمر سواء لدُنيانا او أُخرانا. ودائما ما بنُقابله بالهروب المؤقت بالـscrolls. والحقيقة يا شباب، آفة التشتت ووهم الإنجازية ما هي إلا مشكلة مستحدثة بسبب وفرة الخير الـ احنا فيها دي، وفرة غير مسبوق لها أجل. كثرة المصادر، والبودكاستات، والكورسات الـ بقت في متناول اليد دي ما هي إلا خير، ولكن، عدم وضع منهاجية في تحديد الأولويات من الأهم ثم الأقل اهمية، ووضع الأهداف الواضحة، هو سبب كبير في توهان الواحد بين الخير دا كله. لأن زمان، قبل زمن السوشال، كانت الناس عندها اهداف محددة ليومها. كل واحد عارف دوره كويس، ومطلوب منه ايه. من الفجر للعشاء، ☝ بين شغل وغدا وراحة وصحاب والمدام والعيال والنوم. انما دلوقت انت بتسمع شوية بوتكاست هنا، لمقال حلو هناك، على شوية scroll بين هذا وذاك؛ مقطع بيديك شعور إنك فهمت، وبوست يخليك حاسس إنك اتعلمت، مقارنات بين مصصادر وموالااات تحسسك إنك بتخطط وبتنجز… لكن في الحقيقة، مفيش حاجة بتتحط على أرض الواقع. وقد قيل أن العلم يهتف بالعمل، فإن أجبته وإلا ارتحل. ومع تكرار الأيام بالشكل ده، بيبدأ عندك نوع من الإحباط، وإحساس إنك متأخر، وعديم الإنجاز. إحساس إنك كنت مشغول طول اليوم، ولكن بدون أي فائدة معنوية أو حسية. كله بسبب التيه المزيف الـ صنعته لنفسك دا. طب وليه من الأول بقا تعمل الفخ وتقع فيه؟؟؟ 🤔 تفكروا كويس في الكلام دا، وكل واحد أدرى بما، ومن اين يؤتى، لان تحديد المشاكل هو رأس الحل، إن شاء الله. وحتى لا نطيل الحديث على حضراتكم، خلينا نكتفي بهذا القدر، ونسيبكم تستمتعوا شوية بالإجازة شوية عشان ما نقفلهاش عليكم من اولها كدا. 😅 ونكمل حديث إن شاء الله في المقال الـ جاي؛ ودا هنبدا نشوف فيه حلول لمشكلة تضييع الوقت دي ونناقش فيها "طرق نعيد بيها ضبت الإجازة".

لا تنسونا من صالح دعائكم،

والسلام عليكم ورحمة الله وبركاته. 🤍 #إجازة_برا_الجدول